Siirte iwe tuguk che biitu

Siirte iwe menu alak

Siirte iwe tuguk che mi orit

Baorinikab Jehovah

Kalenjin

Kanetutikab Bibilia che bo Iman

NG’ALEK CHE KIGITES

Kenyitab 1914, ko Kenyit ne bo Kamanut eng’ Maoinatetab Bibilia

Kenyitab 1914, ko Kenyit ne bo Kamanut eng’ Maoinatetab Bibilia

KISIB komwa bik che kiinetigei Bibilia kenyisiek che negit 40 kotomo koit kenyitab 1914 kole, tun yaaksei tuguk che bo kamanut eng’ kenyinoto. Tos ki nee tuguchuto kiyaagis, ago nee kit ne iboru kole bo kamanut kenyitab 1914?

Ko u ole kigisirta eng’ Luka 21:24, ko kimwa Jesu kole: “Ak kotiech Bororiosiek Jerusalem, agoi kosulda betusiekab Bororiosiek.” Jerusalem ko ki nganaset ne o ne bo bororietab Yunanik, ki ng’echeretab laitornatet ne bo laitorinik che ki bunu kotab Laitoriat Daudi. (Tienwogikab Kalosunet 48:1, 2) Nga u noto, ko ki teer laitorinichoto eng’ laitorinik che ki bo bororiosiek alak. Kitebee icheget ‘ng’echeretab laitornatetab Jehovah’ ne kata Kamuktaindet inendet. (1 Ateptab Betusiek 29:23) Ko u noto, Jerusalem ko ki kaborunetab laitornatetab Jehovah

Ara anyun kiinam ‘kotiech bororosiek’ laitornatetab Kamuktaindet au? Kiyaak nito eng’ kenyitab 607 Kotomo Koit Betusiekab Jesu (K.K.B.J.) ye kingong’em bikab Babulon Jerusalem. Kitebi buch “ng’echeretab laitornatet ne bo Jehovah” ak kigiter mata kotestai kolaitoran laitorinik che kibunu kotab Daudi. (2 Laitorinik 25:1-26) Tos ‘kigitiech’ Jerusalem koigeny? Achicha, amu mwaei maoinatetab Esekiel agobo laitoriat ne bo let Sedekia ne bo Jerusalem kole: “Inemu chepkulet ak ireegu nariet…ma kobiitu noto kogeny, kot konyo ne nyoljin kobunji; si agochi inendet.” (Esekiel 21:26, 27) Inendet ne “nyoljin kobunji” laitornatetab kotab Daudi ko Kristo Jesu. (Luka 1:32, 33) Ko u noto, ko kibek ‘tieganoto’ kingoek Jesu Laitoriat

Tos kiyaak au kioto bo kamanut? Ki kaibor Jesu kole nyo kolaitorani Bikab Bororiosiek eng’ kasarta ne kigitet. Kinyorchini bukuitab Daniel kurgetab 4 ng’alek che imuchi kotoretech kenai kasarata kele tia. Mwae bukuinoto agobo karuotitoetab maoinatet ne kiiruotyi Nebukadnesar Laitoriatab Babulon. Kigeer ketit ne o ne kigieb. Kima komuchi kong’at musukyennyi amu kiga kitae karnet ak sugunwet. Kimwa malaikaiyat kole: “Ingoteb ko u noto kot kogesgei betusiek che kiging’at, konyil tisab.”—Daniel 4: 10-16.

Igergeite Bibilia laitornatet ketik eng’ kasarwek alak. (Esekiel 17:22-24; 31: 2-5) Ko u noto, kingeeb ketoto bo kaborunet, ko kiibor ole kinyo keterto bounatetab Kamuktaindet ne kiiboru laitorinikab Jerusalem. Nga u noto, ko kiiboru ng’ang’utionoto kole kinyo ‘ketiechei Jerusalem’ kasarta ne kigitin, kasarata ko ‘betusiek tisab.’ Kigoi kasarata ne tia?

Mwae Ng’ang’utiet 12:6, 14 kole betusiek somok ak kebeberiat ko kergei ak “betusiek elfut agenge bogol aeng’ ak tamanwogik lo.” Ara anyun, ‘betusiek tisab’ ko kergei ak betusiek elfut agenge bogol aeng’ ak tamanwogik lo konyil aeng’, anan ko betusiek 2,520. Nga u noto, ko ma bagach bikab bororiosiek “kotiech” laitornatetab Kamuktaindet eng’ betusiek 2,520 kong’eete kingobut Jerusalem. Ara anyun, toogu kele ki koi kasarito kosiir betusiechuto. Kosubgei ak Koitosiek 14:34 ak Esekiel 4:6, ko mwae kole “betut agenge ko bo kenyit agenge,” ara ‘betusiek tisab’ ko kergei ak kenyisiek 2,520.

Kitaugei kenyisiechoto 2,520 eng’ kenyitab 607 Kotomo Koit Betusiekab Jesu, kingong’em Babulon Jerusalem ak koisto laitornatet eng’ kotab Daudi. Kibek kasarata kenyitab 1914 arawetab Taman. Kibek “betusiekab bororiosiek” kenyinoto, ak kitelel Jesu Kristo koek Laitoriat eng’ Bounatetab Kamuktaindet ne bo kipsengwet.*—Tienwogikab Kalosunet 2: 1-6; Daniel 7:13, 14.

Ko u ole kigasib komwaita Jesu, ko kigotook ‘nyonunennyi’ ko Laitoriatab kipsengwet eng’ tuguk che eechen che kigoyaakis eng’ ng’ony komugul, boriet, rubet, botanosiekab ng’ony, korotwek. (Matayo 24:3-8; Luka 21:11) Tuguchuto ko kaborunoik che kimen che iboru kole kong’ete kenyitab 1914 ko kigitelel Bounatetab Kamuktaindet ne bo kipsengwet ak taunetab ‘betusiekab let’ che bo kasari ya kimitei.—2 Timoteo 3:1-5.


*  Kong’eete arawetab Taman kenyitab 607 Kotomo Koit Betusiekab Jesu agoi arawetab Taman kenyitab 1 Kotomo Koit Betusiekab Jesu ko kenyisiek 606. Amu ma mi kenyit ne keguure buch (0), ko kong’eete arawetab Taman kenyit 1 Kotomo Koit Betusiekab Jesu agoi arawetab Taman kenyitab 1914 Ko Kagoit Betusiekab Jesu (K.B.J.) ko kenyisiek 1,914. Ngetes kenyisiek 606 ak 1,914, kenyoru kenyisiek 2,520. Si inyoru logoiywek agobo kabutetab Jerusalem eng’ kenyitab 607 Kotomo Koit Betusiekab Jesu, igeer ole kigisir kele “Chronology” eng’ bukuit ne kiguure Insight on the Scriptures ne ki sirei Baorinikab Jehovah

“BETUSIEK TISAB”
Kenyisiek 2,520
Kenyisiek 606 ak robo (1/4)
Kenyitab 607 K.K.B.J. arawetab Taman
agoi kenyitab 1 K.K.B.J. arawetab Taman
ak aeng’ tarigit 31
Kenyisiek 1,913 ak roboisiek somok (3/4)
Kenyitab 1 K.B.J. arawetab agenge tarigit 1,
agoi arawetab Taman kenyitab 1914
607

“Ak kotiech Bororiosiek Jerusalem

Keng’emei Jerusalem
← K.K.B.J. K.B.J.→ 1914

“Kot konyo ne nyoljin kobunji”

Ko Laitoriat Jesu Kristo

← Keer somanet ne ng’alale ng’alechu