Siirte iwe tuguk che biitu

Siirte iwe menu alak

Siirte iwe tuguk che mi orit

Baorinikab Jehovah

Kalenjin

Kanetutikab Bibilia che bo Iman

SOMANETAB LO

Mi Ano Bik che Kigobek?

Mi Ano Bik che Kigobek?

Nee ne yaaksei ye kagebegu?

Amu nee si kebegu?

Tos kinyoru kagaigaet ngenai imanda agobo meet?

KIGOBWAT bik teebutichuto eng’ kenyisiek che chang’. Bo kamanut teebutichuto. Matiny kemenye ano anan ko ki ng’o, ko tiinyei age tugul eng’ achek walutikab teebutichuto.

2 Kiginetgei eng’ somanetab mut kit ne kiyai tiseiywotab Jesu Kristo ne kiitiachech si kobiit keyatwech oretab sobondab koigeny. Kiginetgei kora kele kigasib komwa Bibilia agobo kasarta ne tun ko ma “komi meet kogeny.” (Ng’ang’utiet 21:4) Ya tugul, ketesetai kebegu achek tugul. Kimwa Laitoriat Solomon kole, “Ingen che soptos kole begu.” (Amdoindet 9:5) Kitieme kemeng’isie kenyisiek che chang’ ndo imugaksei. Agot nga u noto, keteebegei kit ne yaaksei ye kagebegu.

3 Ngobek chamankyok, kerirtosi. Ak kimuchi keteeb kele: ‘Tos kayaak nee eng’ icheget? Tos nyalildos? Tos keerech? Tos kimuchi ketoret icheget? Ta tun kegeere icheget kogeny?’ Konu dinisiekab ng’onyuni walutik che teerchin agobo teebutichu. Ineti alak kole, ngot itebi atebet ne mie ko tun iwendi kipsengwet, ko ngot itebi atebet ne ya ko tun kebeelin. Ineti dinisiek alak kole, ngobek bik, ko sirtoi kobendi ole mi tamirmirik si kotuiyo ak kugoisiek che kigobek. Ineti alak kora kole mi ole bendi che kigobek si kobiit kiruokyi, yeityo kesich kogeny eng’ borto age.

4 Kanetutichuto bo dinisiek koneti kit agenge tugul, kole mi kit ne tesetai kosobei ngome chito. Negit dinit age tugul ne bo keny anan ko ne bo rani, koneti kole, eng’ oret agenge anan ko age ketesetai kesoptosi koigeny ketinye kamuget kegeer, kegas ak kibwat. Agot nga u noto, komuktoi ano koyaak ko u noto? Kimuchi kegaste, kegeerte ak kibwat kityo ngotko boisie metinnyo. Ngome chito, ko ma koboisie metit. Ngo ma koboisie metit, ko ma kibwati, ma kegase kiy, ma kegastoi ama kegeere kiy age tugul.

TOS YAAKSEI NEE ENG’ MEET IMAN?

Mat ne kagibar

Ngome mat ko wendi ano?

5 Ingen Jehovah, Yaindetab metit kit ne yaaksei eng’ meet. Ingen Jehovah imanda, ago eng’ Ng’olyondennyi, Bibilia, ko arorwech agobo che kigobek. Kanetutietab Bibilia ne togu ko ni: Ngome chito, ko ma ko mi. Ngo kagome chito, ko ma kosobei. Ma kastoi che kigobek, ma keertoi ama ibwati kiy. Ma mi kebeberta agot agenge eng’ bortonnyo ne tesetai kosobei ye kagome chito. Ma kitinye sobondo anan ko tamirmiriet ne ma meei.*

6 Kingo kagoguuiyo Solomon kole ingen che soptos kole begu, kosir inendet kole: “Ago manaei kiy age tugul che kigobek.” Yeitio kotestai komwa agobo imaninito komie kole, ma imuchi kochamech anan kowechech che kigobek, kora ko “mami boisiet, anan chobutik anan naet, anan ng’omnatet eng’ kererit.” (Amdoindet 9:5, 6, 10) Ko u, noto ko mwaei Tienwogikab Kalosunet 146:4 kole, ye kagome chito, ko “betos kabwatutikyik.” Kitinye borwek che begu ago mami kiy ne tesetai kosobei ye kagome chito. Sobet ne kiboibochini ko kergei ak kandolit ne lalei. Ngebar mat eng’ kandolit, ko ma wendi wui. Meei kityo, ma komi.

KIT NE KIMWA JESU AGOBO MEET

7 Kimwa Jesu Kristo agobo kit ne yaaksei eng’ che kigobek. Kimwa ko u noto agobo chito ne kigiguure Lasaro, ne kiingen inendet komie ago kigagome. Yeityo komwachi Jesu alamalaikyik kolenji: “Inuuchi choruennyo Lasaro.” Kiibwati alamalaik kole, mwaei Jesu agobo ruondo ne ruei Lasaro komunyi amu miani. Kima ko mwaei Jesu ko u noto. Kimwa Jesu komie kole: “Kagome Lasaro.” (Johana 11:11-14) Nai ile, kiigergeite Jesu meet kamung’et ak ruondo. Kima komi Lasaro kipsengwet ago kima komi araraitab mat. Kima wo inendet kotuiyo ak malaikaisiek anan ko kugoisiek che kigobek. Kima wo kesich inendet kogeny ko chito age. Kiimunyi eng’ meet, ko u yo ruei eng’ ruondo ne nyigis ne mami karuotitoet. Igergeite sirutik alak kora meet ruondo. Ko u, kingelage koik alamaliet ne ki kiguure Stepano agoi kome, ko mwaei Bibilia kole ‘kiinuuch.’ (Boisionik 7:60) Ko u noto ko kisir Paulo agobo bik alak che kiga ‘koruiyo’ eng’ meet eng’ betusiekyik.—1 Korintoek 15:6.

Gap chi che boiboi

Kiyai Jehovah bik komeng’is koigeny eng’ ng’ony

8 Tos ki magetab Kamuktaindet eng’ taunet kobek bik? Ma u noto agot kitigin! Kiyai Jehovah chito si kobiit komeng’is eng’ ng’ony koigeny. Ko u ye ki kinetgei eng’ bukuini, ko kiinde Kamuktaindet Adam ak Awa, bik che tai, paradiso ne kararan. Kiigochi icheget borwek che ititaatin. Kimakyin Jehovah icheget tuguk che miachen kityo. Tos mi sigindet ne tinye chamnyet ne makyin lagokyik kogas ng’wanindab osindo ak meet? Achicha! Ki chamei Jehovah lagokyik ago kimakyin icheget koboibochi boiboiyet ne ma begu eng’ ng’ony. Mwaei Bibilia agobo bik kole: “Kiinde [Jehovah] mugulelwekwak kabwatetab koigeny.” (Amdoindet 3:11) Kiyaech Kamuktaindet ketinye maget ne bo kemeng’isie koigeny. Ago kigoyaat oret si kobiit kosulda maganoto.

AMU NEE SI KOBEGU BIK

9 Ara anyun, amu nee si kobegu bik? Si kobiit kenyoru walutiet, ko nyolu kegeer kit ne kiyaak komi chi agenge ak kwony agenge kityo eng’ ng’ony. Mwaei Bibilia kole: “Kiigochi Jehovah Kamuktaindet kobit ket age tugul eng’ ng’ony ne kararan eng’ keeret, ak ne mie eng’ amet.” (Taunet 2:9) Nga u noto, ko kimi kit agenge ne kigiete icheget. Kimwachi Jehovah Adam kolenji: “Imuchi iam logoek che bo ket age tugul ne imache ne mi mbaret; ago mat iam che bo ketit ne bo naet ne kinae ne mie ak ne ya; amu eng’ betut ne keam che bo ketoto, imee ne matiny.” (Taunet 2:16, 17) Ki ma ko ui ng’atutionito kegas it. Ki mi logoekab ketik alak che chang’ che kiimuchi koam Adam ak Awa. Nga no, ko kitinye icheget boroindo koborji kongoi Kamuktaindet ne kiga kogochi tuguk tugul koboto sobet ne ititaat. Ndo kiga kas it, ko ki ta iboru kora kole kigonyiti icheget kimnatetab Kwandannywa ne bo kipsengwet, ago kichobotin koyan kandoinatennyi.

10 Kit ne ya, ko kilewen bik che tai kongelelji Jehovah. Kiboisie Setani ndaret kolenji Awa: “Tos, iman kimwa Kamuktaindet kole, Amat oam logoek che bo ketit age tugul ne bo mbaret?” Kowolji Awa kolenji: “Kichamwech keam logoek che bo ketikab mbaret: ago kimwa Kamuktaindet kole, Amat oam logoek che bo ketit ne mi kwenutab mbaret, amat otwa, si mobegu.”—Taunet 3:1-3.

11 Komwa Setani kole, “Iman, mobegu: amu ingen Kamuktaindet kole, eng’ betut ne koam che bo ketoto koyatogis konyekwok, ak ogergeitu ak Kamuktaindet, onai ne mie ak ne ya.” (Taunet 3:4, 5) Kimache Setani koyan Awa kole, kita nyoru borotet ngot koam logoiyat ne kima kichamji koam. Kosubgei ak Setani, ko kiimuchi kotilchigei Awa kit ne mie anan ko ne ya, kiimuchi koyai kit age tugul ne machei. Kimwa kora Setani kole, ki mwae lembech Jehovah ye kingomwa kit ne ki ta yaaksei ngot koam logoiyat Adam ak Awa. Kiiyan Awa ng’alekab Setani. Kibut anyun Awa logoek ak koam. Yeityo kogochi manong’otiondennyi, koam agine. Maam amu kima kongen. Kiingen komie kole yae kit ne kimachamji Kamuktaindett icheget koyai. Kingoam logoiyat, ko kibut kongen ng’atutiet ne kima ko ui kisub ago ne ki bo iman. Ma konyit icheget Kwandanywa ne bo kipsengwet ak kimnatennyi. Kima komi amu nee si ma kas it Yaindennywa ne tinye chamnyet!

12 Eng’ kabarunet: Tos igastoi ano ngot irib werit anan ko chepto, yeityo kongeleljin eng’ oret ne iborun kole ma konyitin ago ma chamin agot kitigin? Iimin ne bo kwong’ut. Ibwat anyun, ole kigasta Jehovah kingongelelji Adam ak Awa.

Kiyae Jehovah Adam ng’ung’unyek

Kigiyae Adam ng’ung’unyek, ago kiwekyigei ng’ung’unyek

13 Kima komi amu nee kometo Jehovah Adam ak Awa ngelelik kotestai kotebi eng’ ng’ony koigeny. Kibek icheget, ko u ye kigamwa Kamuktaindet kole begu. Kiigeskei Adam ak Awa. Ma sirto koba ole mi tamirmirik. Kinae nito amu kit ne kimwachi Jehovah Adam kingo kago kergong’ agobo ngelelnotennyi. Kimwa Kamuktaindet kole: ‘Iwekyinige ng’ony; amu kiginemunenen yoto; amu i ng’ung’unyek, ak iweekyige ng’ung’unyek.’ (Taunet 3:19) Kiyae Kamuktaindet Adam ng’ung’unyek. (Taunet 2:7) Kima komi Adam kotomo keyai inendet. Ara anyun kingolenji Jehovah Adam iwekyinigei ng’ung’unyek, ko kiiboru kole wekyinigei ole ki u kotomo keyai inendet. Egu Adam ne ma sobei ko u ng’ung’unyek che kiga kiyaen inendet.

14 To tago soptos rani Adam ak Awa, nga u noto ko kibek amu kilewen kongelelji Kamuktaindet ak koyai tengek. Kibegu amu kiinamdech Adam achek tugul tengek ak meet. (Romanik 5:12) Tengegito ko u miando ne ya mising’ ne kinamdogei ne ma imuchi komwee chi. Kit ne konu tengekto ko meet, amu kigichub icheget. Meet ko bunyot ma chorwet. (1 Korintoek 15:26) Kiweekyini kongoi Jehovah ne tia agobo katiaget ne kigonech si kobiit kotiachech eng’ bunyondonito bo kwong’ut!

KENAI IMANDA AGOBO MEET KO BO KAMANUT

15 Kit ne ineti Bibilia agobo bik che kigobek, ko kaigaech mising’. Ko u ye kagegeer, ko magasei ng’wanindo bik che kigobek. Mami amu nee kiywei icheget, amu ma imuchi koitech kiy. Ma kimuchi ketoret, ago ma imuchi kotoretech. Ma kimuchi keng’alalji che kigobek, ago ma imuchi kong’alalwech. Mwae lembechek kandoik che chang’ che bo dinisiek kole, imuchi kotoret bik che kigobek, ago bik tugul che iyani icheget, kogochin kandoichoto robisiek. Nga u noto, ngot kenai imanda agobo bik che kigobek, kotoretech si ma iberberech bik che ineti lembechek che u choto.

16 Tos iyani dining’ung kit ne ineti Bibilia agobo meet? Ma iyani che chang’. Amu nee? Amu kigowal Setani kanetutikwak. Boisie inendet dinisiekab lembech koyai bik koyan kole, ngome borto, kotesetai bik ko soptos eng’ oldab tamirmirik. Nito ko lembeita ne ituitos Setani ak lembechek alak si kowal bik che chang’ koistoege Jehovah Kamuktaindet. Yaitoi ano ko u noto?

17 Ko u ye kagemwa eng’ tai, koneti dinisiek che chang’ kole, ngot ko tinye chito atebet ne ya, ko tun ye me ko wendi mat ne lalei koigeny. Ma konyiti Kamuktaindet kanetutioni. Jehovah ko Kamuktaindet ne tinyei chamnyet ago magoi yai bik konyalilso eng’ ora nito. (1 Johana 4:8) Tos igaste ano ngot igeer chito ne belei eunekab lakwennyi ne ngeleliot koek kergong’iet? Tos itegis chichoto? Eng’ iman, ko tos imach agot inai chichoto? Ne matiny ko achicha! Igeere chichoto ko chi ne ya ago ma tinyei rirge. Ko u noto, ko machei Setani kora kiyan kele inyalili bik Jehovah eng’ mat ne lalei koigeny!

18 Boisiee kora Setani dinisiek alak konet kole, ye kagobek bik kobendi koegu bikab tamirmirik che magat ketegis. Kosubgei ak kanetutioni, komuchi koek tamirmirikab che kigobek choronok anan ko bunik che koromen. Iyani bik che chang’ lembeiito. Iywei bik che kigobek ak kogochin icheget teegisto ak kootei. Ne kata u noto, koneti Bibilia kole, ruitos che kigobek ak nyolu keot Jehovah Kamuktaindet ne bo iman inegei, Yaindet ago Toretindenyo.—Ng’ang’utiet 4:11

19 Ngot inai imanda agobo meet ko ribin si ma iberberin lembeitab dinisiek. Toretin kora iguiye kanetutik alak che bo Bibilia. Ko u, ye inai ile ma sirtoi bik kobendi oldab tamirmirik eng’ meet, kogonin nito iguiye ororutietab sobondab koigeny eng’ ng’ony ne paradiso ile bo iman, ak iyan mising’.

20 Kiteeb keny Job chito ne kiisubi imanda tebutioni kole: “Ngo mee chito, kosobei” kogeny? (Job 14:14) Tos imugaksei koweek kosob chito ne ruei eng’ meet? Kit ne ineti Bibilia agobo nito kogaigaech mising’, ko u ye iboru somanet ne rubei.

KIT NE INETI BIBILIA

  • Ma keertoi che kigobek, ma kastoi ama ibwati kiy.—Amdoindet 9:5.
  • Imung’dos che kigobek, ma nyalildos.—Johana 11:11.
  • Kibegu amu kiinamdech Adam tengek.—Romanik 5:12.

*  Si inai che chang’ agobo “sobondo” ak “tamirmiriet,” kaigai keer Ng’alek che Kigites.


Teebutik che Kinetegei

1-3. Ngorcho teebutik che teebei bik agobo meet, ago walu nee dinisiek che chang’?

4. Nee kit agenge ne iyani dinisiek che chang’ agobo meet?

5, 6. Nee kit ne ineti Bibilia agobo bik che kigobek?

7. Kiiarorundo ano Jesu kit ne u meet?

8. Kinaitoi ano kele kima ko magetab Kamuktaindet kobek bik?

9. Nee kit ne kietee Jehovah Adam, ago amu nee si kima ko ui kogas it ng’atutionoto?

10, 11. (a) Ma kas it bik che tai Kamuktaindet eng’ or nee? (b) Amu nee si ki kiy ne korom ngelelnotetab Adam ak Awa?

12. Nee kit ne imuchi kotoretech kiguiye ole kigasta Jehovah ye kingongelelji Adam ak Awa?

13. Kile Jehovah yaaksei nee ye me Adam, ago iboru nee nito?

14. Amu nee si kebegu?

15. Amu nee si kenyoru kagaigaet ngot kenai imanda agobo meet?

16. Ng’o ne kigowal kanetutikab dinisiek che chang’, ago eng’ or nee?

17. Amu nee si ko kanetisietab mat ne lalei koigeny ko ma konyiti Jehovah?

18. Ootetab che kigobek, kotiengei kanetisiet ngoro ne bo dinisiekab lembech?

19. Ye kinai imanda agobo meet kotoretech kiguiye kanetutiet age ngoro ne bo Bibilia?

20. King’alale teebutiet ngoro eng’ somanet ne rubei?