Imarisai

Imarisai

 OQALUTTUAQ 91

Jiisusip qaqqami oqaluusaa

Jiisusip qaqqami oqaluusaa

MAANI Jesus issiavoq. Galilæami qaqqami inuppassuit uku ajoqersulerpai. Taassumunnga qaninnerpaat Jesusip ajoqersugarai. Ilaat aqqaneq-marluk toqqarsimavai apustilinngortillugit. Apustilit Jesusip immikkut ajoqersugarai. Qanoq ateqartut nalunngiliuk?

Ukuupput: Simon Peter qatanngutaalu Andreas. Taava Jakob Johannesilu, aamma taakku qatanngutigiipput. Ataaseq ateqarpoq Jakob, allalu ateqarluni Simon. Apustilit ilaat marluk ateqarput Judas. Aappaa tassaavoq Judas Iskariot, aappaalu taaneqartarpoq Taddæʹusimik. Taava Filip Nataʹnaelilu (Bartolomæʹusimittaaq taaneqartartoq), kiisalu Mattæus Tomasilu.

Jesus Samariamit uterami oqaluussilerpoq oqarluni: ’Qilammiup naalagaaffia qanillivoq.’ Naalagaaffik sunaasoq nalunngiliuk? Naalagaaffiuvoq piviusoq, Guutip naalakkersuisui. Jesus tassani kunngiuvoq. Taanna qilammit naalagaajumaarpoq eqqissinerlu nunami atulersikkumaarlugu. Taava Guutip naalagaaffiata nunarsuaq paratiisinngortikkumaarpaa.

Uani Jesusip inuit naalagaaffik pillugu ajoqersorpai. ’Ima qinusassaasi,’ nassuiaavoq. ’Ataatarput qilammiusutit, aqqit illernarsili. Naalagaaffiit tikiulli. Piumasat qilammisut nunamissaaq pili.’ Inuit amerlasuut qinnut tamanna taasarpaat ’Ataatarpooq’-mik. Qinnut taanna alanngaarsinnaaviuk tamaat?

Jesusip aamma inuit imminnut qanoq innissaannik ajoqersorpai. ’Inunnut qanorluunniit iliorfigeqqugussi ilississaaq taamatut iliorfigisigik,’ oqarpoq. Inuit allat ajunngitsumik iliorfigigaangatsit illit iluarusuttarputit, ilaa? Taava uaguttaaq nammineq allat ajunngitsumik iliorfigisariaqarpavut, Jesus taama oqarpoq. Inuit tamarmik nunami paratiisiusumi taamaaliortalerpata nuannissaqaaq, ilaa?