Efesossimiunut 5:1-33
5 Taamaattumik Guuti ilissinnik qitornamisut asannittoq ilaarsiuk.
2 Kristusip uagutsinnik* asanninneratut uagullu pilluta* pilliutitut tipigissutut Guutimut imminut tunniunneratut asaqatigiittuaritsi.
3 Atoqatigiinnikkut eqqunngitsuliorneq,* mingunnartut suulluunniit piumatunerlu eqqaassanngilluinnarpasi, tamakkumi inunnut illernartunut naleqqutinngillat.
4 Kanngunartumik pissuseqarnasi, sianiitsorpallattumik oqalunnasi atoqatigiinnerlu pillugu quiasaarnasi – naleqqutinngitsumik pissuseqarnasi – Guuti qutsavigisassavarsi.
5 Nalunngilluinnarparsimi atoqatigiinnikkut eqqunngitsuliortartoq,* minguttooq piumatoorluunniit, tassa guutipilussiortoq, Kristusip Guutillu kunngeqarfianni kingornussassaqanngitsoq.
6 Ilumuunngitsumik oqaluttumit salloqittarneqarniaqinasi, tamakkumi pissutigalugit Guutip naalanngitsut pillassammagit.*
7 Taamaattumik taakku ilaassanngilasi.
8 Taartumiissimagaluarpusi, maannali Naalagaq ataasioqatigigassiuk qaamanermiippusi. Qaamanerullu qitornaasut inuujuaritsi.
9 Qaamanerummi inerititai tassaapput ajunngitsut, naapertuilluartut ilumoortullu suulluunniit.
10 Naalakkap suna iluarinartinneraa qulakkeertuarsiuk.
11 Taartumut tunngasut iluaqutaanngitsut iliuuserissaarlugit qulaarsigit.
12 Inuimmi isertorlutik iliuuserisartagaat kanngunangaarmata oqaatigineqarsinnaanngillat.
13 Qaamanerup suut tamaasa takuneqarsinnaanngorlugit qulaarpai.
14 Taamaattumik allassimavoq: “Sinittutinaa, iterit toqusunillu makillutit, Kristusillu qinngussavaatit.”
15 Taamaattumik sianiitsutut pinnasi silatuutulli inuunissarsi eqqumaffigeqqissaarsiuk.
16 Ullut ajortuummata piffissarsi pitsaanerpaamik atorsiuk.
17 Tamanna pissutigalugu sianiitsutut pissusilersorunnaarlusi Jehovap piumasaa suunersoq paasiniartuarsiuk.
18 Aamma viinnimik aalakuussanngilasi,* tamanna nuannaapilunnermik* kinguneqartarmat. Guutilli anersaavanik immersortuaritsi.
19 Tussiaqatigiittarlusilu Guuti unnersiutigalugu erinarsoqatigiittaritsi, nipilersuuserlusi uummammit pisumik Jehova erinarsorfigisarsiuk.
20 Naalakkatta Jiisusip Kristusip aqqani Guuterput Ataatarpullu suut tamaasa pillugit qutsavigiuarsiuk.
21 Kristusi mianeralugu kajumillusi immissinnut naalattaritsi.
22 Nuliaasut Naalakkamut kajumillutik naalattarnermissut uiminnut naalassapput,
23 Kristusimmi ilagiinnut, timiminut, annaassaminut niaquuneratut uiusoq nuliaminut niaquummat.
24 Ilagiit Kristusimut kajumillutik naalattarnerattut nuliaasut uitik sutigut tamatigut naalattariaqarpaat.
25 Uiususi, Kristusip ilagiinnik asanninneratut nuliasi asajuarsigit. Kristusi ilagiit pillugit toquvoq
26 illernarsisikkumallugit imermillu, tassa Guutip oqaasianik, minguiarumallugit.
27 Taamaaliorpoq ilagiit saamini alutornarlutik – tassa simerneqaratik, eqisalunneqaratik arlaatigulluunniit ippinnaateqaratik – illernarlutillu minguitsuuniassammata.
28 Taamatuttaaq uiusut nuliatik timimittut asasariaqarpaat. Angut nuliaminik asannittoq imminut asavoq.
29 Kialuunniimmi timini uumissunngisaannarpaa, inuussutissittarpaali isumassortarlugulu. Kristusip aamma ilagiittut taama pisarpaatigut
30 timimini tamatta avatigigamisigut.
31 “Tamanna pissutigalugu angutip ataatani anaananilu qimassavai nuliaminullu atajuarluni,* taakkulu marluk ataasiulissapput.”*
32 Guutip isertugaataa tamanna pingaaruteqarpoq. Matumani Kristusi ilagiillu pivakka.
33 Uiusullu kialuunniit imminut asanermisut nuliani asassavaa, nuliaasullu uini ataqqingaassavaa.
Ilanngussat
^ Imalt. immaqa: “ilissinnik”.
^ Imalt. immaqa: “ilissilu pillusi”.
^ Grækerisut: porneia. Nassuiaatit takukkit.
^ Nassuiaatit takukkit.
^ Imalt.: “kamaatissammagit”.
^ Imalt.: “amaassanngilasi; putumassanngilasi; nakeqqassanngilasi”.
^ Imalt.: “imminut aqussinnaannginnermik”.
^ Imalt.: “nulianilu najortuarlugu”.
^ Imalt.: “timinngussapput ataaseq”.
