Siirte iwe tuguk che biitu

Siirte iwe menu alak

Siirte iwe tuguk che mi orit

Baorinikab Jehovah

Kalenjin

Kanetutikab Bibilia che bo Iman

SOMANETAB TAMAN AK SOMOK

Ole Keertoi Kamuktaindet Sobondo

Ole Keertoi Kamuktaindet Sobondo

Tos keertoi ano Kamuktaindet sobondo?

Tos keertoi ano Kamuktaindet kebar lakwet ne mi moet?

Tos kiborunde ano kele kigonyiti sobondo?

KIMWA maotiot ne keguure Jeremia kole: “Jehovah ko Kamuktaindet ne bo iman; inendet ko Kamuktaindet ne sobei.” (Jeremia 10:10) Kora, Jehovah Kamuktaindet ko Yaindetab tuguk tugul che soptos. Kimwachi malaikaisiek Jehovah kolenji: “Kiitou iyai tuguk tugul, ak kibiit amu mageng’ung’, ak kigiyai.” (Ng’ang’utiet 4:11) Eng’ tiendo ne kilosune Kamuktaindet, ko kimwa Laitoriat ne keguure Daudi kole: “Amu mi oldang’ung’ kondab beekab sobon.” (Tienwogikab Kalosunet 36:9) Ko u noto, sobondo ko konunotiot ne bunu Kamuktaindet.

2 Tesetai koriibwech Jehovah sobonwekyok kora. (Boisionik 17:28) Konech Jehovah amitwogik che kiame, beek che kiee, koristo ne koneech kibus, ak ng’onyut ne kimenye. (Boisionik 14:15-17) Kigoyai Jehovah tuguchuto eng’ oret ne yaei keboibochi sobet. Nga u noto, ko si kobiit keboiboichi sobet, ko nyolu kinetgei agobo ng’atutikab Kamuktaindet ak kegas it ng’atutichoto.—Isaia 48:17, 18.

KEGONYIT SOBONDO

3 Makwech Kamuktaindet kegonyit sobennyo ak ne bo bik alak. Ko u keny eng’ betusiekab Adam ak Awa, ko kinerekyi werinnywa ne keguure Kaen tupchennyi ne kiguure Abil. Kiitechi Jehovah Kaen kole imuchi kondochi neregekyik koyai tengek. Magas it Kaen kateeunanoto. King’eetyi “Kaen ng’etab kam Abil ak kobar.” (Taunet 4:3-8) Kibir Jehovah Kaen amu kibar ne tupcho.—Taunet 4:9-11.

4 Kingobata kenyisiek 2,400, kogochi Jehovah lagokab Israel ng’atutik che ki magat kotoret icheget koboisiechi Kamuktaindet eng’ oret ne nyolu. Amu kigon Jehovah ng’atutichoto kobun maotiot ne kiguuren Musa, eng’ kasarwek alak keguuren Ng’atutikab Musa. Agenge eng’ Ng’atutikab Musa ko mwaei kole: “Amerumisie.” (Ne Kibwate Ng’atutik 5:17) Kiiborchi nito lagokab Israel kole, keerei Kamuktaindet sobondab chito ko bo kamanut ago nyolu kogeer bik ak ichek sobonwekab bik alak ko bo kamanut.

5 Ara anyun, ang’ lakwet ne tomo kesich? Kosubgei ak Ng’atutikab Musa, ko ki lelut kebar lakwet ne mi moetab kamennyi. Agot sobondo ne bo lakwet ne tomo kesich, ko bo kamanut eng’ taitab Jehovah. (Komong’u 21:22, 23; Tienwogikab Kalosunet 127:3) Nito koboru kole lelut kebar lakwet ne mi moet.

6 Ngot kegonyiti sobondo ko nyolu kegeer bik eng’ oret ne mie. Mwaei Bibilia kole: “Chi age tugul ne wechei ne tupcho ko rumin: ak ongen ole ma mi rumin ne tinyei sobondab koigeny ne menyei eng’ inendet.” (1 Johana 3:15) Ngot kemache sobondab koigeny ko magat kitutun sasisiet age tugul eng’ mugulelwekyok ne imuch keting’ee bik, amu sasisiet ko taunetab koromnatet. (1 Johana 3:11, 12) Bo kamanut kinetgei kecham bik alak.

KIBORU KONYIT ENG’ SOBONDO

Lakwet ne tomo kesich
  • ngot ko ma kibar lakwet ne mi moet

Chito ne ng’emei sigarok
  • ngemete atebosiek che ma tililen

Choronok aeng’ che bunu bororiosiek che teerchin
  • ngot kitutu eng’ mugulelwekyok sasisietab bik alak tugul

7 Ara anyun, tos kiborunde ano konyit eng’ sobonwekyok? Ma mi chi ne machei kome, nga u noto ko cheng’ei bik alak boiboiyet eng’ tuguk che imuchi kogon meet. Ko u, boisien bik che chang’ tumotet, tumoek anan miraa, anan ko kerichekab bogitet si kogochi boiboiyet. Tuguchuto ko ng’emei borwek ago eng’ kasarwek che chang’ kobarei bik che boisien. Chito ne boisien tuguchuto ko ma keerei sobondo ko u ole keertoi Kamuktaindet. Atebosiechuto ko ma tililen eng’ taitab Kamuktaindet. (Romanik 6:19; 12:1; 2 Korintoek 7:1) Si keboisiechin Kamuktaindet eng’ oret ne iyani inendet ko nyolu kebagach atebosiechuto. Nga imuch ko uuit keyai ko u noto komuchi kotoretech Jehovah. Ago boibochin inendet kagiletab ge ne kigiiligei kerib sobonwekyok amu konunotiot ne bo kamanut ne bunu Jehovah.

8 Ngot ketinye konyit eng’ sobondo, ko magat kibwat kerib ge. Kiegu bik che ribegei, si ma kiyai tuguk che kigeere ko u yo iboiboech ago eng’ iman komuchi kong’em sobonwekyok. Kikwerie karit eng’ oret ne kararan ak keistoegei koromnatet anan ko ureriosiek che yaach. (Tienwogikab Kalosunet 11:5) Kimwa ng’atutietab Kamuktaindet ne kiigochi lagokab Israel kole: “Ye iteech got ne leel itegel got barak iyiem kotuiyo, si meipchi gong’ung’ korotik, ngo chirkwin chi eng’ oloto.” (Ne Kibwate Ng’atutik 22:8) Kosubgei ak kit ne mwae ng’atutik, ko magat kegeer kele mi komie kurgotikab gorikyok si ma riich kiy chi age tugul kobut ak koumian. Ngot itinye karit, ko kotomo iboisie ko magat igeer ile chobot komie ak koboisie kiy age tugul. Mat koek got neng’ung’ anan ko karing’ung’ kit ne tos yain inyendet anan ko bik alak koumionso.

9 Ara anyun, tos nyolu kerib sobonwekab tiong’ik kora? Chuto ak ichek ko bo kamanut eng’ taitab Yaindet. Iyani Kamuktaindet kebar tiong’ik si keam ak kenyor ngoroik anan ko si kerib sobonwekab bik. (Taunet 3:21; 9:3; Komong’u 21:28) Nga u noto, kiumisan anan kebar tiong’ik buch, ko lelut ago iboru nito komie kole ma kigeere sobondo ko bo kamanut agot kitigin.—Kalewenaik 12:10.

KEGONYIT KOROTIK

10 Kingo kagobar Kaen tupchennyi Abil, komwachi Jehovah Kaen kolenji: “Rirjina tugetab korotikab ng’etab komet eng’ ng’ony.” (Taunet 4:10) Kingomwa Kamuktaindet agobo korotikab Abil, ko king’alale sobondab Abil. Kiiwong’ Kaen sobetab Abil, ago ki magat kegerkong’ Kaen. Ki u yo kirirji korotik anan ko sobondo Abil Jehovah si koyai imanda. Kigibor kora eng’ Maranet ne bo betusiekab Noa ole namdogei sobondo ak korotik. Kotomo koit Maranet, ko kiamei bik logoek, ngwek, bek ak njuguk. Kingobata Maranet, komwachi Jehovah Noa kolenji: “Egu amitwogikwok kiy age tugul ne sobei ne wendoti; kagonok tugul ko u ye kiga agonok ngwek alak tugul che nyalilen.” Nga u noto, ko mi kit ne kieete Kamuktaindet: “Ago moam banyek koboto sobondanyi; sobonoto ko korotikyik.” (Taunet 1:29; 9:3, 4) Iboru nito komie kele, namjindos Jehovah sobet ak korotikab kit age tugul ne sobei.

11 Kigonyiti korotik ye ma kiam. Eng’ ng’atutiet ne kiigochi Jehovah lagokab Israel ko king’at ichek kolenji: “Ak ngobar chi age tugul…tiony age tugul anan taritiet age tugul ne kiamei; kotumda korotikyik, ak kotuge ng’ung’unyek.…Kialenji lagokab Israel amatata oam korotik alak tugul che bo borto age tugul.” (Atebetab Lawik 17:13, 14) Kita koboisiei ng’atutiet ne kiga igochi Kamuktaindet Noa kenyisiek 800 che kiga kosiirto kole mat koam korotikab tiony age tugul. Kitoogu kabwatutikab Jehovah komie agobo nito: Kiimuchi koam kiboitinikyik tiong’ik ago kima nyolu koam korotik. Kinyolu kotumda korotik koba ng’ony, ak ko u noto, keweekyi sobet Kamuktaindet.

12 Boisiei ng’atutionito eng’ Kristianik kora. Kituiyo keny alamalaikab Jesu ak boisiek alak che ki teleljin boisiet ne bo kasubikab Jesu ak kolewen ng’atutik che ki magat kogas it chi tugul eng’ tuiyetab Kristianik. Kitil icheget kole: “Amu kigeere kele mie eng’ Tamirmiriet ne Tilil, ak eng’ achek kele, magigesenjok milet ne nyigis kosiir tuguch nyolu; kele otabanege tuguk che kieng’jin kanamonik, ak korotik, ak banyekab che kagiget [kometoe korotik bendo] ak sokset.” (Boisionik 15:28, 29; 21:25) Ko u noto, ko magat ketestai ‘kitabanege korotik.’ Eng’ taitab Kamuktaindet, ko bo kamanut nito ko u yo bo kamanut keistoege ootetab kanamonik ak sokset.

Chito ne kagindochi maiywek kobun tigitiot

Ngot kolenjin taktari imete maiywek, ko tos irutyigei kobun tigitik?

13 Ng’atutionito bo kiistoege korotik ko tos boto ketesyi chito korotik kobun tigitiot? Ee. Eng’ kaborunet: Ngele ndo lenjin taktari iistoege maiywek. Tos nito koboru kele nga ma magat iee maiywek imuchi irutyigei kobun tigitik? Achicha! Ko u noto, keistoege korotik, koboru kole ma magat kochut borwekyok korotik eng’ or age tugul. Ara anyun ng’atutietab keistoege korotik koboru kole ma nyolu kechamji chi age tugul koteswech korotik kobun tigitik.

14 Ngele kaumian Kristianindet mising’ anan ko magat keeny, yeityo komwa taktariek kole magat ketesyi korotik anan ngo ma kitesyi komeei. Eng’ iman ko ma mache Kristianindet kome. Iyani inendet ortinwek alak che teerchin che bo kanyoiset che ma kiboisie korotik eng’ oret ne ma nyolu, amu tiemei inendet koriib sobondo ne konunotiot ne bo kamanut ne bunu Kamuktaindet. Ko u noto, kocheng’ei ortinwechoto alak che bo kanyoiset ngot kobiitu ak koyani konyoiset age ne teer ne ma ketesyi korotik.

15 Tos but Kristianindet ng’atutikab Kamuktaindet si kobiit kotes sobennyi kitigin eng’ ng’onyuni? Kimwa Jesu kole: “Amu age tugul ne machei kosor sobondanyi kobeeti: ak age tugul ne ibeeti sobondanyi agobo ane konyoru.” (Matayo 16:25) Ma kimache kebegu. Nga u noto, ngot kebut ng’atutikab Kamuktaindet ketieme kesoru sobonwekyok, ko ma kinyoru sobondab koigeny. Ki bik che ng’omen anyun, ngot kiyan kele bo iman ng’atutietab Kamuktaindet, ketinye kamang’unet ne kim kele ngot kebegu eng’ or age tugul, ko tun ibwatech inendet ne igoitoi sobondo ak koweekwech konunotiot ne kararan noto ko sobondo.—Johana 5:28, 29; Hebranik 11:6.

16 Rani, ko tilei kiboitinikab Kamuktaindet che iyanotin kosub ng’atutiennyi ne bo korotik. Ma amei korotik eng’ or age tugul. Ago ma iyani keboisie korotik kinya icheget.* Iguitos icheget komie kole ingen Yaindetab korotik kit ne nyoljin icheget. Tos iyani agot ak inye ko u noto?

BOISIET NE NYOLU NE BO KOROTIK

Tos iborunde ano ile igonyiti sobondo ak korotik?

Chepyoset ne miani ne ng’aloljin daktariandennyi

17 Kiibor komie Ng’atutikab Musa oret agenge kityo ne nyolu keboisie korotik. Kosubgei ak ootet ne kigimakyin lagokab Israel, ko king’at Jehovah icheget kole: “Amu mi sobondab borto korotik: ak kiagonok korotichuto oyachinegei kagaigaet eng’ kaptisisio amu sobonwekwok: amu korotik che yaei kagaigaet agobo sobondo.” (Atebetab Lawik 17:11) Kingoyai tengek lagokab Israel, ko si kobiit konyor nyoetab kat, ko kinyolu kogoito tiony ak kerong’ji korotikyik tutigin baragutab kaptisisio eng’ hekalut. Boisiet agenge kityo ne nyolu ne bo korotik ko ki eng’ tiseiywek che u choto.

18 Ma kobou rani Ng’atutikab Musa Kristianik che bo iman ago ko u noto, ko ma magat kogoito tiseiywekab tiong’ik ak korong’ji korotikab tiong’ik baragutab kaptisisio. (Hebranik 10:1) Nga u noto, kingeboisie korotik eng’ kaptisisio eng’ betusiekab lagokab Israel, ko kisib kobor agobo tiseiywotab kamanut ne bo Weritab Kamuktaindet, Jesu Kristo. Ko u ole kiga kinetitegei eng’ Somanet 5 eng’ bukuini, ko kigon Jesu sobennyi agobo achek ye kingoyan ketumda korotikyik koek tiseiywot. Yeitio kwo anyun kipsengwet ak kogochi Kamuktaindet konyil agenge ak koyam kamanutietab korotikyik che kigitumda. (Hebranik 9:11, 12) Kiyai noto si kobiit kenyoiywech kaat tengekwogikyok ak koyat oret si kenyoru sobondab koigeny. (Matayo 20:28; Johana 3:16) Kibunji kamanut mising’ boisionito bo korotik. (1 Petero 1:18, 19) Kisorwech ngot ketinye kayanet kityo eng’ korotikab Jesu che kigitumda.

19 Kiweekyini kongoi ne o Jehovah Kamuktaindet agobo konunotionnyi ne bo chamnyet ne noto ko sobondo! Ago tos ma yaech nito kemwachi bik alak agobo boroindo ne bo konyor icheget sobondab koigeny ngot koyan tiseiywotab Jesu? Ngot kemagen kiy sobonwekab bik ko u ye mogen kiy Jehovah, ko yaech nito kemwachi bik agobo nito eng’ maget ak kagiiletab ge. (Esekiel 3:17-21) Ngot kigilgei keyai boisionito, kimuchi kemwa ko u Paulo ne kimwa kole: “A tilil eng’ korotikab bik tugul. Amu ma ariny amwowok magutik tugul che bo Jehovah.” (Boisionik 20:26, 27) Kemwachi bik agobo Kamuktaindet ak magutikyik, ko oret ne mie ne kiboru kele kigonyiti sobondo ak korotik.

KIT NE INETI BIBILIA

  • Sobet ko konunotiot ne bunu Kamuktaindet.—Tienwogikab Kalosunet 36:9; Ng’ang’utiet 4:11.
  • Kebar lakwet ne mi moet ko lelut, amu bo kamanut sobondab lakwet ne mi moet eng’ taitab Kamuktaindet.—Komong’u 21:22, 23; Tienwogikab Kalosunet 127:3.
  • Kiboru konyit eng’ sobet ngot keistoegei tuguk che imuchi kong’em sobonwekyok ak ye ma kiam korotik. —Ne Kibwate Ng’atutik 5:17; Boisionik 15:28, 29.

*  Eng’ logoiywek che chang’ agobo tuguk che kimuch keboisie ne kata korotik, igeer pechisiekab 13-17 eng’ bukuit ne kiguure How Can Blood Save Your Life? ne kisirei Baorinikab Jehovah.


Teebutik che Kinetegei

1. Ng’o ne kiyaei tuguk tugul che soptos?

2. Ne kit ne yaei Kamuktaindet si kobiit koribwech sobonwekyok?

3. Tos ki geerto ano Kamuktaindet baretab Abil?

4. Kiiborundo ano Kamuktaindet eng’ Ng’atutikab Musa oret ne nyolu kegeerte sobondo?

5. Nyolu kegeerte ano baretab lakwet ne mi moet?

6. Amu nee si ma nyolu kesas bik?

7. Nee boisionik che iboru kole ma kitinye konyit eng’ sobondo?

8. Amu nee si ko nyolu kibwat agobo ribetab ge?

9. Ngot kegonyiti sobondo, keribtoi ano tiong’ik?

10. Kigoborundo ano Kamuktaindet kole namegei sobondo ak korotik?

11. Nee boisietab korotik ne kieesio Kamuktaindet kong’eete betusiekab Noa?

12. Nee ng’atutiet ne tiinyegei ak korotik ne kiga igochi tamirmiriet ne tilil alamalaikab Jesu keny ago ta koboisiei rani?

13. Ngoro kaborunet ne toretech kenai kele, keistoegei korotik koboto keistoegei kora ketesyi chito kobun tigitik?

14, 15. Ndo mwae taktariek kole magat ketesyi Kristianindet korotik kobun tigitik, ko nyolu koyai nee inendet, ago amu nee?

16. Kosubgei ak korotik, ko nee kit ne tilei kiboitinikab Kamuktaindet koyai?

17. Eng’ Israelik che bo keny, ko ki nee boisiet agenge ne bo korotik ne kiiyanat eng’ Jehovah Kamuktaindet?

18. Nee kaberuret ak borotosiek che kimuchi kenyoru eng’ korotikab Jesu che kigitumda?

19. Nee ne magat keyai si kobiit ketililitu “eng’ korotikab bik tugul”?