Siirte iwe tuguk che biitu

Siirte iwe menu alak

Siirte iwe tuguk che mi orit

Baorinikab Jehovah

Kalenjin

Kanetutikab Bibilia che bo Iman

NG’ALEK CHE KIGITES

Jesu Kristo ko Mesia ne Kigasib Kemaoten Agobo Inendet

Jesu Kristo ko Mesia ne Kigasib Kemaoten Agobo Inendet

SI KOBIIT kotoretech kenai agobo Mesia, ko kiibusyi Jehovah Kamuktaindet maotik komwawech agobo siget, boisiet, ak meetab chito ne kiga kimwa kele tun nyo Kosoru bik. Kiisulda maoinatosiechuto bo Bibilia tugul eng’ Jesu Kristo. Bo iman kiy age tugul ne kigakimwa. Eng’ kaborunetab nito, ko ngegeer maoinatosiek tutigin che kisib kemwa agobo tuguk che tiinyegei ak siget ak ming’inatetab Mesia

Kigasib komaoten Isaia kole tun bunu Mesia gotab Laitoriat ne kiguure Daudi. (Isaia 9:7) Kiyaak ko u noto iman, kigisikyi Jesu oretab Daudi.—Matayo 1:1, 6-17

Kisib komwa maotiot age ne keguure Mika kole, tun koegu lakwanito laitoriat ago tun kisikyin “Betlehem Eprata.” (Mika 5:2) Eng’ kasarta ne kigisichei Jesu, ko kimi komoswek aeng’u che kigikuure Betlehem eng’ Israel. Agenge ko ki mi murot katam ne bo Nasaret, ko kinegityin age ak Jerusalem eng’ Juda. Betlehem ne kinegit ak Jerusalem, ko kigikuure keny, Eprata. Kigisikyi Jesu yoto ko u ye kiga kimaoten!—Matayo 2:1.

Kisib komwa maoinatet age ne bo Bibilia kole, tun kiguure Weritab Kamuktaindet komong’ “eng’ Misri.” Ki kimut Jesu kota ko lakwet kwo Misri. Kigiwegu koga kome Herod, kosulda anyun maoinatet.—Hosea 11:1; Matayo 2:15.

Eng’ mapit [“Maoinatosiek che Tiinyegei ak Mesia”], ko mi sirutik eng’ ye kagisir kele “Maoinatet” ne mi tuguk che kiga kimwa agobo Mesia. Kaigai, keerchinen ak sirutik che kagisir eng’ “Kasuldaet.” Ye iyai ko u nito, kogimiti kayaneng’ung’ agobo imandab Ng’olyotab Kamuktaindet.

Yo ichigili sirutik, ko nyolu inai ile maoinatosiechuto ko kigagisir kenyisiek bogolusiek kotom kesich Jesu. Kimwa Jesu kole: “Kanyol kosulda tuguk tugul, che kigisir eng’ Ng’atutik che bo Musa, ak eng’ Maotik, ak eng’ tienwogikab kalosunet, agobo ane.” (Luka 24:44) Imuchi igeer eng’ Bibilia neng’ung’ si inai ile kiisulda maoinatosiek tugul!

MAOINATOSIEK CHE TIINYEGEI AK MESIA
KIT NE KIYAAK MAOINATET KASULDAET
Kisikyin oretab Juda Taunet 49:10 Luka 3:23-33
Sichei bergeiyat Isaia 7:14 Matayo 1:18-25
Bunu oretab Laitoriat ne kiguure Daudi Isaia 9:7 Matayo 1:1, 6-17
Mwaei Jehovah kole Werinnyi inendet Tienwogikab Kalosunet 2:7 Matayo 3:17
Ma iyani chi inendet Isaia 53:1 Johana 12:37, 38
Chutei Jerusalem ko bunei moitab sigiriet Sekaria 9:9 Matayo 21:1-9
Ng’wektoi choruennyi Tienwogikab Kalosunet 41:9 Johana 13:18, 21-30
King’wektae fedaisiek 30 Sekaria 11:12 Matayo 26:14-16
Siisei eng’ taitab bik che mwaitae lembech Isaia 53:7 Matayo 27:11-14
Kigochin siki Tienwogikab Kalosunet 69:21 Mariko 15:23, 36
Kitoorei Isaia 53:5 Johana 19:34, 37
Magiiriei kowekyik agot agenge Tienwogikab Kalosunet 34:20 Johana 19:33, 36
Kitubei ak magorek Isaia 53:9 Matayo27:57-60
King’eeti kotomo konun Tienwogikab Kalosunet 16:10 Boisionik 2:24, 27
Kitorori eng’ eutab tai ne bo Jehovah Tienwogikab Kalosunet 110:1 Boisionik 7:56

← Keer somanet ne ng’alale ng’alechu