Siirte iwe tuguk che biitu

Siirte iwe menu alak

Siirte iwe tuguk che mi orit

Baorinikab Jehovah

Kalenjin

Kanetutikab Bibilia che bo Iman

SOMANETAB SISIT

Bounatetab Kamuktaindet ko Nee?

Bounatetab Kamuktaindet ko Nee?

Nee kit ne mwawech Bibilia agobo Bounatetab Kamuktaindet?

Tun yaei nee Bounatetab Kamuktaindet?

Tun yaei au Bounatetab Kamuktaindet koyaak magennyi eng’ ng’ony?

INGEN bik che chang’ eng’ ng’ony komugul saet ne kiguure Saetab Kiptaiyat. Nito koboru saet ne naat ne kigon Jesu Kristo koek kaborunet. Bo kamanut mising’ saanito ago ngigeer tuguk somok che tai eng’ saanito, ko toretin inetgei che chang’ agobo kit ne ineti Bibilia eng’ iman.

2 Eng’ taunetab saanito bo kabarunet, ko kiinet Jesu bik che kigasei kole: “Noto anyun osa ko u ni: Kwandanyo ne mi kipsengwet, Ingotililit kaineng’ung’. Ingonyo bounateng’ung’. Ingoyaak eng’ ngony mageng’ung’, ko u ye kiyaei eng’ kipsengwet.” (Matayo 6:9-13) Tos bo kamanut ne tia tuguchuto somogu kiinetech Jesu kesa?

3 Koginetgei che chang’ agobo kainetab Kamuktaindet, Jehovah. Ago ko keng’alale kitigin agobo magetab Kamuktaindet, kit ne kigoyachi ak kit ne tun yachin bik. Ara anyun, tos kimwae agobo nee Jesu ye kingomwawech kesaa ko u ni: “Ingonyo bounateng’ung’”? Bounatetab Kamuktaindet ko nee? Tun itililei kainetab Kamuktaindet eng’or nee? Ago tinyegei nyonunetab Bounatet ak yaetab maget ne bo Kamuktaindet eng’ or nee?

BOUNATETAB KAMUKTAINDET KO NEE?

4 Bounatetab Kamuktaindet ko laitornatet ne kiitelel Jehovah Kamuktaindet ak kolewen inendet Laitoriat. Ng’o laitoriat eng’ Bounatetab Kamuktaindet? Jesu Kristo. Jesu ko Laitoriat ne o kosir laitorinikab ng’onyuni ago kiguure “Laitoriat ne bo laitorinik ak Kiptaiyat ne bo kiptainik.” (1 Timoteo 6:15) Tinyei kimnatet koyai tuguk che miach kosir laitoriat age tugul ne mi ng’onyuni.

5 Tun bounisie Bounatetab Kamuktaindet eng’ ano? Tos mi ano Jesu? Ibwati komie ile kiinetgei ile kigibar ak kigartat eng’ ketit, yeitio king’eet inendet. Kingobata kasarta kitigin, koweek kipsengwet. (Boisionik 2:33) Ko u noto, komi Bounatetab Kamuktaindet kipsengwet. Noto amu nee si koguure Bibilia “bounatennyi ne bo kipsengwet.” (2 Timoteo 4:18) Nga mi Bounatetab Kamuktaindet kipsengwet, ko tun bou ng’ony.—Ng’ang’utiet 11:15

6 Nee ne yaei Jesu koek Laitoriat ne teer eng’ laitorinik alak? Ne tai, ko amu ma meei inendet. Ngo kergeite Bibilia Jesu ak laitorinik alak che bo ng’ony, ko kuure inendet “ne tinyei inegei sobondab koigeny, ne menyei eng’ lapkeiyet ne magimuchi kerikyi.” (1 Timoteo 6:16) Iboru nito kole tuguk tugul che yaei Jesu ko tun tebyei koigeny. Ago tun yaei tuguk che eechen ak che kororon.

7 Ibwat maoinatoni bo Bibilia agobo Jesu: “Ak kotebe inendet Tamirmirietab Jehovah, tamirmirietab ng’omnatet ak kaguiyet, tamirmirietab kiruoget ak kimnatet, tamirmirietab naet ak kaiyweisiet ne kiywei Jehovah. Ak komi boiboiyennyi kaiyweisiet ne kiywei Jehovah: amairuochi ko u ye keerei, ama kerei kong’ ko u ye kasei; ago iruoksechin kibananok eng’ imanda, ak koger kong’ che taloen che bo ng’ony eng’ imanda.” (Isaia 11:2-4) Iboru ng’alechoto kole kiga kiaror kele tun egu Jesu Laitoriat ne bou bik eng’ imanda ak rirenet. Tos imache laitoriat ne u noto?

8 Imanda age agobo Bounatetab Kamuktaindet ko ni: tun ko ma laitorani Jesu inegei. Tun komi bik che laitorani tugul. Ko u, kimwachi Paulo Timoteo kole: “Ngemuite, ko tun kibou koboto inendet.” (2 Timoteo 2:12) Ee, tun bounisiei Paulo, Timoteo, ak bik alak che iyanotin che kilewen Kamuktaindet ak Jesu eng’ Bounatetab kipsengwet. Tos tun ko bik ata che nyoru kasarata bo kwong’ut?

9 Ko u ole kiiborundo Somanetab 7 eng’ bukuini, ko kigeer Johana eng’ ng’ang’utiet ne kiging’ang’ji, kotononi “Arwet [Jesu Kristo] eng’ tulwetab Sion [boisiennyi ne o mising’ eng’ kipsengwet], ak komi koboto inendet bik elfusiek bogol ak artam ak ang’wan che tinyei kainennyi, ak kainetab Kwandanyi, che kigisirji togochikwak.” Ng’o bichoto 144,000? Mwawech Johana kole: “Chuto ko icheget che isubi Arwet eng’ oldo tugul ole wendi. Kigial chuto eng’ kwenutab bik, koek tongoanik eng’ Jehovah ak eng’ Arwet.” (Ng’ang’utiet 14:1, 4) Ee, chuto ko kasubikab Jesu Kristo che iyanotin che kigilewen kolaitoran ak inendet eng’ kipsengwet. Ye kaging’eet eng’ meet ak koba kipsengwet, kobendi koegu laitorinik ak tun bou ng’ony ak Jesu. (Ng’ang’utiet 20:4, 6) Kong’eete kenyitab 33 Ko Kagoit betusiekab Jesu, kotesetai Kamuktaindet koleweni Kristianik che iyanotin si kobiit konyi bik koek 144,000.

10 Kaborunetab chamnyet eng’ Kamuktaindet kingochob kobounis bik 144,000 ak Jesu. Amu nee si ko u noto? Amu ne tai kongen Jesu nyalilda ne nyoru bik. Kimwa paulo kole Jesu ko “ne maimuchi kogaswech nyalulnatosiekyok; ago ne kigiyom kou achek eng’ tuguk tugul, ama yai tengek.” (Hebranik 4:15; 5:8) Kigomuitochi nyalilwogik bichuto tun laitorani ak Jesu. Kora ko kigoborio ak borwek che ma ititaatin ago kigomuitochi mianwogik tugul che teerchin. Eng iman ko tun iguitos icheget koimutik che nyoru bik.

TUN YAEI NEE BOUNATETAB KAMUKTAINDET?

11 Kingomwa Jesu kole nyolu kosa alamalaikyik agobo Bounatetab Kamuktaindet konyo ng’ony, ko kimwa kora kole nyolu kosa koyaak magennyi eng’ ng’ony “ko u ye kiyaei eng’ kipseng’wet.” Mi Kamuktaindet kipsengwet, ago yaei malaikaisiekyik che iyanotin magennyin eng’ kipsengwet betusiek tugul. Nga u noto, ko eng’ Somanetab 3 eng’ bukuini, ko kiginetgei kele, kibagach malaikayat ne ya koyai magetab Kamuktaindet ak kong’al Adam ak Awa koyai tengekto. Eng’ Somanetab 10, ko tun kinetigei che chang’ agobo kit ne ineti Bibilia agobo malaikaiyandanoto ya ne kiguure Setani Oindet. Kigichamji Setani ak oikyik kotebi kitigin eng’ kipsengwet. Ko u noto, ko ma tugul eng’ kipsengwet che kiyaei magetab Kamuktaindet. Ki nyolu kowalak noto ye tau kobounis Bounatetab Kamuktaindet. Ki nyolu koborio Jesu Kristo ye kagoeek Laitoriat ak Setani.—Ng’ang’utiet 12:7-9.

12 Maoinatoni isubi koboru kit ne kinyo koyaak: “Kiagas kutit ne o eng’ kipsengwet, kole, Kagonyo nguno yetunet, ak kamuktaet, ak bounatetab Jehovah nenyo, ak kimnatetab Kristo nenyi: amu kagetururto kataamindetab che kitupche kwo ng’ony, ne itaami ichek eng’ taitab Jehovah nenyo bet ak kemoi.” (Ng’ang’utiet 12:10) Tos kaigeer tuguk aeng’ che bo kamanut eng’ sirutioni che kigimwa kele yaaksei? Ne tai, ko tougei Bounatetab Kamuktaindet ko laitoriat Jesu Kristo. Ne bo aeng’, ketururu Setani konyo ng’ony.

13 Kibiit nee kingo kagoyaak tuguchoto aeng’u? Kosubgei ak kit ne kiyaak eng’ kipsengwet, kesomani ko u ni: “Noto anyun oboiboitu, okwek kipsengwetisiek, ak okwek che omenye oloto.” (Ng’ang’utiet 12:12) Ee, boiboen malaikaisiek amu ma komi Setani ak oikyik kipsengwet, amu noto ko age tugul ne mi kipsengwet koyanat eng’ Jehovah Kamuktaindet. Mi kalyet ne o mising’ oloto. Yaaksei magetab Kamuktaindet eng’ kipsengwet.

14 Nee kit anyun ne kiyaak eng’ ng’ony? Mwaei Bibilia kole: “Bwa agobo ng’ony ak nyanjet: amu kachorgei oindet konyo ole omi, kotinyei nereknatet ne o, amu ingen kole tinyei betusiek che ng’ering’ kityo.” (Ng’ang’utiet 12:12) Neregat Setani amu kigiturur inendet eng’ kipsengwet ago ingen kole tinyei betusiek che ng’ering’. Eng’ neregekyik, ko kigogon inendet nyalilda anan ko “bwa,” eng’ ng’ony. Kinetigei che chang’ agobo “bwa” noto eng’ somanet ne rubei. Amu kigeturur Setani konyo ng’ony ak kogonu inendet nyalilda, kimuchi ketebegei kele, Yaitoi ano Bounatet koyaak magetab Kamuktaindet eng’ ng’ony?

15 Ibwat magetab Kamuktaindet agobo ng’ony. Kiinetgei agobo nito eng’ Somanetab 3. Kimwa Kamuktaindet eng’ mbaretab Eden kole magennyi ko koek ng’ony paradiso ak konyi bik che ma begu ago che isubi imanda. Kiyai Setani Adam ak Awa koyai tengekto, ago kiteer nito kasuldaetab maget ne bo Kamuktaindet eng’ ng’ony, nga u noto, ko mawal nito maganoto. Ta ko magetab Jehovah konam “emet che bo imanda, ak komeny oloto koigeny.” (Tienwogikab Kalosunet 37:29) Ago tun yaei Bounatetab Kamuktaindet kosulda noto. Tun yaei ko u noto eng’ or nee?

Kingeturur Setani ak oikyik komong’ eng’ kipsengwet ko kiyai kobiit bwa eng’ ng’ony. Begu kaimutichoto konegit

Pichainikab boriet, ak rubet

16 Keer maoinatet ne kisomani eng’ Daniel 2:44. Kisomani ko u ni: “Ak tun lumdoi Kamuktaindetab kipsengwet eng’ betusiekab laitorinichoto bounatet ne magoi king’em, ama kigochin laitornatanato boror age; ago tuatui ak koges bounatosiechuto tugul, ak tononi koigeny.” Tos mwawech nee nito agobo Bounatetab Kamuktaindet?

17 Ne tai, komwawech kole kilumdoi Bounatetab Kamuktaindet “eng’ betusiekab laitorinichoto,” anan ko ta komi bounatosiek alak. Ne bo aeng’, ko mwawech kole, tebyei Bounatonoto koigeny. Mami bounatet age ne siirei bounatetab Kamuktaindet ak kobounis. Ne bo somok, kegeere kele, tun komi boriet eng’ Bounatetab Kamuktaindet ak bounatosiekab ng’ony. Tun ibelisiei Bounatetab Kamuktaindet. Ak koek anyun noto Bounatet ne inegei ne bou bik. Tun boibochin bik bounatet ne tomo kogeere ole kigoi.

18 Mwaei che chang’ Bibilia agobo borietab let ne bo Bounatetab Kamuktaindet ak bounatosiekab ng’onyuni. Ko u, ineti kole kotesetai korigu let ne bo laitorinikab ng’onyuni, koletoi tamirmirikab oik lembeita kong’alei “laitorinikab ng’ony komugul.” Amu nee si koyai ko u noto? “Si koyum ichek [laitorinik] koba lugetab betut ne o ne bo Jehovah, Kamuktaindet.” Tun kiyumi laitorinikab ng’ony tugul “eng’ ole kiguure Har-Magedon eng’ kutitab Hebranik.” (Ng’ang’utiet 16:14, 16) Amu kit ne mwae sirutichuto aeng’u, ko boriet ne bo let eng’ bounatosiekab ng’ony ak Bounatetab Kamuktaindet keguure Har-Magedon.

19 Nee ne yaei Bounatetab Kamuktaindet kosulda eng’ borietab Har-Magedon? Ibwat kogeny agobo magetab Kamuktaindet eng’ ng’ony. Ki magetab Jehovah Kamuktaindet konyi bik che isubi imanda, che ititaatin ak koboisiechi inendet eng’ ng’ony ne Paradiso. Nee ne teerei si mayaak ko u noto rani? Ne tai, ketinye tengek, kimiandosi ak kebegu. Kiginetgei eng’ Somanetab 5 kele, nga u noto ko kime Jesu agobo achek si kobiit kesobche koigeny. Ne matiny ibwati ng’alek che kigisir eng’ Logoiwekab Johana kole: “Kicham Jehovah ng’ony mising’, kot kogoito Werinnyi ne kigii inegei, si malus age tugul ne iyani inendet, ago si konyor sobondab koigeny.”—Johana 3:16.

20 Kit age, ko yaei bik tuguk che yaach. Mwaei lembeita, ng’alsei, ago yaei sokset. Ma machei koyai magetab Kamuktaindet. Bik tugul che yaei tuguk che yaach ko tun keng’emei eng’ borietab Kamuktaindet, Har-Magedon. (Tienwogikab Kalosunet 37:10) Amu nee age kora si mayaaksei magetab Kamuktaindet eng’ ng’ony, ko amu ma igimiti bounatosiekab ng’onyuni bik koyai. Bounatosiek che chang’ ko ma kimen, kolgolen ago ma isubi imanda. Mwaei Bibilia komie kole: “Tinyei chito age kimnatet koboi age si kogochinegei nyalilda.”—Amdoindet 8:9.

21 Ye kagobata Har-Magedon ko tun kobou bik tugul Bounatet agenge, noto ko Bounatetab Kamuktaindet. Baunatanoto ko tun koyaei magetab Kamuktaindet ak kogochi bik berurto ne kararan ne bo kwong’ut. Ko u, tun istoi bounatanoto Setani ak oikyik. (Ng’ang’utiet 20:1-3) Boisiei Jehovah tiseiywotab Jesu koisto mianwogik ak meet eng’ bik che iyanotin. Ko u noto, ko tun komeng’isiei bik tugul koigeny kobounisiei Bounatetab Kamuktaindet. (Ng’ang’utiet 22:1-3) Tun kiyaei ng’ony koek paradiso. Ko u noto, ko tun yaei Bounatetab Kamuktaindet koyaak magennyi eng’ ng’ony ak kotilil kainennyi. Tos iboru nee nito? Iboru nito kole tun eng’ let kobounisiei Baunatetab Kamuktaindet, ko tun konyiti chi tugul ne sobei kainetab Jehovah.

TUN YAEI AU BOUNATETAB KAMUKTAINDET KOYAAK MAGENNYI ENG’ NG’ONY?

22 Kingo mwachi Jesu kasubikyik kosa kole, “Ingonyo bounateng’ung’,” ko kitogu kele kitomo konyo Bounatetab Kamuktaindet kasarata. Tos kinyo kingo kagowektagei Jesu kipsengwet? Achicha, amu kimwa Petero ak Paulo kole kingo kaging’eet Jesu, kosulda maoinatet ne kenyorjini Tienwogikab Kalosunet 110:1 ne mwaei kole: “Kalenji Jehovah kiptaiyandennyu, Tebe eunnyu ne bo tai, Agoi ayai buniguk koek ng’echeretab kelyeguk.” (Boisionik 2:32-34; Hebranik 10:12, 13) Kiiboru nito kele kimi kasarta ne kinyolu kogany Jesu kosirto.

Yaaksei magetab Kamuktaindet eng’ ng’ony ko u kipsengwet ye bounis Bounatetab Kamuktaindet

Kororoktoi asista eng’ nyanchet

23 Kiigany Jesu kasarta ne tia? Kobegunoti kenyisiekab 1800 ak 1900, koguiyo bik che kiigilegei konetgei Bibilia kole, begu kasarata kenyitab 1914. (Kosubgei ak kenyinoto igeer Ng’alek che Kigites) Tuguk che kiyaagis eng’ ng’ony komugul kenyitab 1914 koboru kole ki bo iman kaguiyetab bichoto kiigilegei konetgei Bibilia. Iboru kasuldaet ne bo maoinatetab Bibilia kole, eng’ kenyitab 1914, ko kiek Kristo Laitoriat ak konaam kobounis Bounatetab Kamuktaindet ne bo kipsengwet. Kimite rani “betusiek che ng’ering’” che ng’etunotin eng’ Setani. (Ng’ang’utiet 12:12; Tienwogikab Kalosunet 110:2) Kimuchi kemwa eng’ iman kele konegit konyo koyaei Bounatetab Kamuktaindet koyaak magennyi eng’ ng’ony. Tos igeere chuto ko logoiywek che bo kwong’ut? Tos iyani ile bo iman logoiywechuto? Toretin somanet ne rubei igeer ile ineti Bibilia tuguchuto eng’ iman.

KIT NE INETI BIBILIA

  • Tun bounisiei Bounatetab Kamuktaindet komi kipsengwet ko Laitoriat Jesu Kristo, koboto bik 144,000 che kigilewen kolaitoran tugul ak inendet.—Ng’ang’utiet 14:1, 4.
  • Kiinam kobounis Bounatetab Kamuktaindet kenyitab 1914, kong’etegei yoto keturur Setani konyo ng’ony.—Ng’ang’utiet 12:9.
  • Konegit ko ng’emei Bounatetab Kamuktaindet bounatosiekab ng’onyuni, ak koek ng’ony paradiso.—Ng’ang’utiet 16:14, 16.

Teebutik che Kinetegei

1. King’alale saet ngoro ne naat?

2. Nee tuguk somogu che kiinet Jesu kasubikyik kosa?

3. Nee kit ne magat kenai agobo Bounatetab Kamuktaindet?

4. Bounatetab Kamuktaindet ko nee, ago ng’o Laitoriat?

5. Bounisiei Bounatetab Kamuktaindet eng’ ano, ago bou ano?

6, 7. Nee kit ne yaei Jesu koek Laitoriat ne teer eng’ laitorinik alak?

8. Tos tun ko ng’o che laitorani ak Jesu?

9. Ata bik che tun bounisiei ak Jesu, ago kitau Kamuktaindet au koleweni bichoto icheget?

10. Amu nee si ko chamnyet eng’ Kamuktaindet kochob kobounis Jesu ak bik 144,000?

11. Amu nee si kimwa Jesu kole nyolu kosa alamalaikyik koyaak mageetab Kamuktaindet eng’ kipsengwet?

12. Nee tuguk aeng’u che bo kamanut che yaaksei che kemwaei eng’ Ng’ang’utiet 12:10?

13. Ki biit nee eng’ kipsengwet kingo kageturur Setani?

14. Nee kit ne kiyaak amu kigeturur Setani konyo ng’ony?

15. Magetab Kamuktaindet ko nee agobo ng’ony?

16, 17. Nee kit ne mwawech Daniel 2:44 agobo Bounatetab Kamuktaindet?

18. Kiguure nee borietab let ne bo Bounatetab Kamuktaindet ak laitorinikab ng’onyuni?

19, 20. Nee ne teerei si ma yaak magetab Kamuktaindet eng’ ng’ony rani?

21. Tun yaitoi ano Bounatetab Kamuktaindet koyaak magennyi eng’ ng’ony?

22. Kinaitoi ano kele ma nyo Bounatetab Kamuktaindet kota komi Jesu ng’ony anan kasarta kitigin ko kaging’eet?

23. (a) Kiinaami au Bounatetab Kamuktaindet kobounisiei? (b) King’alale nee eng’ somanet ne rubei?