Siirte iwe tuguk che biitu

Siirte iwe menu alak

Siirte iwe tuguk che mi orit

Baorinikab Jehovah

Kalenjin

Kanetutikab Bibilia che bo Iman

SOMANETAB TAMAN AK LO

Oot Kamuktiandet eng’ Oret ne bo Iman

Oot Kamuktiandet eng’ Oret ne bo Iman

Ineti nee Bibilia agobo keboisiee kanamonik ak keoot kugoisiek che kigobek?

Tos keertoi ano Kristianik igorwekab dinisiek?

Tos iarorjinde ano bik alak agobo kayaneng’ung’ eng’ oret ne ma imuchi konerekso?

NDO inae ile konyo konde chito sumu ainet ole irame beek, ago amu noto komuchi kobar bik beek che bunu ainanoto. Tos iyai nee? Ne matiny ko ma irame beechoto, icheng’e ainet age. Nga u noto, imuchi iteebege kora ile, ‘Tos kogochuton sumu eng’ or age tugul?’

2 Yaaksei kit ne u nito kosubgei ak dinit ne bo lembech. Ineti Bibilia kole, ma tilil dinitab lembech amu tinyei kanetutik ak atebosiek che ma tililen. (2 Korintoek 6:17) Noto amu nee si ko bo kamanut imong’une “Babulon ne o” ne noto ko dinisiek che kirindoi Kamuktaindet eng’ ng’ony komugul. (Ng’ang’utiet 18:2, 4) Tos kiimong’u eng’ dinisiechoto bo lembech? Kiweegun kongoi, ngot ko kiiyai ko u noto. Nga u noto, ko magat iyai kit ne siirei imong’u kityo eng’ dinit ne bo lembech. Yeitio, ko magat iteebegei ko u ni, ‘Tos mi kiy ne tiinyegei ak dinitab lembech ne ng’etunot eng’ ane?’ Keer kaborunoichu.

KANAMONIK AK KEOOT KUGOISIEK CHE KIGOBEK

Ortinwekab ootet che kiboisie eng’ ng’ony komugul

3 Eng’ kenyisiek che chang’, ko mitei bik alak che kigo boisiee kanamonik eng’ gorikwak. Tos itinye kanamonik eng’ gong’ung’? Ngot ko u noto, imuchi igeer ko u yo ma nyolu kesa Kamuktaindet koma kiboisie kiy ne toogu ne u kanamwet. Imuchi ichame agot mising’ alak eng’ tuguchoto. Nga u noto, ko Kamuktaindet inendet ne mwae ole nyolundoi keoot, ago ineti Bibilia kole ma machei inendet keboisie kanamonik. (Komong’u 20:4, 5; Tienwogikab Kalosunet 115:4-8; Isaia 42:8; 1 Johana 5:21) Ara anyun, imuchi ioot Kamuktaindet eng’ oret ne bo iman ye ing’em kiy age tugul ne itinye ne tiinyegei ak ootetab lembech. Eng’ iman, ko nyolu igeer tuguchoto ko u ole keertoi Jehovah, amu “wechei” inendet tuguchoto.—Ne Kibwate Ng’atutik 27:15.

4 Keoot kugoisiek che kigobek ko kit ne yaei dinisiekab lembech. Kingo tomo konetgei Bibilia bik alak, ko kiiyani kole soptos che kigobek eng’ oldab tamirmirik ago imuchi kotoret anan kong’em bik che soptos. Imuchi kiigiiligei ibaibai kugoisieguk che kigobek. Nga u noto, ko u ole kiinetitegei eng’ Somanetab 6 eng’ bukuini, ko ma ingen kiy ago ma soptos eng’ wui che kigobek. Ara anyun, kotiem chito kong’alal ak che kigobek ko buch. Logoiywek alak tugul che u yo bunu che kigobek, ko eng’ iman kobunu oik. Ko u noto, ko kietee Jehovah Israelik kotiem kong’alal ak bik che kigobek anan koyai kiy age tugul ne tiinyegei ak keng’alal ak oik.—Ne Kibwate Ng’atutik 18:10-2.

5 Ngot ko kiiboisie kanamonik anan ko kicham ioote kugoisiek che kigobek, ko tos imuchi iyai nee? Soman ak ibwat agobo logoiywekab Bibilia che iborun ole keertoi Kamuktaindet tuguchu. Saa Jehovah betusiek tugul agobo mageng’ung’ ne bo ioot inendet eng’ oret ne bo iman, ak isom kotoretin inendet ibwat ko u ole ibwotitoi.—Isaia 55:9.

KIMA KOYAE KRISTIANIK CHE KI BO TAI IGORTAB KRISMAS

6 Imuchi kong’em dinitab lembech ole ootitoi chito, amu tiinyegei ak igorwek che naatin. Eng’ kaborunet, ibwat agobo Krismas. Iyani bik kole betutab Krismas ko kabwatet ne bo sigetab Jesu Kristo, ago negit dinit age tugul ne kuuregei bo Kristianik koyae igortab Krismas. Nga u noto, ko ma mi kiy ne iboru kole kiyai igorito alamalaikab Jesu. Mwae bukuit ne keguure Sacred Origins of Profound Things kole: “Kingo kagobata kenyisiek 200 kong’eete kingesich Kristo, ko ma mi chi ne kiingen tarigit ne kigisiche inendet, ago bik tutigin kityo che kimage kiy tariginoto.”

7 Agot ndo kiingen alamalaikab Jesu tarigit ne kigisiche inendet, ko ki ma koyae igorto kobwat betunoto. Amu nee? Amu mwae bukuit ne keguure The World Book Encyclopedia kole, Kristianik che ki bo tai ko “kigeerei igortab betut ne kigisiche chito ko bitonwekab bik che kieesioi Kamuktaindet.” Ng’alalen Bibilia igorwek che bo betutab sigetab bik aeng’ kityo, bik che ki ma kootei Jehovah. (Taunet 40:20; Mariko 6:21) Kiyaei bik kora igorwek che bo betutab siget si kobiit koboor teegisto eng’ cheptalelisiekab bik che kieesioi Kamuktaindet. Ko u, eng’ arawetab Mut tarigit 24, ko kitinye Romanik igortab betut ne kigisiche cheptalelit ne kigiguure Diana. Eng’ betut ne rubei, ko kiibwati sigetab cheptalelinywa-asista, ne kigiguure Apollo. Ko u noto, igorwekab betutab siget, ko kitiinyegei ak bik che kieesioi Kamuktaindet ma Kristianik.

8 Mi kit age kora ne kiyae Kristianik che ki bo tai si ma isub igortab betut ne kigisiche Jesu. Kiingen alamalaikab Jesu kole, igorwek che bo betutab siget ko kitiinyegei ak kaiyweetab tamirmirik che yaach. Ko u, kiiyani Yunanik ak Romanik che ki bo keny kole, kinyonei tamirmiriet kesichei chito age tugul ak koriib chichoto eng’ sobennyi tugul. Mwae bukuit ne keguure The Lore of Birthdays kole: “Kitinyei tamirmirionito kimnatetab oik ne u ne bo cheptalelit ne betunnyi ne bo siget ko kergei ak ne bo chichoto.” Eng’ iman, ko magoi boiboichi Jehovah igorto age tugul ne inaamdoi Jesu kaiyweetab tamirmirik che yaach. (Isaia 65:11, 12) Ara anyun, amu nee si koyae bik che chang’ igortab Krismas?

OLE KITAUNENGEI KRISMAS

9 Kingo kagobata kenyisiek che chang’ kong’eete komi Jesu ng’ony, konaam bik kobwat betutab siget ne bo Jesu tarigit 25 arawetab Taman ak Aeng’. Nga u noto, ko kima ko noto tarigit ne kigisiche Jesu.* Ara anyun, ki amu nee si kelewen tarigit 25 arawetab Taman ak Aeng’? Bik alak che kinyo koguuregei Kristianik, ko “kigasei ta namgei tariginoto ak tarigitab igorto ne bo Romanik, igorto ne kitau bik che kieesioi Kamuktaindet ago kiisubi Romanik si kobiit kobwat ‘betut ne kigisichei asista ne kigim.’” (The New Encyclopædia Britannica) Eng’ betusiekab kaititiet ye kingo ma kim asista, ko kiyae igorwek bik che kieesioi Kamuktaindet si kobiit koyai koweek asista ne konu lalang’iet ak lapkeiyet. Kigibwati kele, tarigit 25 arawetab Taman ak Aeng’ ko ki betut ne kiinaami koweeksei asisata. Amu kitiemei kandoikab dinisiek kowelel bik che ki eesioi Kamuktaindet, ko kiinaam koyai icheget igorito ak kotiem koyai kotook ko u yo bo “Kristianik” igorito.#

10 Ki kenai kele kitaunegei Krismas bik che ki eesioi Kamuktaindet. Amu ma namegei ak sirutik ole kitaundogei Krismas, ko kigieete bik eng’ kenyisiekab 1600 koyai igorito eng’ emotinwekab England ak emotinwek alak che kibou emetab Amerika. Agot chi age tugul ne kima wo boisiet eng’ betutab Krismas, ko kigiibe kakwautiet kegeer kit ne kagiita. Nga u noto, ye ma tianit, koweek bitonwechoto bo keny koboto alak che ki lelach. Kiek anyun Krismas igorto ne bo kamanut kogeny, ago ta ko u noto rani eng’ emotinwek che chang’. Ara anyun, amu tiinyegei Krismas ak dinitab lembech, koma isubi bik igorito che machei kobaibai Kamuktaindet, ma isubi kora igorwek alak tugul che kitaunegei ootetab bik che ki eesioi Kamuktaindet.%

TOS BO KAMANUT IMAN OLE KITAUNEGEI IGORWEK?

Tos iam tamtam ne kenemunen ole kilakyin tagatagek?

Tamtam ne mitei ole kilakyin tagatagek

11 Iyani bik alak kole, igorwek che u Krismas, ko kitau bik che ki eesioi Kamuktaindet, nga u noto, kobwati kole ma ya kisub igorwechoto. Eng’ iman, ko ma ibwati bik che chang’ agobo dinitab lembech yo yaei igorwek. Igochin igorwechuto gab chi kasarta ne tuiytos tugul. Tos igase ko u nito ak inye? Ngot ko u noto, ko chamnyet ne itinyee bikab gaa ne yain igeer ko ui ioot Kamuktaindet ne bo iman, ma amu ichame dinitab lembech. Nai ile machei Jehovah, ne kitau gab chi, isich kosyinet ne kararan ak bik che otupche. (Epesoek 3:14, 15) Nga u noto, imuchi igimit chamnyeng’ung’ ak tupchosieguk eng’ oret ne iyani Kamuktaindet. Kosubgei ak kit ne nyolu kobunji kamanut mising’ eng’ achek, ko kisir Paulo kole: “Si onai noto taachaksei eng’ Kiptaiyat.”—Epesoek 5:10.

12 Imuchi ibwati ile, ole kitaunegei igorwek ko ma kit ne yae bik kosub igorwechoto rani. Tos bo kamanut iman ole kitaunegei igorwechoto? Ee! Eng’ kaborunet: Ndo igeere tamtam (swiit) eng’ ole kilakyin takatagaek. Tos inemu tamtam noto ak iam? Achicha! Ma tilil tamtam noto. Ko u tamtam noto, komuch kotook igorwek ko kororon, nga u noto, ko kitaunegei komoswek che ma tililen. Si kobiit kisub ootet ne bo iman, ko nyolu ketinye kabwatutik che u che bo maotiot Isaia ne kimwachi bik che ootei Kamuktaindet eng’ oret ne bo iman kole: “Amat otwa kiy ne ma tilil.”—Isaia 52:11.

BOISIEE NG’OMNATET YE OMI AK BIK ALAK

13 Imuchi kobiit kaimutik ye ieesie isub igorwek. Ko u, imuch ko kwong’io bik che oyae boisiet tugul ye keer kole ma iyae boisiet age tugul ne kiyae eng’ betusiekab igorwek. Iyae nee ngot kegonin konunotiot ne bo Krismas? Tos ya itaach konunotiondonoto? Ara ngot ko ma tinyei kayanet ne u neng’ung’ manong’otiot anan ko osotiondeng’ung? Tos iyai nee si magas lagoguk ko u yo kagieete kiy ne igochin boiboiyet amu ma isub igorwek?

14 Magat keboisiee ng’omnatet si kenai kit ne nyolu keyai eng’ igorto age tugul. Ngot kigatin eng’ kagotiet ne boisiee bik eng’ betusiekab igorwechuto, imuchi iweekyi kongoi kityo chichoto magun chametab ge. Ara anyun, tos nyolu iyai nee ngot omi ak chito ne igeere betut age tugul anan ko ne oboisiei tuwai? Eng’ kasarwek che u chuto, imuchi igas ta kiarorji kosiir iweekyi kongoi kityo. Eng’ kasarwek tugul, ko magat iboisiee ng’omnatet. Mwae Bibilia kole: “Ingoteb ng’alekwok eng’ mieindo kotugul, koanyinyogis eng’ munyuk, si kobiit onai ole kanyol owoljinde chi age tugul.” (Kolosaik 4:6) Ribgei si kobiit iboru teegisto eng’ bik tugul. Nyolu iboisiee ng’omnatet ye iaroru kayaneng’ung’. Iaroru komie ile, ma iesioi konunoik ak tuiyosiek, ago ne kata u noto, iboiboichini iyai boisionichuto eng’ kasarwek alak che teer.

15 Ara ngot komache chito kogonin konunotiot? Imuch iyan anan ko meyan konunotiondonito kosubgei ak kit ne yae inendet kogonin. Imuch komwa chito ne konin konunotiot kole: “Angen ale meyae igorito. Nga u noto, amache agonin konunotiondoni.” Imuchi igeer ile, ye itaach konunotiondonito eng’ kasarata, ko ma kergei ak iyai igorto. Eng’ iman, ngot ko chito ne konin konunotiot ko ma ingen kayaneng’ung’, imuchi imwachi ilenji meyae igorwek che u choto. Toretin nito si iarorji kit ne yain itaach konunoik, ago ma igoitoi konunoik eng’ kasarwek che u choto. Kora, ko ng’omnot ieesie konunotiot ngot ko chito ne konin komache koborun kole, ma i kim eng’ kayaneng’ung’ anan imuchi ibagach si kobiit inyoru konunoik.

TOS IYAI NEE NGOT KO MA TINYEI KAYANET NE U NENG’UNG’ BIKAB GAA?

16 Iyae nee ngot ko motinye kayanet agenge ak bikab gaa? Kora, ko magat iboisiee ng’omnatet. Ma bo kiy ieesie bitet anan igorto age tugul ne isubi bikab gaa. Ne kata u noto, konyit kayanennywa, ko u yo imache kogonyit neng’ung’. (Matayo 7:12) Istoege boisiet age tugul ne imuch koyain ichut igorwechuto. Kora, ko nyolu igeer komie tuguk alak che ma tiinyegei ak chutetab igorwechoto. Eng’ iman, ko nyolu itebi eng’ oret ne ma iruogun kiy age tugul kole keyai kiy ne ya.—1 Timoteo 1:18, 19.

17 Imuchi iyai nee si mageer lagoguk kole keete kiy ne kararan amu ma iyai igorwek che ma namegei ak sirutik? Tiengei kit ne oyae eng’ betusiek alak che bo kenyit. Itabani sigik alak kasarwek eng’ kenyit si kobiit kogochi lagokwak konunoik. Agenge eng’ konunoik che bo kamanut che imuchi igochi lagoguk, ko itaban kasarta otebi tugul ak iboorji chamnyet.

OOT KAMUKTAINDET ENG’ ORET NE BO IMAN

Gap chi che ootei Kamuktaindet

Keoot Kamuktaindet eng’ oret ne bo iman koibu boiboiyet ne bo iman

18 Si kobiit ibaibai Kamuktaindet, ko magat ieesie dinit ne bo lembech ak isub dinit ne bo iman. Kisub dinit ne bo iman ko keyai nee? Mwae Bibilia kole: “Ak ongibwatge achege eng’ achege kigimitge eng’ chamnyet ak boisiosiek che miach; ama kibagaktoi kituiyege achege eng’ achege, ko u biitetab bik alak, ago kiteechinige; ak ko u noto kosiir, ko u ye ogeere ole rigu betut.” (Hebranik 10:24, 25) Konin boroindo ne kararan tuiyosiekab Kristianik ioot Kamuktaindet eng’ oret ne iyani inendet. (Tienwogikab Kalosunet 22:22; 122:1) Eng’ tuiyosiek che u choto, ko mitei ‘kagaigaetab ge’ eng’ Kristianik che iyanotin.—Romanik 1:12.

19 Oret age ne imuchi ioot Kamuktaindet eng’ oret ne bo iman, ko imwachi bik alak agobo tuguk che kionetgei ak Baorinikab Jehovah eng’ Bibilia. Eng’ iman, ko “tigendos ak korirtos” bik che chang’ agobo yaitiet ne yaaksei rani eng’ ng’ony. (Esekiel 9:4) Imuchi ingen bik alak che tigendos ak korirtos. Amu nee si memwachi icheget agobo kamang’unetab Bibilia ne nyonei? Ye itestai obendate ak Kristianik che bo iman ak ing’alalji bik alak agobo imandab Bibilia ne bo kwong’ut ne kiinetgei, igeere ile maget age tugul ne imuch kota itinye eng’ muguleldang’ung’ ne bo bitonwek che bo dinitab lembech, kotesetai koistogei. Nai ile iboiboitu ne bo kwong’ut ak inyoru kaberuret ne o ngot ioot Kamuktaindet eng’ oret ne bo iman.—Malaki 3:10.

KIT NE INETI BIBILIA

  • Ma magat keboisiee kanamonik anan keoot kugoisiek che kigobek ye kioote Kamuktaindet eng’ oret ne bo iman.—Komong’u 20:4, 5; Ne Kibwate Ng’atutik 18:10-12.
  • Ma nyolu keyai igorwek che kitau bik che ki eesioi Kamuktaindet.—Epesoek 5:10.
  • Nyolu koboisiee ng’omnatet Kristianikab iman ye iarorjin bik alak kayanennywa.—Kolosaik 4:6.

*  Keer Ng’alek che Kigites.

#  Saturnalia, nito ko igortab cheptalelit ne kigiguure Saturnalia, ko kit age ne kiyai kelewen tarigit 25 arawetab Taman ak Aeng’. Kiyae Romanik igorito si kobiit kogonyit cheptalelinnywa ne ki bo kabatisiet, kigiyae igorito kong’eete tarigit 17 agoi tarigit 24 arawetab Taman ak Aeng’. Kigiamisiei ak keeisei, ak kigochingei konunoik ago ki o boiboiyet eng’ betunoto bo Saturnalia.

%  Eng’ logoiywek agobo ole keertoi Kristianik che bo iman igorwek alak che naatin, igeer Ng’alek che Kigites.


Teebutik che Kinetegei

1, 2. Nee teebutiet ne magat iteebengei ye kaimete dinitab lembech, ago amu nee si ko bo kamanut nito?

3. (a) Nee kit ne mwae Bibilia agobo keboisiee kanamonik, ago amu nee si ko imuchi kouuit eng’ bik alak koyan ole keertoi Kamuktaindet nito? (b) Nee kit ne nyolu iite tuguk alak tugul che itinye che tiinyegei ak dinitab lembech?

4. (a) Tos kinaite ano kele buch keoot kugoisiek che kigobek? (b) Amu nee si kietee Jehovah bikyik koyai kiy age tugul ne tiinyegei ak oik?

5. Imuchi iyai nee ngot ko kicham iboisiee kanamonik anan ko kicham ioote kugoisiek che kigobek?

6, 7. (a) Iyani bik kole betutab Krismas ko kabwatetab nee, ago tos kiyae igortab Krismas kasubikab Jesu che ki bo tai? (b) Kitiinyegei ak nee igorwekab betutab siget eng’ kasartab alamalaikab Jesu?

8. Tiinyegei igorwek che bo betutab siget ak kaiyweet ne kiywei tamirmirik eng’ or nee?

9. Kigilewendo ano tarigit 25 arawetab Taman ak aeng’ koek betutab igorto ne bo betut ne kigisiche Jesu?

10. Amu nee si ki ma yai igortab Krismas bik alak eng’ betusiek che kigosiirto?

11. Amu nee si koyae bik alak igorwek, nga u noto ko nee kit ne magat kobunji kamanut mising’ eng’ achek?

12. Amu nee si ko nyolu keistoengei bitonwek ak igorwek che tinye taunet ne ma tilil? Konu kaborunet.

13. Tos nee kaimutik che imuch kobiit ye ieesie iyai igorwek?

14, 15. Imuchi iyai nee, ngot kogatin chito eng’ kagotiet ne bo igorwek anan ngot komache kogonin konunotiot?

16. Tos iboisiee ng’omnatet eng’or nee eng’ tuguk che tiinyegei ak igorwek?

17. Imuchi iyai nee si itoret lagoguk si mageer kole keete kiy ne kararan ye keer bik alak che yae igorwechoto?

18. Ngot iwe tuiyosiekab Kristianik che bo iman, ko toretin eng’ or nee nito ioot Kamuktaindet eng’ oret ne bo iman?

19. Amu nee si ko bo kamanut imwachi bik alak agobo tuguk che kiinetgei eng’ Bibilia?