Siirte iwe tuguk che biitu

Siirte iwe menu alak

Siirte iwe tuguk che mi orit

Baorinikab Jehovah

Kalenjin

Kanetutikab Bibilia che bo Iman

SOMANETAB TAMAN AK TISAB

Rikyi Kamuktaindet eng’ Saet

Rikyi Kamuktaindet eng’ Saet

Amu nee si ko nyolu kesa Kamuktaindet?

Magat keyai nee si kogaswech Kamuktaindet sautik?

Tos wolundoi ano Kamuktaindet sautikyok?

NGEGEER kecheik anan kogelik che mi kipsengwet, kegeere komining’ ng’ony kosiir tugul. Eng’ iman, keerei Jehovah, “ne kiyai kipsengwet ak ng’ony,” bororiosiekab bik ko u beek che kasaita konyil agenge eng’ teret. (Tienwogikab Kalosunet 115:15; Isaia 40:15) Nga u noto, ko mwae Bibilia kole: “Negite Jehovah icheget tugul che kuure inendet, tugul che kuure eng’ iman. Isuldochin icheget che iywei inendet kit ne machei ichek; kasei inendet rirekwak, ak soru.” (Tienwogikab Kalosunet 145:18, 19) Ibwat kit ne iboru nito! Negit eng’ achek Yaindet ne imuuktaat eng’ tugul ago kasech ngot keguur “inendet eng’ iman.” Kitinye kasarta ne kararan ne tia kerikyi Kamuktaindet!

2 Nga u noto, ngot kemache kogas Jehovah sautikyok, ko magat kesa eng’ oret ne iyani inendet. Ara tos kimuchi keyaite ano nito ngot ko ma kiguitosi kit ne ineti Bibilia agobo saet? Bo kamanut kenai kit ne mwae Sirutik agobo nito, amu toretech saet kerikyi Jehovah.

AMU NEE SI KO NYOLU KESA JEHOVAH?

3 Kit agenge ne yaech kesa Jehovah, ko amu makwech inendet keyai ko u noto. Mwawech Ng’olyondennyi kole: “Amogereri met eng’ kiy age tugul; ago eng’ kiy age tugul ko eng’ saet ak somet koboto kongoi, ingonaak somutikwok eng’ Jehovah. Ak ribei kalyetab Jehovah, ne siirei kaguiyet tugul, mugulelwekwok ak kabwatutikwok eng’ Kristo Jesu.” (Pilipik 4:6, 7) Eng’ iman, ko ma kimache kegeer ko u yo ma kimagen kiy tetutionito kigonech inendet Laitoriat ne Toror eng’ Ng’ony komugul!

Kwondo ne saei

Machei “Yaindetab kipsengwet ak ng’ony” kogas sautikyok

4 Kit ne bo aeng’ si ko nyolu kesa, ko ngesa Jehovah kasarta age tugul, ko oret noto ne igimiti choruandinnyo ak inendet. Ma ng’alaljingei choronok yo magen ge kiy kityo. Ne kata u noto, ko choronok che bo iman ko magen ge kiy, ago kimitu choruandinywa ye testai kong’ang’jigei kabwatutikwak, kaimutikwak ak ole kastoi age tugul. Eng’ kasarwek alak, ko u noto choruandinnyo ak Jehovah Kamuktaindet. Kigotoretin bukuini inetgei tuguk che ineti Bibilia agobo Jehovah, atebosiekyik ak magutikyik. Koinetgei ile, inendet ko chi ne omuchi oyai choruandit ak inendet. Konin saet kasarta imwachi Kwandang’ung’ ne bo kipsengwet kabwatuguk ak ing’ang’ji inendet muguleldang’ung’. Ye itestai iyai ko u noto, irikyini Jehovah.—Jakobo 4:8.

NEE KIT NE MAGAT KEYAI?

5 Tos kasei Jehovah sautik tugul? Ibwat kit ne kimwachi inendet bikab Israel che ki ingelelik eng’ betusiekab Isaia kolenji: “Ee, ye osa eng’ sautik che chang’, ko magase: nyiitat eunekwok korotik.” (Isaia 1:15) Ko u noto, komi tuguk che imuch keyae, che imuch koyai Kamuktaindet si magas sautikyok. Ara anyun, si kogas Kamuktaindet sautikyok, komi tuguk che magat keyai.

6 Kit ne bo kamanut, ko magat ketinye kayanet. (Mariko 11:24) Kisir Paulo kole: “Ngo mami kayanet ko ma imugaksei kibaibai inendet: amu inendet ne rikyin Jehovah konyoljin koyan kole mi inendet, ak kole igochin melekto icheget che cheng’ei inendet.” (Hebranik 11:6) Kele kitinye kayanet ne bo iman, koma kenai kityo kele mi Kamuktaindet ak ko kasei ak kowolu sautikyok. Kiboru kayanet eng’ boisionikyok. Magat kiboru komie kele kitinye kayanet eng’ ole kitebtoi betusiek tugul.—Jakobo 2:26.

7 Makyin Jehovah kora icheget che rikyin inendet eng’ saet, koyai ko u noto eng’ kamining’etab ge ak komwa ole kastoi iman eng’ mugulelwekwak. Tos ma kitinye amu nee si keng’alajin Jehovah eng’ kamining’etab ge? Ngonyor bik kasarta kong’alal ak laitoriat anan ko kandoindetab emet, ko yaei ko u noto, eng’ teegisto kongen torornatetab kandoindonoto. Nyolu ketinye teegisto ne tia ye kirikyini Jehovah! (Tienwogikab Kalosunet 138:6) Eng’ iman, inendet ko “Kamuktaindet ne bo Kamuktaet.” (Taunet 17:1) Ye kisae Kamuktaindet, ko magat keyai ko u noto eng’ oret ne kiboru kele kingen kit ne ki u eng’ tainnyi. Kamining’etab ge ne u noto, ko toretech kora kesa saet ne bunu mugulelwekyok, ak keistoegei sautik che kigetyini eng’ ng’alekab buch.—Matayo 6:7, 8.

8 Kit age ne magat keyai si kogas Kamuktaindet sautikyok, ko magat keyai tuguk che namegei ak sautikyok. Makwech Jehovah keyai tuguk che kimuchi kosubgei ak sautikyok. Ko u, ngot kesa kele, “Konech rani amitwogikyok,” ko magat keyai boisiet age tugul ne biitu eng’ kagiiletab ge. (Matayo 6:11; 2 Tesalonikek 3:10) Ngot kesom toretet kimukte nyalulnatetab borto, ko magat keribgei si keistoege ortinwek alak tugul che imuchi komutech ole mi yomset. (Kolosaik 3:5) Koboto tuguchuto magat keyai, ko mi teebutik agobo saet che magotin kewol.

KEWOL TEEBUTIK ALAK AGOBO SAET

9Ng’o ne nyolu kesa? Kiinet Jesu kasubikyik kosa “Kwandanyo ne bo kipsengwet.” (Matayo 6:9) Ara anyun, magat kesa Jehovah Kamuktaindet kityo. Nga u noto, komachei inendet kesa eng’ kainetab Jesu Kristo. Amu nee? Amu ko u ole kiginetitegei eng’ Somanetab 5, ko kigiyook Jesu konyo ng’ony koek katiaget si kobiit kotiachech eng’ tengek ak meet. (Johana 3:16; Romanik 5:12) Jesu ko Tisiindet ne O ak Kiruogindet ne kigilewen. (Johana 5:22; Hebranik 6:20) Ko u noto, komwawech Sirutik kesa kobun Jesu. Kimwa inendet kole: “A oret, ak iman, ak sobondo: manyonjin chi Kwanda, ama eng’ ane.” (Johana 14:6) Si kobiit kogas Kamuktaindet sautikyok, ko magat kesa Jehovah inegei kobun Werinnyi.

10Tos mi ole magat ketebte ye kisae? Achicha. Mami ole machei Jehovah kotebto eunekyok anan ko borwekyok ye kisae. Ineti Bibilia kole iyanat kesa eng’ atebto age tugul. Nito koboto ketebng’ony, king’uruch, kegutuny, ak ketonon. (1 Ateptab Betusiek 17:16; Neemia 8:6; Daniel 6:10; Mariko 11:25) Kit ne bo kamanut eng’ iman, ko ma ole kitebtoi si kobiit kogeerech bik alak, ne kata u noto, ko nyolu ketinye maget ne kararan ne bo muguleldo. Eng’ iman, yo kiyae boisionikyok betut age tugul anan ko ye kaginyoru kiy ne ka ma kibwotyini, kimuchi kesa eng’ muguleldo eng’ olda age tugul ole kimi. Kasei Jehovah sautik che u choto agot nga imuch magas bik che kemi tugul.—Neemia 2:1-6.

11Tos kisa agobo nee? Iaroru Bibilia kole: “Ngesom kiy age tugul ko u magenyi, kogasech [Jehovah].” (1 Johana 5:14) Ko u noto, kimuchi kesa agobo kiy age tugul ne namegei ak magetab Kamuktaindet. Tos magennyi kesa agobo tuguk che iimech? Ee, magennyi! Kesa Jehovah, komuchi ko kergeit ak yo ong’alale ak chorueng’ung’. Kimuchi keng’alalji Kamuktaindet komie, ‘kerong’ji mugulelwekyok.’ (Tienwogikab Kalosunet 62:8) Nyolu kesa kogonech tamirmiriet ne tilil, amu nito ko toretech keyai kit ne mie. (Luka 11:13) Kimuchi kesa kora kogonech kandoinatet ketil tilutik eng’ ng’omnatet ak kimnatet kemuitochi kaimutik. (Jakobo 1:5) Yo kagiyai tengek, ko nyolu kesom nyoetab kaat, si kobiit kenyoiywech kaat eng’ tiseiywotab Kristo. (Epesoek 1:3, 7) Eng’ iman, ko ma nyolu kemwa tuguk che tiinyech kityo eng’ saet. Nyolu kesa agobo bik alak, che u bikyok che bo gaa ak tupchosiekyok che kiboisiechini Kamuktaindet tugul.—Boisionik 12:5; Kolosaik 4:12.

Bik che saei eng’ kasarwek che teerchin

Kasei Jehovah sautiguk eng’ kasarta age tugul

12 Tuguk che tiinyegei ak Jehovah Kamuktaindet ko nyolu koek tuguk che tai che bo kamanut eng’ sautikyok. Eng’ iman, ketinye amu nee si kilosu Kamuktaindet eng’ muguleldo ak keweekyi kongoi eng’ mieindonyi tugul. (1 Ateptab Betusiek 29:10-13) Kigon Jesu saetab kaborunet, ne kigisir eng’ Matayo 6:9-13, ye kiinetech kesa kotililit kainetab Kamuktaindet, noto ko kesa kogeer bik kainennyi kotilil. Kit ne rubei, komwae Jesu kole kesa konyo Bounatetab Kamuktaindet ak koyaak magennyi eng’ ng’ony ko u ye kiyae eng’ kipsengwet. Ye kingo kagomwa Jesu agobo tuguchuto bo kamanut tiinyegei ak Jehovah komwa agobo tuguk che tiinyech. Ye kitaune Kamuktaindet koek ne bo kamanut eng’ sautikyok, kiboru kele ma kibwatigei kityo.

13Nyolu ko koegitu sautikyok ne tia? Ma mwae Bibilia agobo koindo ne magat ye kisae achegei anan ko ye kisae eng’ taitab bik. Imuchi konwagit saet ko u ne kisae kotomo keam amitwogik anan ko koit ko u saet ne kisae ye kiyatyini Jehovah mugulelwekyok. (1 Samuel 1:12, 15) Nga u noto, ko kigeer kong’ Jesu bik che kigeeregei ko u yo miach ichegei ye kingo sae sautik che koen koborugei eng’ taitab bik alak. (Luka 20:46, 47) Ma iboiboi Jehovah sautik che u choto. Kit ne bo kamanut ko magat kesa sautik che bunu mugulelwekyok. Ko u noto, ko koindab sautik che iyanotin komuchi koteerchin kosubgei ak tuguk che kimache ak kasarwek che teerchin.

14Nyolu kesa konyil che chang’ ne tia? Igimitech Bibilia kesa “betusiek tugul,” ‘kigiiljige saet,’ ak ‘kesa kotugul.’ (Luka 18:1; Romanik 12:12; 1 Tesalonikek 5:17) Igimitech Bibilia kesa betusiek tugul ak ketestai keweekyi Jehovah kongoi eng’ mieindanyi, ak ketienge inendet kondoiywech, kogaigaech ak kogimitech. Tos ma igaigaech kenai kele ma tet Jehovah ng’atutik agobo koindab sautikyok anan ko kasarwek che nyolu kesa inendet? Ngot ketinye kongoi agobo saet eng’ iman, kecheng’e kasarwek che chang’ kesa Kwandanyo ne bo kipsengwet.

15Tos amu nee si ko nyolu kemwa kele “Amen” eng’ kagesunetab saet? Ng’oliot “amen” koboru kole “iman” anan “ngoyaak ko u noto.” Iboru kaborunoikab sirutik kole, bo kamanut kemwa “Amen” eng’ sautik che kisae achege ak sautik che kisae kemi ak bik che chang’. (1 Ateptab Betusiek 16:36; Tienwogikab Kalosunet 41:13) Ye kimwa kele “Amen” eng’ kagesunetab sautik che kisae achege, kiboru kele bunu muguleldo sautikyok. Ye kimwa kele “Amen” eng’ mugulelwekyok anan eng’ tuget eng’ kagesunetab sautik che sae chito age, kiboru kele kagiyonjine ak kit ne kamwa chichoto eng’ saet.—1 Korintoek 14:16.

OLE WOLUNDOI KAMUKTAINDET SAUTIKYOK

16 Tos wolu Jehovah sautik iman? Ee, wolu! Kitinye amu nee ne kim si kimang’u kele “inendet” ne kasei saet, ko wolu sautik che bunu muguleldo che sae bik che chang’. (Tienwogikab Kalosunet 65:2) Imuchi kowol Jehovah sautikyok eng’ ortinwek che teerchin.

17 Boisiee Jehovah malaikaisiekyik ak kiboitinikyik che mi ng’ony kowol sautik. (Hebranik 1:13, 14) Kigobiit kasarwek che chang’ che sae chito Kamuktaindet toretet si koguiyo Bibilia, ago ma tianit ko rutochi inendet agenge eng’ kiboitinikab Jehovah. Nito koboru kole, indochin malaikaisiek boisiet ne kiamdoi logoiywek che bo Bounatet. (Ng’ang’utiet 14:6) Si kobiit kowol sautikyok che kisae yo kemache kiy, komuchi koyai Jehovah Kristianindet age konyo kotoretech.—Kalewenaik 12:25; Jakobo 2:16.

18 Boisiee kora Jehovah Kamuktaindet tamirmiriennyi ne tilil ak Ng’olyondennyi Bibilia, si kowol sautikab kiboitinikyik. Imuchi koboisiee tamirmiriennyi kondoiywech ak kogonech kimnatet, si kobiit kowol sautikyok che kisae kesome toretet si kemuitochi tiemutik. (2 Korintoek 4:7) Eng’ kasarwek che chang’ ko bunu Bibilia walutietab sautikyok che kisae kesome oret ne nyolu kisub, eng’ Bibilia ko toretech Jehovah kelewen tuguk che nyolu keyai eng’ ng’omnatet. Kimuchi kenyoru sirutik che toretech yo kinetigei Bibilia ak ye kisomani bukuisiekab Kristianik che u bukuini. Kimuchi kibwatwech sirutik eng’ tuiyosiekab Kristianik che nyolu kotigonech, anan ko eng’ ng’alek che imuch komwa boiyotab tuiyet ne ibwati chametab ge nenyo.—Galatiek 6:1.

Gap chi che toreti chorwet ne yos

Imuchi koyai Jehovah Kristianindet kotoretech, si kobiit kowol sautikyok

19 Ngot kegeer ko u yo ka igage Jehovah kowol sautikyok, ko melen amu ma imuchi kowol. Ne kata u noto, ko nyolu kenai kele wolu Jehovah sautik kosubgei ak magennyi ak eng’ kasartanyi. Ingen inendet magutikyok ak ole yaitoi kosulda magutichoto kosiir ole kingende. Eng’ kasarwek che chang’, kometech inendet ketestai ‘kesom, kecheng’ ak kigongony.’ (Luka 11:5-10) Ngetestai kesa eng’ muitaet ko u noto, kiborjini Kamuktaindet magennyo ne o ak kayanennyo ne bo iman. Kora, komuchi kowol Jehovah sautikyok eng’ oret ne ma toogu. Ko u, imuchi kowol saennyo ne kisae agobo tiemutiet, imuch maisto tiemutionoto, ne kata u noto, kogonech kimnatet kemuitochi.—Pilipik 4:13.

20 Kimwae kongoi ne tia amu rikyin Yaindetab ng’ony komugul icheget che kuure inendet eng’ oret ne nyolu eng’ saet! (Tienwogikab Kalosunet 145:18) Ongeboisie komie kasarito bo saet ne kigo konech Jehovah. Ngot keyai ko u noto, keboiboichini kamang’unet ne bo kerikyi Jehovah, ne kasei sautik.

KIT NE INETI BIBILIA

  • Ngesa Jehovah betusiek tugul kotoretech kerikyi inendet.—Jakobo 4:8.
  • Si kobiit kogas Kamuktaindet sautikyok, ko magat kesa eng’ kayanet, kimining’itngei ak kesa kobun muguleldo.—Mariko 11:24.
  • Magat kesa Jehovah kobun Werinnyi.—Matayo 6:9; Johana 14:6.
  • Boisiee Jehovah, “ne kasei saet,” malaikaisiekyik, kiboitinikyik che mi ng’ony, tamirmiriennyi ne tilil, ak Ng’olyondenyi kowol sautik.—Tienwogikab Kalosunet 65:2.

Teebutik che Kinetegei

1, 2. Amu nee si ko nyolu kegeer saet ko kasarta ne kararan, ago amu nee si ko magat kenai kit ne ineti Bibilia agobo nito?

3. Nee kit agenge ne bo kamanut ne yaech kesa Jehovah?

4. Tos igimiti eng’ or nee saet chorwandinnyo ak Jehovah?

5. Nee kit ne iboru kole ma kasei Jehovah sautik tugul?

6. Si kobiit kogas Kamuktaindet sautikyok, ko nee kit ne bo kamanut ne magat keyai, ago kiyaitoi ano nito?

7. (a) Amu nee si konyolu ketinye teegisto ye keng’alajini Jehovah eng’ saet? (b) Kiborundoi ano kamining’etab ge ak ole kigastoi iman eng’ mugulelwekyok ye kisae Kamuktaindet?

8. Tos kimuchi keyai kosubgei ak sautiyok eng’ or nee?

9. Ng’o ne nyolu kesa, ago kobun ng’o?

10. Amu nee si ko mami ole magat ketebte yo kisae?

11. Nee tuguk che tiinyech che nyolu kesa?

12. Kimuchi kinde tai tuguk che tiinyegei ak Kwandanyo ne bo kipsengwet eng’ sautikyok koek tuguk che bo kamanut eng’ or nee?

13. Nee kit ne iboru Bibilia agobo koindab sautik che iyanotin?

14. Tos iboru nee Bibilia ye igimitech kesa “betusiek tugul,” ago nito kogaigaech eng’ or nee?

15. Amu nee si ko nyolu kemwa kele “Amen” eng’ kagesunetab sautik che kisae achege ak sautik che sae chito age?

16. Nee kamang’unet ne kimuchi kenyoru kosubgei ak saet?

17. Amu nee si kimuchi kemwa kele boisie Kamuktaindet malaikaisiekyik ak kiboitinikyik che mi ng’ony kowol sautikyok?

18. Boisie Jehovah tamirmiriennyi ne tilil ak Ng’olyondennyi kowol sautikab kiboitinikyik eng’ or nee?

19. Nee kit ne nyolu kibwat ngot kegeer ko u yo ma kiwolu sautikyok?

20. Amu nee si ko nyolu keboisiee kasarta ne kararan ne bo saet?