Nuannaril­luakkannik naapitsivutit, aalajangerpusilu katissagaluarussi immissinnut tulluar­nerlusi paasiumallugu peerariiler­niarlusi. Ilisarisimal­lualerniar­nissinni suna ilimagissaviuk?

Allaaserisami matumani

•  Unneqqarissumik oqaloqatigiis­sinnaaneq

•  Isumaqatigiin­ngissuteqarsinnaaneq

•  Uippakajaaq­qajaasinnaaneq

 Unneqqarissumik oqaloqatigiis­sinnaaneq

 Peerariinnissi nalaani immissinnut tunngasunik paasisaqarluarsin­naavusi. Pissutsini assigiin­ngitsuni peeqqavit qanoq qisuariar­tarnera pissusilersorneralu maluginiar­tarukku ilisarisimal­lualersinnaavat.

 Aammali ammasumik unneqqaris­sumillu oqaloqatigiit­tariaqarpusi. Oqaloqatigiin­nissinni misigis­sutsinnit aqunneqarnak eqqarsarluarlutit pitsaasumik naliliisarit.

 Uku eqqartussavasi:

•   Aningaasat. Akiitsoqarpit? Aningaasanik aqutsisinnaaneq ajornakusoor­tippiuk? Katissagaluarussi aningaasat isertitat aningasar­tuutillu pillugit qanoq aalajangiisassavisi?

•   Peqqissuseq. Peqqissuuit? Perulun­nartumik peqqiil­liuteqar­nikuuit?

•   Anguniakkat. Inuunerit qanoq atorusuppiuk? Anguniakkatit peeqqavit anguniagaanut naleqquppat? Katereerlusi pissutsit atukkassi allanngornerat pissutigalugu anguniakkatit angusin­naajunnaarlugit paasigukku suli pilluarsinnaavit?

•   Ilaquttat. Maanna ilaquttavit ilaannik arlaatigut isumassugaqarpit? Siunissami taama pisussaaf­feqaleriataarsinnaavit? Meerartaarusuppit? Taamaappat qassinik?

 Tamakkuninnga eqqartuinissinni ammasumik unneqqaris­sumillu oqaluttarit. Ilumoortoq killormut saatissanngilat aamma iluareq­qusaagin­narlutit paasissutissat pingaarutillit oqaatiginaveersaaqinagit. – Hebræerit 13:18.

 Eqqarsaatigisassaq: Peeqqat pillugu suna paasisariaqarpiuk? Peeqqavit illit pillutit suna paasisariaqarpaa? Massakkut unneqqaris­suunersi katissagaluarussi oqaloqatigiil­luartar­nissassinnut qanoq iluaqutigis­savisiuk?

 Najoqqutassiaq Biibilimeersoq: “Inoqatersi ilumoortumik oqaluut­tassavarsi.” – Efesossimiut 4:25.

 “Arnaq immaqa ima eqqarsarpoq: ‘Ukiup affaa qaangiuppat assammior­taassaagut,’ uffa immaqa angut eqqarsartoq: ‘Aatsaat ukioq ataaseq qaangiuppat.’ Taamaat­toqartillugu arnaq aliatsas­sinnaavoq paatsuungalerlunilu, sukkanerusumik pisoqarnissaa ilimagigamiuk. Peerariit eqqarsaatiminnik aniatitseqatigiin­nissaat pingaaruteqarpoq.” – Ariana, ukioq ataaseq katissimareersoq.

 Isumaqatigiin­ngissuteqarsinnaaneq

 Inunnik marlunnik assigeeq­qissaar­toqanngilaq. Taamaattumik ilimagis­sanngilat peeqqallu suut tamaasa isumaqatigiis­sutigisin­naagisi. Assersuutigalugu kulturi perorsagaanerlu isummassinnut sunniuteqartarput.

 Eqqarsaatigisassaq: Annikitsutigut isumaqatigiin­ngissuteqaraangassi Biibilimi najoqqutassiaq unioqqutin­neqanngippat peeqqavit isumaa atortiin­narusut­tarpiuk? Marluullusi eqqisseqatigiinnersi pingaar­nerpaatippisiuk?

 Najoqqutassiaq Biibilimeersoq: “Uteriitsuun­nginnersi tamanit ilisimaneqalerli.” – Filippimiut 4:5.

 “Misigigaluaruil­luunniit immissinnut tulluaq­qissaarlusi, ilaannikkut isumaqatigiin­ngittassaasi. Soorunami tulluar­tuunissarsi pingaaruteqarpoq, isumaqatigiin­ngikkaangassili qanoq pissusilersor­tarnersi paasissallugu taamatulli pingaaruteqartigaaq.” – Matthew, ukiuni tallimani katissimareersoq.

 Uippakajaaq­qajaasinnaaneq

 Peeraqarnerup piffissar­tornarsin­naanera pissusis­samisoorpoq, immaqalu qasusarlutillu uippakajaartutut misigisassaatit. Qanoq iliorsinnaavit?

 Naleqqus­sartarit. Pisussaaffinnut ikinngutinnullu allanut piffissaqar­niassagavit peeqqat kisiat samminiaan­naqinagu. Alana, ukiuni tallimani katissimareersoq, ima oqarpoq: “Katereeraluaruil­luunniit ikinngutitit suli pisariaqar­tissavatit, taakkualu pisariaqar­tissavaatsit. Peerartaariaravit taakku sumigin­naqinagit.”

 Eqqaamajuk: Katikkuit inuuninnut attuumas­suteqartunut tamanut piffissaqar­niartus­saallutillu nukissaqar­niartus­saavutit. Pitsaassaaq peerariinnissi nalaani tamanna ilinnialereerukku.

 Eqqarsaatigisassaq: Naatsorsuutigaajuk peeqqavit sammiin­navillutillu piffissaqarfigiuaan­nassagaatit? Misigisarpit peeqqavit piumaffigival­laartaraatit? Arlaannarsiluunniit peerariin­nissinni qasusutut ipilersutul­luunniit misigisimaleqqunagu qanoq piviusorsiorsin­naavisi?

 Najoqqutassiaq Biibilimeersoq: “Suut tamarmik aalajangersimasumik piffissaligaapput.” – Oqaluus­sisartup oqaasii 3:1.

 “Peerariit piffissartik aliikkusersor­nermuinnaq atortarunikku katinnermik kingorna ulluinnarsiulerunik artorsar­tupilus­suussapput. Peerariit iluaqutigissavaat ulluinnarni suliassat, assersuutigalugu pisiniarfilerineq, illulerinerlu, peqatigiillutik isumagisarunikkit guutisioqatigiik­kunillu. Taamaalillutik katissimallutik inooqatigiin­nissaminnut piareersarluassapput.” – Daniel, ukiuni marlunni katissimareersoq.

 Eqqaamajuk peerariinneq killeqarmat, katinniar­nerlusimi qimassanerlusiluunniit aalajanger­tariaqalissaasi. Aalajangiitinnak suut eqqarsaatigeq­qaartariaqarpigit? Tamanna allaaserisat immikkoortuisa pingajuanni sammineqassaaq.