Siirte iwe tuguk che biitu

Siirte iwe menu alak

Siirte iwe tuguk che mi orit

Baorinikab Jehovah

Kalenjin

Kanetutikab Bibilia che bo Iman

SOMANETAB MUT

Katiaget ko Konunotiotab Kamuktaindet ne O

Katiaget ko Konunotiotab Kamuktaindet ne O

Katiaget ko nee?

Ki kigonundo ano katiaget?

Tos iborun nee katiaget?

Tos iborunde ano kongoi agobo katiaget?

TOS nee konunotiot ne o ne ki inyoru besio? Ma bo kamanut konunotiot kityo amu kagiboisie robisiek che chang’ keal. Eng’ iman kamanutietab konunotiot, ko ma kigeree chang’indab robisiek che kagiale. Ne kata u noto, ko bo kamanut konunotiot ngot kogonin boiboiyet anan ko toretin eng’ kiy ne imache eng’ sobeng’ung’.

2 Eng’ konunotik tugul che ki igas ta kinyor, ko mi agenge ne siirei tugul. Nito ko konunotiot ne kiigochi Kamuktaindet bik. Ki kogonech Jehovah tuguk che chang’, nga u noto, konunotiot ne o mising’ ko sobondab Werinnyi Jesu Kristo ne kiek tiseiywot. (Matayo 20:28) Ko u ye ta kegeere eng’ somanani, ko konunotiot ne bo kamanut mising’ ne imuchi inyoru ko katiaget, amu imuchi kogonin boiboiyet ne bo kwong’ut ak koyaun magutiguk che bo kamanut. Katiaget eng’ iman ko oret ne o ne iborunenen Jehovah chamnyennyi.

KATIAGET KO NEE?

3 Ngemwa eng’ oret ne nyumnyum ko u ni, katiaget ko oret ne boisie Jehovah kosor bik eng’ tengekto ak meet. (Epesoek 1:7) Si kobiit kiguiye kit ne mwaei Bibilia agobo katiaget, ko magat kibwat kit ne kiyaak eng’ mbaretab Eden. Ngot kiguiye kityo kit ne kiibet Adam kingoyai tengek, koyaech nito kiboru kongoi ak kegeer amu nee si ko bo kamanut konunotiondonito bo katiaget.

4 Kingoyai Jehovah Adam, ko kiigochi inendet kit ne bo kamanut mising’, noto ko sobet ne ititaat. Ibwat kit ne kiiboru nito eng’ Adam. Amu kigiyochi inendet borto ak kabwatutik che ititaatin, ko ki ma komuchi komian, koosit anan kome. Amu ki chi ne kiititaat, ko kitinyei chorwandit ne inegei ak Jehovah. Mwaei Bibilia kole, Adam ko ki “weritab Jehovah.” (Luka 3:38) Ko u noto, ko kiboiboichi Adam chorwandit ne ki rikyinot ak Jehovah Kamuktaindet, ko u kwanda ne tinyei chamnyet eng’ werinnyi. King’alaldos Jehovah ak werinnyi ne bo ng’onyuni Adam, kogochi boisionik che kiboiboichin inendet ak komwachi tuguk che kimakyin koyai.—Taunet 1:28-30; 2:16, 17.

5 Kigiyai Adam eng’ “itondab Kamuktaindet.” (Taunet 1:27) Tos iboru nee nito? Ko u ye kigigeer eng’ Somanet ne Tai ne bo bukuini, ko Jehovah ko tamirmiriet. (Johana 4:24) Ko u noto ko ma tinyei Jehovah borto ne u nenyo. Ngomwa Bibilia kole kigiyai Adam eng’ itondab Kamuktaindet, koboru kole kigiyaita atebosiek che u che bo Kamuktaindet ko u, chamyet, ng’omnatet, imanda ak kimnatet. Ki kergei Adam kora ak Kwandanyi eng’ oret age, kiimuchi kotilchigei koyai kit age tugul ne ki machei. Ara ki ma ko u Adam mashinit ne yaei kityo boisiet ne kagitetyi koyai. Ne kata u noto, ko kiimuchi kolewen koyai kit ne mie anan ko ne ya. Ndo kiga kas it Kamuktaindet, ko ki ta meng’siei koigeny eng’ ng’onyut ne Paradiso.

6 Ara anyun, kingo mata kogas it Adam Kamuktaindet, kiruokyi inendet meet. Kiyai tengektannyi kobeet Adam sobet ne ititaat ak borotosiek tugul che namegei ak sobonoto. (Taunet 3:17-19) Kit ne ya mising’ ko, ma ibet Adam sobennyi kityo, kiibet kora sobetab logokyik tugul. Mwaei Ng’olyotab Kamuktaindet kole: “Kimong’ji ng’ony tengek eng’ chito agenge, [Adam] ak meet amu tengek; koityi anyun meet bik tugul, amu kiyai tugul tengek.” (Romanik 5:12) Ee eng’ iman, ko kigonamdech achek tugul Adam tengekto. Ko u noto ko mwaei Bibilia kole, ‘kialdagei’ inendet koboto logokyik koek otwogikab tengek ak meet. (Romanik 7:14) Ki ma komi kamang’unet eng’ Adam ak Awa amu kiesio kogas it Kamuktaindet kochamei. Nga u noto, ko tos nyor kamang’unet logokwak, koboteech?

7 Kisor Jehovah bik eng’ oretab katiaget. Tos katiaget ko nee? Katiaget koboru tuguk aeng’. Ne tai, katiaget ko kit ne kilibani si kobiit kitiach chi anan keweek kiy. Kimuchi kigerkeite beit ne kilibani si kitiage chi ne kigiger eng’ korgoret agobo boriet. Ne bo aeng’, katiaget ko kit ne tuchei anan koliban beitab kiy. Kergei nito ak beit ne kilibani si ketugee ng’emisiet ne kiyaak. Ko u, ngoyai chito kobiit ng’emisiet, ko magat koliban kit ne namegei ak beitab tuguk che kang’emagis.

8 Tos kiimugaksei eng’ or nee ketuch tuguk che chang’ che kibetyo agobo tengektab Adam ak kitiachech achek tugul eng’ tengek ak meet ne kiinamdech Adam? Ongegeer katiaget ne kitetwech Jehovah ak kit ne imuchi koborun nito.

OLE KIGONUNDO JEHOVAH KATIAGET

9 Amu kigibeet sobondo ne ititaat, ko ma mi chi age tugul ne ma ititaat ne kiimuchi koweek kogeny. (Tienwogikab Kalosunet 49:7, 8) Kit ne ki magat, ko katiaget ne kergei ak kit ne kigibeet. Namegei nito ak ng’atutietab imanit ne ititaat ne kinyorjin Ng’oliotab Kamuktaindet, ne mwaei kole: “Kigeere sobondo sobondo.” (Ne Kibwate Ng’atutik 19:21) Ara anyun tos nee ne kiimuchi kotuch sobondo ne kiititaat, anan ko sobet ne kiibet Adam? Kimagat sobondo age ne bo chito ne ititaat koek kit “ne kitiage” sobondo ne kiibeet Adam.—1 Timoteo 2:6.

Komeei Jesu ko katiaget

Kigon Jehovah Werinnyi ne kigii inegei koek katiagennyo

10 Tos kigonundo ano Jehovah katiaget? Kiiyok agenge eng’ werikyik che ititaatin che bo tamirmirik konyo ng’ony. Ma iyook kityo Jehovah werit age tugul ne bo tamirmiriet. Kiiyok Werinnyi ne chamei mising’, ne kigii inegei. (1 Johana 4:9, 10) Kibagach Werinito kipsengwet kochamei. (Pilipik 2:7) Ko u ye kiginetgei eng’ somanetab ang’wan eng’ bukuini, ko kiyai Jehovah kwong’utiet kouuto sobetab Werinnyi agoi moetab sigisiet ne bo Maria. Kigisige Jesu anyun tamirmiriet ne tilil ne bo Kamuktaindet, noto amu nee si ki ma ko tinyei tengek.—Luka 1:35.

11 Kiimuchi koegundo ano chito agenge, katiaget ne kitiage bik che chang’? Eng’ iman, ko tos kinyorundo ano bik tengekto eng’ taunet? Nai ile, kiibet Adam borotet ne bo kwang’ut ne konu sobet ne ititaat ye kingoyai tengek. Ko u noto, ko ki ma ta imuchi kogochi sobet ne ititaat lagokyik. Ne kata u noto, ko kiinamda tengekto ak meet kityo. Jesu ne inendet koguure Bibilia “Adam ne bo let,” ko kitinye sobet ne ititaat, ma yai tengek ole kigoi. (1 Korintoek 15:45) Eng’ ng’alek alak, ko kiigeer Jesu Adam si kobiit kosorwech. Amu kiigoito Jesu sobennyi ne ititaat, ak kotebi koyanat eng’ Kamuktaindet, ko kiliban komie tengektab Adam. Ara anyun, kigochi Jesu lagokab Adam kamang’unet.—Romanik 5:19; 1 Korintoek 15:21, 22

12 Mwawech Bibilia komie agobo nyalilda ne kimuitochi Jesu kotomo kome. Kigibir inendet mising’, kigigartat, ak kome meet ne ng’wan eng’ ketit. (Johana 19:1, 16-18, 30; Ng’alek che Kigites) Amu nee si ki nyolu konyalil mising’ Jesu ko u noto? Eng’ somanet ne ta kegeere eng’ bukuini, kinetigei kele ma iyani Setani kole tinyei Jehovah kiboitinik che imuchi kogas it inendet agot matiny kotinye yomutik. Amu kitestai komuita Jesu koyanat agot nga kiginyalil, ko kigochi Setani wolutiet ne yamegei. Kiibor Jesu kole imuchi kotil koboisiechi Kamuktaindet chito ne ititaat ne imuchi kotilchige koyai kit age tugul ne machei, agot ndo yai nee Oindet. Ne matiny, ko kiboiboichi Jehovah mising’ kayanetab Werinnyi ne chamanet!—Kalewenaik 27:11.

13 Kigilipanda ano katiaget? Eng’ arawetab Nisan betutab 14 (kosubgei ak kalendaitab Yahudik), kenyitab 33 Ko Kagoit Betusiekab Jesu, ko kiiyan Jehovah kebar Werinnyi ne ki ititaat ne ki ma kotinyei tengek. Kigon anyun Jesu sobennyi ne ititaat ko chito koek tiseiywot “konyil agenge ak koyam.” (Hebranik 10:10) Kingobata betusiek somogu ko kagome Jesu, kong’eet Jehovah inendet ak kowekyi bortab tamirmiriet. Kingoit Jesu kipsengwet, kogochi Kamuktaindet kamanutietab sobennyi ne kigon koek tiseiywot si kobiit kotiach lagokab Adam. (Hebranik 9:24) Kiiyan Jehovah tiseiywotab Jesu koek katiaget ne ki magat si kobiit kesor bik eng’ otwognatetab tengekto ak meet.—Romanik 3:23, 24.

KIT NE IBORUN KATIAGET

14 Agot nga kitinye tengekto, komuchi kotoretech katiaget kenyoru kaberuret. Ngegeer borotet ne imuchi kogoneech rani ak ne tun koneech konunotiondonito bunu Kamuktaindet.

15Kinyoiywech kaat tengekwogikyok. Amu tengekto ne kigonech Adam, ko yochei kigilgei si kobiit keyai ne mie. Age tugul eng’ achek ko lelei eng’ tuguk che kiyae anan ko che kimwae. Nga u noto, tiseiywotab Jesu ne kiitiachech, kotoretech kenyoru “nyoetab kaat ne bo tengekwogikyok.” (Kolosaik 1:13, 14) Si kobiit kenyoru nyoetab kaat, ko magat kesigu eng’ iman. Magat kora kesom Jehovah nyoetab kaat eng’ kaming’inetabgei ketinye kayanet eng’ katiagetab tiseiywot ne kiitiachenech Jesu.—1 Johana 1:8, 9.

16Kigase anan kenae kele iyanech Kamuktaindet ma esiech. Yo kigase kele mi kiy eng’ oritinnyo ne iruokwech, koyaech nito kibet kamang’unet ak kegas ko u yo ki buch eng’ taitab Kamuktaindet. Amu kigenyoru nyoetab kaat kobun katiaget, ko konech Jehovah kamuget keoot kingen kele iyanech inendet agot nga ma ki ititaatin. (Hebranik 9:13, 14) Yaech nito keng’alal ak Jehovah, ma kirindech kiy. Ko u noto, kimuchi kerikyi Jehovah eng’ saet. (Hebranik 4:14-16) Ngerib chorwandit ak Jehovah, kenyoru kalyet, kegonyitigei, ak kenyoru boiboiyet

17Kinyoru kamang’unet ne bo sobondab koigeny eng’ ng’ony ne paradiso. Mwaei Romanik 6:23 kole, “melektab tengek ko meet.” Tesei kora sirutionito kole: “Ago konunetab chamyet ne bo Jehovah ko sobondab koigeny eng’ Kristo Jesu Kiptaiyandennyo.” Kiginetgei eng’ Somanetab 3 eng’ bukuini agobo kaberuret ne tun kinyoru eng’ ng’ony ne paradiso ne nyonei. (Ng’ang’utiet 21:3, 4) Berurto ne nyonei, ne nito koboto sobondab koigeny ne ma mi mianwek, komugaksei amu kime Jesu agobo achek. Si kobiit kenyoru kaberuret ne kageng’alale, ko nyolu kiboru kongoi agobo konunotiotab katiaget.

IMUCHI IBORUNDE ANO KONGOI?

18 Amu nee si ko magat kiwekyi Jehovah kongoi agobo katiaget? Bo kamanut konunotiot yo ka igiilgei mising’ chito ne kagonin, kaboisie kasarta anan ko robinik eng’ kononutiondonoto. Kiboiboitu mising’ yo kagigeer kele kagonech chito konunotiot amu chamech iman eng’ muguleldannyi. Katiaget ko kononutiot ne bo kamanut mising’ kosir konunoik tugul, amu kigon ge Kamuktaindet eng’ oret ne o mising’ si kobiit kogonech katiaganito. Mwaei Johana 3:16 kole, “Amu kicham Jehovah ng’ony mising’, kot kogoito Werinnyi ne kigii inegei.” Katiaget ko kabarunet ne o mising’ ne iborwech kole chamech Jehovah. Iborwech nito kora kole chamech Jesu amu kiigoito sobennyi kochamei agobo achek. (Johana 15:13) Ara anyun, magat koborwech katiaget komie kole chamei Jehovah ak Jesu age tugul eng’ achek.—Galatiek 2:20

19 Ara tos imuchi iborunde ano kongoi agobo konunotiotab katiaget ne bunu Kamuktaindet? Ne tai eng’ tugul, inetgei che chang’ agobo Jehovah. (Johana 17:3) Ngot iboisie bukuini inetgei Bibilia, ko toretin inai che chang’ agobo Jehovah. Ye itestai inai che chang’ agobo Jehovah, kotesaksei chamnyeng’ung’ eng’ inendet. Yeityo, koyain chamnyonito imach iyai kit ne iboiboi Jehovah.—1 Johana 5:3.

Kwondo ne somani Bibilia

Oret agenge ne iboru ile iwekyini Jehovah kongoi eng’ konunotionnyi ne bo katiaget, ko inetgei che chang’ agobo inendet

20Iboru kayaneng’ung’ eng’ tiseiywotab Jesu ne kiek katiaget. Kosubgei ak Jesu ko kigimwa kele: “Tinyei sobondab koigeny ne iyani Werit.” (Johana 3:36) Tos kiborunde ano kele kitinye kayanet eng’ Jesu? Ma kiboru kayananoto eng’ ng’alek ichegei. Mwaei Jakobo 2:26 kole: ‘Meat kayanet ne matinyei boisionik.’ Ee kayanet ne bo iman kotogunen “boisionik,” noto ko eng’ atebosiekyok. Oret agenge ne kimuchi kiboru kele kitinye kayanet eng’ Jesu ko ketiem kisub kakwautikyik, ma eng’ kit ne kimwae kityo, eng’ kit ne kiyae kora.—Johana 13:15.

21Nyolu iwe kabwatet ne bo Igortab Kiptaiyat ne kiyaei konyil agenge eng’ kenyit. Kitoi Jesu kabwatet ne inegei ne kuure Bibilia “igortab Kiptaiyat” kemboutab tarigit 14, arawetab Nisan (kosubgei ak kalendait ne bo Yahudik) eng’ kenyitab 33 Ko Kagoit Betusiekab Jesu. (1 Korintoek 11:20; Matayo 26:26-28) Kiguure kabwatanito Kabwatetab meetab Kristo. Kitoi Jesu kabwatanito, si kobiit kotoret kasubikyik ak bik tugul che kibwa koek Kristianik che bo iman konai kole, kigon inendet sobennyi koek katiaget ye kingome. Kosubgei ak nito ko kigon inendet ng’atutiet kole: “Oyae ko u ni eng’ kabwatet ne obwatena.” (Luka 22:19) Ngot kibwat Kabwatanito, kobwatwech chamnyet ne o ne kiibor Jehovah ak Jesu kosubgei ak katiaget. Kimuchi kiboru kongoi agobo katiaget ngot kebe kibwat meetab Jesu eng’ Kabwatet ne kiyae kenyit age tugul.*

22 Katiaget ne kigo konech Jehovah ko konunotiot ne ma kigergeite kiy. (2 Korintoek 9:14, 15) Konunotiondonito bo kamanut mising’, komuchi kotoret agot bik che kigobek konyor borotet. Iaroru somanet ne bo 6 ak 7 ole tun toretitoi konunotiondonito bik che kigobek.

KIT NE INETI BIBILIA

  • Katiaget ko oret ne boisie Jehovah kosor bik eng’ tengek ak meet.—Epesoek 1:7
  • Kigon Jehovah katiaget kingoyook Werinnyi ne kigii inegei konyo ng’ony kome agobo achek.—1 Johana 4:9, 10.
  • Toretech katiaget kenyoiywech kaat tengekwogikyok, kegas ko kiyanotin eng’ taitab Kamuktaindet, ak kenyoru kamang’unet ne bo sobondab koigeny.—1 Johana 1:8, 9.
  • Kiboru kongoi eng’ katiaget ngot kinetgei che chang’ agobo Jehovah, ngot kiboru kayanet eng’ tiseiywotab Jesu ne kiitiachech ak kebe kabwatet ne bo Igortab Kiptaiyat.—Johana 3:16

*  Eng’ ng’alek che chang’ agobo kit ne iboru Igortab Kiptaiyat, isoman Ng’alek che Kigites.


Teebutik che Kinetegei

1, 2. (a) Ngoro kononutiot ne tos imwa ile bo kamanut? (b) Amu nee si kimuchi kemwa kele katiaget ko kononutiot ne bo kamanut mising’ ne tos inyoru?

3. Tos katiaget ko nee, ago nee ne magat kiguiye si kobiit kiboru kongoi agobo kononutiondonito bo kamanut?

4. Tos kiiboru nee sobet ne ititaat eng’ Adam?

5. Nee ne iboru Bibilia ngomwa kole kigiyai Adam eng’ “itondab Kamuktaindet”?

6. Kingoesio kogas it Adam Kamuktaindet, ko tos kiibet nee, ago kiyaak nee eng’ logokyik?

7, 8. Ngorcho tuguk aeng’ che iboru katiaget?

9. Ki katiaget ne u nee ne ki magat?

10. Tos kigonundo ano Jehovah katiaget?

11. Kiimuchi koegundo ano chito agenge katiagetab bik che chang’?

12. Kiibor nee nyalildab Jesu?

13. Tos kigilipanda ano katiaget?

14, 15. Si kobiit kenyoru “nyoetab kaat ne bo tengekwogikyok,” ko magat keyai nee?

16. Nee kit ne toretech keoot Kamuktaindet kingen kele iyanech, ago amu nee si ko bo kamanut kingen kele iyanech Kamuktaindet?

17. Ngoro kaberuret ne yaei meetab Jesu ne kime agobo achek komugak?

18. Amu nee si ko magat kiwekyi Jehovah kongoi eng’ katiaget ne kigonech?

19, 20. Imuchi iboru eng’ ortinwek ngorcho ile iwekyini Kamuktaindet kongoi eng’ konunotiondennyi ne bo katiaget?

21, 22. (a) Amu nee si ko magat kebe kabwatet ne bo Igortab Kiptaiyat kenyit age tugul? (b) Iaroru nee Somanet ne bo 6 ak 7?