Siirte iwe tuguk che biitu

Siirte iwe menu alak

Siirte iwe tuguk che mi orit

Baorinikab Jehovah

Kalenjin

Kanetutikab Bibilia che bo Iman

NG’ALEK CHE KIGITES

Ole Kinaitoi “Babulon Ne O”

Ole Kinaitoi “Babulon Ne O”

TINYEI bukuitab Ng’ang’utiet arorutik che ma magat kiguiyo ko u ole kigisirta. (Ng’ang’utiet 1:1) Ko u, mwae agobo kwondo ne kigisirchi togennyi kainet ne mwae kole, “BABULON NE O.” Kimwae kele tebee kwonyito, “tuiyosiek ak bororiosiek.” (Ng’ang’utiet 17:1, 5, 15) Amu ma mi kwony ne imuchi kotebee tuiyosiek ak bororiosiek, koboru kole kwonyito ko kalewenet. Ara anyun, tos chepkugoniondonito bo kalewenet koboru nee?

Kuure Ng’ang’utiet 17:18 kwonyoto bo kalewenet “nganaset ne o, ne bou laitorinikab ng’ony.” Ng’olyot, nganaset, ko kibagengeitab bik che chang’. Amu ‘nganasanito o’ ko “bou laitorinikab ng’ony,” ko ne matiny kwondo ne kiguure Babulon ne O, ko kibagengeit ne tinyei kimnatet eng’ ng’ony komugul. Kibagengenito ko tiinyegei ak dinit, ma bo bolatosiek anan mung’aret. Keer anyun ng’alek che tiinyegei ak kwonyito eng’ Ng’ang’utiet, che yaech kemwa ko u nito.

Kwondo ne kiguure Babulon ne O ko ma kiy ne tiinyegei ak bolatosiek, amu mwaei Ng’olyotab Kamuktaindet kole ‘yaei sokset laitorinikab ng’ony,’ anan kibagengeisiek che bo bolatosiekab ng’onyuni ak inendet. Soksetab kwonyito ko kosyinet ne kigoyai inendet ak laitorinikab ng’onyuni, ago amu nito, keguure inendet “chepkugoniot ne o.”—Ng’ang’utiet 17:1, 2; Jakobo 4:4.

Babulon ne O, ko ma kiy ne tiinyegei ak mung’aret amu tun ko rirtos “chemung’arainikab ng’ony,” che choto ko kibagengeisiekab mung’aret betut ne king’emei inendet. Eng’ iman, komwae Bibilia kole, mi “ole loo” laitorinik ak chemung’arainik, ko keerei Babulon ne O. (Ng’ang’utiet 18:3, 9, 10, 15-17) Ko u noto, ko bo iman kemwa kele Babulon ne O ko tiinyegei ak dinit, ma kiy ne tiinyegei ak bolatosiek anan ko mung’aret.

Ole kinaitoi Babulon ne O kora kele kiy ne tiinyegei ak dinit, ko ng’olyot ne mwae Bibilia kole iberberi bororiosiek tugul eng’ ‘banisiennyi [“boisiet ne tiinyege ak oik,” NW].’ (Ng’ang’utiet 18:23) Amu boisionik tugul che tiinyegei ak oik eng’ dinisiek ko bunu kimnatetab oik, ko ma kwong’ut ngo kuure Bibilia Babulon ne O “ole menyei oik.” (Ng’ang’utiet 18:2; Ne Kibwate Ng’atutik 18:10-12) Kimwae kora kele kigo kirinda Babulon ne O “maotik” ak “bik che tililen.” (Ng’ang’utiet 18:24) Eng’ iman, ko sasei Babulon ne O dinitab iman ago amu noto, konyalili ak kobarei “baorinikab Jesu.” (Ng’ang’utiet 17:6) Ko u noto, kwonyi kiguure Babulon ne O ko dinisiek tugul che bo lembech che mi ng’onyuni, chuto koboto dinisiek tugul che kirindoi Jehovah Kamuktaindet.

← Keer somanet ne ng’alale ng’alechu