Guutip isumassarsisitsineratigut Biibili hebræerisut, aramæerisut grækerisullu allanneqarpoq. Inuit ‘inuiaqatigiinnit tamaneersut’ Guutip oqaasia iluaqutigis­sappassuk Biibili oqaatsinut amerlasuunut nutserneqar­tariaqarpoq. (Matiusi 24:14) Atuakkat 27-t Matiusimiit Saqqummersitanut ukiuni 100-ni siullerni Kr.in.king. kristumiunit grækerisut allanneqaq­qaarnerat pissutigalugu ima taaneqartarput: “Grækerisut Allakkat Illernartut.”

New World Translation of the Christian Greek Scriptures tuluttut 1950-imi saqqummersin­neqaqqaarpoq. Taanna Westcottip aamma Hortip grækerisut allataat ilisimaneqarluartoq, grækerisut allagatoqqanut amerlanernut naapertuuttoq, pingaarnertut tunngavigalugu nutserneqarpoq. Nunarsuup nutaanngor­nissaanik nutsigaq grækerisut allagatoqqat sapinngisamik maleqqis­saarlugit nutserneqarpoq. Kalaallisuun­ngortitaq una tuluttut 2013-imi saqqummersin­neqartoq tunngavigalugu suliaavoq. Nutsikkami matumani aamma sapinngisamik allassimaq­qaartut maleqqis­saarniar­neqarput. Nutserinitsinni allassimaq­qaarfinnut naapertuutsinnissaa anguniagariin­narnagu aamma paasiuminartumik atuaruminar­tumillu nutserinissarput anguniagaraarput. Oqaatsinut tunngatillugu aalajangikkagut pillugit amerlanerusunik paasissutis­saqarpoq tapiliussani ukunani: “Biibilimik nutserinermut najoqqutassat”, “Nutsikkami matumani aalajangersakkat iluaqutissallu” aamma “Biibili nalerput tikillugu qanoq piujuartoq”.

Guutip atia immikkuul­larissoq, Jehova, Nunarsuup nutaanngor­nissaanik nutsikkami Matiusimiit Saqqummersitanut 237-riarluni allassimavoq. Guutip atiata illernarsisin­neqarnissaa pingaaruteqarmat aniguisitaajumallunilu ateq taanna tatigineqar­tariaqarmat nutsikkami matumani ateq Jehova Biibilimi allassimaf­fissaani allanneqartarpoq. (Matiusi 6:9; Romamiut 10:13) Taamatut aalajangiinermut pissutaasut ilaat tapiliussami uani nassuiar­neqarput: “Guutip aqqa Grækerisut Allakkani Illernartuni.”

Taaguut Nunarsuup nutaanngor­nissaanik nutsigaq Guutip nunarsuarmik paratiisiusumik inuit eqqortuliortut najugaqarfis­saannik pilersitsinissamik neriorsuutaanik tunngaveqarpoq. (Petrusimit 2. 3:13) Guutip eqqarsaatai oqaasiilu sapinngisamik eqqoqqis­saartumik nutserneqar­niassammata matuminnga nutserisut, Guutimik Biibilip Atuakkiortuanik asannittut, misigipput immikkut ittumik akisussaaf­feqarlutik. Qinnutigaarput nutsigaq una atuartartut ilumoorlutik ‘ilumoortoq pillugu eqqoqqis­saartumik paasisimasaqalerusuttut’ iluaqutigingaassagaat. – Timuutiusimut 1. 2:4.