Siirte iwe tuguk che biitu

Siirte iwe menu alak

Siirte iwe tuguk che mi orit

Baorinikab Jehovah

Kalenjin

Kanetutikab Bibilia che bo Iman

SOMANETAB SOGOL

Nee Kit ne Iboru Kele Kimi “Betusiek che bo Let”

Nee Kit ne Iboru Kele Kimi “Betusiek che bo Let”

Nee Kit ne Iboru Kele Kimi “Betusiek che bo Let”?

Mwaei Ng’olyotab Kamuktaindet kole tun u nee bik “betusiek che bo let”?

Kisib komwa nee Bibilia agobo “betusiek che bo let”?

TOS kiigas logoiywek eng’ redio anan ko eng’ television ak itebeegei ile ‘Tos takyingei ano ng’onyuni?’ Yaaksei tuguk che yaachen eng’ sait ne ma kiityin, ma mi chi ne imuchi komwa kit ne tun yaaksei, agot eng’ betut ne rubei. (Jakobo 4:14) Nga u noto, kongen Jehovah kit ne tun yaaksei betusiek che bwanei. (Isaia 46:10) Kisib komwa Ng’olyondennyi Bibilia agobo tuguk che yaachen che yaaksei eng’ betusiekyok, ago mwaei kora tuguk che kororon che bo kwong’ut che tun yaaksei eng’ betusiek che bwanei.

2 Kimwa Jesu Kristo agobo Bounatetab Kamuktaindet ne tun igesu yaitiet ak koyai ng’ony koek paradiso. (Luka 4:43) Ki machei bik konai agobo betut ne nyonei Bounatet. Kiteebe alamalaik Jesu kolenji: “Mwawech, egu au tuguchu? Ak tun u nee kaborunetab nyonuneng’ung?” (Matayo 24:3) Kiwolji Jesu kolenji, Jehovah Kamuktaindet inegei ne ingen betut ne itu kagesunetab ng’onyuni. (Matayo 24:36) Nga u noto, ko kisib komwa Jesu tuguk che yaaksei eng’ ng’ony kotomo koyai Bounatetab Kamuktaindet kobiit kalyet ak chametab ge eng’ bik tugul. Tuguk che kisib komwa Jesu ko yaaksei rani!

3 Kotomo kegeer kit ne iboru kele kimi “kagesunetab ng’ony,” ko ngeng’alale agobo boriet ne kima komuchi kogeer chi. Kiyaak borionito eng’ kipsengwet ago tuguk che kiyaagis kosubgei ak borionoto ko tiinyech achek tugul.

BORIET ENG’ KIPSENGWET

4 Iaroru Somanetab Sisit eng’ bukuini kole kinaam Jesu Kristo kolaitoran eng’ kipsengwet kenyitab 1914. (Daniel 7:13, 14) Kingo kagobata noto, koib kakwautiet Jesu. Mwae Bibilia kole: “Ak kibiit luget eng’ kipsengwet: kiwa Mikael [nito ko kainet age ne bo Jesu] koboto malaikaisiekyik kobargei ak maswetit [nito ko Setani Oindet]; ak kiyai luget maswetinoto ak malaikaisiekyik.”* Ma ibelis Setani ak oikyik eng’ borionoto, kigiturur anyun icheget komong’ eng’ kipsengwet kobwa ng’ony. Kiboiboitu malaikaisiekab Jehovah kingeturur Setani ak oikyik komong’ eng’ kipsengwet. Nga u noto, ko kima boiboitu bik eng’ ng’ony. Kima boiboitu amu kigasib komwa Bibilia kole: “Bwa agobo ng’ony…amu kachorgei oindet konyo ole omi, kotinyei nereknatet ne o, amu ingen kole tinyei betusiek che ng’ering’ kityo.”—Ng’ang’utiet 12: 7, 9, 12.

5 Keer anyun kit ne kinyo koyaak kosubgei ak borionoto kibiit eng’ kipsengwet. Amu ki neregat Setani, ko kinyo koyai inendet kobiit bwa eng’ bik che mi ng’ony. Ko u ye ta igeere, kemeng’isiei eng’ kasarata bo bwa. Nga u noto, ko nwach kasarito, amu ‘ng’ering’ betusiechuto.’ Agot Setani kongen kole nwach kasarito. Kuure Bibilia kasarito “betusiek che bo let.” (2 Timoteo 3:1) Kiboiboi ne tia ngenai kele istoi Kamuktaindet boisionikab Oindet konegit eng’ ng’ony komugul! Ngegeer anyun tuguk che yaaksei rani che kigasib komwa Bibilia. Iboru tuguchuto kole kimi betusiek che bo let ago konegit koibchin Bounatetab Kamuktaindet borotosiek che bo koigeny bik tugul che chamei Jehovah. Ne tai, ngeng’alale kaborunaik ang’wan che kimwa Jesu kole iboru kele kimi betusiekab let.

TUGUK CHE YAAKSEI CHE EECHEN ENG’ BETUSIEK CHE BO LET

Pichainikab boriet, rubet, ak tuguk che ma tau chi ko u botanosiekab ng’ony

6‘Tun setyin bororiet age bororiet age, ak setyin bounatet age bounatet age.’ (Matayo 24:7) Kigebar bik Milionisiek eng’ boriet eng’ kenyisiek 100 che kigosirto. Kimwa kipsomaniat agenge ne bo Britain kole: “Kigibar bik che chang’ eng’ kenyisiekab 1900.…Ki chang’ boriosiek kenyisiechoto, kima kosiirtoi kasarta ne tia ko ma kigas boriet eng’ wui.” Mwae sugulit ne somanjin ng’alekab ng’onyut kole: “Boriet ne kibiit eng’ kenyisiekab 1900 ko kibar bik che chang’ konyil somok kosiir che kibek eng’ boriosiek che kimi kong’eete kenyitab 1 agoi kenyitab 1899.” Kigobek bik che siirei milionisiek 100 eng’ boriet kong’eete borietab kenyitab 1914. Kigoimgei bik che chang’ ak kogas ng’wanindo amu kigobet chamanikwak eng’ boriet. Imuch kiibet agot ak inye chamaneng’ung’ eng’ oret ne u ni.

7‘Tun biitu rubosiek.’ (Matayo 24:7) Mwae kipsomaninik kole kigotesak amitwogik eng’ kenyisiek 30 che kigosiirto. Nga u noto, kotesetai kororu amitwogik amu ma tinyei bik rabinik che yamei koal amitwogik anan ko amu ma tinyei mbaret ne imuchi kogol minutik. Bik che chang’ ko nyalildos eng’ rubet ne ma begu. Mwae kibagenge ne teleljin ng’alekab tililindo ak borwek, (World Health Organization) kole, begu lagok che siirei milionisiek mut eng’ kenyit age tugul amu manyoru amitwogik che yamei.

8‘Tun biitu botanosiek che eechen che bo ng’ony.’ (Luka 21:11) Kosubgei ak kipsomaninik che somanjin ng’alekab ole kitebto ng’ony, ko mwae kole kong’eete kenyitab 1990 kityo, ko kigobiit botanosiek 17 che kimen eng’ kenyit age tugul che king’em korik ak kogerer ng’onyut. Ago kigotestai kobiit botanosiek che kimen che ng’emei korik kobek kenyit age tugul. Mwaei bukuit age kole: “Kigobar bik che chang’ botanosiekab ng’ony eng’ kenyisiek 100 che kigosiirto ago nga kigotesak ng’omnatet rani ko kigotoret kogirinda meet kitigin kityo.”

9‘Tun biitu…korotwek.’ (Luka 21:11) Nga kigotesak ng’omnatetab kanyoiset, kotesetai kobarei bik mianwogik che taugei ak che ki bo keny. Mwaei logoiyot agenge kole mianwogik 20 che naatin, che choto ko chebuoniot, cheptigonit ak miando ne mandoi moet [Cholera], ko kigonaak eng’ kenyisiek che kigosiirto, ago mitei mianwogik che ma mitei kerichek che imuchi konya. Eng’ iman, ko kigobiit mianwogik che ma regune 30. Alak eng’ mianwogichuto ko matinyei kerichek ago barei bik.

BIKAB BETUSIEKAB LET

Ma mage kiy bik che chang’ kandoinatet ne kararan ne bunu Ng’olyotab Kamuktaindet

10 Nga kigasib komwa Bibilia agobo tuguk che yaaksei rani eng’ ng’onyuni, ko kisib komwa kora kole tun iboru atebetab bik kole kagoit betusiekab let. Kimwa Paulo kit ne tun u bik betusiekab let. Kisomani eng’ 2 Timoteo 3:1-5 kole: “Nai ni ile bwanei eng’ betusiek che let egosiek che bichien.” Eng’ kebeberiat, ko kimwa Paulo kole tun egu bik

  • che chamegei ichegei
  • che chamei silingisiek
  • che ingeleljin sigikwak
  • che ma tililen (che ma iyanotin)
  • che ma tinyei chamnyet
  • che ma ribegei
  • che kolgolen
  • che chamei ureriet kosiir koek che chamei Jehovah
  • che tinyei kergeindab kaiyweet ne kiywei Jehovah, ago esioi kimnatet ne bo kaiyweonato

11 Tos u choto bik eng’ ole imenye? Eng’ iman ko u choto. Mi bik oldinwek tugul che tinyei atebosiek che ma nyolu. Iboru nito kole negit si koib Kamuktaindet kakwautiet, amu mwaei Bibilia kole: “Ye kaeegitu kiptengeginik ko u suswek, ak ye kanyor berurto yaikab tengekto; ko si keng’em agoi koigeny.”—Tienwogikab Kalosunet 92:7.

TUGUK CHE KORORON

12 O bwa eng’ ng’ony iman betusiekab let, ko u ole kigasib komwaita Bibilia. Nga kimi ng’onyut ne chang’ kaimutik, ko mitei tuguk che kororon che yaaksei eng’ kiboitinikab Jehovah.

‘Kiamdaati logoiywechu miach bo bounatet eng’ ng’ony komugul.’—Matayo 24:14

Baorinikab Jehovah che amdoi logoiywek che miach

13Tun ‘tesoksei naet’ ko u ye kigasib komwaita bukuitab Daniel, nito ko ng’omnatet ne bo iman agobo Kamuktaindet. Tos yaaksei nito au? Tun yaaksei eng’ “betusiek che bo let.” (Daniel 12:4) Mising’ ko kong’eete kenyitab 1914, ko kigotoret Jehovah bik che machei koboisiechi inendet kotestai koguiyo Bibilia. Kigotestai koguiyo imanda agobo kainetab Kamuktaindet ak magennyi, tiseiywotab Jesu Kristo, ole mi bik che kigobek, ak ng’eetiet. Ne siirei tugul ko kigonetgei kiboitinikab Jehovah komeng’is eng’ oret ne igochin icheget borotet ak kogochi Kamuktaindet kalosunet. Kigoguiyo komie boisietab Bounatetab Kamuktaindet ak ole tun nyo kolititoi tuguk komiagitu eng’ ng’ony. Tos boisien ng’omnatonito eng’ or nee? Toretech teebutionito keityin maoinatet age ne isuldoi eng’ betusiechuto bo let.

14[Tun] keamdaati logoiywechu miach bo bounatet eng’ ng’ony komugul,” kimwa ng’alechu Jesu Kristo eng’ maoinatennyi ne bo “kagesunetab ng’ony.” (Matayo 24:3, 14) Kiamdaati logoiywechu miach bo Bounatet eng’ ng’ony komugul, eng’ emotinwek che sirei 230 ak kutuswek che sirei 400 kineti bik konai agobo Bounatonito, kit ne nyo koyaei, ak kit ne kimuchi keyai si kenyoru borotosiekyik. Bik milionisiek che Baorinikab Jehovah kogiilegei koamda logoiywek che miach che bo Bounatet. Bunu baorinichuto bo Jehovah “bororiet age tugul, ak oret age tugul ak bik ak kutuswek.” (Ng’ang’utiet 7:9) Igochin Baorinikab Jehovah bik milionisiek che machei konai kanetutikab Bibilia che bo iman konetisietab Bibilia eng’ gaa ne ma kiyochei chi. Nito ko kasuldaetab maoinatet ne kararan ne tia, mising’ ko kingosib komwa Jesu agobo Kristianik kole, ‘wechok bik tugul’!—Luka 21:17.

TOS NYOLU IYAI NEE?

15 Amu kigosulda maoinatosiek che chang’ che bo Bibilia, ko tos mayain nito iyan ile kimi betusiek che bo let? Itu “kagesunet” ne matiny ye kageamda logoiywek che miach agoi kogeer Jehovah kole kagoyam. (Matayo 24:14) “Kagesunet” ko kasarta ne tun istoi Kamuktaindet yaitiet eng’ ng’ony. Tun boisien Jehovah Jesu ak malaikaisiekyik che kimen kong’em bik tugul che ingeleljin inendet kochamei. (2 Tesalonikek 1:6-9) Tun ko ma koberberi Setani ak oikyik bororiosiek kogeny. Ye ibata noto korong’kyi Bounatetab Kamuktaindet berurto bik tugul che imining’ityingei laitornatennyi ne bo iman.— Ng’ang’utiet 20:1-3; 21:3-5.

16 Amu kagorik betusiekab let che bo ng’onyuni bo Setani konyolu keteebegei kele, ‘Nyolu ayae nee nguni?’ Kiboru ng’omnatet ye kitestai kinetgei che chang’ agobo Jehovah ak kit ne makwech. (Johana 17:3) Inetgei Bibilia eng’ kagiiletabgei. Yai koek atebeng’ung’ icheng’ chorwandit eng’ bik che yaei magetab Jehovah. (Hebranik 10:24, 25) Nde muguldang’ung’ naet ne o ne kigoyai Jehovah Kamuktaindet komugak konyor bik eng’ ng’ony komugul, ak iwalage eng’ sobeng’ung’ si kobiit koyanin Kamuktaindet ak kobaibain noto.—Jakobo 4:8.

17 Kigasib komwa Jesu kole tun eesioi bik kaborunet ne iboru kole kimi betusiekab let. Itu ng’emetab kiptengeginik eng’ kasarta ne ma kibwatyin. Tun kwong’dos bik che chang’ ko u yo konyo chorindet eng’ saisiekab kemoi. (1 Tesalonikek 5:2) Kiitechi bik Jesu kole: “Ko u ole kiteptoi betusichu ki bo Noa, egu ko u noto nyonunetab Weritab chi. Amu u eng’ betusiechoto ye kitom kobiit maranet kiamisiei ak kieeisei, kiitunisiei ak kiigoitoi kitun, agoi betut ne kiwa Noa melit orit, ak kima nai ichek agoi koit maranet, ak koges ichek tugul; egu ko u noto nyonunetab Weritab chi.”—Matayo 24:37-39.

18 Noto amu nee si kilenji Jesu bik: “Oripge anyun okwek, si manyi mugulelwekwok keiyandit, ak bogitet, ak kaiimutikab sobetab betusiechu, ak konyonjok betunoto kocheak ko u mestet: amu u noto tun nyonji bik tugul che menyei ng’ony komugul. Ago oripge eng’ betut age tugul, ak osae, si kobiit oterterisie, ochilile tuguchuto tugul bwanei, ak otononse [ko o che iyanotin] eng’ taitab Weritab chi.” (Luka 21:34-36) Bo kamanut kinde mugulelwekyok ng’alekab Jesu. Amu nee? Amu bik che iyanotin eng’ Jehovah Kamuktaindet ak “Weritab chi,” Jesu Kristo, kotinyei kamang’unet kochililso eng’ kagesunetab ng’onyuni bo Setani ak konyor sobondab koigeny eng’ ng’ony ne leel ne negit ne bo kwong’ut!—Johana 3:16; 2 Petero 3:13.

KIT NE INETI BIBILIA

  • Kit ne iboru kele kimi betusiekab let ko bitunetab boriosiek, amitwogik che rorunotin, botanosiekab ng’ony, ak mianwogik.—Matayo 24:7; Luka 21:11.
  • Eng’ betusiekab let, ko chamegei bik, chamei silingisiek, ago chamei ureriet ma chamei Kamuktaindet.—2 Timoteo 3:1-5.
  • Eng’ betusiechuto bo let, keamdoi logoiywek che miach che bo Bounatet eng’ ng’ony komugul.—Matayo 24:14.

*  Si inai ng’alek che chang’ che iboru kole Mikael ko kainet age ne bo Jesu Kristo, igeer Ng’alek che Kigites.


Teebutik che Kinetegei

1. Tos kinyorune ano kanetisiet agobo betusiek che bwanei?

2, 3. Nee teebutiet ne kiteebe alamalaik Jesu, ago kiwolji inendet kolenji nee?

4, 5. (a) Nee kit ne kiyaak eng’ kipsengwet kingo kaginde Jesu koek Laitoriat? (b) Kosubgei ak Ng’ang’utiet 12:12, ko nee kit ne kiyaak kingobata boriet eng’ kipsengwet?

6, 7. Isuldoi eng’ or nee ng’alekab Jesu agobo boriosiek ak rubosiek eng’ betusiechu kimi?

8, 9. Nee kit ne iboru kole isuldoi maoinatetab Jesu agobo batanosiekab ng’ony ak mianwogik?

10. Nee atebet ne kigasib komwa 2 Timoteo 3:1-5 ne igeere eng’ bik rani?

11. Iboru eng’ or nee Tienwogikab Kalosunet 92:7 kit ne tun yaaksei eng’ bik che yaach?

12, 13. Tos kigotesak “ng’omnatet ne bo iman” eng’ “betusiechu bo let” eng’ or nee?

14. Kigeamda logoiywek che miach che bo Bounatet rani eng’ komosta ne o ne tia, ago ng’o che amdoi logoiywechuto?

15. (a) Tos iyani ile kimi betusiekab let, ago amu nee si iyan? (b) Tun kilyonjin bik tugul che ma kasei it Jehovah eng’ “kagesunet” ak konyor nee che imining’ityingei Bounatet Kamuktaindet?

16. Nee kit ne nyolu iyai?

17. Amu nee si ko ng’emetab kiptengeginik ko tun ityin bik che chang’ eng’ kasarta ne ma ibwatyin?

18. Nee kateechinet ne kimwa Jesu ne nyolu kinde mugulelwekyok?