Qanoq iliorsinnaasutit

1. Nukittuffitit eqqarsaatigikkit. (2 Korinthimiut 11:6) Sanngiiffivit eqqumaffiginissaat ajunngitsuugaluartoq nukittuffitit amerlapput. Pikkoriffiit eqqumaffiginerisigut imminut ajortutut isigiunnaarnissamut kiserliorunnaarnissamullu pisariaqartumik imminut tatigilersinnaavutit. Imminut ima aperigit: ‘Suut nukittuffigaakka?’ Pikkoriffitit pissuserisatillu nuannersut eqqarsaatigikkit.

2. Allat ilumoorluni soqutiginninnermik ersersitsivigikkit. Aallaqqaammut inuit ikittut soqutiginninnermik ersersitsivigikkit. “Allat qanoq innerannik imaluunniit suliffiat pillugu aperinerisigut ilisarisimanerulersinnaavatit,” taama inuusuttoq Jorgemik atilik oqarpoq.

Ilutitit ornikkumallugit ikaarfissaliorit, tassa iliuuseqarit

Siunnersuut: Peqatitit kisiisa oqaloqatiginagit inuit allat aamma oqaloqatigisakkit. Biibilimi ikinngutigiilluartutut eqqartorneqartut ilaat – soorlu Ruthi No’omilu, Daavi Jonatanilu aamma Timotheusi Paulusilu – ukiumikkut nikingasorujussuupput. (Ruthi 1:16, 17; 1 Samueli 18:2; 1 Korinthimiut 4:17) Aamma eqqaamassavat oqaloqatigiinnermi inuk ataasiinnaq oqaaseqarneq ajormat. Tusarnaarluartartut pingaartinneqartarput. Taamaattumik ittuutuguit eqqaamassavat kisivit oqaaseqartariaqannginnavit!

3. ‘Misiginneqataasarit.(1 Petrusi 3:8) Oqaloqatigisat isumaqatiginngikkaluarlugu erinitsajuillutit akornusernaveersaartaruk. Oqaasii isumaqatigisatit eqqarsaatigikkit. Isumaqataannginnerit oqaatigisariaqarlugu misigiguit saamallutit periaaserillutillu taamaaliussaatit.

Siunnersuut: Oqaluunneqarusunnittut allat oqaluuttakkit. Oqqakkumatuujuguit, uumisaariumatuujuguit, soqqusaatsuuguit, imminut iluartuutikkuit imaluunniit assuarinnittuuguit allat ilinnit ungasillitissavatit. ‘Tamatigut inussiarnersumik oqaluttaruit’ nuannarinerussavaatsit. – Kolossemiut 4:6.