Siirte iwe tuguk che biitu

Siirte iwe menu alak

Siirte iwe tuguk che mi orit

Baorinikab Jehovah

Kalenjin

Kanetutikab Bibilia che bo Iman

SOMANETAB TAMAN AK AGENGE

Amu Nee si Kochamda Kamuktaindet Kobiit Nyalilda?

Amu Nee si Kochamda Kamuktaindet Kobiit Nyalilda?

Tos ki tau Kamuktaindet nyalilda ne mi ng’onyuni?

Nee kit ne kiyaak eng’ mbaretab Eden?

Tos tun istoi eng’ or nee Kamuktaindet kit age tugul ne kigogon nyalilda?

KINGO kagobata boriet eng’ emet agenge, ketupchi chepyosok ak lagok tugul che kibek eng’ borionoto kererit agenge ne o ak kelumchi kimurtoinik tabanutab kererinoto. Kiga kisirchi kimurtoiyot age tugul ng’olyot ne mwae kole: “Amu nee?” Ng’wan teebutioni kosiir tugul eng’ kasarwek alak. Mising’ ko yo kabiit boriet, ng’emisiet, miando, anan yaitiet ak kobeet chamnikab bik, kong’em korikwak, anan kogochi icheget nyalilda eng’ ortinwek che teerchin. Machei konai amu nee si koyaaksei tuguk che yaach eng’ icheget.

2 Amu nee si kochamda Kamuktaindet nyalilda? Ngot ko Jehovah Kamuktaindet ko kim kosiir tugul, chamech, ng’om ak ko isubi imanda, ko amu nee si ko kinyi ng’onyuni sosisiet ak butetab imanda? Tos kiiteebegei teebutichuto?

3 Tos ya keteeb amu nee si kochamda Kamuktaindet nyalilda? Ibwati bik alak kole, ngot koteeb teebutionito koboru kole matinye kayanet anan ko ma teegisi Kamuktaindet. Ye isomani Bibilia, igeere ile mi kiboitinik che iyanotin che bo Kamuktaindet che ki tinyei teebutik che u chuto. Ko u, kiteebe maotiot ne keguure Habakuk Jehovah kolenji: “Amu nee si iborua tengekto, ak igona ageer kamaaset? amu mi tainnyu ng’emisiet ak koromnatet: ak komi boriet ak kong’eetei tiyiet.”—Habakuk 1:3.

Tun iwong’u Jehovah nyalilda age tugul

Ketubei chito ne kagome

4 Tos kiwaage Jehovah maotiot ne iyanat Habakuk amu kiteeb teebutichoto? Achicha. Ne kata u noto, ko kiiyan Kamuktaindet kesir ng’alekab Habakuk eng’ sirutik che tililen che bo Bibilia. Kitoret kora Kamuktaindet koguiyo komie agobo tuguk che kiyaaksei ak konyor kayanet ne kim. Machei Jehovah koyaun ko u noto agot ak inye. Ibwat ile, ineti Bibilia kole, “ibwatok mising’.” (1 Petero 5:7) Wechei Kamuktaindet yaitiet ak nyalilda kosiir chi age tugul. (Isaia 55:8, 9) Ara anyun, tos amu nee si komi nyalilda ne o mising’ ng’onyuni?

AMU NEE SI KOMI NYALILDA NE O MISING’?

5 Kigoteebe bik che chang’ kandoik ak konetikab dinisiek agobo amu nee si komi nyalilda ne o mising’. Wolu kandoik che chang’ kole, nyalilda ko magetab Kamuktaindet ago kigasib kotet inendet tuguk che tun yaaksei koboto tuguk che yaach che bo kwong’ut. Kigemwochi bik che chang’ kelenji ortinwekab Kamuktaindet ko ma kiguitos, anan ibchin inendet bik meet agot lagok si kobiit komut icheget koba kipsengwet. Ko u ye kiga inetgei, ko kiigeer ile magoi yai kiy age tugul ne ya Jehovah Kamuktaindet. Mwaei Bibilia: “Ee, iman, mayaei Kamuktaindet kiy ne ya, Ama imaasi kiruoget Inendet ne bo Kamuktaet.”—Job 34:12.

6 Tos ingen amu nee si ko mwae bik kole tau Kamuktaindet nyalilda ne o ne mi ng’onyuni? Bik che chang’, kobwati kole Kamuktaindet ne bo Kamuktaet ne bou ng’onyuni. Ma ingen icheget imanda ne bo kamanut ne ineti Bibilia. Kiinetgei imaninoto eng’ Somanetab 3 ne bo bukuini. Bounindetab ng’onyuni eng’ iman ko Setani ne Oindet.

7 Mwae Bibilia komie kole: “Mitei ng’ony komugul eng’ bounatetab inendet ne ya.” (1 Johana 5:19) Ngibwat nito, ko tos ma igeere ile iman nito? Iboru ng’onyuni atebetab Setani, ne inendet ko “kaberberindetab ng’ony komugul.” (Ng’ang’utiet 12:9) Setani ko sasindet, ng’olindet ago ya. Ko u noto, kinyi ng’onyut ne bou inendet sasisiet, ng’olset ak yaitiet. Noto amu nee ne tai si ko o nyalilda mising’.

8 Ne bo aeng’ si ko o nyalilda ko ni, ko u ole kiginetitegei eng’ Somanetab 3, ki koek chito ne ma ititaat ak kiptengekyot kong’eete kingongelelji Kamuktaindet eng’ mbaretab Eden. Tiemei bichuto tinyei tengek koborchigei bounatet, ki kogon nito boriet, usisiet ak nyalilda. (Amdoindet 4:1; 8:9) Ne bo somok ko o nyalilda ko amu “ityin ichek tugul sainywa ak betunywa [“kasarta ne ma kibwatyin,” NW].” (Amdoindet 9:11) Eng’ ng’onyut ne ma bou Jehovah, komuchi konyalilso bik amu imuch komi oldo ne ma nyolu eng’ kasarta ne ma nyolu.

9 Igaigaech ngenai kele ma tou Kamuktaindet nyalilda. Ma inendet ne yaei kobiit boriosiek, yaitiet, usisiet, anan ko tuguk che ma tau chi ko u botanosiekab ng’ony, che yaei bik konyalilso. Kora, ko magat kenai, Amu nee si kochamda Jehovah kobiit nyalilda? Ngot ko kim Jehovah kosir tugul, ko magat koisto nyalilda. Ara anyun, amu nee si ma boisie kimnatanoto? Mi amu nee ne kararan ne yae Kamuktaindet si mayai ko u noto, amu inendet ko chamnyet.—1 Johana 4:8.

NEE KIT NE KIYAAK ENG’ MBARETAB EDEN?

10 Si kobiit kenai amu nee si kochamda Kamuktaindet nyalilda, ko magat kibwat ole kitaundogei nyalilda. Kingondochi Setani Adam ak Awa kongelelchi Jehovah, ko kitoigei teebutiet ne bo kamanut. Ma esio Setani kole tinyei Jehovah kimnatet. Ingen Setani agot agine kole matinyei kagesunet kimnatetab Jehovah. Ne kata u noto, ko ki esio Setani kole ma nyoljin Jehovah kalaitoran. Kingoguure Setani Kamuktaindet kiplembechwa ne eete bikyik tuguk che kororon, ko u yo kimwa kole Jehovah ko bounindet ne ya. (Taunet 3:2-5) Kiibor Setani kole imuch koboiboitu bik agot ndo ma bou Kamuktaindet icheget. Nito ko ki kirindaet eng’ torornatet ne siirei tugul ne bo Jehovah, nyoljinennyi kolaitoran.

11 Kiingelelji Adam ak Awa Jehovah. Ki u yo kamwa kole: ‘Ma magat koboiywech Jehovah. Kimuchi ketiljigei kit ne mie ak ne ya.’ Tos ki ta yaei nee Jehovah? Ki ta inetitoi ano Jehovah malaikaisiek kole bo iman orennyi, ago ma bo iman kit ne ki yai ngelelichoto? Imuchi komwa chi kole, ki ta ng’emei Kamuktaindet ngelelichoto ak koyai bik alak. Nga u noto, ko kiga komwa Jehovah magennyi kole konyi lagokab Adam ak Awa ng’ony, ago kimache komeng’is icheget eng’ ng’ony ne paradiso. (Taunet 1:28) Yaei Jehovah kosulda magutikyik betusiek tugul. (Isaia 55:10, 11) Kora, ndo kiga ng’em Jehovah ngelelichoto eng’ Eden, ko ki ta ma ilitiiti kit ne kiga kotoigei agobo nyoljinetab Jehovah kolaitoran.

Kanetindet ak lagok

Tos ng’om lakwet kosir konetindet?

12 Ngegeer kaborunet. Ibwat konetindet koneti lagok ole kimuchi keyaita esabuk che uen. Yeitio komwa lakwet agenge ne ng’om ago ngeleliot kole, ma ingen konetindet ole kiyaitoi esabuchoto. Si kobiit koboor lakwanito kole ng’om kosiir konetindet, ko mwaei kole ingen oret age ne kaigai ole kiyoitoi esabuchoto. Imuchi kobwat lagok alak kole mwaei iman ngeleliondonoto, yeitio kongelel agot ak ichek. Nee kit ne magat koyai konetindet? Ngot ko oon ngelelichoto komanda sang’, ko tos keerto ano lagok alak? Tos ma ibwat lagochoto kole mwaei iman ngelelichoto tugul? Imuchi ma testai kotegis lagok alak konetindet, kobwati kole iywei konetindet kotook kele ma mwaei iman. Nga u noto, ko ngemwa kele kachamji konetindet ngeleliondonoto koborji lagok alak ole imuchi koyaita esabchandanoto.

13 Kigoyai Jehovah kit ne kergei ak kit ne ki yai konetindet eng’ kabarunennyo. Nai ile ki ma ko ngelelichoto kimi Eden kityo che kigeerei kit ne kiyaaksei. Kigeere malaikaisiek che chang’ kora. (Job 38:7; Daniel 7:10) Kit ne ki yae Jehovah ko ki tiinyei malaikaisiechoto tugul ak bik tugul. Ara anyun, tos kigoyai nee Jehovah? Kichamji inendet Setani koboor ngot komuchi kondochi bik. Kichamji Kamuktaindet kora bik koboigei kondochin Setani.

14 Ingen konetindet eng’ kabarunennyo kole, lakwanoto ngeleliot ak lagok che isubi inendet ko ma mwaei iman. Nga u noto, kongen kora kole, ngot ko chamji ngelelichoto koboor ole kiyaitoi esabchandanoto kosubgei ak icheget, kotoreti nito lagok tugul. Ngot ko ma imuch ngelelichoto, kogeerei lagok tugul che miach kole konetindennywa inegei ne nyolu kondochi icheget. Iguitos amu nee si koon konetindonito ngelelichoto ko ba sang’. Ko u noto, kongen Jehovah kole, nyoru borotet bik che isubi imanda ak malaikaisiek ye keer kole ma ta komuch Setani ak ngelelik che isubi inendet,ago kora ko ma ta komuch bik koboi bik alak. Ko u Jeremia ne bo keny, ko tun konetigei icheget imani nito bo kamanut: “Ee Jehovah, angen ale, ma bo chito ortinwekyik; amaindochin chito ne wendoti, kabwatutikyik.”—Jeremia 10:23.

AMU NEE SI KOCHAMDA JEHOVAH NYALILDA ENG’ KASARTA NE KOI?

15 Ara anyun, tos amu nee si kochamda Jehovah nyalilda eng’ kasarta ne koi? Ago amu nee si ma teer inendet tuguk che yaach si ma yaak? Ibwat tuguk aeng’ eng’ koborunennyo che ma yaei konetindet. Ne tai, ko ma eete lakwet ne ngeleliot koaror ole kiyaitoi esabchandanoto. Ne bo aeng’, ma toreti konetindet ngeleliondonito koboor orennyi. Ko u noto, ibwat tuguk aeng’ che kitil Jehovah kole ma yae. Ne tai, ko tomo koeete Setani ak ichek che isubi inendet kotiem koboor ngot ko bo iman icheget. Ki bo kamanut kosiirto kasarta. Eng’ kenyisiek che chang’, ko kigotiem bik oret age tugul ne bo bounisiet anan ko laitornatet. Nga kigotestai bik eng’ ng’omnatosiek, ko tesetai butetab imanda, tesetai bananda, yaitiet ak boriet. Kogotook kele ma imuchi chito ko bounis.

16 Ne bo aeng’ ko tomo kotoret Jehovah Setani kondochi ng’onyuni. Ndo kiteerei Kamuktaindet yaitiet, ko tos kima koboru nito kole toreti inendet ngelelichuto koboor kole bo iman icheget? Ngot koyai Kamuktaindet ko u noto, ko tos ma yai bik kobwat kole, imuchi kobounis bik eng’ oret ne boiboichin bik tugul? Ki egu Jehovah kiplembechwa nda kigayai ko u noto. Nga u noto, ko “ma imugaksei eng’ Jehovah komwa lembech.”—Hebranik 6:18.

Toretin Kamuktaindet imuitochi nyalilda

Kwondo igaigai Ng’olyotab Kamuktaindet

17 Ara anyun ang’ tuguk che kigoyaak che yaach eng’ kasarta ne kigo ngelelji bik Kamuktaindet? Kiyae ne mie kibwat kele Jehovah ko ne bo kamuktaet tugul. Ko u noto, imuchi ago nyo koisto Jehovah nyalilda age tugul ne nyoru bik. Ko u ye kiginetgei, ko tun kiwegu ng’onyuni kigoyait koek Paradiso. Tun kiistoi tuguk che kigogon tengekto kobun kayanetab tiseiywotab Jesu ak tun king’eeti bik che kigobek. Tun boisiee Kamuktaindet Jesu “si kobiit kong’em boisionikab oindet.” (1 Johana 3:8) Tun yaei Jehovah tuguchu tugul eng’ kasarta ne nyolu. Kiboiboi kele ma sib koib kakwautiet Kamuktaindet, amu kigo konech muitaennyi boroindo kinetgei imanda ak keboisiechi inendet. (2 Petero 3:9, 10) Ya tugul, ko kigotestai Kamuktaindet kocheng’ bik che boisiechin inendet eng’ muguleldo tugul, ak kotoreti icheget komuitochi nyalilwogik che imuchi konyor eng’ ng’onyuni mi kaimutik.—Johana 4:23; 1 Korintoek 10:13.

18 Imuchi koteebegei bik alak kole, Tos kima kimuchi keteer nyalilda ndo kigayai Kamuktaindet Adam ak Awa eng’ oret ne kima komuchi kongelelso? Si kobiit kewolu teebutionito, ko magat ibwat konunotiot ne bo kamanut ne kigo konin Jehovah.

TOS IBOISIE ENG’ OR NEE KONUNOTIOT NE BUNU KAMUKTAINDET?

19 Ko u ole kigi keerte eng’ Somanetab 5, ko kigiyai chito eng’ oret ne imuchi kotilchigei kit ne machei koyai. Tos igeere ile nito ko konunotiot ne bo kamanut? Kigoyai Kamuktaindet tiong’ik che ma iitoksei ago tugul kondochin ng’omnatet ne kiigochi inendet. Nga u noto, ko ma tinyei tiong’ik kamuget kotilchigei kit ne machei koyai. (Kalewenaik 30:24) Tos kigimuchi keboiboichi sobet ndo kiga yaech Kamuktaindet ko u tiong’ik? Achicha, kiboiboi amu kiyaech inendet eng’ oret ne kimuchi ketilchigei kit ne kimache keegu eng’ sobennyo, oret ne kimache kisub, choronok che kimachei ak tuguk alak che chang’. Kiboibochini kamuget ne kitinye kelewen kit ne kimache keyai, ago nito kit ne machei Kamuktaindet keboiboichin.

20 Ma boiboichin Jehovah boisiet ne kiyae eng’ torchinet. (2 Korintoek 9:7) Eng’ kabarunet: Nee kit ne tos boiboichi sigindet mising’, ngomwachi lakwet kolenji, “Achamin” amu kagilenji komwa ko u noto, anan ngomwa inegei kobun muguleldanyi? Ko u noto, ko teebutiet ko ni, Tos iboisie eng’ or nee kamuget ne kigonin Jehovah ne imuchi itilchigei kit ne imache iyai? Kiboisie eng’ oret ne ya Setani, Adam ak Awa kamuganoto. Kieesio icheget Jehovah Kamuktaindet. Tos iyai nee?

21 Itinye boroindo iboisie konunotiondonoto bo kwong’ut eng’ oret ne kararan mising’. Imuchi otuiyegei ak bik tugul che kigolewen kotebe komostab Jehovah. Iboiboi Kamuktaindet icheget amu yaei boisiet koboor kole kiplembechwa Setani ago ma ta komuch koboi bik. (Kalewenaik 27:11) Imuchi iyai ko u noto ak inye ngot ilewen isub oret ne mie. Kiaroru nito eng’ somanet ne rubei.

KIT NE INETI BIBILIA

  • Ma Kamuktaindet ne tau tuguk che yaach che yaaksei eng’ ng’onyuni.—Job 34:10.
  • Kingo kuure Setani Kamuktaindet kiplembechwa, ago ma makyin bikyik tuguk che kororon, ko ki u yo kimwae kole ma magat koboi bik Jehovah.—Taunet 3:2-5.
  • Tun boisie Jehovah Werinnyi ne Laitoriat ne bo Bounatetab Mesia kowong’ nyalilda ak koisto tuguk tugul che yaach.—1 Johana 3:8.

Teebutik che Kinetegei

1, 2. Nee nyalilwogik che nyoru bik rani, ago yaei koteeb teebutik ngorcho?

3, 4. (a) Nee kit ne iboru kole, ma ya keteeb amu nee si kochamda Kamuktaindet nyalilda? (b) Keertoi ano Jehovah yaitiet ak nyalilda?

5. Mwae bik kasarwek alak kole nee kit ne yae bik konyalilso, ko nee kit ne ineti Bibilia?

6. Amu nee si komwae bik che chang’ kole tau Kamuktaindet nyalilda ne o ne mi ng’onyuni?

7, 8. (a) Iboru ng’onyuni atebetab bounindet ne bo ng’onyuni eng’ or nee? (b) Tos kigotes nyalilda bik che ma ititaatin ak “kasarta ne ma kibwatyin” eng’ or nee?

9. Amu nee si kingen komie kele tinyei Jehovah amu nee ne kararan si kochamda nyalilda kotestai?

10. Nee kit ne kiesio Setani, ago ki yai ko u noto eng’ or nee?

11. Ki amu nee si ma ng’em Jehovah ngelelik eng’ Eden?

12, 13. Iboru amu nee si kichamji Jehovah Setani koek bounindetab ng’ony ago amu nee si ko chamji Kamuktaindet bik kondochigei.

14. Tos nee borotet ne biitu amu ki chamda Jehovah koboigei bik ichegei?

15, 16. (a) Amu nee si kochamda Jehovah nyalilda eng’ kasarta ne koi? (b) Amu nee si kotomo koteer Jehovah tuguk che yaach che bo kwong’ut?

17, 18. Tun yaei nee Jehovah agobo tuguk che yaach che kigobiit kosubgei ak bounatetab bik ak kandoinatetab Setani?

19. Nee konunotiot ne bo kamanut ne kigonech Jehovah, ago amu nee si kegonyit konunotiondonito?

20, 21. Tos kimuchi keboisie kamuget ne kimuchi kelewenjigei kit ne kimache keyai eng’ or nee, ago amu nee si kemache keyai ko u noto?