•  Ilisimasariaqakkatit

•  Iliuuserisin­naasatit

•  Angajoqqaat qanoq oqartut

 Ilisimasariaqakkatit

 Kulturit ilaanni meeqqat angajoq­qaaminnut atasorujus­suupput siunnersor­tissarsiorfigisarlugillu. Kulturinili allani meeqqat peqaaminnut siunnersor­tissarsiortarput.

 Meeqqat peqaaminnut siunnersor­tissarsioraangamik angajoqqaamik oqartus­saassusiat sumigin­narnerujar­tortarpaat. Meeqqat inuusut­tuaranngoraangata angajoqqaat misigisarput meeqqaminnut sunniuteqarun­naarlutik. Tamannalu tupinnanngilaq! Meeqqat piffissarujussuaq atorlugu meeraqatitik allat ilagival­laaleraangamikkit angajoq­qaaminnit perorsar­neqarun­naarlutik peqaaminnit perorsar­neqalersarput.

 Sooruna meeqqat angajoq­qaaminnut qanimut attaveqarun­naarlutik peqaaminnut attaveqarluar­neruler­tarnerat taama ajornan­ngitsigisoq? Patsisaasut ilaat eqqarsaatigikkit.

•   Atuarfik. Meeqqat piffissap annerpaartaani meeraqatitik ilagigaangamikkit meeraqatiminnut atanerulertarput, angajoqqaallu pinnagit peqaamik qanoq isumaqarfigineraatik pingaar­nerutiler­tarpaat. Tamannalu meeqqat inuusut­tuaranngor­neranni sakkortusisarpoq.

•   Angajoqqaanik ilaqarpiar­tannginneq. Ilaqutariinni amerlasuuni meeqqat atuarfimmiit soraaraangamik angerlarsimasoqan­nginnerani, immaqa angajoqqaamik sulinerata nalaanni, angerlartarput.

•   Inuusut­tuaraaneq. Meeqqat inuusut­tuaranngoraangamik inuusuttut allat ilaarlugit ileqqulersuuteqalertarput, soorlu atisalersoriaatsikkut, oqaloriaatsikkut pissusilersoriaatsikkullu. Angajoqqaat pinnagit peqaamik qanoq isumaqarfigineraatik pingaar­nerutiler­tarpaat.

•   Ussassaarutit. Niuertut ilaat inuusut­tuaqqat kisiisa eqqarsaatigalugit nioqqutis­siortarlutillu aliikkutassianik sanaartortarput, tamannalu pissutigalugu angajoqqaat inuusut­tuaqqallu imminnut paaseqatigiin­nginnerulertarput. Psykologi Robert Epstein allappoq: “Inuusut­tuaqqanut tunngasunik tuniniaasariaqarun­naaraluarunik suliffeqarfiit annertuut arlallit iluanaaruterpassuatik annaallugit akiliisin­naajunnaarlutik matooras­sagaluarput.” a

 Iliuuserisin­naasatit

•   Qitornannut attaveqarluar­niartuarit.

   Biibilimi ima allassimavoq: “Oqaatsit taakku peqqussutillu ullumi ilinnut tunniussakka aalajangiutis­savatit. Erninnut nangeqqit­tuartas­savatit eqqartor­tarlugillu angerlarsimatillutit issiasaraangavit, angalaar­taraangavit, innartaraangavit makittaraangavillu.” – Mosesimik 5. 6:6, 7.

   Inuusut­tuaqqat peqaaminnit ikinngutigineqarsin­naapput, angajoq­qaaminnilli siunnersor­neqarnermissut taakkunannga siunnersor­neqarsin­naanngillat. Nikalloqinak! Ilisimatuut oqarsimapput meeqqat inuusut­tuaqqallu amerlanerus­suteqartut angajoq­qaaminnut ataqqin­nillutillu nuannaar­titsiumasartut. Qitornannut qanimut attaveqar­tuaruit inuusut­tuaraqataanit sunniuteqar­nerussaatit.

   “Meeqqatit piffissaqarfigisariaqarpatit. Ullut tamaasa sammisaqaqatigiit­taritsi, assersuutigalugu igaqatigiillusi, torersaaqatigiillusi ilinniak­kereqatigalugil­luunniit. Nuannisaqaqatigiit­taritsi – soorlu spilleqatigiillusi, filmeqatigiillusi fjernsyneqatigiil­lusiluunniit. Eqqarsas­sanngilatit qitornannik piffissamik atorluaallutit sivikitsuinnarmik peqateqar­tarnissat naammattoq. Qitornat piffissaqarfigil­luartan­ngikkukku qanimut attaveqarluarneq ineriar­tortinneqarsin­naanngilaq!” – Lorraine.

•   Assigiin­ngitsunik ukiulinnik ilagisaqar­tittaruk

   Biibilimi ima allassimavoq: “Sianiissuseq nukappissap uummataanut qilersugaavoq.” – Ussatit 22:15.

   Angajoqqaat ilaasa meeqqat peqaaminnik ikinnguterpas­suaqarnerat iluarisarpaat. Eqqumaf­figiulli naak qitornat peqaaminik ikinnguterpas­suaqaraluartoq ineriar­tornissaminut ikinngutit assigiin­ngitsunik ukiullit pisariaqar­timmagit. Inuusuttullu siulersor­neqarnissamik pisariaqartitaat angajoqqaat asannittut tunniul­luarsin­naanerusaat peqaavisa tunnius­sinnaan­ngilaat.

   “Immaqa qitornavit ikinngutai arlaatigut ilisimasaqarput, peqaavili aalajangiil­luarnissamik ikiuinis­saminnut inuunermi misilit­tagaqaratillu ilisimas­suseqan­ngillat. Meeqqalli angajoqqaami siunnersuutaat maleruar­tarunikkit ukiuminnut naleqquttumik ineriar­torlutillu inersimal­lualeriar­tussapput.” – Nadia.

•   Maligas­saalluarit.

   Biibilimi ima allassimavoq: “Ilisimasunik peqateqartoq ilisimas­suseqalersarpoq.” – Ussatit 13:20.

   Meeqqat peroriar­tornerminni angajoqqaamik ilagisarneri iluaqutigingaar­tarpaat. Taamaattumik maligas­saalluarit.

   “Meeqqanut maligas­siuisut pingaaruteqar­nerpaat tassaapput angajoqqaat. Qitornat angajoq­qaaminnik asanninneq ataqqin­ninnerlu ilikkarunikku perorunik nammineq taakkunatut ittoorusulissapput.” – Katherine.