Siirte iwe tuguk che biitu

Siirte iwe menu alak

Siirte iwe tuguk che mi orit

Baorinikab Jehovah

Kalenjin

Kanetutikab Bibilia che bo Iman

SOMANETAB SOMOK

Nee Magetab Kamuktaindet Agobo Ng’ony?

Nee Magetab Kamuktaindet Agobo Ng’ony?

Nee magetab Kamuktaindet agobo bik?

Kigegirinda Kamuktaindet eng’ or nee?

Tos tun u nee sobet eng’ ng’ony?

BO KWONG’UT magetab Kamuktaindet agobo ng’ony. Machei Jehovah konyi ng’ony bik che miach borwek ago boiboi. Mwaei Bibilia kole, “kigol Jehovah Kamuktaindet mbaret eng’ Eden” ak kiyai “kobit ket age tugul eng’ ng’ony ne kararan eng’ keeret, ak ne mie eng’ amet.” Kingo kagoyai Jehovah chito ne tai ak kwondanyi, Adam ak Awa, konde icheget mbaret ne kararan ak kolenji: “Oiiye, otesage, si onyi ng’ony; ak obou.” (Taunet 1:28; 2:8, 9, 15) Ara anyun, ki magetab Kamuktaindet kosich bichuto lagok, ak kotes mbaranoto kararan koeet koyom ng’ony komugul, ak korib tiong’ik.

2 Tos ibwati ile tatun koyaaksei magetab Jehovah Kamuktaindet ne bo komeng’is bik eng’ ng’ony ne paradiso? Mwaei Kamuktaindet kole, “Ee, kaamwa, ak ayae.” (Isaia 46:9-11; 55:11) Ee, kit ne machei Kamuktaindet koyai, koyaei eng’ iman! Mwaei kole, “kima yai [ng’ony] koek buch” nga u noto, ko “kiyai si kobiit kemeny.” (Isaia 45:18) Tos kimachei Kamuktaindet komeny ng’ony bik che u nee? Ago kimachei komeng’is kasarta ne tia? Wolu Bibilia kole, “Namei emet che bo imanda, ak komeny oloto koigeny.”—Tienwogikab Kalosunet 37:29; Ng’ang’utiet 21:3, 4.

3 Eng’ iman, ko tomo koyaak nito. Miandos bik ago begu rani, bortos ak kobaregei kora. Mi kiy ne kiyaak. Agot nga u noto, ko kima ko magetab Kamuktaindet koek ng’onyut kit ne u rani! Tos nee ne kiyaak? Amu nee si kotomo kosulda magetab Kamuktaindet? Ma mi bukuit age tugul ne kisirei chito ne imuchi komwawech agobo nito amu kitaunegei ng’alechu kipsengwet.

OLE KIBUNU BUNYOT

4 Bukuit ne tai eng’ Bibilia ko mwawech agobo kirindoindet ne kigirinda Kamuktaindet eng’ mbaretab Eden. Kimwaei kele “ndaret” inendet, nga ki ma ko tiony kityo. Bukuit ne bo let eng’ Bibilia koborwech kole “kiguure Oindet ak ko Setani, kaberberindetab ng’ony komugul.” Kiguure kora “erenet ne bo keny.” (Taunet 3:1; Ng’ang’utiet 12:9) Kiboisie malaikaiyandanito kim ndaret kong’ang’alalji Awa, kiyai kotook ko u yo ndaret ne ng’alali. Ne matiny, ko kimi malaikaiyandanito ye kingochopchin Kamuktaindet ng’onyut bik.—Job 38:4, 7.

5 Amu ititootin tuguk tugul che kiyai Jehovah, ko tos ng’o ne kiyaei “Setani,” “Oindet”? Kiwalgei agenge eng’ malaikaisiek che kimen che bo Kamuktaindet koek Oindet. Tos kiwaldagei ano? Nyolu kenai kele imuchi kowalak rani chito ne mie ne isubi imanda ak koek chorindet. Tos yaak ko u noto eng’ or nee? Imuchi kochamji chito maget ne ya kochut muguleldannyi. Ngot ko testai kobwat komuchi ko kimit maganoto. Yeityo, ye nyor kasarta, komuchi koyai kosubgei ak maget ne cham kobwoti.—Jakobo 1:13-15.

6 Kiyaak nito eng’ Setani Oindet. Imuchi kigasei inendet komwachin Kamuktaindet Adam ak Awa kolenjin oiiye ak onyi ng’ony. (Taunet 1:27, 28) Kiibwat Setani kole ‘imuchi koota anendet bichu tugul ne kata ootei Kamuktaindet!’ Ko u noto ko kiinam kobiit maget ne ya eng’ muguleldannyi. Eng’ let kong’al Awa komwachi lembechek agobo Kamuktaindet. (Taunet 3:1-5) Kiek inendet anyun “Oindet,” kainanito koboru kole “mwoitoe chito age lembeita.” Kiek kora “Setani,” nito koboru kole “Kirindoindet” inendet.

7 Kiboisie lembechek ak ng’olset Setani ne Oindet koyai Adam ak Awa kongelelji Kamuktaindet. (Taunet 2:17; 3:6) Ki eng’ let kobek icheget ko u ole kigamwaita Kamuktaindet kole begu ngot ko magas it inendet. (Taunet 3:17-19) Amu kiek Adam ne ma ititaat kingo kagoyai tengek, ko kiinaamda lagokyik tugul tengekto. (Romanik 5:12) Kimuchi keboisie kit ne kichobee matubaruk kiboru nito. Ngot ko kwolot kioto, ko tos mong’u matubaruk che kororon? Mong’ u matubariat age tugul ko kwolot anan ko ma ititaat. Ko u noto ko ma mi chi ne ititaat amu kigonamda Adam age tugul tengekto. Noto amu nee si ko osegitu bik ak kobegu.—Romanik 3:23

8 Kingondochi Setani Adam ak Awa koyachi Kamuktaindet tengekto, ko eng’ iman ko kiindochin ngelelnatet. Kigirindoi oretab Jehovah ne bo bounatet. Ki u yo kimwaei Setani kole: ‘Kamuktaindet ko bounindet ne ya. Mwaei lembechek ak koetee bikyik tuguk che kororon. Imuchi kotilchige bik kit ne machei koyai ngo mie anan ko ya, ma Kamuktaindet kityo ne imuchi kolaitoran icheget. Ago imuchi ko kararanit sobennywa ngot abou icheget.’ Tos ki ta yaei nee Kamuktaindet agobo kirindaet ne kigirinda Setani inendet? Ibwati bik alak kole, ki ta barei Kamuktaindet ngelelichuto. Tos ki ta wolu nito kirindaetab Setani? Tos ki ta iboru nito kole indochin bik Kamuktaindet eng’ oret ne bo iman?

9 Amu bo iman Jehovah eng’ oret ne ititaat, ko ki ta ma imugaksei kobar inendet ngelelichoto eng’ kasarata. Kitil Jehovah kole ki magat kosirto kasarta si kobiit kowol kirindaetab Setani eng’ oret ne yamegei, ak kobor kole kiplembechwa Oindet. Ara anyun, kitil Kamuktaindet kometo bik koboigei ichegei eng’ kasarta ne ma tia kondochin Setani. King’alale eng’ Somanetab 11 eng’ bukuini agobo amu nee si kiyai Jehovah ko u noto ak amu nee si kochamda kosirto kasarta ne o ama wol ng’alechu. Agot nga u noto, ko nyolu kibwat ko u ni: Tos ki bo iman koyan Adam ak Awa ng’alekab Setani ne ki tomo koyachi kiy age tugul ne kararan? Tos ki bo iman koyan icheget kole kiplembechwa Jehovah ne ki ka kogochi tuguk tugul che ki tindoi? Ndo ki inye, ko tos ki ta iyaei nee?

10 Nyolu ketebegei teebutichuto achek tugul amu tiinyech ng’alechuto rani. Ee itinye kasarta iwe komostab Jehovah si iwolu kirindaetab Setani. Imuchi iyan Jehovah koek Bounindeng’ung’ ak iborchi Setani ile kiplembechwa inendet. (Tienwogikab Kalosunet 73:28; Kalewenaik 27:11) Kit ne ya, ko bik tutigin kityo eng’ bilionisiek che mi ng’onyuni che yaei ko u noto. Konech nito ketebegei teebutioni bo kamanut, Tos ineti Bibilia iman kole bou Setani ng’onyuni?

NG’O NE BOU NG’ONYUNI?

Tos kiimuchi kogochi Setani bounatosiek tugul che bo ng’onyuni Jesu ngot ko ki ma ko chechik?

Koesioi Jesu tiemutietab Setani komoche kogochi inendet bounatosiekab ng’ony

11 Ki ingen Jesu komie kole bounindetab ng’onyuni ko Setani. Eng’ oretab kwong’ut, ko kiiborji Setani Jesu “bororiosiek tugul che bo ng’ony, ak telunatet ne bo choto.” Ak komwachi Jesu kolenji: “Agonin tuguchu tugul, ngibutya iloswa.” (Matayo 4:8, 9; Luka 4:5, 6) Ibwat agobo ni. Tos kimuchi koek yomset eng’ Jesu nito ndo kima ko bou bounatosiechuto Setani? Ma esioi Jesu kole ma bo Setani bounatosiechuto tugul bo ng’onyuni. Eng’ iman, ki ma ta esioi Jesu ndo kitinyei kimnatet eng’ bounatosiechuto.

12 Jehovah ko Kamuktaindet ne bo Kamuktaet Tugul, Yaindetab tuguk tugul che bo kwong’ut. (Ng’ang’utiet 4:11) Eng’ iman, ko kiguure Jesu “ne o ne bo ng’onyuni” Setani. (Johana 12:31; 14:30; 16:11) Kuure agot Bibilia Setani ne Oindet “cheptalelitab ng’onyuni.” (2 Korintoek 4:3, 4) Kisir kristianindet ne kiyoktoi Johana agobo Setani kole: “Mitei ng’ony komugul eng’ bounatetab inendet ne ya.”—1 Johana 5:19.

OLE TUN KIGESUNDOI NG’ONYUTAB SETANI

13 Ye sirtoi kenyit age tugul, kotesetai koyaitu ng’onyut. Kinyi lugosiekab boriet, bikab bolatosiek che ma isubi imanda, kandoikab dinisiek che chombilik, ak bik che uuen metowek. Ma imugaksei kewal emet tugul. Ng’ang’u Bibilia kole, nyo koistoi Kamuktaindet konegit kiy age tugul ne ya ne mi ng’onyuni eng’ borietab Har-Magedon. Ye ibata nito, kosub ng’onyut ne leel ne bo imanda.—Ng’ang’utiet 16:14-16.

14 Kilewen Jehovah Kamuktaindet Jesu Kristo koek Laitoriat eng’ Bounatennyi ne bo kipsengwet. Kisib komwa Bibilia kole: “Amu kagisikwech lakwet, kagigonech werit; ak ting’e inendet bounatet tigikyiennyi: ak kiguure kainennyi…Bounindetab Kalyet. Mami ole igesunegei tesetab ge ne bo bounatennyi ak kalyet.” (Isaia 9:6, 7) Kosubgei ak bounatonito, ko kiinet Jesu kasubikyik kosa ko u ni: “Ingonyo bounateng’ung’. Ingoyaak eng’ ng’ony mageng’ung’, ko u ye kiyaei eng’ kipsengwet.” (Matayo 6:10) Ko u ye ta kegeere eng’ bukuini, ko nyo koistoi konegit Bounatetab Kamuktaindet bounatosiekab ng’onyuni, ak kobounis nenyi koigeny. (Daniel 2:44) Ak kogon Bounatetab Kamuktaindet paradiso eng’ ng’onyuni.

NEGIT NG’ONYUT NE LEEL!

15 Mwawech Bibilia eng’ iman kole: “Kigeni kipsengwet ne leel ak ng’onyut ne leel ko u arorutiennyi [Kamuktaindet], ole menyei imanda.” (2 Petero 3:13; Isaia 65:17) Ngong’alale Bibilia agobo “ng’ony” kasarwek alak, kong’alale bik che menyei ng’ony. (Taunet 11:1) Ko u noto, “ng’onyut ne leel” ne bo imanda, ko bik che kiiyan Kamuktaindet koek bikyik.

16 Kiaror Jesu kole eng’ ng’onyut ne leel ne nyonei, ko nyoru bik tugul “sobondab koigeny” che iyonotin eng’ Kamuktaindet. (Mariko 10:30) Kaigai ng’any Bibilia neng’ung’ eng’ bukuitab Johana 3:16 ak 17:3, si isoman kit ne kimwa Jesu kole magat keyai si kenyoru sobondab koigeny. Soman anyun eng’ Bibilia agobo berurto ne tun boibochin bik tugul che tun igochin Kamuktaindet sobondab koigeny eng’ ng’ony ne Paradiso.

17Tun ko ma komi yaitiet, boriosiek, butetab ng’atutik, ak chemarget. “Ma komi kiptengekyot…Ago namei emet che taloen.” (Tienwogikab Kalosunet 37:10, 11) Tun komi kalyet amu ‘igesu Kamuktaindet lugosiek eng’ ng’ony komugul.’ (Tienwogikab Kalosunet 46:9; Isaia 2:4) Yeityo “konyoru ne bo imanda berurto; ak chang’indab kalyet agoi ko ma komi arawet,” nito ko sobondab koigeny!—Tienwogikab Kalosunet 72:7.

18Tun meng’isiei bikab Jehovah eng’ kalyet. Kingo kas it lagokab Israel Kamuktaindet, ko kimeng’is eng’ kalyet. (Atebetab Lawik 25:18, 19) Tun kararan ne tia keboibochi kalyet ne u noto eng’ Paradiso!—Isaia 32:18; Mika 4:4.

19Tun ko ma komi rubosiek. Kimwa tienindetab tienwogikab kalosunet kole: “Ak tun biitu chang’indab bek eng’ ng’ony eng’ tulonok barak.” (Tienwogikab Kalosunet 72:16) Tun iberuri Jehovah Kamuktaindet bikyik che bo imanda, ‘tun konu ng’ony iyotennyi.’—Tienwogikab Kalosunet 67:6.

Koboibochin Paradiso bik tugul che bunu bororiosiek che teerchin

20Tun egu ng’ony tugul paradiso. Tun kitechei gorik che kororon ak mbarenik che kororon eng’ emet ne kigakong’em kiptengeginik. (Isaia 65:21-24; Ng’ang’utiet 11:18) Ye testai koba betusiek, ko tesetai koegitu oldinwek che menyei bik kot ko kararanit ng’onyut tugul ko u mbaretab Eden. Ak kogochi Kamuktaindet “age tugul ne sobei kit ne machei kot kobiyo.”—Tienwogikab Kalosunet 145:16.

21Tun ko mi kalyet eng’ tiong’ik ak bik. Tun amisiei tugul tiong’ikab timin ak che bo gaa. Agot lakwet ne ming’in ko tun ko ma iywei tiong’ik che koromen rani.—Isaia 11:6-9; 65:25.

22Tun begu mianwogik. Amu Jesu ko Laitoriat eng’ Bounatetab Kamuktaindet, ko tun isobi bik eng’ chang’indo kosir ye kigaisobto kingomi ng’ony. (Matayo 9:35; Mariko 1:40-42; Johana 5:5-9) Yeityo “ma tun mwaei ne meng’isiei kole Amiani.”—Isaia 33:24; 35:5, 6.

23Tun king’eti chamanikyok che kigobek ak konyor kamang’unet ne bo sobondab koigeny. Tun ing’eti Kamuktaindet bik tugul che mi kabwatutikyik che ruitos eng’ meet. Eng’ iman ko, “tatun komi ng’eetyetab che bo imanda ak che ma bo imanda.”—Boisionik 24:15; Johana 5:28, 29.

24 Tun nyoru kasarta ne kararan ne bo kwong’ut icheget che leweni konetgei ak koboisiechi Jehovah Kamuktaindet, ne Yaindet! Kiiarorchi Jesu kiptengekyot ne kiga kigartat tuwai agobo Paradiso ne tun nyonei. Bo kamanut kinetgei agobo Jesu Kristo ne eng’ inendet komugaksei kiberurech eng’ ortinwek tugul che kageng’alale.

KIT NE INETI BIBILIA

  • Tun isuldoi magetab Kamuktaindet ne bo koyai ng’ony koek paradiso.—Isaia 45:18; 55:11.
  • Bou Setani ng’onyuni rani.—Johana 12:31; 1 Johana 5:19.
  • Tun iberuri Kamuktaindet bik eng’ ng’onyut ne leel ne nyonei.—Tienwogikab Kalosunet 37:10, 11, 29.

Teebutik che Kinetegei

1. Tos nee magetab Kamuktaindet agobo ng’ony?

2. (a) Tos kinaite ano kele, isuldoi magetab Kamuktaindet agobo ng’ony? (b) Kosubgei ak Bibilia, ko tun meng’isiei koigeny bik che u nee?

3. Nee tuguk che yaach che mi ng’onyuni rani, ago tos yaei nito koteeb bik teebutik ngorcho?

4, 5. (a) Ng’o ne king’ololji Awa kobun ndaret? (b) Imuktoi ano kowalak chito ne mie ne isubi imanda koek chorindet?

6. Kiek malaikaiyatab Kamuktaindet Setani ne Oindet eng’ or nee?

7. (a) Ki amu nee si kobek Adam ak Awa? (b) Amu nee si ko osegitu bik ak kobegu?

8, 9. (a) Tos nee kirindaet ne kiyai Setani? (b) Ki amu nee si ma bar Kamuktaindet ngelelichoto eng’ kasarata?

10. Tos iborunde ano ile imi komostab Jehovah si iwolu kirindaetab Setani?

11, 12. (a) Tos iborundoi ano yomset ne kigiyom Jesu kele bounindetab ng’onyuni Setani? (b) Tos nee kit age ne iboru kole Setani ko bounindetab ng’onyuni?

13. Amu nee si ko magat ng’onyut ne leel?

14. Ng’o ne kilewen Kamuktaindet koek Laitoriat eng’ Bounatennyi, ago kiga kisib kemwaita ano nito?

15. Tos “ng’onyut ne leel” ko nee?

16. Tos nee kononutiot ne kararan ne igochin Kamuktaindet bik tugul che iyonotin eng’ inendet, ago magat keyai nee si kenyoru?

17, 18. Kinaitoi ano kele tun kobitu kalyet eng’ ng’ony komugul?

19. Amu nee si kingen kele tun chang’ amitwogik ng’onyut ne leel ne bo Kamuktaindet?

20. Amu nee si kingen komie kele tun egu ng’ony tugul paradiso?

21. Nee kit ne iboru kele tun ko mi kalyet eng’ tiong’ik ak bik?

22. Tun kilyonjin mianwogik?

23. Amu nee si tun konech boiboiyet eng’ sobonwekyok ng’etiet?

24. Tos igeertoi ano agobo meng’otet eng’ ng’onyut ne Paradiso?