Siirte iwe tuguk che biitu

Siirte iwe menu alak

Siirte iwe tuguk che mi orit

Baorinikab Jehovah

Kalenjin

Kanetutikab Bibilia che bo Iman

SOMANETAB TAMAN AK AENG’

Kemeng’is eng’ Oret ne Iboiboi Kamuktaindet

Kemeng’is eng’ Oret ne Iboiboi Kamuktaindet

Imuchi iegu choruetab Kamuktaindet eng’ or nee?

Tos tiinyin eng’ or nee kirindaet ne kigirinda Setani Jehovah?

Nee atebet ne ma iboiboi Jehovah?

Imuchi imeng’isie eng’ or nee si ibaibai Kamuktaindet?

TOS chito ne tinye atebet ne u nee ne imuchi ilewen koek chorueng’ung? Ne ma tiny, icheng’e chito ne tinye kabwatutik che u cheguk, ne chamei tuguk che ichamei ak atebet ne u neng’ung’. Igase ta iyai chorwandit ak chito ne tinyei atebosiek che kororon che u, imanda ak talasiet.

2 Kigolewen Kamuktaindet kong’eete keny bik alak koek choronokyik. Ko u, kiguure Jehovah Abraham choruennyi. (Isaia 41:8; Jakobo 2:23) Kiguure Kamuktaindet Daudi “chito ne iboiboi muguleldannyu” amu chamei Jehovah bik che u choto. (Boisionik 13:22) Ago kigeer kora Jehovah maotiot ne kigi kuure Daniel ko chito ne “chamat mising’.”—Daniel 9:23.

3 Amu nee si kigeer Jehovah Abraham, Daudi ak Daniel koek choronokyik? Kimwachi inendet Abraham kolenji: “Amu kegas it kutinnyu.” (Taunet 22:18) Ko u noto, ko rikyin Jehovah bik tugul che yaei eng’ kaming’inetab ge kit ne makyin icheget koyai. Kimwachi Israelik kolenji: “Ogas kutinnyu, si aek Kamuktaindeng’wong’, ak oegu bikyuk.” (Jeremia 7:23) Ngot igas it Jehovah, imuchi iegu choruennyi agot ak inye!

IGIMITI JEHOVAH CHORONOKYIK

4 Ibwat agobo borotet ne kinyoru ye kiyai choruandit ak Kamuktaindet. Mwaei Bibilia kole cheng’ei Jehovah boroindo “kobortogei kole kim agobo icheget che igesunotgei mugulelwekwak eng’ tainnyi.” (2 Ateptab Betusiek 16:9) Tos imuchi koborundo ano Jehovah kimnatennyi eng’ sobeng’ung’? Oret agenge ko ne kiboru eng’ Tienwogikab Kalosunet 32:8 ne mwae kole: “Atigonin ak anetin eng’ oret ne ibune: ang’omitin ageerotin.”

5 Nito ko ribsetab Jehovah ne iboiboech ne tia! Indoun inendet eng’ oret ne nyolu ak koribin ye itieme iboisie ng’atutikyik eng’ sobeng’ung’. Machei Kamuktaindet kotoretin imuch imuitochi kaimutik ak tiemutiguk. (Tienwogikab Kalosunet 55:22) Ko u noto, ngot iboisiechi Jehovah eng’ muguleldang’ung’ tugul, imuchi inyoru kamang’unet ko u sirindetab tienwogikab kalosunet ne kimwa kole: “Kande Jehovah tainnyu betusiek tugul: amu mi inendet eunnyu ne bo tai, magiistaa.” (Tienwogikab Kalosunet 16:8; 63:8) Ee, imuchi kotoretin Jehovah imeng’isie eng’ oret ne iboiboi inendet. Nga u noto, ko u ye ingen, ko mi bunyotab Kamuktaindet ne machei koteerin si meyai ko u nito.

KIRINDAETAB SETANI

6 Kiiboruech Somanetab 11 ole kigirandaita Setani ne Oindet nyoljinetab Jehovah ne bo kobounis. Kimwaitae Setani Kamuktaindet lembeita kole mwaei lembechek ak kiibor kole ma yai kit ne mie Jehovah ye kingo ma iyanji Adam ak Awa kotiljigei kit ne mie ak ne ya. Kingo kagoyai tengek Adam ak Awa ago kingonaam konyi lagokwak ng’ony, ko ma iyan Setani kit ne yae bik si koboisiechi Kamuktaindet. Kimwa Setani kole: “Ma boisiechin bik Kamuktaindet amu chamei inendet, ndo kigona boroindo, amuchi awal chi age tugul si ma boisiechi Kamuktaindet.” Iboru ng’alek che ng’alale agobo chito ne kiguure Job kole, nito kit ne iyani Setani. Job ko ki ng’o, ago kitiinyei eng’ or nee kirindaetab Setani?

7 Kimi Job ng’ony kenyisiek 3,600 che kigosiirto. Ki chito ne ki mie inendet amu kimwa Jehovah kole: “Amu mami ne kergei ak inendet eng’ ng’ony, ne igesunotgei ak ko chito ne bo iman, ne iywei Kamuktaindet, ak ko istoegei yaitio.” (Job 1:8) Ki iboiboi Kamuktaindet Job.

8 Kiteeb Setani kit ne ki yae Job koboisiechi Kamuktaindet. Kilenji Oindet Jehovah: “Tos ma iyieme ng’otwet inendet [Job] koboto gonnyi, ak tuguk tugul che tinyei, eng’ komosta age tugul? Kiiberur boisionikab eunekyik, ak kotesak tugukyik eng’ emet. Ago chuul eung’ung’, ak itwa tuguk tugul che tinyei si koesien eng’ taing’ung’.”—Job 1:10, 11.

9 Ko u noto, ko kimwa Setani kole kiboisiechi Job Kamuktaindet amu tuguk che kiigochi Kamuktaindet inendet. Kimwa Oindet kora kole ndo kigitiemei Job, ko kiesioi Kamuktaindet. Tos kiyai nee Jehovah agobo nito? Amu kitiinye Job ng’alechuto, ko kiiyanji Jehovah Setani kotiem inendet. Eng’ oranito, ko kitoogu komie ngot ko chamei Job Kamuktaindet anan ko ma chamei.

TIEMUTIKAB JOB

10 Kiinaam Setani kotiem Job eng’ ortinwek che teerchin. Kigichor tugab Job alak ak kebar alak. Kigibar kiboitinikyik che chang’. Kiigochi nito Job bananda. Kiyait mising’ ye kingobar usonet ne o lagokyik taman. Nga kibiit tuguchuto yaach mising’, ko “ma yai Job tengek eng’ chuto tugul, anan koiityi Kamuktaindet berberiet.”—Job 1:22.

Kigiberur Job amu kitienge Jehovah eng’ kayanet

Kigiberur Job agobo kayanennyi

11 Ma bagach Setani Job. Kiibwat kole agot nga kiimuchi komuitochi Job tugukyik, kiboitinik ak lagokyik che kiibet inendet, ko kiimuchi koesio inendet Kamuktaindet ndo miani. Kimeto Jehovah Setani kobire Job miando ne ng’wan ago ne samis. Nga u noto, nito ko ma yai Job kobeet kayanennyi eng’ Kamuktaindet. Ne kata u noto, ko mwae Bibilia kole: “Eng’ chuto tugul ko ma mwa Job tengek eng’ kutinnyi.”—Job 2:10.

12 Ma nai Job kole ki Setani ne kitau kaimutikyik. Amu mi tuguk che ma nai agobo kirindaetab Oindet eng’ torornatetab Jehovah ne siirei tugul, ko kiywei Job kole ki bunu Kamuktaindet kaimutikyik. (Job 6:4; 16:11-14) Kitestai Job kotiengei Jehovah eng’ kayanet. Kiiboor anyun atebetab Job ne bo kayanet kole, ma iman kit ne kigamwa Setani kole boisiechin Job Kamuktaindet amu tuguk che makyingei!

13 Atebetab Job ne bo kayanet, ko kiigochi Jehovah walutiet ne kim kosubgei kirindaetab Setani. Eng’ iman ko ki choruetab Jehovah Job, ago kiiberur Kamuktaindet inendet eng’ atebennyi ne bo kayanet.—Job 42:12-17.

TIINYIN ENG’ OR NEE KIRINDAETAB SETANI?

14 Ng’olyot ne kimwa Setani kole ma boisiechin chito Kamuktaindet buch, ko kima kotakyingei Job inegei. Tiinyin agot ak inye. Kiboru nito komie eng’ Kalewenaik 27:11 ye mwae Ng’olyotab Jehovah kole: “Werinnyu, ng’omitu, ak ibaibai muguleldanyu, si amuch awolji inendet ne itewera.” Ng’alechu kigisire kenyisiek che chang’ ko kagome Job, koboru kole ki tesetai Setani koteweri Kamuktaindet ak komwaitoe lembech kiboitinikyik. Ngot kemeng’isie eng’ oret ne iboiboi Jehovah, kegonu walutiet agobo lembeitab Setani ago eng’ oranito kibaibai muguleldab Kamuktaindet. Tos igastoi ano agobo nito? Tos ma bo kwong’ut iegu agenge eng’ che wolu lembechekab Oindet, agot ndo magat iwalage eng’ sobeng’ung’?

15 Nai ile kimwa Setani kole: “Igoitoi chito tugukyik tugul agobo sobondanyi.” (Job 2:4) Kingomwa Setani kole “chito” ko kiibor komie kole ng’alekyik ko kitiinyei bik tugul, ma Job inegei. Nito ko ki kit ne bo kamanut. Ma iyani Setani kole imuchi inyendet itiengei Kamuktaindet eng’ kayanet. Machei Oindet si megas it Kamuktaindet ago machei imete si ma isub oret ne bo imanda ye inyoru kaimutik. Tos yai ko u nito Setani eng’ or nee?

16 Ko u ye kiging’alale eng’ Somanetab 10, ko boisie Setani ortinwek che teerchin kotiem koyai bik koistoegei Kamuktaindet. Eng’ oret age, kocheng’ei Setani bik “ko u ng’etundo ne boriseni, kocheng’ei ne amei.” (1 Petero 5:8) Toogu anyun boisietab Setani ye teerin choronok, bikab gaa anan ko bik alak tugul si ma inetgei ak iboisie kit ne inetigei eng’ Bibilia.* (Johana 15:19, 20) Eng’ komosta age, kotesetai Setani “kowalegei koek malaikaiyatab lapkeiyet.” (2 Korintoek 11:14) Imuch koboisie Oindet ortinwek che ma kinae koberberin ak kong’alin si mesub oret ne iboiboi Kamuktaindet. Imuchi koboisie kora, tugun che borin mugulel, yain Oindet igeergei ko u yo ma imuchi ibaibai Kamuktaindet. (Kalewenaik 24:10) Ngot ko yaegei Setani ko u “ng’etundo ne boriseni” anan ko “malaikaiyatab lapkeiyet,” ko ni kit ne tokyingei: Mwae inendet kole, ngot inyoru kaimutik anan ko tiemutik, imetoi ma iboisiechini Kamuktaindet. Iwolundoi ano ng’olyotab Setani ak iboru eng’ or nee ile itiengei Kamuktaindet ko u ye kigayai Job?

KEGAS IT NG’ATUTIKAB JEHOVAH

17 Imuchi iwolu ng’alekab Setani ye imeng’isie eng’ oret ne iboiboi Kamuktaindet. Nito koboru nee? Mwae Bibilia kole: “Ak kanyol icham Jehovah Kamuktaindeng’ung’ eng’ muguleldang’ung’ tugul, eng’ sobondang’ung’ tugul, ak eng’ kimnateng’ung’ tugul.” (Ne Kibwate Ng’atutik 6:5) Ye tesetai koeetu chamnyeng’ung’ eng’ Kamuktaindet, ko tesetai koeetu mageng’ung’ iyai kit ne magun Kamuktaindet iyai. Kisir Johana kole: “Amu ni chamnyetab Jehovah, ale kerib ng’atutikyik.” Ngot ichame Jehovah eng’ muguleldang’ung’ tugul, igeere ile “ma nyigisen ng’atutikyik.”—1 Johana 5:3.

18 Ngorcho ng’atutikab Jehovah? Alak eng’ choto, ko atebosiek che nyolu keistoegei. Ko u, keer ng’alek che mi bogisit, che kagisir kele “Mwee Tuguk che Wechei Jehovah.” Inyoru eng’ yoto tuguk che esioi Bibilia. Imuch igeer eng’ tai ko u yo ma yaach mising’ alak. Nga u noto, ko ye ibwat agobo sirutik che kagisir igeere ng’omnatet ne bunu ng’atutikab Jehovah. Iwal atebet eng’ sobeng’ung’ komuch koek kit ne ui ne tomo inyoru besio. Nga u noto, ngot imeng’isie eng’ oret ne iboiboi Kamuktaindet kogonin yametabgei ak boiboiyet. (Isaia 48:17, 18) Nito ko kit ne imuchi iityi. Kinae nee nito?

MWEE TUGUK CHE WECHEI JEHOVAH

Bik aeng’ che chelesos
Gap chi che eesei ak kogulei sigarok
Kwondo ne chorsei
  • Rumisiet.—Komong’u 20:13; 21:22, 23.
  • Ibetab ge.—Atebetab Lawik 20:10, 13, 15, 16; Romanik 1:24, 26, 27, 32; 1 Korintoek 6:9, 10.
  • Keng’alal ak oik.—Ne Kibwate Ng’atutik 18:9-13; 1 Korintoek 10:21, 22; Galatiek 5:20, 21.
  • Ootetab kanamonik.—1 Korintoek 10:14
  • Bogitet.—1 Korintoek 5:11.
  • Chorset.—Atebetab Lawik 6:2, 4; Epesoek 4:28.
  • Lembechek.—Kalewenaik 6:16, 19; Kolosaik 3:9; Ng’ang’utiet 22:15.
  • Keiyandit.—1 Korintoek 5:11.
  • Koromnatet.—Tienwogikab Kalosunet 11:5; Kalewenaik 22:24, 25; Malaki 2:16; Galatiek 5:20.
  • Ng’alekab tewernatet.—Atebetab Lawik 19:16; Epesoek 5:4; Kolosaik 3:8.
  • Keboisie korotik eng’ oret ne ma nyolu.—Taunet 9:4; Boisionik 15:20, 28, 29.
  • Chito ne ma ribei bikab gonnyi.—1 Timoteo 5:8.
  • Kechut boriosiek anan ko bolatosiekab ng’onyuni.—Isaia 2:4; Johana 6:15; 17:16.
  • Keboisie tumotet ak kerichekab bogitet.—Mariko 15:23; 2 Korintoek 7:1.

19 Ma makwech Jehovah keyai tuguk che ma kimuchi. (Ne Kibwate Ng’atutik 30:11-14) Ingen inendet kit ne kimuchi ak kit ne ma kimuchi. (Tienwogikab Kalosunet 103:14) Ne siirei tugul, ko konech Jehovah kimnatet si kimuch kegas it inendet. Kimwa Paulo kole: “Agobo iman Jehovah ne machamdook keyomak kosiir ne te ne omuchi: ago koboto yomsonoto koyae agine oret ne ochilile si kobiit omuch omuite.” (1 Korintoek 10:13) Si kotoretin Jehovah imuite, komuchi kogonin “oindo ne siirtoot ne bo kamuktaet.” (2 Korintoek 4:7) Kingo kagomuitochi Paulo tiemutik che chang’, komwa kole: “Amuchi ayai tuguk tugul eng’ inendet ne igimita.”—Pilipik 4:13.

INETGEI ATEBET NE IBOIBOI KAMUKTAINDET

20 Eng’ iman, si kobiit kibaibai Jehovah, ko ma keesie tuguk che wechei kityo, nyolu kora keyai tuguk alak che chang’ che ibaibai inendet. Magat kora icham tuguk che chamei inendet. (Romanik 12:9) Tos ma igase ta kirikyi bik che tinye kabwatutik che u cheguk, che chame tuguk che u che ichame ak che tinye atebosiek che u cheguk? U noto Jehovah agine. Ko u noto, inetgei icham tuguk che chame Jehovah. Alak keng’alale eng’ Tienwogikab Kalosunet 15:1-5 ole kisomani agobo bik che kigeer Kamuktaindet ko choronokyik. Iboru choronokab Jehovah kit ne kuure Bibilia “logoiyotab Tamirmiriet.” Chuto ko atebosiek che u, “chamnyet, boiboiyet, kalyet, muitaet, talasiet, mieindo, atepto ne kiyani, kaming’inetab ge, ribetab ge.”—Galatiek 5:22, 23.

21 Ye isoman ak inetgei Bibilia betusiek tugul ko toretin iboru atebosiekab Kamuktaindet eng’ sobeng’ung’. Ago ye inetgei kit ne magun Kamuktaindet ko toretin konamgei kabwatutiguk ak che bo Kamuktaindet. (Isaia 30:20, 21) Ye itesrtai igimiti chamnyeng’ung’ eng’ Jehovah, ko tesetai koeetu mageng’ung’ ne bo imeng’isie eng’ oret ne iboiboi Kamuktaindet.

22 Magat kigiilgei si kobiit kibaibai Jehovah. Igergeite Bibilia kewal sobeng’ung’ ak kireg chito ne bo keny ak kilaach chito ne leel. (Kolosaik 3:9, 10) Nga u noto, kosubgei ak ng’atutikab Jehovah ko kisir sirindetab tienwogikab kalosunet kole: “Mitei melekto ne o ngerib choto.” (Tienwogikab Kalosunet 19:11) Igeere ak inye ile kemeng’is eng’ oret ne ibaibai Kamuktaindet, ko konu melekto ne o. Ye iyai ko u noto, igonu wolutiet eng’ kirindaetab Setani ak ibaibai muguleldab Jehovah!

KIT NE INETI BIBILIA

  • Imuchi iyegu choruetab Kamuktaindet ngot igas it inendet.—Jakobo 2:23.
  • Kigo kirinda Setani kit ne yaei bik kotiengei Jehovah eng’ kayanet.—Job 1:8, 10, 11; 2:4; Kalewenaik 27:11.
  • Magat kemwee atebosiek che ma iboiboi Kamuktaindet.—1 Korintoek 6:9, 10.
  • Kimuchi kibaibai Jehovah ye kiwech tuguk che wechei inendet ak kecham tuguk che chamei inendet.—Romanik 12:9.

*  Ma iboru nito kele bik tugul che kirinden koboisie Setani. Nga u noto, ko cheptalelitab ng’onyuni Setani ak kobou ng’ony komugul. (2 Korintoek 4:4; 1 Johana 5:19) Ko u noto, kimang’u kele ye isub oretab Kamuktaindet eng’ sobeng’ung’, nito ko oret ne ma machei bik che chang’, ago yaei nito kogirinden alak.


Teebutik che Kinetegei

1, 2. Ng’o bik che kigeer Jehovah ko choronokyik?

3. Amu nee si koleweni Jehovah bik alak koek choronokyik?

4, 5. Tos iboru eng’ or nee Jehovah kimnatennyi eng’ bikyik?

6. Kimwa nee Setani kosubgei ak bik?

7, 8. (a) Nee kit ne kiyai Job koteerit eng’ bik che ki bo kasartanyi? (b) Kiteebta ano Setani kit ne ki yae Job koboisiechi Kamuktaindet?

9. Kiyai nee Jehovah agobo kit ne kiteeb Setani agobo Job, ago amu nee si kiyai ko u noto?

10. Kinyor tiemutik ngorcho Job, ago kiyai nee inendet kosubgei ak tiemutichoto?

11. (a) Nee kit ne bo aeng’ ne kimwa Setani agobo Job, ago kiyai nee Jehovah agobo nito? (b) Tos kiyai nee Job kosubgei ak miando ne ng’wan ne kinyor?

12. Tos kiwalundo ano Job kirindaetab Oindet?

13. Amu kiiyanat Job eng’ Kamuktaindet, ko tos kiyaak nee?

14, 15. Amu nee si kimuchi kemwa kele kirindaetab Setani eng’ Job, kotiinyei bik tugul?

16. (a) Nee ortinwek che boisie Setani si koweech bik si ma isub oretab Kamuktaindet? (b) Tos boisie Oindet ortinwechuto eng’ or nee agobo inye?

17. Nee kit ne o ne yaech kegas it ng’atutikab Jehovah?

18, 19. (a) Ngorcho ng’atutikab Jehovah? (Keer bogisit.) (b) Kinae nee kele ma makwech Kamuktaindet keyai tuguk che ma kimuchi keyai?

20. Nee atebosiek che nyolu kinetgei, ago amu nee si ko bo kamanut atebosiechuto?

21. Nee ne tos toretin iboru atebet ne iboiboi Kamuktaindet?

22. Nee borotosiek che inyoru ngot imeng’isie eng’ oret ne iboiboi Kamuktaindet?