Siirte iwe tuguk che biitu

Siirte iwe menu alak

Siirte iwe tuguk che mi orit

Baorinikab Jehovah

Kalenjin

Kanetutikab Bibilia che bo Iman

NG’ALEK CHE KIGITES

Imanda Agobo Kwanda, Werit, ak Tamirmiriet ne Tilil

Imanda Agobo Kwanda, Werit, ak Tamirmiriet ne Tilil

BIK che iyani kanetisietab Kipsomok ko mwaei kole, Kamuktaindet ko bik somok eng’ agenge, Kwanda, Werit, ak Tamirmiriet ne Tilil. Kimwaei kele aechin bichuto tugul, tinyei kamuget ne kergei, ago ma tinyei taunet. Ara anyun, kosubgei ak kanetisietab Kipsomok koneti kole, Kwanda ko Kamuktaindet, Werit ko Kamuktaindet ak Tamirmiriet ne Tilil ko Kamuktaindet, agot nga u noto ko mwaei kora kole, Kamuktaindet ko agenge kityo.

Bik che chang’ che iyani Kipsomok ko mwaei kole, ma imuchi agot koaror komie agobo kanetisioni. Ibwati kora kole ineti Bibilia ko u noto. Bo kamanut kenai kele ma kinyorchin Bibilia ng’oliot “Kipsomok.” Tos kinyorjin iman Bibilia kiy age tugul ne tiinyegei ak Kipsomok? Si kobiit kewolu teebutioni, ko ngegeer sirutiet ne boisiee bik che ineti Kipsomok.

“KI JEHOVAH NG’OLYONDET”

Mwaei Johana 1:1 kole: “Eng’ taunet ko kimi Ng’olyondet, ak kimi Ng’olyondet ak Jehovah, ak ki Jehovah Ng’olyondet.” Eng’ let ne bo kurganoto, koboru komie Johana kole, “Ng’olyondet” ko Jesu. (Johana 1:14) Amu kiguure Ng’olyondet Jehovah, ko mwaei bik alak kole Werit ak Kwanda ko kebeberiatab Jehovah.

Nai ile, eng’ tai ko kiga kisire kebeberiandanito bo Bibilia kutitab Yunanik. Yeitio, kowal bik sirutichoto kong’eete kutitab Yunanik agoi kutuswek alak. Nga u noto, ko ma sir siriik alak kole “ki Jehovah Ng’olyondet.” Tos amu nee? Amu ki Yunanik che kicham kosirei Bibilia, ko kigeer siriik alak kole ki nyolu kesir koteerit ng’olyot ne kiga kisir eng’ kutitab Yunanik kole “ki Jehovah Ng’olyondet.” Tos kiyai ko u noto eng’ or nee? Kaborunet agenge ko ni: “Ki mi Ng’olyondet ak Jehovah ago ki kergei atebennyi ak ne bo Jehovah.” (The Translator’s New Testament) Kosubgei ak Bibilia nito bo The Translator’s New Testament, ko ma Jehovah Ng’olyondet.* Ne kata u noto, amu toror Ng’olyondet eng’ yautik tugul che bo Jehovah, ko tinyei atebet ne kergei ak ne bo Jehovah.

NYORU LOGOIYWEK CHE BO IMAN CHE CHANG’

Ma ingen bik che chang’ kutitab Yunanik ne kigiboisie kesirei Bibilia. Ara tos inaite ano kit ne kiiboru Johana eng’ iman? Ibwat kaborunoni: Ngele ineti konetindet lagok. Ye ibata, koguiyo lagok eng’ ortinwek che teerchin ole kaiarorundo konetindet. Ara tos imuchi konai lagok imanit eng’ or nee? Imuchi koteebe konetindet si kobiit konai che chang’. Ne matiny, ye inetgei icheget che chang’, ko toreti koguiyo komie agobo arorutionito. Ko u noto, si kobiit iguiye kit ne iboru Johana 1:1, imuchi igeer logoiywek che miach che bo Johana si inai che chang’ agobo torornatetab Jesu. Ye inetgei che chang’ agobo ng’alechuto, kotoretin inai imanit.

Ko u, ibwat kit ne kisir Johana eng’ Johana 1:18 kole: “Mami chi ne kigeer Jehovah ole kigoi.” Nga u noto, ko kigogeer bik Jesu, ne Werit amu kimwa Johana kole: “Ak kiek Ng’olyot borto, ak komeny kwenunnyo ak kigigeer toronatennyi.” (Johana 1:14) Ara anyun, tos imuchi koek Werit kebebertab Kamuktaindet? Mwae kora Johana kole, kimi Ng’olyot “ak Jehovah.” Ara kimuchi kemwaita ano kele mi chito ak chito age, ago eng’ kasarato ko chichoto inendet? Kora ko u ole kigisirta eng’ Johana 17:3, koboru Jesu komie teerchinet ne mi eng’ inendet ak Kwandanyi ne bo kipsengwet. Kuure Jesu Kwandannyi, “Jehovah ne inyendet inyege ne bo iman.” Kobegunoti logoiywekab Johana, kogesune inendet ng’alek che mwae kole: “Kigisir chu, si kobiit oyan ole Jesu ko Kristo, Weritab Jehovah.” (Johana 20:31) Keer ile, kiguuren Jesu Weritab Jehovah, ma Jehovah. Logoiywechuto kigisir eng’ bukuitab Johana, koboru ole nyolundoi kiguiyo Johana 1:1. Jesu ne Ng’olyondet ko ma yaechin ak Kamuktaindet ne imuktaat eng’ tugul.

KEER IMANDA

Ibwat kogeny agobo konetindet ak lagok. Ngele ma iyani alak matiny kagogas ng’alek che chang’ che kagoarorji konetindet. Tos imuchi koyai nee? Imuchi kobeechi icheget konetindet age ak koteebe si kobiit koarorji che chang’. Ngot koarorji konetindet ne bo aeng’ ko u konetindet ne bo tai, komuchi koguiyo lagok. Ko u noto, ngot ko ma iguiytosi komie ng’alek che mwae Johana agobo kit ne kureegei Jesu ak Kamuktaindet Ne Imuktaat eng’ Tugul, imuchi igeer sirindet age ne bo Bibilia si kobiit inai che chang’. Ko u, keer kit ne kisir Matayo. Kosubgei ak kagesunetab ng’onyuni, ko kisir inendet ng’alek che kimwa Jesu kole: “Ago manae chi age tugul agobo betunoto ak sainoto, manae agot malaikaisiek che bo kipsengwet, anan Werit, ago Kwanda inegei.” (Matayo 24:36) Tos iborundoi ano ng’alechuto kole Jesu ko ma Jehovah, Kamuktaindet Ne Imuktaat eng’ Tugul?

Mwae Jesu kole ingen Kwanda che chang’ kosiir Werit. Ndo ki Jesu ko kebeberiatab Jehovah Kamuktaindet ne imuktaat, ko ki ta ingen tuguk che ingen Kwandanyi. Ko u noto anyun, ko magoi aechin Werit ak Kwanda. Nga u noto, komwae alak kole: ‘Ki tinyei itonwek aeng’ Jesu. Eng’ yu, ko ng’alali ko chito.’ Agot ndo ki u noto, ang’ tamirmiriet ne tilil anyun? Ngot ko tamirmiriet ne tilil ko kebeberiatab Kamuktaindet ne noto ko Kwanda, ko amu nee si ma mwae Jesu kole ingen kit ne ingen Kwanda?

Ye itesetai inetigei Bibilia, igeere tuguk che chang’ eng’ Bibilia che ng’alale agobo kanetisioni. Mwau imanit agobo Kwanda, Werit ak tamirmiriet ne tilil.—Tienwogikab Kalosunet 90:2; Boisionik 7:55; Kolosaik 1:15.


*  Si inyoru ng’alalutik che chang’ agobo Johana 1:1, igeer The Watchtower November 1, 2008, pechisiekab 24-25 bukuit ne kisirei Baorinikab Jehovah.

← Keer somanet ne ng’alale ng’alechu