Akissut Biibilimeersoq

 Upperisaq ilumoortoq naapertorlugu inuusut inuunngitsullu immikkoor­tinneqarsin­naanerat Biibilimi ima allaatigineqarpoq: “Inerititaasigut ilisarisin­naavasi. Inuimmi viinnissanik fiigininillu orpikkanit kapinar­tulinnit katersin­ngisaannarput, ilaa?” (Matiusi 7:16) Soorlu viinnequt inerititaasigut orpikkamit kapinar­tulimmit allaanerusoq, taamatuttaaq upperisaq ilumoortoq eqqunngitsumit immikkoor­tinneqarsinnaavoq. ‘Inerititai’, tassa ilisarnaatai, imaapput:

1.   Upperisaq ilumoortoq inuit isumaliutersuutaannik tunngaveqarani ilumoortunik Biibilimeersunik ilinniar­titsisarpoq. (Johannesi 4:24; 17:17) Assersuutigalugu tarnerup suunera aamma nunarsuarmi paratiisissami naassaan­ngitsumik inuunissamik neriuuteqarneq ilinniar­titsissutigai. (Tussiaat 37:29; Esaja 35:5, 6) Ajoqersuutinillu eqqunngitsunik ilumoor­tuusaar­nermillu qulaajaasarpoq. – Matiusi 15:9; 23:27, 28.

2.   Upperisap ilumoortup inuit Guutimik ilisarisiman­nilernis­saannik ikiortarpai Guutillu atia, Jehova, a ilinniar­titsissutigisarlugu. (Tussiaat 83:19; Esaja 42:8; Johannesi 17:3, 6) Ilinniar­titsissutiginngilaa Guuti qanillisin­naanngikkipput nassuiaruminaatsuusorlu. Ilinniar­titsissutigaali Guutip kissaatigigaa imminut qanimut attaveqar­nissarput. – Jaaku 4:8.

3.   Upperisap ilumoortup ilinniar­titsissutigaa Jiisusi Kristusi annaassisussatut Guutimit toqqarneqartoq. (Apustilit Suliaat 4:10, 12) Kristumiut ilumoortut Jiisusip inassutaanut naalallutillu sapinngisaminnik maligas­siaanik ilaarsiniartarput. – Johannesi 13:15; 15:14.

4.   Upperisap ilumoortup ilinniar­titsissutigaa Guutip naalagaaffia inunnut neriuutis­satuaasoq. Kristumiullu ilumoortut Kunngeqarfik taanna inoqatiminnut oqaluus­sissutigisarpaat. – Matiusi 10:7; 24:14.

5.   Upperisami ilumoortumi namminis­sarsiun­ngitsumik asaqatigiinnissaq pingaar­tinneqarpoq. (Johannesi 13:35) Inuiaat kikkulluunniit ataqqineqar­nissaat ilinniar­titsissutigineqarpoq, inuillu sumiuunerat, kulturiallu apeqqutaatinnagit qanorluunniillu oqaaseqaraluartut tikilluaqquai. (Apustilit Suliaat 10:34, 35) Kristumiut ilumoortut inoqatitik asagamikkit sorsunnermut peqataaneq ajorput. – Mika 4:3; Johannesimit 1. 3:11, 12.

6.   Upperisaq ilumoortoq akissarsiaqar­titanik palaseqanngilaq qaffasis­sumillu immikkut ittunik taaguuteqar­titsinatik. – Matiusi 23:8-12; Petrusimit 1. 5:2, 3.

7.   Upperisaq ilumoortoq politikkimut akuliutin­ngisaannarpoq. (Johannesi 17:16; 18:36) Kristumiulli ilumoortut najugaqarfimminni oqartus­saasunut ataqqin­nillutillu naalapput Biibilimi peqqussut una malikkamikku: “Kaasari [tassa oqartussaasut] kaasarip piinik Guutilu Guutip piinik tunisiuk.” – Makkorsi 12:17; Romamiut 13:1, 2.

8.   Upperisaq ilumoortoq inooriaasiuvoq ileqqulersuutaan­naanani. Kristumiut ilumoortut inuunerminni sutigut tamatigut Biibilimi najoqqutassiat qutsissut maleruar­tarpaat. (Efesossimiut 5:3-5; Johannesimit 1. 3:18) Imaanngilarli inuunerat pikkunaatsuusoq, ‘Guutimimmi pilluartumik’ guutisiornertik nuannaarutigingaarpaat. – Timuutiusimut 1. 1:11.

9.   Upperisaq ilumoortoq naapertorlugu inuusut ikinnerus­suteqarput. (Matiusi 7:13, 14) Guutip piumasaa malillugu inuugamik nikassar­neqarlutillu malersor­neqartarput. – Matiusi 5:10-12.

Upperisaq ilumoortoq tassaagin­nanngilaq ‘uannut tulluarsorisara’

 Misigissutsit maliinnarlugit upperisamik toqqaaniarneq ulorianarsinnaavoq. Biibilimi siulittuutigineqarpoq inuit upperisarsiornikkut ‘ilinniar­titsisunik tusarusutaminnik ilinniar­titsisartunik ujartuisalissasut’. (Timuutiusimut 2. 4:3) Biibilimili kajumis­saarneqarpugut ‘upperisarsioriaaseq Guutitta Ataatattalu minguitsutut mingutsin­neqarsiman­ngitsutullu isigisaa’ toqqassagipput, allanit nuannarineqan­ngikkaluarpal­luunniit. – Jaaku 1:27, quppernerup ataani ilanngussaq; Johannesi 15:18, 19.