Siirte iwe tuguk che biitu

Siirte iwe menu alak

Siirte iwe tuguk che mi orit

Baorinikab Jehovah

Kalenjin

Kanetutikab Bibilia che bo Iman

SOMANETAB TAMAN AK MUT

Keoot Kamuktaindet eng’ Oret ne Iyani

Keoot Kamuktaindet eng’ Oret ne Iyani

Tos iboiboi Kamuktaindet dinisiek tugul?

Tos kimuchi kenaite ano dinit ne bo iman?

Ng’o kiboitinikab Kamuktaindet che bo iman eng’ ng’ony rani?

IWATECH Kamuktaindet mising’ ago makwech kenyoru borotet eng’ kandoinatennyi ne bo chamnyet. Ngot keoot Kamuktaindet eng’ oret ne nyolu, keboiboitu ak keistoegei kaimutik che chang’ eng’ sobet. Kinyoru kaberurennyi ak toretennyi kora. (Isaia 48:17) Nga u noto, komi dinisiek che chang’ che mwaei kole ineti imanda agobo Kamuktaindet. Ago dinisiechuto koteerchin kanetutikwak agobo Kamuktaindet, kele ng’o inendet ak nee kit ne makwech keyai.

2 Tos inaite ano oret ne nyolu keoot Jehovah? Magoi inetgei ak igeerchine kanetisiosiek tugul che bo dinisiek che chang’. Magat inetgei kityo kit ne ineti Bibilia iman agobo dinitab iman. Eng’ kaborunet: Ndo kigonin boisiet iwe mbar ikwei chebololinik (mogobek), ko tos inaite ano ne kigorur? Tos itil age tugul ak iyoo yeitio ichamcham si inai ngot ko kigorur? Tos ma bo kamanut inetgei ole kinaitoi chebololet ne kigorur? Ye kainai komie ole kinaitoi chebololet ne kigorur, ko nyumnyumitu inai chebololosiek che tomo koruryo. Ko u noto, ngot kinetgei ole kinaitoi dinit ne bo iman, kenae dinisiek che bo lembech.

3 Bo kamanut keoot Jehovah eng’ oret ne iyani inendet. Iyani bik che chang’ kole, ibaibai Kamuktaindet dinisiek tugul, nga u noto, ko ma ineti Bibilia ko u noto. Ma yamei agot kityo koguuregei chito Kristianindet. Kimwa Jesu kole: “Ma itei age tugul bounatetab kipsengwet ne lenjina, Kiptaiyandani, Kiptaiyandani; ago inendet ne yae magetab Baba ne mi kipsengwet.” Ko u noto, si koyanech Kamuktaindet, ko magat kinetgei agobo tuguk che makwech inendet keyai ak keyai magutichoto. Ki kuure Jesu bik che ma yaei magutikab Kamuktaindet ‘che yae yaitio.’ (Matayo 7:21-23) Ko u chebololet ne tomo korur, ko buch dinisiek che bo lembech. Ne ya agot mising’, koberberi bik dinisiek che u chuto.

4 Igochin Jehovah chi age tugul eng’ ng’ony kasarta si konyor sobondab koigeny. Nga u noto, si kenyoru sobondab koigeny eng’ Paradiso, ko magat keoot Kamuktaindet komie ak kemeng’isie rani eng’ oret ne iyani inendet. Kit ne ya, ko ma iyani che chang’ koyai ko u noto. Noto amu nee si kimwa Jesu kole: “Obun okwek kurget ne mariich: amu kurget ne baraa, ak oret ne tebees, noto ne wendi ng’emisiet, ak chang’ che bunei noto kot koit oloto. Amu mariich kurget, ak ko bichii oret, ne wendi sobondo, ak ng’erinng’ che nyoru.” (Matayo 7:13, 14) Dinitab iman kondochin bik konyor sobondab koigeny. Dinitab lembech kondochin bik koba ng’emisiet. Ma machei Jehovah keng’em chi age tugul, noto amu nee si kogochin bik eng’ komoswek tugul boroindo konetgei agobo inendet. (2 Petero 3:9) Ko u noto, eng’ iman, ole kiotitoi Kamuktaindet komuchi kogonech sobondo anan ko meet.

OLE KINAITOI DINIT NE BO IMAN

5 Tos kinyorundo ano oret ‘oret ne wendi sobondo’? Kimwa Jesu kole, toogu dinitab iman eng’ sobetab bik che isubi dininoto. Kimwa inendet kole: “Onae ichek logoekwak…ketit age tugul ne mie, yiei logoek che miach.” (Matayo 7:16, 17) Eng’ ng’alek alak, ko icheget che isubi dinit ne bo iman kenaen kayanennywa ak atebennywa. Nga ma ititaatin ak kolelei, koyae kiboitinik che bo iman magetab Kamuktaindet eng’ kibagenge. Ngegeer tuguk lo che kinaen bik che isubi dinit ne bo iman.

BIK CHE OOTEI KAMUKTAINDET ENG’ ORET NE BO IMAN

  • ko boisiee Bibilia eng’ kanetutikwak
  • ko ootei Jehovah inegei ago amdoi agobo kainennyi
  • koborjingei chamnyet ne bo iman
  • koyani kole Jesu ko oret ne boisiee Kamuktaindet kosor bik
  • ko ma bo ng’ony
  • ko amdoi agobo Bounatetab Kamuktaindet kole noto ko kamang’unet ne inegei eng’ bik
Bikab bororiosiek che teerchin che ootei Kamuktaindet

6Tiengei Bibilia kanetutik che bo kiboitinikab Kamuktaindet. Mwae Bibilia kole: “Bunu kabusetab Jehovah sirutiet age tugul, ak kotoreti eng’ konetisiet, eng’ kergong’iet, eng’ kateechinet, eng’ kotigonet ne mi eng’ imanda: si kobiit koek chitab Jehovah, ne inetat, ne kigichob koek ne ititaat eng’ boisiet age tugul ne mie.” (2 Timoteo 3:16, 17) Kisirji Paulo Kristianik kole: “Ye kingotaach ng’olyot ne kiogasenech, noto ng’olyotab Jehovah, kiotaach, ma ko u ng’olyotab bik, ago ko u ye mi eng’ imanit, ng’olyotab Jehovah.” (1 Tesalonikek 2:13) Ko u noto, kayanosiek ak boisionikab dinit ne bo iman ko ma tiengei kanetisiet anan ko bitonwekab bik. Tiengei Ng’olyotab Kamuktaindet, Bibilia.

7 Kigon Jesu Kristo kaborunet ne kararan ye kingo boisiee Ng’olyotab Kamuktaindet eng’ kanetisiennyi. Ye kingosae inendet Kwandanyi ne bo kipsengwet, ko kimwa Jesu kole: “Imanit ng’olyondeng’ung’.” (Johana 17:17) Kiiyani Jesu Ng’olyotab Kamuktaindet, ago kiy age tugul ne kiinet inendet, ko kinamegei ak Sirutik. Kimwa Jesu konyil che chang’ kole: “Sirat.” (Matayo 4:4, 7, 10) Ki ye ibata noto, komwa kit ne mwae sirutiet. Ko u noto, ko ma ineti bikab Kamuktaindet rani kabwatutikwak. Iyani kole Bibilia ko Ng’olyotab Kamuktaindet, ago boisiee komie icheget sirutik eng’ kanetutikwak.

8Bik che isubi dinitab iman, kootei Jehovah inegei ak komwachin bik alak kainanito. Kimwa Jesu kole: “Ilosu Kiptaiyat Jehovah neng’ung’, ak iboisiechi inendet inegei.” (Matayo 4:10) Ko u noto anyun, ko ma ootei kiboitinikab Kamuktaindet kiy age, ootei Jehovah inegei. Ootanito koboto kineet bik konai kainetab Kamuktaindet ak kit ne u inendet. Mwae Tienwogikab Kalosunet 83:18 kole: “Inyendet inyege ne kaineng’ung’ ko JEHOVAH, inye ko i Ne Toror Mising’ ne bou ng’ony komugul.” Kigon Jesu kaborunet eng’ ole kimuchi ketoretito bik konai Kamuktaindet, amu kimwa inendet eng’ saet kole: “Kiaborji kaineng’ung’ bik che kiigona eng’ ng’ony.” (Johana 17:6) Ko u noto, kiboitinik che bo iman rani koneti bik alak agobo kainetab Kamuktaindet, magutikyik ak atebosiekyik.

9Iborjingei bikab Kamuktaindet chamnyet ne bo iman. Kimwa Jesu kole: “Naei bik tugul kole o alamaliennyu [“alamalaikyuk,” NW], ngochamdosi.” (Johana 13:35) Ki ting’engei chamnyet ne u noto Kristianik che ki bo tai. Chamnyet ne ineti Kamuktaindet kole nyolu ketinye, ko ne yaech kecham bik tugul ngo lelach anan ko tuen, anan ko bo emotinwek che teer, ago ituiyech chamnyonito eng’ tupchondit ne ma imuchi kong’eti kiy age tugul. (Kolosaik 3:14) Bikab dinisiek che bo lembech ko ma tinyei chamnyet ne u noto. Kinaitoi ano nito? Barei bikab kutuswek alak. Ma namei karikab luget Kristianik che bo iman si kobar chi age tugul. Mwae Bibilia kole: “Ng’ang’aksei lagokab Jehovah eng’ nito, ak lagokab oindet: chi age tugul ne mayae imanda ko ma bo Jehovah, anan inendet ne ma chamei ne tupcho.…[“nyolu,” NW] kechamnye achege eng’ achege. Ma ko u Kaen ne ki bo inendet ne ya, ak kibar ng’etab kamet.”—1 Johana 3:10-12; 4:20, 21.

10 Eng’ iman, chamnyet ne bo iman ko ma keistoengei baretab bik kityo. Bosiee Kristianik che bo iman kasartanywa, kimnatennywa, ak tugukwak si kobiit kotoret ak kogimit bik alak. (Hebranik 10:24, 25) Toretigei eng’ kasarwek che bichien ak koyachin bik alak eng’ oret ne mie. Eng’ iman, ko boisiee icheget eng’ sobennywa ng’atutietab Bibilia ne mwae kole, keyachi “bik tugul ne mie.”—Galatiek 6:10.

11Kristianikab iman koyani kole Jesu Kristo ko oret ne boisiee Kamuktaindet kosorwech. Mwae Bibilia kole: “Ama mi yetunet eng’ chito age: amu mami kainet age eng’ kureretab kipsengwet, ne kigigochi bik, ne kanyol kesorunenech.” (Boisionik 4:12) Ko u ye kigigeer eng’ Somanetab 5, ko kiigoito Jesu sobondannyi koek katiaget eng’ bik che kasei it Kamuktaindet. (Matayo 20:28) Kora, ko Laitoriat Jesu ne kilewen Kamuktaindet eng’ Bounatetab kipsengwet ne tun bou ng’ony komugul. Ago makwech Kamuktaindet kegas it Jesu ak keboisiee kanetutikyik ngot kemache sobondab koigeny. Noto amu nee si komwae Bibilia kole: “Tinye sobondab koigeny ne iyani Werit; ama keerei sobondo ne magase it Werit.”—Johana 3:36.

12Kristianik che bo iman ko ma bo ng’ony. Kingomi tiemisiet eng’ taitab Pilato ne ki laitoriatab Romanik, komwa Jesu kole: “Ma bo ng’onyuni laitornatennyu.” (Johana 18:36) Eng’ emet age tugul ne menyei kasubikab Jesu che bo iman, komining’ityingei icheget Bounatennyi ne bo kipsengwet, noto amu nee si ko ma siebei komosta age tugul eng’ bolatosiekab ng’onyuni. Ma toreti komosta age tugul eng’ suriosiekab bolatosiechoto. Nga u noto, ko ma teerei kiboitinikab Jehovah bik alak che mache kochut bolatosiek, koborchigei ng’echeret, anan kobir kura. Ago nga ma siebei komosta age tugul eng’ bolatosiek kiboitikab iman che bo Kamuktaindet, ko konyiti icheget ng’atutikab emet. Amu nee? Amu ng’atei icheget Ng’olyotab Kamuktaindet ‘kogas it bounatosiek che eechen.’ (Romanik 13:1) Ngo ma namgei magutikab Kamuktaindet ak magutikab bolatosiek, koyae kiboitinikab Kamuktaindet ko u alamalaik che kimwa kole: “Kanyol kegas it Jehovah kosiir bik.”—Boisionik 5:29; Mariko 12:17.

13Amdoi kasubikab Jesu che bo iman agobo Bounatetab Kamuktaindet kole, nito ko kamang’unet ne inegei eng’ bik. Kisib komwa Jesu kole: “Ak keamdaati logoiywechu miach bo bounatet eng’ ng’ony komugul koek baornatet eng’ bororiosiek tugul; ak koit anyun kagesunet.” (Matayo 24:14) Amdoi kasubikab iman che bo Jesu Kristo kole, kamang’unetab bik ne igesu kaimutikwak, ko Bounatetab Kamuktaindet ne bo kipsengwet kityo ma laitorinikab ng’ony. (Tienwogikab Kalosunet 146:3) Kiinetech Jesu kesa agobo bounatonoto ye kingomwa kole: “Ingonyo Bounateng’ung’. Ingoyaak eng’ ng’ony mageng’ung’, ko u ye kiyae eng’ kipsengwet.” (Matayo 6:10) Kisib komwa Ng’olyotab Kamuktaindet kole tun “tuatui ak koges bounatosiechuto tugul [che mitei rani], ak tononi koigeny,” Bounatetab kipsengwet.—Daniel 2:44.

14 Kosubgei ak kit ne kageng’alale, teebegei ko u ni: ‘Ngoro dinit ne boisiee Bibilia eng’ kanetutikyik tugul ago yaei konaak kainetab Jehovah? Ngoro dinit ne iboru chamnyet eng’ oret ne ineteech Jesu kiboru, ne iyani Jesu, ne ma bo ng’ony, ago amdoi kole kamang’unet ne inegei ne bo iman eng’ bik, ko Bounatetab Kamuktaindet? Eng’ dinisiek tugul che bo ng’onyuni, ko tos inai ne yaei tuguchuto tugul?’ Toogu komie kele, Baorinikab Jehovah che yaei tuguchuto.—Isaia 43:10-12.

Ye ituiyegei ak bikab Jehovah oboisiechi inendet, inyoru tuguk che chang’ che siirei tuguk che imuchi ibeet

Bikab bororiosiek che choronok

TOS IYAI NEE?

15 Ma yamei kemwa kele kiyani Kamuktaindet kityo. Eng’ iman ko mwae Bibilia kole, agot oik koyani kole mi Kamuktaindet. (Jakobo 2:19) Nga u noto, ko mayae icheget magetab Kamuktaindet, amu noto ko ma iyani Kamuktaindet icheget. Si kobiit koyanech Kamuktaindet, ko ma magat kiyan kele mi inendet kityo, magat keyai magennyi kora. Magat kora keistoengei dinitab lembech ak kisub dinitab ne bo iman.

16 Kiiborwech Paulo kole ma magat keyai kiy age tugul ne tiinyegei ak ootetab lembech. Kisir inendet kole: “Omong’u eng’ kwenunywa, ak otabange, mwaei Kiptaiyat, amotwa kiy ne bo simdo; si ataachak.” (2 Korintoek 6:17; Isaia 52:11) Ko u noto, koistoengei Kristianik che bo iman kiy age tugul ne tiinyegei ak dinitab lembech.

17 “Iboru Bibilia kole dinisiek tugul che bo lembech ko kebeberiatab BABULON NE O.”* (Ng’ang’utiet 17:5) Ibwatwech kainanito nganasetab Babulon ne ki bo keny, ole kitaunegei dinitab lembech kingobata Maranetab betusiekab Noa. Kanetutik ak bitonwek che chang’ che naatin rani eng’ dinisiekab lembech ko kitoigei keny eng’ Babulon. Ko u, kisae bikab Babulon kipsomok che bo cheptalelisiek. Kanetutiet ne o eng’ dinisiek che chang’ rani, ko Kipsomok. Nga u noto, koneti Bibilia komie kole mi Kamuktaindet agenge kityo ne bo iman, ne keguure Jehovah, ago Jesu Kristo ko Werinnyi. (Johana 17:3) Kiiyani bikab Babulon kora kole, mi kit ne mi orit ne bo chito ne ma meei ak komuchi konyalil eng’ ole kinyalile bik. Rani koneti dinisiek che chang’ kole, mi kit ne mi orit ne bo chito ne ma meei ne imuchi konyalil eng’ mat ne lolei koigeny.

18 Dinisiek tugul eng’ ng’ony komugul che kirindoi kamuktaindet ko kimuchi keguure Babulon ne O ne bo rani, amu kiiletagei ootetab Babulon ne bo keny eng’ ng’ony komugul. Ago kisib komwa Kamuktaindet kole, tun kigesu dinisiechoto eng’ betut ne ma kibwotyin. (Ng’ang’utiet 18:8) Tos igeere amu nee si ko bo kamanut iistoengei kiy age tugul ne tiinyegei ak Babulon ne O? Machei Jehovah Kamuktaindet ‘imong’une inendet’ eng’ chokyinet ko ta komi kasarta.—Ng’ang’utiet 18:4.

19 Ye ka itil imong’une dinitab lembech, komuchi kolewen alak eng’ choronoguk koistoenengei. Nga u noto, ko ye ituiyegei ak bikab Jehovah oboisiechi inendet, inyoru tuguk che chang’ kosiir tuguk che imuchi ibeet. Ko u alamalaikab Jesu che ki meto tuguk che chang’ si kobiit kosub inendet, inyoru tupchosiek che chang’ che otinye kayanet agenge. Iyegu agenge eng’ Kristianik che bo iman che milionisiek che mi ng’ony komugul, che iboru chamnyet ne bo iman. Ak inyoru kamang’unet ne bo kwong’ut ne bo sobondab koigeny eng’ “betusiek che tun bwanei.” (Mariko 10:28-30) Ye siirto betusiek, komuchi kogeer bik che kigabagachin agobo kayaneng’ung’ kit ne ineti Bibilia ak koek kiboitinikab Jehovah agichek.

20 Ineti Bibilia kole konegit kogeesu Kamuktaindet ng’onyuni ya, ak kogon ng’onyut ne leel ne mi imanda ne bou Bounatennyi. (2 Petero 3:9, 13) Tun kararan ng’onyunoto ne tia! Ago eng’ ng’onyunoto leel mi imanda, ko tun komi dinit agenge kityo, ootet agenge kityo ne bo iman. Tos ma ng’omnatet iib kakwautik che magotin otuiyegei ak Kristianik che bo iman eng’ chokyinet?

KIT NE INETI BIBILIA

  • Mitei dinit agenge kityo ne bo iman.—Matayo 7:13, 14.
  • Dinit ne bo iman kenae kanetutikyik ak bitonwekyik.—Matayo 7:16, 17.
  • Ootei Baorinikab Jehovah Kamuktaindet eng’ oret ne iyani inendet.—Isaia 43:10.

*  Si inyoru logoiywek che chang’ agobo amu nee si keguure BABULON NE O dinisiek tugul che kirindoi Jehovah Kamuktaindet eng’ ng’ony komugul, igeer Ng’alek che Kigites.


Teebutik che Kinetegei

1. Nee borotet ne kenyoru ngot keoot Kamuktaindet eng’ oret ne nyolu?

2. Tos kinetetigei ano oret ne nyolu keoot Jehovah, ago nee kaborunet ne toretech kiguiye nito?

3. Kosubgei ak Jesu, ko nee kit ne magat keyai ngot kemache koyanech Kamuktaindet?

4. Iboru nee ng’alek che kimwa Jesu agobo ortinwek aeng’, ago wendi ano oret age tugul?

5. Kinae nee bik che isubi dinit ne bo iman?

6, 7. Tos keertoi ano kiboitinikab Kamuktaindet Bibilia, ago kigon Jesu kaborunet kosubgei ak nito eng’ or nee?

8. Keoot Jehovah koboto keyai nee?

9, 10. Iborjingei Kristianik che bo iman chamnyet eng’ ortinwek ngorcho?

11. Amu nee si ko bo kamanut kiyan Jesu Kristo koek oret ne sorunen Kamuktaindet bik?

12. Keek bik che ma bo ng’ony ko keyai nee?

13. Tos keertoi ano kasubikab Yesu che bo iman Bounatetab Kamuktaindet, ago amu noto koyae nee icheget?

14. Ngoro dinit ne iyani ile ootei Kamuktaindet eng’ oret ne bo iman?

15. Nga makwech Kamuktaindet kiyan kele mi inendet, ko nee kit age ne machei keyai?

16. Nyolu keyai nee agobo boisionik che bo dinitab lembech?

17, 18. “BABULON NE O” ko nee, ago amu nee si ko magat ‘kemong’une inendet’ eng’ chokyinet?

19. Ngot keboisichi Jehovah, kenyoru nee?

20. Nee kamang’unetab bik che isubi dinit ne bo iman eng’ betusiek che bwanei?