Matiusi naapertorlugu 26:1-75
-
Palasit Jiisusip toqunnissaa pilersaarusiulerpaat (1-5)
-
Uuliap tipigissup Jiisusimut kuineqarnera (6-13)
-
Qaangiiffik kingulleq akeqqanullu pisinneqarnissaq (14-25)
-
Naalakkap unnukkorsiortitsineranik atuutilersitsineq (26-30)
-
Petrusip naluneraanissaa pillugu siulittuut (31-35)
-
Jiisusip Getsiimanimi qinunera (36-46)
-
Jiisusip tigusaanera (47-56)
-
Juutit eqqartuussiviisa qullersaannut sassartinneqarnera (57-68)
-
Petrusip Jiisusimik naluneraanera (69-75)
26 Jiisusip tamakku tamaasa eqqartoreerlugit ilinniartitani oqarfigai:
2 “Nalunngilarsi ullut marluk qaangiuppata qaangiiffik* nalliussineqassasoq inuullu Ernera qisummi naalliutsitsiviliami* toqoqqullugu akeqqanut pisinneqassasoq.”
3 Taava palasit nuimasut inuiaqatigiinnilu utoqqaanertat palasiunerup, Kajfarsimik atillip, illuata kaajaluisaani katersuupput.
4 Peqqusersusaarlutillu Jiisusip tigusarinissaa toqunnissaalu pilersaarusiulerpaat.
5 Oqarpulli: “Inuit eqqissiviilliuleqinammata nalliussinermi tigusarissanngilarput.”
6 Jiisusi Betaaniami Siimuup pupissuusimasup illuaniitillugu
7 arnap puiaasannguaq alabastiusoq uuliamik tipigissumik akisuumik imalik nassarlugu ornippaa nerineranilu niaquanut kuillugu.
8 Ilinniartitaasa tamanna narrutsaatigaat imalu oqarlutik: “Piisaartunnguaqarpoq.
9 Akisuumimmi tuneriarlugu aningaasat piitsunut tunniunneqarsinnaagaluarput.”
10 Jiisusip tamanna paasigamiuk oqarfigai: “Sooq arnaq isornartorsiorpisiuk? Uannut ajunngitsuliorpoq.
11 Piitsummi najortigiuassavasi, uangali najortigiuassanngilassinga.
12 Uulia tipigissoq timinnut kuigamiuk ilisaanissannut piareersarpaanga.
13 Ilumut oqarfigaassi: Nunarsuarmi sumiluunniit nutaarsiassat nuannersut oqaluussissutigineqaraangata arnaq taanna eqqaaniarlugu iliuusia oqaluttuarineqartassaaq.”
14 Taava aqqaneq-marluk ilaat, Juudarsi Iskaariuutimik taaneqartartoq, palasinut nuimasunukarpoq
15 oqarlunilu: “Ilissinnut pisissagukku qanoq akilissavisinga?” Aningaasanik sølvinik 30-nik akilerumavaat.
16 Taamaattumik taamanimiilli akeqqanut pisikkumallugu periarfissarsiulerpoq.
17 Ullut iffiamik-qaqortumik* seernarsaateqanngitsumik neriffiusartut siullianni ilinniartitat Jiisusi ornippaat aperalugulu: “Qaangiiffimmi unnukkorsiutissannik sumut piareersaakkiartussavatsigit?”
18 Oqarpoq: “Illoqarfimmukaritsi angullu nalunngisara oqarfigalugu: ‘Ilinniartitsisoq ima oqarpoq: “Uannut piffissarititaasoq nalliutingajalerpoq. Illit angerlarsimaffinni ilinniartitakka ilagalugit qaangiiffik nalliussissavara.”’”
19 Taava ilinniartitat Jiisusip ilitsersuineratut qaangiiffiup nalliussinissaanut piareersaapput.
20 Unnulermat Jiisusip ilinniartitani aqqaneq-marluk nerisarfimmi issiaqatigai.
21 Neritillutik oqarfigai: “Ilumut oqarfigaassi: Arlassi akeqqanut pisissavaanga.”
22 Tamarmik tamanna assut aliatsaatigalugu aperaat: “Naalagaq, uangaanngilaq, ilaa?”
23 Akivai: “Puuguttamut itisuumut misusseqatima akeqqanut pisissavaanga.
24 Aap, inuup Ernera allaatigineqarnermisut qimagutissaaq, inuulli Erneranik akeqqanut pisitsisoq perloqqusaassaaq! Inummut taassumunnga ajunnginnerussagaluarpoq inunngorsimanngitsuuguni.”
25 Juudarsip akeqqanut pisitsisussaata aperaa: “Ilinniartitsisoq, uangaanngilaq, ilaa?” Jiisusip akivaa: “Nammineq nalunngilat.”
26 Suli neritillutik Jiisusip iffiaq-qaqortoq tiguaa, qinoriarlunilu aggoramiuk ilinniartitaminut tunniuppaa oqarlunilu: “Akki, nerigitsi. Taanna timinnut assersuutaavoq.”
27 Imerfik tigoriarlugu Guutimut qujavoq, taakkununngalu tunniukkamiuk oqarpoq: “Tamassi tassannga imeritsi,
28 taannami amerlasuut ajortuliaat isumakkeerneqaqqullugit uanga aannut kuineqartussamut, isumaqatigiissummik* atuutsitsilersussamut, assersuutaavoq.
29 Oqarfigaassili: Ataatama kunngeqarfiani nutaamik viinnisoqatiginissassi tungaanut viinnequtip inerittuanik imeqqissanngilluinnarpunga.”
30 Unnersiutiginnissutinik* erinarsoreerlutik Qaqqamut Oliivenequtilimmukarput.
31 Taava Jiisusip oqarfigai: “Tamassi unnuaru qimassavassinga,* allassimavormi: ‘Savanik paarsisoq saassutissavara, savallu siammassapput.’
32 Toqusunilli makititaareeruma siuarlunga Galiliiamukarumaarpunga.”
33 Petrusilli oqarfigaa: “Allat tamarmik qimakkaluarpatsit uanga qimanngisaannassavakkit!”*
34 Jiisusip oqarfigaa: “Ilumut oqarfigaakkit: Unnuaru kukkukooq angutiviaq qarlortinnagu pingasoriarlutit nalunerassavarma.”
35 Petrusip oqarfigaa: “Toqoqatigissagaluarukkilluunniit naluneranngisaannassavakkit.” Ilinniartitat allat tamarmik aamma taama oqarput.
36 Taava Jiisusip ilinniartitani Getsiimanimik taaneqartartumukaqatigai imalu oqarfigalugit: “Ikunga qinujartorninni maanga issaagitsi.”
37 Petrusi Zebediiallu erneri marluk ingerlaqatigitillugit aliasulerpoq assullu ernumalerluni.
38 Taava oqarfigai: “Assut ernumaqaanga toqumut allaat. Maaniigitsi eqqumaqatigalungalu.”
39 Qimagutilaariarlunilu seeqqummerpoq niaqqunilu sikitsillugu ima qinulluni: “Ataata, ajornanngippat imerfik* una uannit peeruk. Piumasarali pinnani illit piumasat pili.”
40 Uterami ilinniartitallu sinittut takugamigit Petrusi oqarfigaa: “Akunnermi ataasiinnarmiluunniit eqqumaqatigisinnaannginnassinga?
41 Ussernartumut nakkaannaqqunasi eqqumajuarlusilu qinujuaritsi. Soorunami siunertarineqartoq ajunngitsuuvoq,* timili sanngiippoq.”
42 Aappassaanik qinujartoqqippoq: “Ataata, allatut ajornartumik imerfimmit uannga imertariaqaruma piumasat pili.”
43 Uteqqikkami sinittut takuai, qasoqigamimmi.
44 Pingajussaanik qimallugit qinujartoqqippoq taamatullu qinoqqilluni.
45 Ilinniartitaminut uteqqikkami oqarfigai: “Piffissami taama pingaaruteqartigisumi qanoq-aamma sinillusilu qasuersaassavisi! Inuup Ernera ajortuliortartunut pisinneqangajalerpoq.
46 Ingerlaleratta nikuigitsi. Akeqqanut pisitsisussara qanilliartorpoq.”
47 Suli oqalutsillugu aqqaneq-marluk ilaat Juudarsi inuppassuit panalisartut anaatalisartullu, palasinit nuimasunit inuiaqatigiinnilu utoqqaanertanit aallartitat, ilagalugit takkuppoq.
48 Akeqqanut pisitsisussaata ilani ilisimatereersimavai oqarluni: “Kunitara tigusarissavarsi.”
49 Ingerlaannarlu Jiisusi ornippaa oqarfigalugulu: “Aluu Ilinniartitsisoq!” kunillugulu.
50 Jiisusilli oqarfigaa: “Uumaangaa, suniarlutit maanngarpit?” Taava sassarput Jiisusilu tigusaralugu.
51 Jiisusilli ilagisaasa ilaata panani amoriarlugu palasiunerup inussiaataa siutaarpaa.
52 Taava Jiisusip oqarfigaa: “Panat puuanut manguguk. Panalersortummi tamarmik panamik toqunneqassapput.
53 Imaluunniit isumaqarpit Ataataga inngilinik legiuuninik* aqqaneq-marlunnit amerlanerusunik uannik ikiuisussanik aallartitseqqullugu qinnuigisinnaanngikkiga?
54 Taamaalioraluaruma Allakkani Illernartuni taama pisoqartariaqarneranik allassimasut qanoq eqquutissagamik?”
55 Taamaalisorlu Jiisusip inuppassuit oqarfigai: “Ujajaasuusoralunga panalisarlusi anaatalisarlusilu tigusariartorpisinga? Ullut tamaasa guutisiorfimmi issiallunga ilinniartitsisarpunga, taamaattorli tigusarinngilassinga.
56 Tamakkuli tamarmik pipput pruffiitinit allakkat eqquuteqqullugit.” Taava ilinniartitaasa tamarmik qimappaat qimaallutillu.
57 Jiisusimik tigusarinnittut palasiunermut Kajfarsimut, allakkanik ilisimasut utoqqaanertallu katersuuffigisaannut, ingerlappaat.
58 Palasiunerulli illuata kaajaluisaa tikivillugu Petrusip ungasiarluni malittuarpaa. Iseramilu qanoq pisoqassasoq takuniarlugu illumi kiffat issiaqatigilerpai.
59 Maanna palasit nuimasut juutillu eqqartuussiviisa qullersaannut ilaasortat tamarmik Jiisusi toqukkumallugu sallullutik ilisimannittutut nassuiaasussanik ujaasipput.
60 Sallullutik ilisimannittutut nassuiaasut amerlasuut sassartaraluartut unnerluutiginissaanut pissutissarsinngillat. Kingusinnerusukkut marluk sassarput
61 oqarlutillu: “Angut una oqarpoq: ‘Guutisiorfik* ingutsersinnaavara ullullu pingasut ingerlaneranni sanaqqillugu.’”
62 Taava palasiuneq nikuippoq oqarfigalugulu: “Akissutissaqanngilatit? Tusaannginnakku qanoq unnerluutigigaatsit?”
63 Jiisusili oqaaseqanngilaq. Taamaattumik palasiunerup oqarfigaa: “Guuti uumassuseqartoq uppernarsaasiullugu ilisimatissavatsigut tassaanerlutit Kristusi, Guutip ernera!”
64 Jiisusip oqarfigaa: “Nammineq tamanna oqaatigaat. Oqarfigaassili: Maannamiit inuup Ernera pissaanerup talerpiatungaani issiasoq qilaallu nuiaasigut aggersoq takussavarsi.”
65 Taava palasiunerup qallersaatini alippaa oqarlunilu: “Guuti mitaatigaa! Ilisimannittut amerlanerusut pisariaqartippagut? Maanna tusareerparsi Guuti mitaatigigaa.
66 Qanoq isumaqarpisi?” Akipput: “Toqutaasariaqarpoq.”
67 Taava kiinaatigut qitserarpaat tilluarlugulu. Allat isattarpaat
68 imalu oqarlutik: “Kristusi, pruffiitiuguit oqarfigitigut kia annersikkaatit.”
69 Petrusi silami illup kaajaluisaani issiatillugu kiffap arnap inuusuttup ornippaa oqarfigalugulu: “Jiisusi Galiliiamiu ikinngutigaat, ilaa?”
70 Tamaasali isigitillugit misiarpoq: “Naluara suna pinerit.”
71 Illup kaajaluisaata isaariaanukarmat arnap inuusuttup allap maluginiarpaa tassaniittullu oqarfigalugit: “Angutip uuma Jiisusi Naazaratsimiu ikinngutigaa.”
72 Misiaqqippoq uppernarsaallunilu: “Inuk taanna ilisarisimanngilara!”
73 Kingunitsianngua Petrusip eqqaani nikorfasut ornippaat oqarfigalugulu: “Illit aamma taakkua ilagaatsit! Sumiorpaluutinnimmi* tusaaneqarsinnaavoq.”
74 Taava misiarpoq uppernarsaallunilu:* “Inuk taanna ilisarisimanngilara!” Taamaalisorlu kukkukooq angutiviaq qarlorpoq.
75 Petrusillu eqqaalerpai Jiisusip oqaasii: “Kukkukooq angutiviaq qarlortinnagu pingasoriarlutit nalunerassavarma.” Taava anivoq aliasunnermillu qissaserluni.
Ilanngussat
^ Imalt.: “poorski”. Nassuiaatit takukkit.
^ Nassuiaatit takukkit.
^ Imalt.: “qaqortuliamik”.
^ Imalt.: “angerutsimik”.
^ Imalt.: “Tussiutinik”.
^ Nutsiinn.: “uanga pissutaallunga orlussaasi”.
^ Nutsiinn.: “Allat tamarmik illit pissutaallutit orlugaluarpata uanga orlunngisaannassaanga!”
^ “Imerfik” Jiisusip Guutimik mitaatiginnittutut eqqunngitsumik unnerluutigineqarluni toqunneqarnissaanik Guutip akuersinermigut piumasaanut assersuutaavoq.
^ Imalt.: “anersaaq piumassuseqarpoq”.
^ Nassuiaatit takukkit.
^ Imalt.: “Guutip illua”.
^ Imalt.: “Allamiorpaluutinnimmi”.
^ Nutsiinn.: “imminullu perloqqulluni”.
