Imarisai

Imarisai

 OQALUTTUAQ 72

Guutip kunngi Hizkija ikioraa

Guutip kunngi Hizkija ikioraa

NALUNNGILIUK suna pillugu angutip uuma Jehova qinnuigigaa? Suna pillugu Jehovap tunisiviata saavanut allakkanik ilisiva? Angut tassaavoq Ezekias. Israelimi naggueqatigiinnut marlunnut kujalliusunut kunngiuvoq. Ajornartorsiulersimavorlu. Sooq?

Assyriamiut naalagaaffik avannarleq naggueqatigiit qulit piat piuneerutereersimammassuk. Jehovap tamatuma pinissaa akuerisimavaa inuit taakku ajormata. Maannalu sakkutuut Assyriamiut aggerput naggueqatigiit marluk naalagaaffiat sorsukkiartorlugu.

Assyriap kunngiata kunngi Ezekias allakkanik allaffigeqqammerpaa. Tassa allakkat Guutip saanut Ezekiasip ilisai. Allakkani Jehova mitaatigineqarpoq, Ezekiasilu tunniutiinnaqquneqarluni. Tamanna pillugu Ezekias qinuvoq: ’Jehova, Assyriap kunngianit annaatsigut. Taava inuiaqatigiit tamarmik nalujunnaassavaat illit kisivit Guutiusutit.’ Jehovap Ezekias tusassanerpaa?

Ezekias kunngiuvoq ajunngitsoq. Israelimi naggueqatigiit qulit naalagaaffianni kunngit ajortut assiginngilai, ataatanilu ajortoq Akaz assiginagu. Jehovap inatsisai tamaasa Ezekiasip peqqissaarluni naalappai. Taava Ezekias qinoreermat pruffiitip Esajasip tusarlerpaa Jehovap tusarliussaanik uuminnga: ’Assyriap kunngia Jerusalemimut isissanngilaq. Sakkutuui illoqarfimmut qanillissanngillalluunniit. Qarsumik ataatsimilluunniit illoqarfimmut piseriassanngillat.’

Assiliaq quppernermi uaniittoq takuuk. Sakkutoorpassuit toqungasut kikkuusut nalunngiligit? Tassaaku Assyriamiut. Jehovap inngilini aallartippaa, unnuamilu ataatsimi inngilip sakkutuut Assyriamiut 185.000-it toquppai. Taava Assyriap kunngia akiuukkunnaarpoq angerlarlunilu.

Naggueqatigiit marluk naalagaaffiat annaanneqarpoq, inuillu eqqissisinneqarallarput. Ezekiasili toqoreermat ernera Manasse kunnginngorpoq. Manasse erneralu kingoraartaa Amon tamarmik kunngiupput ajortorujussuit. Taava nunami nakuusertoqartaleqqippoq pinerluttoqartaleqqillunilu. Kunngi Amon kiffaminit toqunneqarmat ernera Josias naggueqatigiit marluk naalagaaffiannut kunnginngorpoq.