Inuusut­tuaqqat ilaat piffissaq eqqorlugu angerlan­ngitsoortarput. Ilaasa angajoqqaatik uukapaatit­tarpaat, immaqa sallusarput ikinngutitil­luunniit ilaginiarlugit angajoqqaatik arajutsisillugit anisarlutik. Inuusut­tuaraativit uukapaatippatit qanoq iliorsinnaavit?

•  Inuusut­tuaraatiga pikitsitsiniartuua?

•  Inuusut­tuaraatimami salloqit­tarpanga?

•  Kina pisuua?

•  Inuusut­tuaraatiga qanoq ikiorsin­naavara?

•  Angajoqqaat qanoq oqartut

 Inuusut­tuaraatiga pikitsitsiniartuua?

 Taamaat­tariaqanngilaq. Biibilimi ima allassimasoqarpoq: “Sianiissuseq nukappissap uummataanut qilersugaavoq.” Oqaatsillu taakku inuusut­tuaqqat eqqortit­tarpaat. (Ussatit 22:15) Ph.d. Laurence Steinberg ima allappoq: “Inuusut­tuaqqat ilaannikkut eqqarsaq­qaaratik sianiitsorpal­lattunillu aalajangiisarput. Kukkulut­tortarnerit naatsorsuutigiin­narneqassapput.” a

 Inuusut­tuaraatimami salloqit­tarpanga?

 Isummernak akerliuf­figiniaan­narlutit naalanngikkaatit. Misissuinerit ersersippaat inuusut­tuaqqat angajoq­qaaminnit qanoq isumaqarfigineqar­nerlutik soqutigigaat, taama isikkoqan­ngikkaluartoq. Immaqa erseqqissumik ersersin­ngikkaluarlugu imminut pakatsis­sutigalunilu pakatsisis­simagamitit aliasuutigaa.

 Kina pisuua?

•    Ilagisartakkat pisuuppat? Biibilimi ima allassimavoq: “Ileqqorluttunik ilagisaqartarneq ileqqorinnermut aserorsaataasarpoq.” (Korintimiunut 1. 15:33) Inuusut­tuaqqat ilagisar­takkaminnit sunnerneqangaartarput. Aamma allanit, soorlu internetikkut attaveqaqatigiit­tarfinnit pilerisaarutinillu, sunnerneqartarput. Inuunermilu misilit­tagakinnerat eqqarsaatigigaanni tupinnanngilaq aalajangiinerlut­tarsinnaammata. Soorunami inersimasutut tatiginar­tuussagunik aalajangiussamik kinguneqar­tarnerat ilinniar­tariaqarpaat.

•    Uanga pisuuvunga? Immaqa eqqarsarputit sukangaval­laarsimagavit inuusut­tuaraativit taama pissusilersorfigigaatit. Immaqaluunniit eqqarsarputit tunniutiin­najaval­laartarsimagavit inuusut­tuaraatit piumasaarsorpal­laalersimasoq. Imminut kukkunersiorpal­laarunnaarlutit maannakkut inuusut­tuaraatit qanoq ikiorsin­naanerlugu eqqarsaatigeriaruk.

 Inuusut­tuaraatiga qanoq ikiorsin­naavara?

•   Noqissin­naassuseqarit. Inuusut­tuaraatit eqqarsas­sagunarpoq kamallutillu naviissagit. Allatulli qisuariarsin­naavutit. Taama pisoqar­neranut suna pissutaanersoq pillugu eqqissillutit oqaloqatigiuk. Arajutsisaqarusus­simanngila? Pikkunaal­liorsimava? Kiserliorsimava? Ikinnguteqar­niaannarluni taamaaliorsimava? Soorunami taakkua arlaannaal­luunniit ajortulior­nissamut utoqqatsis­sutaanngillat, kamannalli oqaloqatigigukku illit inuusut­tuaraatillu sooq taamaat­toqarsimaneranik paasisaqar­nerussaasi.

   Biibilimi najoqqutassiaq: “Kinaluunniit tusaaniapal­lattassaaq, oqalunniapal­lattassanngilaq kamajasuujus­sananilu.” – Jaaku 1:19.

•   Pisimasoq pillugu eqqarsalersin­niarsariuk. Ima aperigit: “Pisimasoq pillugu qanoq ilikkagaqarpit? Tulliani taama pisoqaqqippat qanoq iliussavit?” Apeqqutit taama ittut eqqarsarluaq­qaartaler­nissaminut silatusaar­tumillu aalajangiisaler­nissaminut iluaqutigissavai.

   Biibilimi najoqqutassiaq: “Ilinniar­titsilluarnikkut naammagit­tangaarlutit oqaaqqis­saarisarit, sukannersumik mianersoq­qusisarit kajumis­saarisarlutillu.” – Timuutiusimut 2. 4:2.

•   Kinguneri malugitikkit. Inuusut­tuaraativit kukkussutaanut tulluartumik perorsaatis­siiguit perorsaatissiineq sunniuteqarluar­nerussaaq. Assersuutigalugu inuusut­tuaraatit kammalaatiminik tavaqateqaan­narumalluni atuariar­tunngitsoorsimappat immaqa piffissami aalajangersimasumi taakku ilageqqujun­naarsin­naavatit.

    Biibilimi najoqqutassiaq: ‘Kialuunniit naajartortussat siaruar­tikkani katersorumaarpai.’ – Galaatiamiut 6:7.

•   Tatiginninneq ineriar­torteqqin­niarlugu iliuuseqarit. Imaalial­laannaq pinavianngilaq. Inuusut­tuaraatilli paasitit­tariaqarpat tassunga tatigin­ninnerit iluarseq­qissinnaasoq. Misigigunimi iluarseq­qinneqarsin­naanngitsoq immaqa ilinnit tatigineqaq­qilernissani sulissutigiun­naassavaa.

   Biibilimi najoqqutassiaq: “Meeqqasi nikalloq­qunagit uumitsatsis­sanngilasi.” – Kolossimiut 3:21.