Siirte iwe tuguk che biitu

Siirte iwe menu alak

Siirte iwe tuguk che mi orit

Baorinikab Jehovah

Kalenjin

Kanetutikab Bibilia che bo Iman

SOMANETAB TAMAN AK SOGOL

Mebagach Chamnyetab Kamuktaindet

Mebagach Chamnyetab Kamuktaindet

Kecham Kamuktaindet ko keyai nee?

Ma kibagachi eng’ or nee chamnyetab Kamutaindet?

Tun iberuri Jehovah eng’ or nee bik che ma bagachi chamnyennyi?

IBWAT iwendi eng’ oret eng’ betutab koristo ne o ak ropta. Tesetai kotuegitu bolik. Kanaam koliel, ak kotul tulet ne o, ak korongei ropta ne o mising’. Ichaktoi icheng’e ole imuchi iyumee. Eng’ oret taban, igeer got ne imuchi iyumee. Kigiteech komie, yamat, ago kararan. Igeere ko bo kamanut yoto ne tia!

Chito ne cheng’ei ole yumee

Iyae Jehovah koek ole iyume eng’ betusiechu yaach?

2 Kimi betusiek che yaach che u choto. Tesetai tuguk che yaaksei eng’ ng’onyuni koyagitu. Nga u noto, komi ole ribot ole kimuchi keyumee si ma amech kiy. Tos ano yuto? Keer kit ne ineti Bibilia, mwae kole: “Amwae agobo Jehovah ale, Inendet ole amwechini ak ko irimennyu Kamuktaindennyu ne amang’u.”—Tienwogikab Kalosunet 91:2

3 Ibwat noto! Imuchi koek Jehovah Yaindennyo ne bou ng’ony komugul ole kimwechini ago ne ribech. Imuchi koribech amu kim inendet kosiir chi age tugul anan kiy age tugul ne imuchi koimech. Agot ndo kinyoru kaimutik, komuchi koisto Jehovah tuguk tugul che yaachen che kigoibwech kaimutik. Kimuchi keyai Jehovah koek ole kimwechini eng’ or nee? Magat kimang’u inendet. Ne siirei tugul, komwawech Ng’olyotab Kamuktaindet kole: “Oripge [“mebagach,” NW] eng’ chamnyetab Jehovah.” (Juda 21) Ee, ma magat kebagach chamnyetab Kamuktaindet, nyolu kerib choruandinnyo ak Kwandanyo ne bo kipsengwet. Ye kiyai ko u noto, kenae eng’ iman kele kimwechini inendet. Nga u noto, kimuchi kiyaite ano choruandit ne u nito?

NAI CHAMNYET KAMUKTAINDET AK IYAI KOSUBGEI AK CHAMNYONOTO

4 Si ma kibagach chamnyetab Kamuktaindet, ko magat iguiye ole kigoborundech Jehovah chamnyet. Ibwat kanetutikab Bibilia alak che kigotoretin bukuini inetgei. Ko Yaindet Jehovah, ko ki kogonech inendet ng’ony koek gaa ne kiboiboichini. Kigonyiit ng’ony amitwogik ak beek, tuguk che toretech, tiong’ik che iboiboech ak oldinwek che kororon. Amu ng’alek che mi Bibilia ko bunu Kamuktaindet, ko kigong’ang’wech inendet kainennyin ak atebennyi. Ne sirei tugul, ko mwawech Ng’olyondennyi kole, kiiyok inendet Werinnyi ne chamei konyo ng’ony konyalil ak kome agobo achek. (Johana 3:16) Tos iborwech nee konunotiondonito? Konech kamang’unet ne bo betusiek che bwonei che bo kwong’ut.

5 Kamang’unennyo ne bo betusiek che bwanei kotiengei kora kit age ne kigoyai Kamuktaindet. Kigochob Jehovah laitornatetab kipsengwet, noto ko Bounatetab Mesia. Konegit kogesu Bounatonito nyalilwogik tugul ak koyai ng’ony koek paradiso. Ibwat! Kimuchi kemeng’isie eng’ paradiso eng’ kalyet ak boiboiyet koigeny. (Tienwogikab Kalosunet 37:29) Kotomo koit betunoto, ko kigogonech Kamuktaindet kandoinatet agobo sobet si kobiit kimuch ketebi eng’ oret ne kararan rani. Kigogonech kora kononutiot ne bo saet, nito ko oret ne kimuchi keng’alalji inendet kasarta age tugul. Chuto ko ortinwek tutigin kityo che kigoborji Jehovah bik tugul chamnyet, koboten.

6 Teebutiet ne bo kamanut ibwat ko ni: Tos ayai nee kosubgei ak chamnyetab Jehovah? Mwae bik che chang’ kole, “Magat acham Jehovah ak ane.” Tos igase ko u noto eng’ muguleldang’ung’? Kimwa Jesu kole, ng’atutiet ne o eng’ tugul ko ni: “Cham Kiptaiyat Jehovah neng’ung’ eng’ muguleldang’ung’ komugul, ak eng’ sobondong’ung’ komugul, ak eng’ ng’omnateng’ung’ komugul.” (Matayo 22:37) Eng’ iman, itinye tuguk che chang’ che yain icham Jehovah Kamuktaindet. Nga u noto, ko tos igas eng’ muguleldang’ung’ kityo ile itinye chamnyonoto koboru kole ichame Jehovah eng’ muguleldang’ung’, sobondong’ung’, ak ng’omnateng’ung’?

Keswotab logoiyat

7 Kosubgei ak ole iborundoi Bibilia, ko kecham Kamuktaindet ko ma kit ne kigasei eng’ muguleldo kityo. Eng iman, nga bo kamanut igas eng’ muguleldo ile ichame Jehovah, ko noto ko taunetab chamnyet ne bo iman eng’ inendet. Bo kamanut keswotab logoiyat si kobiit kenyor ketit ne yiei logoek. Nga u noto, ngot imache logoiyat, ko tos yamei kogonin chito keswot inegei kityo? Achicha! Ko u noto, igas eng’ muguleldo ile ichame Jehovah Kamuktaindet, ko taunet kityo. Ineti Bibilia kole: “Amu ni chamnyetab Jehovah, ale kerib ng’atutikyik: ama nyigisen ng’atutikyik.” (1 Johana 5:3) Eng’ iman, ko magat koi logoek che miach chamnyet ne keting’ee Kamuktaindet. Magat kibor eng’ boisionik.—Matayo 7:16-20.

8 Kiboru kele kichame Kamuktaindet ye kisub ng’atutikyik ak keboisie eng’ sobennyo. Ma ui mising’ keyai ko u noto. Ne kata nyigisitu ng’atutikab Jehovah, ko kigichob ng’atutichuto si kotoretech keboiboichi sobet. (Isaia 48:17, 18) Ye kimeng’isie kosubgei ak kandoinatetab Jehovah, kiborjini Kwandannyo ne bo kipsengwet kele kiweekyini inendet kongoi eng’ iman agobo tuguk tugul che kigoyaiywech. Nga u noto, ko bik tutigin kityo eng’ ng’ony rani che yae ko u noto. Ma kimache keegu bik che ma tinyei kongoi ko u bik alak che kimi komi Jesu ng’ony. Kiisob Jesu bik taman che kitinyei mogondosik, nga u noto, ko kiweek agenge kityo koweekyi inendet kongoi. (Luka 17:12-17) Eng’ iman, kimache kegergeitu ak chichoto kitinyei kongoi, ma ko u bik sogol che kima kotinyei kongoi.

9 Ara anyun, nee ng’atutikab Jehovah che magat kisub? Kigeng’alale alak eng’ bukuini, nga u noto, ngegetyingei tutigin eng’ ng’atutichoto.Ye kisub ng’atutikab Kamuktaindet kotoretech si ma kibagach chamnyetab Kamuktaindet.

RIKYI JEHOVAH BETUSIEK TUGUL

10 Kinetgei agobo Jehovah ko kakwautiet ne bo kamanut si kobiit irikyi inendet. Nito ko kit ne nyolu kotestai betusiek tugul. Ngele imite sang’ iyue mat eng’ kemout ne kaitit, ko tos imete mat kome? Achicha. Itesetai itesyini kwenik si kobiit kotestai kolal mat. Imuchi kotiengei sobeng’ung’ ngot itesetai ilali mat! Ko u ole ilaldoi kwenik mat, ko u noto ‘naetab Kamuktaindet,’ igimiti chamnyennyo eng’ Jehovah.—Kalewenaik 2:1-5.

Ko u mat, ko magat itesyi kwenik chamnyengung’ eng’ Jehovah si kotestsi kolal

Chito ne yuei mat

11 Kimachei Jesu kasubikyik korib chamnyennyua eng’ Jehovah ak Ng’olyondenyi ne bo iman kotestai kogimit. Kingo kaging’eet Jesu, koneet kasubikyik aeng’ agobo maoinatosiek che mi Sirutikab Hebranik che kiisulda eng’ inendet. Tos kigasta ano icheget? Kimwa icheget kole: “Tos ki ma lal mat eng’ mugulelwekwok, yu kang’alalwech eng’ oret, kong’ang’wech sirutik?”—Luka 24:32.

12 Ki ye inaam inetgei kit ne ineti Bibilia, ko tos kiibaibaitu ak inaam igiilgei imwachi bik alak agobo imanda ak icham Kamuktaindet? Ne matiny, ko kiiyai ko u noto. Kigogas bik che chang’ ko u noto. Kit ne ui anyun nguno iyai, ko itestai igimit chamnyonoto. Ma kimache kisub kit ne u bik eng’ ng’onyuni rani. Kisib komwa Jesu kole: ‘Tun kaitititu chamnyetab che chang’.’ (Matayo 24:12) Tos imuchi iribte ano chamnyeng’ung’ eng’ Jehovah ak eng’ imandab Bibilia si ma kaititit?

13 Testai inetgei agobo Jehovah Kamuktaindet ak Jesu Kristo. (Johana 17:3) Ibwat mising’ kit ne inetigei eng’ Ng’olyotab Kamuktaindet, ak iteebegei ile: ‘Tos ineeta nee nito agobo Jehovah Kamuktaindet? Tos nee kit age ne kona acham inendet eng’ muguleldanyu komugul, ng’omnatenyu komugul ak sobondanyu komugul?’ (Tienwogikab Kalosunet 77:12) Ye ibwat ko u noto, kotoretin nito kogimit chamnyeng’ung’ eng’ Jehovah.

14 Oret age ne yae chamnyeng’ung’ eng’ Jehovah kotestai kogimit, ko isa betusiek tugul. (1 Tesalonikek 5:17) Kiginetgei eng’ Somanetab 17 ne bo bukuini kele, saet ko konunotiot ne bo kamanut ne bunu Kamuktaindet. Ko u ye tiengei choruanditab bik ng’alalet ne bo betusiek tugul, ko si kobiit kotestai chamnyennyo eng’ Jehovah ko nyolu kesa inendet betusiek tugul. Bo kamanut kobun muguleldo sautikyok, ma nyolu kegetyigei ng’alekab buch. Magat keng’alaji Jehovah ko u yo ng’alaljin lakwet kwandanyi ne chamei. Eng’ iman, kimache keng’alalji inendet eng’ konyit, nga u noto ko magat kobunu mugulelwekyok saet ago ma magat kiywei. (Tienwogikab Kalosunet 62:8) Ee, inetgei Bibilia inyege ak sautik che bunu muguleldo ko tuguk che bo kamanut ye ioote Kamuktaindet ago toretin si ma ibagach chamyetab Kamuktaindet.

NYORU BOIBOIYET YE IOOTE KAMUKTAINDET

15 Inetgei Bibilia inyegei ak saet ko ortinwek che kimuchi keoot Kamuktaindet ko ma keerech chi. Nga u noto, ngegeer oret ne kioote Kamuktaindet eng’ taitab bik, nito ko kemwachi bik alak agobo tuguk che kiyani. Tos koinaam imwachi bik alak agobo imandab Bibilia? Ngot ko u noto, ko kiiboiboichi kasarta ne kararan ne kigo konech Kamuktaindet keboisiechin inendet. (Luka 1:74) Ye kimwachi bik alak imanda ne kiginetgei agobo Jehovah Kamuktaindet, keyae boisiet ne bo kamanut ne kigigochi Kristianik tugul che bo iman, noto ko boisiet ne bo keamda logoiywek che miach che bo Bounatetab Kamuktaindet.—Matayo 24:14; 28:19, 20.

16 Kigeer Paulo boisiennyi ko kit ne bo kamanut, kiguure agenge eng’ konoraik. (2 Korintoek 4:7) Kemwachi bik alak agobo Jehovah Kamuktaindet ak magutikyik, ko boisiet ne kararan kosiir tugul ne imuchi iyai. Nito ko boisiet ne kiboisiechini Magoriot ne mie kosiir tugul ago kinyoru borotet ye kiyai boisionito kosiir boisiet age tugul. Ye iyai boisionito, itoreti bik che tinyei mugulelwek che miach korikyi Kwandanyo ne bo kipsengwet ak kotestai kobun oret ne wendi sobondab koigeny! Tos mi boisiet age ne kararan kosiir nito? Kora, ye ibaorian agobo Jehovah ak Ng’olyondennyi, kogimiti kayaneng’ung’ ak chamnyeng’ung’ eng’ inendet. Ago boiboichin Jehovah boisiet ne iyae. (Hebranik 6:10) Ye itestai iyai boisionito eng’ kagiiletabgei kotoretin si ma ibagach chamnyetab Kamuktaindet.—1 Korintoek 15:58.

17 Bo kamanut kibwat kele boisietab keamda logoiywekab Bounatet ko kit ne nyolu keyai eng’ chokyinet rani. Amu nee? Mwawech Ng’olyotab Kamuktaindet kole: “Karik betut ne o ne bo Jehovah, negit ago chogu mising’.” (Sepania 1:14) Ee, chogu betut ne tun iwong’u Jehovah ng’onyuni ya. Magat kiteechi bik! Magat konai icheget kole, rani kasarta ne magat kolewen Jehovah koek Bounindet ne bou ng’ony komugul. “Maigaegei” betutab let.—Habakuk 2:3.

18 Makwech Jehovah keoot inendet kemi ak Kristianik che bo iman. Noto amu nee si komwawech Ng’olyondennyi kole: “Ak ongibwatgei achege eng’ achege kigimitge eng’ chamnyet ak boisiosiek che miach; ama kibagaktoi kituiyegei achege eng’ achege, ko u bitetab bik alak, ago kiteechinige; ak ko u noto kosiir, ko u ye ogeere ole rigu betut.” (Hebranik 10:24, 25) Ye kituiyegei ak kayanik alak eng’ tuiyosiekab Kristianik, ketinye kasarta ne bo kwong’ut kilosu ak keoot Kamuktaindennyo ne kichame. Kigimitigei ak kecheregei kora.

19 Ye kituiyegei ak kiboitinikab Jehovah, kigimiti chamnyet ak choruandit eng’ tuiyet. Bo kamanut kegeer atebosiek che miach eng’ bik alak ko u ole keertoi Jehovah tuguk che miach eng’ achek. Megeer Kristianik alak ko u yo ititaatin. Ibwat ile teerchin ole kigoit chorwanditab age tugul eng’ achek ak Kamuktaindet, ago lelei age tugul eng’ achek. (Kolosaik 3:13) Cheng’ iyai choruandit ak bik che chamei Jehovah mising’, nito ko yaei koet choruanding’ung’ ak Kamuktaindet. Ee, ye ioot Jehovah omite ak tupchosieguk che Kristianik kotoretin si ma ibagach chamnyetab Kamuktaindet. Iberurtoi ano Jehovah che ootei inendet eng’ kayanet si mabagach chamnyennyi?

ITYI “SOBONDO NE BO IMAN”

20 Iberuri Jehovah kiboitinikyik che bo iman kogochi sobet, nga u noto ko sobet ne u nee? Eng’ iman tos isobe rani? Wolu che chang’ kole kisoptosi. Eng’ tugul, kibusi, kiamisiei, ak keeisei. Eng’ iman kesoptosi. Eng’ kasarwek che bo boiboiyet komuchi kemwa kele, “Nito ko sobet ne bo iman!

Gap chi che boiboichin paradiso

Machei Jehovah iboibochi “sobet ne bo iman.” Tos tun imi si iboibochi?

21 Igilech Ng’oliotab Kamuktaindet ‘kenam sobondo noto ne bo iman.’ (1 Timoteo 6:19) Iboru ng’alechoto kole “sobondo ne bo iman” ko kit ne kimang’u kele tun kinyoru eng’ betusiek che bwanei. Ye kinyoru sobondab koigeny ne kigeni, eng’ ng’ony ne paradiso ko tun ma kimiandosi ago ma kiyosegitu. Tun kiboiboichini kalyet ak boiboiyet. Eng’ betu noto ko tun kiboiboichini “sobet ne bo iman” noto ko sobet ne kimakwech eng’ tai, sobondab koigeny. (1 Timoteo 6:12) Tos ma kamang’unet ne bo kwongut noto?

22 Kimuchi ‘kenam sobondo ne bo iman’ eng’ or nee? Igiili kora Paulo Kristianik “koyai ne mie” ak “koek magorek eng’ boisionik che miach.” (1 Timoteo 6:18) Eng iman, ko tiengei ole kisubtoi imanda ne kiginetgei eng’ Bibilia. Nga u noto, ko tos kimwae Paulo kole kinyoru “sobondo…noto ne bo iman” ye kiyai boisionik che miach? Achicha, amu kamang’unanoto bo kwangut ko tiengei “mieindab” Kamuktaindet (Romanik 5:15) Nga u noto, ko boibochin Jehovah koberur bik che boisiechin inendet eng’ kayanet. Machei kogeer imeng’isiei ‘sobet ne bo iman.’ Igeni bik tugul che ma bagachi chamnyetab Kamuktaindet sobet ne u noto ne bo boiboiyet, kalyet ak ne bo koigeny.

23 Nyolu kotebegei age tugul eng’ achek kole, ‘Tos aoote Kamuktaindet eng’ oret ne mwaei inendet eng’ Bibilia?’ Ngot keoote Kamuktaindet eng’ oret ne u noto betusiek tugul, kemi oret ne bo iman. Kitinye kamang’unet kele Jehovah ko ole kimwechini. Tun ribei bikyik che iyanotin eng’ betusiekab let che bo ng’onyuni ya. Tun saruech Jehovah ak kogonech ng’onyut ne leel ne negit. Tun ko kiboiboi ne tia kegeer kasarata! Ak tun kiboiboi ne tia kegeer kele kigilewen kisub oret ne nyolu eng’ betusiechu bo let! Ngot ilewen ko u noto rani, iboibochini ‘sobet ne bo iman,’ sobet ne bo koigeny ko u ole kimaktoi Jehovah Kamuktaindet!

KIT NE INETI BIBILIA

  • Kiboru chamnyet ne bo iman eng’ Kamuktaindet ye kisub ng’atutikyik ak keboisie eng’sobonwekyok.—1 Johana 5:3.
  • Kinetgei Bibilia, kesa Jehovah saet ne bunu muguleldo, kinet bik alak agobo inendet ak keoot inendet eng’ tuiyosiekab Kristianik kotoretech si ma kibagach chamnyetab Kamuktaindet.—Matayo 24:14; 28:19, 20; Johana 17:3; 1 Tesalonikek 5:17; Hebranik 10:24, 25.
  • Bik che ma bagachi chamnyetab Kamuktaindet kotinyei kamang’unet koboibochi ‘sobet ne bo iman.’—1 Timoteo 6:12, 19; Juda 21.

Teebutik che Kinetegei

1, 2. Kimuchi kenyorjin ano rani ole ribot?

3. Kimuchi keyai Jehovah koek ole kimwechini eng’ or nee?

4, 5. Ngorcho ortinwek che kigoboisie Jehovah koborwech chamnyet?

6. Imuchi iyai nee kosubgei ak chamnyet ne kigoborun Kamuktaindet?

7. Tos mi kit age ne magat iyai kora kosiir igas eng’ muguleldo ile ichame Kamuktaindet kityo? Iaroru.

8, 9. Kimuchi kiborji Kamuktaindet chamnyennyo ak kongoi eng’ or nee?

10. Iaroru amu nee si ko bo kamanut itestai inetgei agobo Jehovah Kamuktaindet.

11. Tos kigasta ano kasubikab Jesu konetisiennyi?

12, 13. (a) U nee chamnyetab bik che chang’ rani eng’ Kamuktaindet ak eng’ Bibilia? (b) Tos kimuchi keribten ano chamnyenyo si ma kaititit?

14. Toretech eng’ or nee saet si kobiit kotestai chamnyennyo eng’ Jehovah kogimit?

15, 16. Amu nee si ko nyolu kegeer boisietab keamda logoiywekab Bounatet ko konoraik ago boisiet ne iboru kole konyitech Kamuktaindet?

17. Amu nee si ko boisietab Kristianik ko nyolu keyai eng’ chokyinet?

18. Amu ne si ko nyolu keoot Jehovah kemitei ak Kristianik che bo iman?

19. Tos kiyaite ano boisiet si kigimit chamnyet eng’ tuiyetab Kristianik?

20, 21. Nee “sobet ne bo iman,” ago amu nee si ko bo kamangunet ne bo kwong’ut?

22. Imuchi ‘inam sobondo ne bo iman’ eng’ or nee?

23. Amu nee si ko bo kamanut ma kibagach chamnyetab Kamuktaindet?

Ineetgei che Chang'

Som Kanetisietab Bibilia ne ma Kiyachei Chi

Amu Nee si Konyolu Ineetgei Bibilia?

Toreti Bibilia bik milionisiek eng’ ng’ony komugul konyor wolutik che bo teebutik che eechen eng’ sobet. Tos imache iegu agenge eng’ bichoto?