Imarisai

Saqqaata tullia

Jehovap Nalunaajaasui

Kalaallisut

Poorski suua?

Poorski suua?

Akissut Biibilimeersoq

Poorski tassaavoq Israelikkut Egyptenimi inussiaanerminnit Kr.in.si. 1513-imi Guutimit aniguisitaasimanerminnik nalliussisarnerat. Guutip Israelikkut peqquai ukiut tamaasa pisimasoq pingaarutilik tamanna qaammatip abibip, kingusinnerusukkut nisanimik taaneqartalersup, ulluisa 14-ianni juutit eqqaaniartassagaat. – 2 Mosesi 12:42; 3 Mosesi 23:5.

Sooq poorskimik taaneqartarpa?

Oqaaseq “poorski” hebræerit oqaasiannit ‘qaangiinermik’ isumalimmit aallaaveqarpoq. Tamatumanilu pineqarpoq Guutip Egyptenimi angajullilianik tamanik toqorartitsinermini Israelikkunnik asattuussinera. (2 Mosesi 12:27; 13:15) Guutip ajunaarutaasumik perlutsitsinnginnermini Israelikkut peqquai savaaqqap savaasalluunniit toqutamik aava matserfimminnut tarnutissagaat. (2 Mosesi 12:21, 22) Guutip taamaaliortut takugamiuk angerlarsimaffii ‘qaangiinnarpai’ angajulliliaallu asattuullugit. – 2 Mosesi 12:7, 13.

Biibilip nalaani qanoq poorskisiortarpat?

Guutip Israelikkut poorski siulleq qanoq nalliussissagaat ilitsersuuppai. * Poorskimi susoqartarnera pillugu ilaatigut Biibilimi makku taaneqarput:

  • Pilliut: Inoqutigiit abibip (nisanip) qulinganni savaaraq (savaasarluunniit) angutiviaq ataatsimik ukiulik toqqariarlugu 14-ianni toquttarpaat. Israelikkut poorskisioqqaaramik toqutamik aavata ilaa matserfimminnut tarnuppaat, neqaalu ilivitsuutillugu siariarlugu nerivaat. – 2 Mosesi 12:3-9.

  • Nerineq: Savaaqqap (savaasalluunniit) saniatigut Israelikkut timiusaq seernarsaateqanngitsoq naatitallu qasilitsut nerisarpaat. – 2 Mosesi 12:8.

  • Nalliussineq: Poorskip aqaguaniit Israelikkut seernarsaateqanngitsumik timiusartorfik ulluni arfineq-marlunni nalliussisarpaat timiusanik seernarsaatilinnik nerisaqarnatik. – 2 Mosesi 12:17-20; 2 Nalunaarsuutit 30:21.

  • Ilinniartitsineq: Poorskisiornermi angajoqqaat qitornatik Jehova Guuti pillugu ilinniartittarpaat. – 2 Mosesi 12:25-27.

  • Angalaneq: Kingusinnerusukkut Israelikkut Jerusalemimut poorskisioriartortarput. – 5 Mosesi 16:5-7; Lukasi 2:41.

  • Ileqqut allat: Jiisusip nalaani poorskisiornermi juutit viinnisortarput erinarsortarlutillu. – Matthæusi 26:19, 30; Lukasi 22:15-18.

Poorski pillugu kukkusumik isummernerit

Kukkusoq: Israelikkut poorskisiummik nerisarput nisanip 15-ianni.

Eqqortoq: Guutip Israelikkut peqquai nisanip 14-ianni seqernup tarrinnerata kingorna savaaraq toquttassagaat unnummilu tamatumani nerisassagaat. (2 Mosesi 12:6, 8) Israelikkut ulluat seqernup tarrinneraniit aallartittarpoq. (3 Mosesi 23:32) Tassa Israelikkut nisanip 14-iata aallartinnerani savaaraq toquttarpaat nerillugulu.

Kukkusoq: Kristumiut poorskisiortassapput.

Eqqortoq: Ukiumi 33-mi nisanip 14-ianni ajoqersukkanilu poorskisioreerlutik Jiisusip nalliuttorsiorneq nutaaq una pilersippaa: ‘Naalakkap nerliutaanik nereqatigiinneq.’ (Lukasi 22:19, 20; 1 Korinthimiut 11:20) Nalliuttorsiornerup tamatuma poorski taarserpaa ‘poorskisiutissatsinnik’ Kristusimik eqqaaniaanerugami. (1 Korinthimiut 5:7) Jiisusip utertitsissutitut pilliutaa inunnik tamanik ajortimit toqumillu inussiaataanermit aniguisitsigami poorskisiornermi pilliummit pingaarneruvoq. – Matthæusi 20:28; Hebræerit 9:15.

^ par. 7 Piffissalli ingerlanerani allannguisoqartariaqarpoq. Assersuutigalugu Israelikkut Egypteni qimariaannaasussaagamikku poorski siulleq “tuaviinnaq” nalliuttorsiutigaat. (2 Mosesi 12:11) Nunali neriorsuutigisaq nunagilerunikku nalliuttorsiortarnertik tuaviuuttariaarutissavaat.