Imarisai

Imarisai

KAPITALI 5

Silarsuarmit qanoq avissaaqqajuarsinnaasugut

Silarsuarmit qanoq avissaaqqajuarsinnaasugut

‘Silarsuarmut ilaanngilasi.’ — JOH 15:19NW.

1. Jiisusip nunarsuarmi inuunermini unnummi kingullermi suna erseqqissarpaa?

JIISUSIP nunarsuarmi inuunermini unnummi kingullermi ajoqersukkami siunissami qanoq ingerlanissaat isumakuluutigingaarpaa. Tamatumunnga tunngatillugu allaat Ataataminut ima qinuvoq: “Qinnutinngilakka silarsuarmit peerseqqullugit, Ajortorli pissutigalugu paareqqullugit. Silarsuarmut ilaanngillat, soorlu uanga silarsuarmut ilaanngitsunga.” (Joh 17:15, 16NW) Taamatut ilumoorluni qinunermigut Jiisusip ajoqersukkaminik asanningaarnini ersersippaa, qinuneranillu erseqqissarneqarpoq taakkua ilaannut unnuk taanna siusinnerusukkut oqaasii uku qanoq pingaaruteqartigisut: ‘Silarsuarmut ilaanngilasi.’ (Joh 15:19NW) Erseqqilluinnarpoq Jiisusip ajoqersukkami silarsuarmit avissaaqqajuarnissaat assut pingaartikkaa!

2. ‘Silarsuaq’ Jiisusip eqqartugaa qanoq paasisariaqarpa?

2 ‘Silarsuaq’ Jiisusip eqqartugaa tassa inuit Guutimit ungasillisimasut, Saatanimit naalakkersorneqartut Saatanitullu namminissarsiortuullutillu makitasuujusut. (Joh 14:30; Ef 2:2; 1 Joh 5:19) Paasinarpoq silarsuarmut tamatumunnga ikinngutaasoq ‘Guutimut akeranngortartoq’. (Jaak 4:4) Guutilli asanninneraniittuinnarumagatta silarsuarmiitilluta silarsuarmit qanoq avissaaqqajuarsinnaavugut? Imatut iliornikkut: (1) Guutip Kristusikkoortumik naalagaaffianik ilumoorfiginnittuarlutalu isummatsigut iliuutsitsigullu politikkimut akuliunnaveersaartuunitsigut, (2) silarsuup anersaavanit sunnertinnaveersaarnitsigut, (3) atisalersoriaatsimut tunngatillugu isornaatsuullutalu ileqqorissuunitsigut, (4) pilimanianngitsumik inooriaaseqarnitsigut, aamma (5) anersaakkut sakkutuussutinik atisinitsigut. Taakku tallimat sammeriartigit.

ILUMOORFIGINNITTUARLUTILLU POLITIKKIMUT AKULIUNNAVEERSAARTUUJUARIT

3. (a) Jiisusip politikki qanoq isumaqarfigaa? (b) Sooq oqartoqarsinnaava Jiisusip ajoqersugai tanitat ambassadøriusut, imaluunniit taanna sinnerlugu ‘oqariartortitaasut’? (Takuuk quppernerup ataani ilanngussaq).

3 Jiisusi Guutip naalagaaffiani qilammi kunngitut naalakkersuisussaq politikkimut akuliunnani Guutip naalagaaffianik oqaluussissutiginninnerminik pingaartitsivoq. (Dan 7:13, 14; Luk 4:43; 17:20, 21) Taamaattumik Jiisusi Romamiut naalagaatitaannut Pontiusi-Pilatusimut sassartitaagami ima oqarpoq: “Uanga naalagaaffiga silarsuarmit matumannga pinngilaq.” (Joh 18:36) Jiisusip ajoqersugaasa aalajaatsut taassuma maligassiaa malippaat taassuminnga taassumalu naalagaaffianik ilumoorfiginninnermikkut silarsuarlu tamakkerlugu naalagaaffianik oqaluussissutiginninnermikkut. (Matt 24:14) Apustili Paulusi ima allappoq: “Kristusi sinnerlugu oqariartortitaavugut Guuti uatsigut oqaaqqissaarimmat. Kristusi sinnerlugu qinnuigaassi: Guutimut saammaannartigitsi!” * — 2 Kor 5:20.

4. Kristumiut ilumoortut tamarmik Guutip naalagaaffianik ilumoorfiginnittuunertik qanoq ersersippaat? (Takuuk “ Kristumiut siulliit akuliunnaveersaartuupput”).

4 Ambassadørit nunani allani nunartik sinnerlugu aallartitaagamik nunami tassani aallartitaaffigisaminni pisunut akuliunneq ajorput; politikkimut kalluunnaveersaartarput. Nunaminnili naalakkersuisut soqutigisaat aalluttarpaat. Taamatut aamma oqartoqarsinnaavoq Kristusip ajoqersugai tanitat pillugit, taakkuami ‘nunavigisaat qilanniippoq’. (Fil 3:20) Taakkua aallussilluarlutik oqaluussinermikkut Kristusip ‘savaatai allat’ millionilippassuit ‘Guutimut saammaannartinnissaannut’ ikiortarpaat. (Joh 10:16; Matt 25:31-40) ‘Savat allat’ Kristusip qatanngutai tanitat tapersersortarpaat suleqatigisarlugillu. ‘Savaataagamik katersat ataatsit’ naalagaaffik Missiarsikkoortoq oqaluussissutigisarpaat, tamarmillu silarsuarmi politikkimut isummamikkut iliuutsimikkullu akuliunnaveersaarluinnartuupput. — Esaja 2:2-4 atuakkit.

5. Ilagiit kristumiut itsarlu Israelikkut suna assigiinngissutigaat, assigiinngissullu tamanna qanoq ersersinneqartarpa?

5 Kristumiut ilumoortut Kristusimik ilumoorfiginninnerat akuliunnaveersaartuunerannut pissutaasutuaanngilaq. Itsaq Israelikkut Guutimit nunamik aalajangersimasumik tunineqartarsimanerattut uagut nunamik tunineqarnata qatannguteqatigiinnut nunanit tamalaaneersunut ilaavugut. (Matt 28:19; 1 Petr 2:9) Politikkikkut partiit najukkatsinniittut tapersersortartuugutsigit Guutip naalagaaffia pillugu tusarliussaq nakimaalluta oqaluussissutigisinnaassanngikkaluarparput, kristumiutullu ataasiussuseqarnitsinnut assut ajoqutaassagaluarpoq. (1 Kor 1:10) Sorsuttoqalissagaluarpallu uppeqativut uagutsinnut asaqquneqartut sorsuffigissagaluarpavut. (Joh 13:34, 35; 1 Joh 3:10-12) Taamaattuminguna Jiisusip ajoqersukkani pissutissaqarluarluni panamik atueqqunngikkai. Allaat oqarfigai akeqqatik asassagaat. — Matt 5:44; 26:52; takuuk ungalusaq “ Uanga akuliunnaveersaartuuvunga?

6. ‘Kaasarimut’ tunngatillugu Guutimut tunniulluinnarsimanerit ilinnut qanoq sunniuteqarpa?

6 Kristumiuugatta ilumoortut inuunerput Guutimut — inummuunngitsoq, peqatigiiffimmuunngitsoq inuiaqatigiinnuunngitsorluunniit — tunniulluinnarsimavarput. Korinthimiunut allakkani siullerni 6:19, 20-mi ima allassimasoqarpoq: “Immissinnik piginngilasi, pisiarineqarpusimi akisuumik.” Jiisusip ajoqersugaasa akileraarnermikkut ataqqinninnermikkullu killilimmillu naalatsigitinnermikkut “kaasari” piumasaanik tunisaraluarlugu aamma ‘Guuti Guutip piinik’ tunisarpaat. (Mark 12:17; Rom 13:1-7) ‘Guutip piinut’ ilaapput pallorfiginninnerat, ilumoorfiginninnerat, naalannerat uummatikkullu iluunngarlutik asanninnerat. Pisariaqarpat allaat Guuti pillugu inuunertik pilliutigerusuppaat. — Luk 4:8; 10:27; Apustilit Suliaat 5:29; Romamiut 14:8 atuakkit.

‘SILARSUUP ANERSAAVANIT’ SUNNERTINNAVEERSAARIT

7, 8. “Silarsuup anersaava” qanoq paasisariaqarpa, qanorlu inunnut naalasseriitsunut sunniuteqartuarpa?

7 Kristumiut aamma silarsuarmit avissaaqqajuarput tamatuma ‘anersaavanit’ ajortumit sunnertinnaveersaarnermikkut. Paulusi ima allappoq: “Uagut silarsuup anersaava pinnagu Anersaaq Guutimit pisoq pissarsiaraarput.” (1 Kor 2:12) Efesosimiunullu ima allappoq: “Siornatigut ... inuunersi [aalajangerneqartittarparsi] silarsuup matuma pissuserisaanit silaannarsuullu naalagaaffiani naalagaasumit, naalasseriitsut qitornaannut sunniuteqartuartumit.” — Ef 2:2, 3.

8 Silarsuup ‘silaannarsua’, imaluunniit anersaava, tassaavoq nukik takussaanngitsoq Guutimut naalanngitsitsisartoq ‘uinngullu pilerigisaanik isillu pilerigisaannik’ siuarsaasartoq. (1 Joh 2:16; 1 Tim 6:9, 10) Silarsuup anersaava ‘naalagaaffiuvoq’, imaluunniit oqartussaassuseqarpoq, imatut paasillugu uinimmik ajortiliusumik kajungilersitsisartoq, nakutitseriarsinnaasoq, uteriitsuusoq silaannartullu sunik tamanik putoqquataarisinnaasoq. Inunnullu naalasseriitsunut ‘sunniuteqartuarpoq’ imatut paasillugu ajortunik pissuseqalersitsisarluni, assersuutigalugu namminissarsiortitsisarluni, makitasuunngortitsisarluni ataqqineqarumatuunngortitsisarlunilu. Ileqqussatigut imminut najoqqutassiorusulersitsisarpoq oqartussaassusilinnullu pikitsitserusulersitsisarluni. * Oqaatigilluaannarlugu silarsuup anersaava inuit uummataanni Diaavulup pissusiinik pileriartuaartitsisarpoq. — Joh 8:44; ApS 13:10; 1 Joh 3:8, 10.

9. Silarsuup anersaava isumatsinnut uummatitsinnullu qanoq sunniuteqarsinnaava?

9 Silarsuup anersaava illit isumanni uummatinnilu sorlanissinnaava? Aap, taamaassinnaavoq aatsaalli eqqumanngikkuit. (Ussatit 4:23 atuaruk). Amerlanertigut malunnanngitsumik sunniuttarpoq. Immaqa peqatigisartakkat inuit ajunngitsoorpasissut Jehovamilli asanninngitsut aqqutigalugit sunniuttarpoq. (Uss 13:20; 1 Kor 15:33) Aamma silarsuup anersaavanit ajortumit sunnertissinnaavutit atuagassiat kristumiunut naleqqutinngitsut, aliikkutassat aserorsaataasut, timersuutit unammillerpalaarpallaartut, internetikkut nittartakkat pornografeertallit tunussisulluunniit saqqummersittagaat, aap, suut kikkullu tamaasa Saatanip eqqarsartaasianik ersersitsisut taassumaluunniit aaqqissuussaanik tapersersuisut aqqutigalugit.

10. Silarsuup anersaavanit qanoq sunnertinnaveersaarsinnaavugut?

10 Guutip asanninneraniittuinnarumalluta silarsuup anersaavanit malunnanngitsumik sunniuttartumit qanoq sunnertinnaveersaarsinnaavugut? Taamaaliorsinnaavugut aatsaat Jehovap uagutsinnut tunniusai anersaakkut ittut tamaasa atorluartarutsigit taassumalu anersaava illernartoq qinnutigisarutsigu. Jehova Diaavulumit taassumalu silarsuaanit ajortumit naalagaaffigisaanit annerungaarpoq. (1 Joh 4:4) Taamaattumik Jehovamut qinunikkut attaveqarluartuarnissarput pingaaruteqarluinnarpoq!

ATISALERSORIAATSIKKUT ISORNAATSUULLUTILLU ILEQQORISSUUGIT

11. Silarsuup anersaava qanoq atisalersoriaatsimut sunniuteqarsimava?

11 Inuup ‘anersaava’, imaluunniit isiginnittaasia, paasinarsisarpoq atisalersoriaasianit, pikisimaneranit aamma eqqiluisaarneranit eqqiluisaannginneranilluunniit. Nunarpassuarni atisalersoriaatsimut tunngatillugu najoqqutassiat ima allanngorsimatigipput fjernsynimi oqaluttuusartoq oqamisaarluni arnat atortittartut atisalersoriaatsimikkut ilisarnaatissaarutipajaartut. Allaat niviarsiaqqat suli inuusuttuaranngunngitsut taamatut atisalersoriaatsimit sunnerneqarsimapput nuilakkaavallaanik naappallaartunillu atisaqartarlutik isornaatsunilli atisaqarnissartik sapernartittarlugu. Aamma nalinginnaavoq pikataasumik atisalersoriaaseqartarneq pikitsitsiumatunermik, allanik ataqqinninnginnermik imminullu ataqqinnginnermik ersersitsisoq.

12, 13. Atisalersoriaaserput pikisarnerpullu eqqarsaatigalugit suut najoqqutarisariaqarpavut?

12 Jehovamut kiffaagatta isikkorinnissarput soqutigaarput, tassa torersunik, ipeqanngitsunik, ippinnanngitsunik pissutsinullu naleqquttunik atisaqarusuppugut. Isikkutsinnit pissusitsinnillu tamatigut ersittariaqarput ‘isornaatsuunerput’ aamma ‘isumakkut peqqissuserput’ (NW) — ‘ajunngitsuliavullu’ ilanngullugit — angutinut ‘arnanullu Guutimik mianerinninnerminnik nassuerutiginnittunut naleqquttut’. Soorunami malugeqqusaarusunngilagut, uagutsinnummi pingaarnerpaavoq ‘Guutip asanninneraniittuinnarnissarput’. (1 Tim 2:9, 10; Jud 21) Aap, ‘pinnissuserput uummammeersoq, inummi isertugaasumeersoq, Guutip isaani erlinnaqisumeersoq’ pingaarnerpaaterusupparput. — 1 Petr 3:3, 4.

13 Aamma eqqaamasariaqarparput atisalersoriaaserput pikisarnerpullu sunniuteqarsinnaasut pallorfiginninnerup ilumoortup inunnit allanit qanoq isumaqarfigineqarneranut. Oqaaseq grækerisooq ‘isornaatsumik’ nutserneqarsimasoq ileqqussanut tunngatillugu atorneqaraangat maniguunneq, mianerinninneq allallu misigissusiinik isumaannillu ataqqinninneq pineqartarput. Tamanna pissutigalugu allat nalunngeqatiginnissutaannik innimiginninnissarput uagut nammineq pisinnaatitaaffigisorisatsinnit pingaarnerutittariaqarparput. Pingaarnerpaamik Jehovamut taassumalu innuttaanut ataqqinaataanissarput kissaatigaarput. Aap, ‘qanorluunniit iliornitsigut Guutip ataqqinaatissaanik’ ‘Guutimit kiffarineqartutut takutinniartarnissarput’ kissaatigaarput. — 1 Kor 4:9; 10:31; 2 Kor 6:3, 4; 7:1.

Atisalersoriaasera pikeriaaseralu Jehovamut ataqqinaataappat?

14. Imminut qanoq aperisariaqarpugut?

14 Oqaluusseqataagaangatta kristumiulluunniit ataatsimiinnerannut najuukkaangatta atisalersoriaaserput, pikisarnerput eqqiluisaarnerpullu ingammik eqqumaffigisariaqarpavut. Imminut ima aperigit: ‘Isikkora eqqiluisaannginneralu allanit mamiatsaatigineqassappat? Peqqusiileqilersitsisarpat? Tamatumunnga tunngatillugu uanga pisinnaatitaaffikka ilagiinni kiffartornermi immikkut pisinnaatitaaffeqalernissannit pingaarnerutittarpakka?’ — Tuss 68:7; Fil 4:5NW; 1 Petr 5:6.

15. Sooq atisalersoriaatsimut, pikisarnermut eqqiluisaarnermullu tunngatillugu malittarisassarpassuarnik Biibilimiittoqanngila?

15 Atisalersoriaatsimut, pikisarnermut eqqiluisaarnermullu tunngatillugu kristumiunut malittarisassarpassuarnik Biibilimiittoqanngilaq. Jehovap aalajangiinissamut namminerlu eqqarsarnissamut kiffaanngissuseqarnissarput kissaatigaa. Aap, anersaakkut inersimallualernissarput najoqqutassiallu Biibilimiittut eqqarsaatigalugit aalajangiisinnaalernissarput ‘paasinnissinnaassutsittalu sungiusagaasup atortuinnarneratigut eqqortumik eqqunngitsumillu immikkoortitsisinnaalernissarput’ kissaatigaa. (Hebr 5:14NW) Pingaarnerpaamik kissaatigaa imminik tullitsinnillu asanninnerput kajumississutigalugu iliuuseqassasugut. (Markusi 12:30, 31 atuakkit). Najoqqutassiat Biibilimiittut taakkua iluanni atisalersoriaatsit pikeriaatsillu assigiinngitsorpassuusinnaapput. Tamanna ersertarpoq Jehovap kiffai millionilippassuit nunarsuarmi sumiluunniit katersuukkaangata atisaasa atisaasalu qalipaataasa assigiinnginnerujussuannit.

PILIMANIANNGITSUMIK INOORIAASEQARIT

16. Silarsuup anersaava Jiisusip ilinniartitsissutaanit qanoq allaanerutigaa, imminullu qanoq aperisariaqarpugut?

16 Silarsuup anersaava peqquserluttuuvoq inunnillu millionilippassuarnik isumaqalersitsisarluni aningaasat pigisallu pillualissutaasartut. Jiisusili ima oqarpoq: “[Inuup] inuuneranut aalajangiisuunngilaq sumik pigisaqarnera naammattorsuarnilluunniit pigisaqaraluaruni.” (Luk 12:15) Jiisusi imminut naaggaarluinnartooqqusinngikkaluarluni ilinniartitsivoq “anersaakkut pisariaqartitsinerminnik eqqumaffiginnittut” anersaakkullu ittunik pingaartitsillutik pilimanianngitsumik inooriaaseqartuartut naassaanngitsumik inuulerumaarlutillu pillualivikkumaartut. (Matt 5:3NW; 6:22) Imminut ima aperigit: ‘Jiisusip tamatumunnga tunngatillugu oqaasii ilumut upperaakka, ‘sallumulluunniit ataataasumit’ sunnerneqartippunga? (Joh 8:44) Oqaatsikka, inuuninni anguniakkakka, pingaartitakka inooriaaseralu qanoq ersersitsippat?’ — Luk 6:45; 21:34-36; 2 Joh 6.

17. Pilimanianngitsumik inooriaaseqartuartut iluaqutigisinnaasaasa ilaannik eqqaasaqarit.

17 Jiisusi ima oqarpoq: “Ilisimassuseq eqqortuutitaavoq suliamigut.” (Matt 11:19) Eqqarsaatigeriakkit pilimanianngitsumik inooriaaseqartuartut iluaqutigisinnaasaasa ilaat. Taakku Guutip naalagaaffianik oqaluussissutiginneqataanermikkut nukissaqaleqqittarput. (Matt 11:29, 30) Pisariaqanngitsunik isumakuluuteqarnaveersaartaramik erloqissutissarpassuaraluatik pinngitsoortarpaat. (1 Timotheusi 6:9, 10 atuakkit). Inuunermi pisariaqartut naammagigamikkit ilaquttaminnut ikinngutiminnullu kristumiunut piffissaqarnerusarput. Taamaattumillu sinilluarnerusinnaasarput. (Oqal 5:11) Sapinngisartik naapertorlugu tunisisaramik pilluangaarput. (ApS 20:35) Aamma ‘neriuuteqangaarput’, qamuunalu eqqissisimallutillu nalerisimaarput. (Rom 15:13; Matt 6:31, 32) Aap, pilluaqqussutit tamakku nalissaqanngilluinnartuupput!

‘SAKKUTUUSSUTIT TAMARMIUSUT’ ATIKKIT

18. Akerarput taassumalu periaasii saassusseriaasiilu Biibilimi qanoq allaatigineqarpat?

18 Guutip asanninneraniittuinnartut aamma Saatanimut anersaakkut illersorneqartarput. Saatanip taakkua pilluarunnaarnissaat kissaatigiinnarnagu aammali naassaanngitsumik inuulinnginnissaat kissaatigaa. (1 Petr 5:8) Paulusi ima allappoq: “Sorsunnerput uinimmut aammullu sorsunnerunngilaq, piginnaatitaasunulli pissaanernullu taartumi matumani silarsuarmi naalagaasunut ajussutsillu anersaavinut pissaasunut qilaap ataaniittunut.” (Ef 6:12) Oqaatsimi grækerisuumi ‘sorsunnitsinnik’ nutserneqartumi pineqanngilaq toqqorluni ungasissumiit qamutillit atorlugit sorsunneq, pineqartorli tassaavoq paaneq tilluunnerlu. Oqaatsinillu ‘piginnaatitaasunit’, ‘pissaanernit’ ‘silarsuarmilu naalagaasunit’ erserpoq anersaat silarsuaannit aaqqissuulluagaasumik piaaraluni saassussisoqartartoq.

19. Kristumiut anersaakkut sakkutuussutaat nassuiakkit.

19 Inuinnaagatta qajannartuullutalu killeqarpugut, taamaakkaluartorli ajugaasinnaavugut. Qanoq? ‘Guutip sakkutuussutaasa tamarmiusut atinerisigut.’ (Ef 6:13) Sakkutuussutit taakku Efesosimiunut allakkani kapitali 6-imi ima allaatigineqarput: “Aalajaanniaritsi sallusuissut qiterutsiussiuk. Atiniarsigit iluarneq saattuaasatut pitseriassuserlu kamippattut eqqissinerup iivangkiiliuanik ingerlassisussatut. Tamani kivissimasarsiuk uppernerup eqqortinnaveeqqutaa, taassuminnga qamissinnaassagassigit Ajortup qarsui ikumasut. Niaqorornaveeqquseritsi annassummik [imaluunniit neriuummik] panalerlusilu Anersaap panaanik, tassa Guutip oqaasianik. Qinujuarnissinni torlulanissinnilu tamatigut [periarfissat tamaasa, NW] Anersaakkut qinusassaasi.” — Ef 6:14-18.

20. Uagut sorsunnerput sakkutuut sorsunnerannit qanoq allaanerua?

20 Sakkutuussutit taakku Guutimeersuugamik uagutsinnut illersuutaajuaannarsinnaapput — aatsaalli atortuaannarutsigit. Sorsunnermi sakkutuut ilaannikkut sorsuffimmiittanngillat. Kristumiulli sorsuffimmiittuaannarput, aatsaallu Guuti Saatanip silarsuaanik suujunnaarsitsippat anersaapilunnillu tamanik itinersuarmut nakkartitsippat sorsukkunnaassapput. (Saqq 12:17; 20:1-3) Taamaattumik illit sanngiiffinnik kissaatinnillu eqqunngitsunik akiugaqaruit akiuuttuarit, tamattami Jehovamut aalajaattuarumalluta ‘timerput peqqarniisaarfigisariaqarparput’. (1 Kor 9:27) Aatsaanuna akiuukkunnaaraangatta isumakululersartugut!

21. Anersaakkut sorsunnitsinni sugutta aatsaat ajugaasinnaavugut?

21 Aamma ikiorneqanngikkutta ajugaasinnaanngilagut. Taamaattumik Paulusip eqqaasippaatigut ‘periarfissat tamaasa anersaakkut qinusarnissatta’ pingaaruteqassusianik. Aamma Jehova tusarnaartariaqarparput taassuma oqaasianik atuaqqissaartarnitsigut ‘sorsoqatitsinnillu’ peqateqartuartarnitsigut, sorsunnermimi tamatumani kisimiilluta akiuutinngilagut! (Fiil 2; Hebr 10:24, 25) Tamakkuninnga iliuuseqartuartut ajugaaginnassanngillat, aammali uppernikkut misilinneqarunik upperisartik illersorsinnaassavaat.

UPPERISANNIK ILLERSUINISSAMUT PIAREERSIMASARIT

22, 23. (a) Sooq upperisatsinnik illersuinissamut piareersimajuartariaqarpugut, imminullu qanoq aperisariaqarpugut? (b) Kapitalimi tulliuttumi suna sammissavarput?

22 Jiisusi ima oqarpoq: “[Silarsuarmut] ilaannginnassi ... silarsuup uumissorpaasi.” (Joh 15:19NW) Taamaattumik kristumiut ataqqinningaarlutik saamallutillu upperisaminnik illersuinissamut piareersimajuartariaqarput. (1 Petrusi 3:15, 16 atuakkit). Imminut ima aperigit: ‘Paasivara sooq Jehovap Nalunaajaasui inuiaqatigiit nalinginnaasumik isummertarnerannut ilaannikkut akerliusumik isummertartut? Uanga taamatut isummertariaqaraangama Biibilimi allassimasut “inussiallu aalajaallunilu silatuup” siunnersuutaasa ilumoortuunerat qularutiginngilluinnartarpara? (Matt 24:45NW; Joh 17:17) Jehovap isaani eqqortulioraangama allanit allaanerunissamut piareersimaannarnanga aammali allaanerunera tulluusimaarutigisarpara?’ — Tuss 34:3; Matt 10:32, 33.

23 Silarsuarmilli avissaaqqajuarniarluta aalajangernerput amerlanertigut malunnaarsaarnerusumik misilinneqartarpoq. Assersuutigalugu eqqaaneqareersutut Jehovap kiffai silarsuarmut ilaalerniassammata Diaavulup silarsuarmini aliikkutassat atorlugit ussassaartarpai. Aliikkutassanik iluaqutaasunik, nuannaalersitsisartunik ilerasuuteqarnanngitsunillu toqqaanissamut suna iluaqutigisinnaavarput? Tamanna kapitalimi tulliuttumi sammissavarput.

^ par. 3 Ukiumi 33-mi piinsip ullua aallarnerfigalugu Kristusi ajoqersukkami tanitat nunarsuarmiittut ilagiissaannut kunngitut naalakkersuivoq. (Kol 1:13) 1914-imi Kristusi kunngitut ‘silarsuarmi naalagaassuseqalersinneqarpoq’. Taamaattumik kristumiut tanitat maanna aamma naalagaaffik Missiarsikkoortoq sinnerlugu ambassadøriupput. — Saqq 11:15.

^ par. 8 Takuuk atuagaq Lad os ræsonnere ud fra Skrifterne, qupp. 419-423, Jehovap Nalunaajaasuinit saqqummersinneqartoq.