Siirte iwe tuguk che biitu

Siirte iwe menu alak

Siirte iwe tuguk che mi orit

Baorinikab Jehovah

Kalenjin

Kanetutikab Bibilia che bo Iman

SOMANETAB TAMAN AK SISIT

Kabatisanet Kogimiti Choruanding’ung’ ak Kamuktaindet

Kabatisanet Kogimiti Choruanding’ung’ ak Kamuktaindet

Kiyaitoi ano kabatisanetab Kristianik?

Nee kakwautik che magat iib si kobiit konyol kibatisanin?

Tos igochigei chito Kamuktaindet eng’ or nee?

Tos kit ne bo kamanut ne yae chito kibatisan ko nee?

KEER beek-o; nee ne kera si ma kibatisana?” Kiteeb chitab Etiopia teebutionoto keny. Kiga koborji Kristionindet ne kigiguure Pilip inendet koyan kole Jesu ko ki Mesia ne kigasib kemwa. Amu kitiiny muguleldanyi ng’alek che kiinetgei eng’ Sirutik, koyai inendet kosubgei ak tuguk che kiinetgei. Kiibor inendet kole machei kibatisan!—Boisionik 8:26-36.

Chitab Ethiopia ne ki bo keny

2 Ngot ko kiinetgei komie somanutik che kigosiirto eng’ bukuini ak agenge eng’ Baorinikab Jehovah, imuchi igas ko ichobot iteeb ile, ‘Nee ne teera si ma kibatisana?’ Agoi nguni, ko koinetgei agobo arorutietab Bibilia ne bo sobondab koigeny eng’ Paradiso. (Luka 23:43; Ng’ang’utiet 21:3, 4) Kiinetgei kora agobo ole mi bik che kigobek ak kamang’unetab ng’eetyet. (Amdoindet 9:5; Johana 5:28, 29) Imuchi kocham iwendi tuiyosiekab Baorinikab Jehovah ago koigeerchigei ole isubtoi icheget dinit ne bo iman. (Johana 13:35) Ne bo kamanut agot mising’, ko imuch koinaam choruandit ak Jehovah Kamuktaindet.

3 Tos iborunde ano ile imache iboisichi Kamuktaindet? Kimwachi Jesu kasubikyik kolenji: “Oba, ak oyai bikab bororiosiek tugul koek alamalaik, obatisan ichek.” (Matayo 28:19) Kigon Jesu kaborunet ne kararan ye kingibatisan eng’ beek. Ma kibise beek inendet, ago ma kirong’ji beek metinnyi. (Matayo 3:16) Ng’olyot “kibatisan” ko bunu ng’olyotab Yunanik ne iboru kole, “kinde orit.” Ko u noto, kabatisanetab Kristianik konyolu kinde chito beek orit.

4 Kabatisanet eng’ beek ko kit ne magat eng’ bik tugul che machei koyai choruandit ak Jehovah Kamuktaindet. Kabatisaneng’ung’ koborchin bik mageng’ung’ ne bo iboisiechi Kamuktaindet. Iboru kole, iboiboichini iyai magetab Jehovah. (Tienwogikab Kalosunet 40:7, 8) Ko u noto, kotomo kibatisanin, ko mi kakwautik che magat iib.

MAGAT NAET AK KAYANET

5 Koinaam iib kakwautiet ne tai. Eng’ or nee? Amu koinyoru naet agobo Jehovah Kamuktaindet ak Jesu Kristo eng’ oret ne bo kanetisietab Bibilia ne onetigei ak Baorinikab Jehovah. (Johana 17:3) Nga u noto, ko ta ko chang’ tuguk che nyolu ko ta inetgei. Machei Kristianik ‘konyi icheget naetab magennyi [Kamuktaindet].’ (Kolosaik 1:9) Ye iwe tuiyetab Baorinikab Jehovah ko toretin mising’ si inyoru naanito. Bo kamanut keba tuiyosiechoto. (Hebranik 10:24, 25) Ye iwe tuiyet betusiek tugul ko toretin ites naet agobo Kamuktaindet.

Kenyor naet ne bo imanit agobo Ng’olyotab Kamuktaindet ko kakwautiet ne bo kamanut si kobiit kibatisanin

Konetisietab Bibilia

6Eng’ iman, ko melen magat inai kiy age tugul eng’ Bibilia si kobiit kibatisanin. Ki tinyei chitab Etiopia naet kitigin, nga u noto ko kimagat konyor toretet si kobiit koguiyo kebeberuek alak che bo Sirutik. (Boisionik 8:30, 31) Ko u noto, ko ta komi tuguk che chang’ che nyolu inetgei. Eng’ iman, ko magoi imete inetgei agobo Kamuktaindet. (Amdoindet 3:11) Nga u noto, kotomo kibatisanin, ko mi kanetutik che magat inai ak iyan. (Hebranik 5:12) Ko u, magat inai ak iyan imanda agobo che kigobek ak kamanutietab kainetab Kamuktaindet koboto Bounatennyi.

7 Nga u noto, ma yamei naet inegei amu, “ngo mami kayanet ko ma imugaksei kibaibai [Kamuktaindet].” (Hebranik 11:6) Mwawech Bibilia kole, kingogas bik alak eng’ nganasetab Korintoek agobo logoiywek che kiamdoi kasubikab Jesu, “koyan, ak kigibatisan.” (Boisionik 18:8) Eng’ oret ne u noto, kanetisietab Bibilia, ne noto ko Ng’olyot ne bunu kabusetab Kamuktaindet, ko nyolu koyain inyoru kayanet ne o. Nyolu kotoretin kanetisietab Bibilia iyan arorutikab Kamuktaindet ak iyan ile imuchi kosorun tiseiywotab Jesu.—Josua 23:14; Boisionik 4:12; 2 Timoteo 3:16, 17.

AMDOCHI BIK ALAK IMANDAB BIBILIA

8 Ye tesetai koetu kayanet eng’ muguleldong’ung’, igeere ko ui itebte tuguk che kiinetgei. (Jeremia 20:9) Yain nito imwachi bik alak agobo Kamuktaindet ak magutikyik.—2 Korintoek 4:13.

Nyolu koyain kayanet imwachi bik alak tuguk che iyani

Chito ne mwachin chito age agobo kayanennyi

9 Imuchi inaam imwachi tilianutiguk, choronoguk, bikab kokwet ak bik che oboisiei tugul imandab Bibilia eng’ ng’omnatet. Ye ibata kasarta, imache iyai boisietab amdaet ne yae Baorinikab Jehovah eng’ kibagenge. Yeit yoto, ko meiywei imwachi Baoriatab Jehovah ne inetin Bibilia. Ngot kotook kele nyolu iamde, kechobei kasarta si kobiit otuiye inye ak konetindeng’ung’ koboto boisiekab tuiyet.

10 Toretin nito onaige ak boisiek alak che ribei okwetab Kamuktaindet. (Boisionik 20:28; 1 Petero 5:2, 3) Ngot kogeer boisiechuto kole iguiytosi ak iyani kanetutikab Bibilia, namegei atebeng’ung’ ak ng’atutikab Kamuktaindet ak imache eng’ iman iegu agenge eng’ Baorinikab Jehovah, komwaun icheget kole nyolu iamde ko i amdoindet ne tomo kibatisan ne bo logoiywek che miach.

11 Imuchi kogeer boisiek kole magat kota iwalage eng’ oreng’ung’ ne bo sobet ak atebeng’ung’ si imuch iamde. Nito komuchi koboto ibagach atebosiek alak che kiiuny. Ko u noto, kotomo imach iegu amdoindet ne tomo kibatisan, ko magat ibagach tengekwogik che nyigisen che u sokset, bogitet ak kerichekab bogitet.—1 Korintoek 6:9, 10; Galatiek 5:19-21.

SIGUNET AK KEWALAK

12 Magat iib kakwauitik alak kotomo kibatisanin. Kimwa Petero kole: “Osigu anyun ak owalage, si kobiit kibukto tengekwogikwok.” (Boisionik 3:19) Sigunet ko kiimgei agobo kit ne kiiyai. Bo kamanut konai chito kole magat sigunet ngot ko ki tinye atebet ne ma tilil, nga u noto ko magat kora sigunet agot ndo ki tinye atebet ne tilil. Amu nee? Amu kiptengeginik bik tugul ago magat konyor nyoetab kaat kobun Kamuktaindet. (Romanik 3:23; 5:12) Kingotomo inetgei Bibilia, ko kima ingen magutikab Kamuktaindet. Ara anyun, kita imeng’toi ano kosubgei ak maganoto? Ko u noto, ko magat isigu.

13 Ye kaisigu, ko magat iwalage. Magat iyai kit ne siirei iimgei. Magat ieesie atebeng’ung’ ne bo keny ak itil komie ile iyae kit ne mie kong’eete nguni. Sigunet ak kewalak ko kakwautik che magotin iib kotomo kibatisanin.

IGOCHIGEI KAMUKTAINDET

14 Mi kakwautiet age ne bo kamanut ne magat iib kotomo kibatisanin. Magat igochigei Jehovah Kamuktaindet.

15 Ye igochigei Jehovah Kamuktaindet eng’ saet ne kim, imwachini inendet ilenji iboisiechini inendet inegei koigeny. (Ne Kibwate Ng’atutik 6:15) Ara amu nee si komach kogochigei chito Kamuktaindet? Si kobiit kewolu teebutionito, ngegeer kaborunoni, ngele kogonaam kochamnyo muren ak kwony. Ye tesetai murenonoto konaei kwonyoto ak kogeerei atebosiekyik che kororon, kotesetai koeetu chamnyennyi eng’ inendet. Ye ibata kasarta, komuchi komach murenonoto kotun kwonyoto. Eng’ iman, kitunis ko kit ne teesyin chito boisionik. Nga u noto, koyae chamnyet murenonoto koib kakwautionito bo kamanut.

16 Ye inai ak icham Jehovah, koyain nito iboisiechi inendet eng’ chameng’ung’, ago mami kiy ne imuchi kogirinden meoot inendet. Chi age tugul ne machei kosub Weritab Kamuktaindet, Jesu Kristo, ko magat “koesiogei.” (Mariko 8:34) Kiesioigei ye makiyan koteerech tuguk che kemache anan ko che kigiiljinigei ma kigas it Kamuktaindet. Ara anyun kotomo kibatisanin, ko magat ko kit ne bo kamanut eng’ sobeng’ung’, ko iyai magetab Jehovah Kamuktaindet.—1 Petero 4:2.

MEIYWEI ILE MA IMUCHI

17 Ma igochinge bik alak Jehovah amu iywei koib kakwautionito nyigis. Imuchi koiywei kole, ngot kogochigei Kamuktaindet, koruokyin eng’ kiy age tugul ne yaei. Amu iywei icheget kole imuchi kotemene ak kolelji Jehovah, kobwati kole kaigai ma igochigei inendet.

18 Ye itestai inetgei icham Jehovah, koyain igochigei inendet ak igiilgei iyai kosubgei ak ole kiigochindegei inendet. (Amdoindet 5:4) Ye kaigochigei Jehovah, imache eng’ iman ‘iwendote ko u ye nyolu eng’ Kiptaiyat, iboiboi inendet.’ (Kolosaik 1:10) Amu ichame Kamuktaindet, ko magoi ibwat ile ui mising’ iyai magennyi. Ne matiny iyani ng’alek che kisir Johana kole: “Amu ni chamnyetab Jehovah, ale kerib ng’atutikyik: ama nyigisen ng’atutikyik.”—1 Johana 5:3.

19 Ma magat iegu ne ititaat si kobiit igochigei Kamuktaindet. Ingen Jehovah tuguk che memuchi iyai ago magoi magun inendet iyai kit ne ma imuchi iyai. (Tienwogikab Kalosunet 103:14) Machei inendet inyoru borotet eng’ sobet ago toretin. (Isaia 41:10) Imuchi iyan ile ngot imang’u Jehovah eng’ muguleldang’ung’ tugul, ‘kolititi ortinweguk.’—Kalewenaik 3:5, 6.

KABATISANET KOBORU KOLE KAIGOCHIGEI JEHOVAH

20 Ye ibwat agobo tuguk che kaginetgei, komuchi kotoretin igochigei Jehovah eng’ saet. Chi tugul ne chamei Kamuktaindet eng’ iman, ko magat kora ‘kong’any eng’ kutit agoi [agobo] yetunet.’ (Romanik 10:10) Tos ing’ang’te ano kutit agobo yetunet?

Tos kiigochigei Kamuktaindet eng’ saet?

Chito ne saei

21 Mwachi boiyot ne tetei boisionikab boisiek eng’ tuiyet ilenji imache kibatisanin. Ng’alalei inendet ak boisiek alak si kobiit kechob ong’alale teebutik agobo kanetutik alak che bo Bibilia. Ngot koyanjin boisiechoto kole nyolu kibatisanin, ko mwaun icheget kole imuchi kibatisanin eng’ tuiyet ne o ne rubei.* Mitei kanetisiet eng’ tuiyosiechoto eechen ne iaroru kit ne iboru kabatisanet. Ye ibata kanetisionoto, kotaach anyun amdoindet bik tugul che nyolu kibatisan kowol teebutik aeng’ che ma uuen koek oret agenge ne ‘ng’anyei kutinywa’ agobo kayanennywa.

22 Kabatisanet inegei ko ne yae bik alak konai kole kaigochigei Kamuktaindet ago i agenge eng’ Baorinikab Jehovah. Bik che kibatisani kenamei ak kinde kochut beek orit si kobiit kogeer bik alak kole kigogochigei Jehovah.

KIT NE IBORU KABATISANENG’UNG’

23 Kimwa Jesu kole kibatisani alamalaikyik “eng’ kainetab Kwanda ak ne bo Werit ak ne bo Tamirmiriet ne Tilil.” (Matayo 28:19) Nito koboru kole chito ne kibatisani, kongen torornatetab Jehovah Kamuktaindet ak ne bo Jesu Kristo. (Tienwogikab Kalosunet 83:18; Matayo 28:18) Ingen kora boisietab tamirmiriet ne tilil anan kimnatet ne bo Kamuktaindet.—Galatiek 5:22, 23; 2 Petero 1:21.

Kabatisanet koboru meet ne bo atebennyo ne bo keny ak kesobche si kobiit keyai magetab Kamuktaindet

Chito ne kibatisani

24 Nga u noto, ko kabatisanet ko ma ichut beek orit kityo. Nito ko kaborunet ne bo kamanut. Ye chut bortang’ung’ beek orit koboru kole kaime eng’ atebeng’ung’ ne bo keny. Ye king’eetin imong’u eng’ beek koboru kole kaisob si kobiit iyai magetab Kamuktaindet. Ibwat kora ile kaigochigei Jehovah Kamuktaindet, ma igochigei boisiet, bik alak anan ko kibagengeit. Ye igochigei Jehovah ak kibatisanin ko taunet ne bo choruanding’ung’ ne kim ak Kamuktaindet.—Tienwogikab Kalosunet 25:14.

25 Kabatisanet ko ma kit inegei ne yain inyoru sorunet. Kisir Paulo kole: “Oboisie yetuneng’wong’ kosulda eng’ kaiyweisiet ak botanet.” (Pilipik 2:12) Taunet kityo kabatisanet. Teebutiet ko ni, Imuchi iyai nee si mebagach chamnyetab Kamuktaindet kiwalu teebutionito eng’ somanet ne rubei.

KIT NE INETI BIBILIA

  • Kabatisanetab Kristianik, ko kechut komie beek orit ma kibise chito beek kityo. —Matayo 3:16.
  • Kakwautik che nyolu kisub si kobiit kibatisan chito, kotaunegei konyor chito naet agobo Kamuktaindet ak kobor kayanet, korub sigunet, kowalak ak kogochigei Kamuktaindet.—Johana 17:3; Boisionik 3:19; 18:8.
  • Si kobiit igochige Jehovah, ko magat iesiege ko u bik che kiesiogei si kobiit kosub Jesu.—Mariko 8:34.
  • Kabatisanet koboru meet ne bo atebetab keny ne bo chi ak isob si kobiit iyai magetab Kamuktaindet.—1 Petero 4:2.

*  Kabatisanet ko kit ne kiyae eng’ tuiyosiek tugul che eechen che yae Baorinikab Jehovah.


Teebutik che Kinetegei

1. Amu nee si kosom chitab Etiopia kibatisan?

2. Amu nee si ko nyolu ibwat mising’ agobo kabatisanet?

3. (a) Nee ng’atutiet ne kiigochi Jesu kasubikyik? (b) Kiyaitoi ano kabatisanet?

4. Tos kibatisan chito eng’ beek koboru nee?

5. (a) Nee kakwautiet ne tai ne magaat iib si kobiit kibatisanin? (b) Amu nee si ko bo kamanut tuiyosiekab Kristianik?

6. Magat itinye naetab Bibilia ne tia si kobiit kibatisanin?

7. Nyolu ko yain kanetutikab Bibilia iyai nee?

8. Nee kit ne yain imwachi bik alak tuguk che kiinetgei?

9, 10. (a) Imuchi inaam iamdochi ng’o imandab Bibilia? (b) Nee kit ne nyolu iyai ngot imache ichut boisietab amdaet ne yae Baorinikab Jehovah eng’ kibagenge?

11. Nee atebosiek che nyolu kowal bik alak si konyolji koamda?

12. Amu nee si ko magat sigunet?

13. Kewalak ko keyai nee?

14. Nee kakwautiet ne bo kamanut ne magat iib kotomo kibatisanin?

15, 16. Kigochigei Kamuktaindet ko keyai nee, ago nee kit ne yae chito koyai ko u noto?

17. Amu nee si koiywei kogochigei Kamuktaindet bik alak?

18. Nee kit ne yain igochigei Jehovah?

19. Amu nee si ko ma magat iywei igochigei Kamuktaindet?

20. Amu nee si ko kagochinetabge ne bo Jehovah, ko ma kiy ne imuchi koung’ak?

21, 22. Tos imuchi ‘ing’any kuting’ung’’ agobo kayaneng’ung’ eng’ or nee?

23. Tos iboru nee kibatisan chito “eng’ kainetab Kwanda ak ne bo Werit ak ne bo Tamirmiriet ne Tilil”?

24, 25. (a) Iboru nee kabatisanet? (b) Nee teebutiet ne magat kewol?