Siirte iwe tuguk che biitu

Siirte iwe menu alak

Siirte iwe tuguk che mi orit

Baorinikab Jehovah

Kalenjin

Kanetutikab Bibilia che bo Iman

NG’ALEK CHE KIGITES

She’ohl′ ak Hai′des ko Nee?

She’ohl′ ak Hai′des ko Nee?

ENG’ kutuswek che kigisiren Bibilia eng’ tai, ko boisiee Bibilia ng’olyotab Hebranik She’ohl′ ak ng’olyotab Yunanik Hai′des konyil koitosiek che sirei 70. Tiinyegei ng’alechuto ak meet. Boisiee Bibilia alak ng’olyot ‘kererit,’ ‘araraitab mat,’ ‘keringet’ anan ko ‘oldab che kigobek.’ Nga u noto, ko eng’ kutuswek che chang’, ko ma tinyei ng’alek che namegei komie ak che kigiboisiee eng’ kutitab Hebranik ak Yunanik. Tos iboru nee ng’alechuto iman? Ngegeer ortinwek che boisiee Bibilia ng’alechuto eng’ komoswek che teerchin.

Mwae Amdoindet 9:10 kole: “Mami boisiet, anan chobutik anan naet, anan ng’omnatet eng’ kererit [She’ohl′] ne iwendi.” Tos iboru nito kole She’ohl′ ko kererit ne toogu, ne imuchi kigitupchi chamanet? Achicha. Ngo ng’alale Bibilia agobo kererit, ko boisien ng’alek alak che teer che bo Hebranik ak Yunanik, ma boisien ng’alek She’ohl′ ak Hai′des. Kora ko ma iboru Bibilia kole “She’ohl′” ko komosta ole mi kererisiek che ketupchin bik, anan ko keringet agenge ne o ne kitupchin bik che chang’.—Taunet 49:30, 31.

Ara anyun, “She’ohl′” ko ano? Iboru Ng’oliotab Kamuktaindet kole “She’ohl′” anan “Hai′des” koboru kit ne sirei kererit ne kitupchin bik che chang’. Ko u, mwae Isaia 5:14 agobo She’ohl′ kole: “Kigobarait oldab che kigobek, ak kigoseng’eng’ ne ma aechin ak kiy.” Nga ki kolugui oldab che kigobek bik che chang’, ko tomo kobiyo, ta komachei che chang’. (Kalewenaik 30:15, 16) “Magoi biyo Oldab che Kigobek [She’ohl′],” ma u kererisiek che kitupchin bik rani che imuchi ketupchi bik tutigin kityo. (Kalewenaik 27:20) Magoi nyi She’ohl′ bik che kigobek. Ma tinyei ole bekyin. Ara anyun She’ohl′ anan ko Hai′des ko ma kiy ne mi wui. Ne kata u noto, She’ohl′ ko ole mi bik che chang’ che ruitos eng’ meet.

Kanetutietab Bibilia agobo ng’eetiet ko toretech kiguiye komie kit ne iboru “She’ohl′” ak “Hai′des.” Ngomwa Bibilia agobo She’ohl′ anan ko Hai′des, komwae agobo ng’alek che tiinyegei ak meet ne mi kamang’unetab ng’eetyet.* (Job 14:13; Boisionik 2:31; Ng’ang’utiet 20:13) Iboru Ng’olyotab Kamuktaindet kora kole, bik che mi She’ohl′ anan Hai′des ko ma che kiboisiechi Jehovah kityo, boto che ki ma boisiechi inendet. (Taunet 37:35; Tienwogikab Kalosunet 55:15) Ko u noto, koneti Bibilia kole tun “komi ng’eetyetab che bo imanda ak che ma bo imanda.”—Boisionik 24:15


*  Ne kata u noto, bik che tun ko ma king’eeti, ko mwaei Bibilia kole mi “Gehenna” ma mi she’ohl′ anan Hai′des. (Matayo 5:30; 10:28; 23:33) Gehenna ko u she’ohl′ ak Hai′des, ma kit ne toogu.

← Keer somanet ne ng’alale ng’alechu