Imarisai

Imarisai

 IMMIKKOORTOQ 19

Jiisusi pisussanik sunniuteqangaartussanik siulittuivoq

Jiisusi pisussanik sunniuteqangaartussanik siulittuivoq

Jiisusi kunngisut pissaaneqarluni najuunnissaminut pissutsillu aaqqissuussaanerata naggataatungaanut nalunaaqutaasussat oqaluttuarai

UULIAP Qaqqaani Jerusalemimut naalaffimmullu alianaatsumik isikkiveqarlutik, ajoqersukkat sisamat Jiisusi kisimiitillugu oqaaserisimasaminik nassuiaaqquaat. Jiisusip oqaatigeqqammerpaa naalaffiup Jerusalemimiittup piuneerunneqarumaarnera. Aamma siusinnerusukkut ‘silarsuup naggatissaa’, imaluunniit pissutsit aaqqissuussaanerata naggataatungaa, pillugu taakku oqaluttuuppai. (Matthæusi 13:40, 49) Maanna apustilit ima oqarput: ‘Oqarfigitigut suna nalunaaqutaassasoq illit tikiunnissannut silarsuullu naggatissaanut.’ — Matthæusi 24:3.

Jiisusip taakku oqaluttuuppai Jerusalemip piuneerunneqarnissaa sioqqullugu qanoq pisoqarumaarnersoq. Oqaasiili isumaqarnipilussuupput. Siulittuutaa kingusinnerusukkut silarsuarmut tamarmut eqquuttussaavoq. Jiisusip piffissap aalajangersimasup iluani pisussat silarsuarmilu pissutsit atuuttussat, tamarmik ataatsimut nalunaaqutaasussat, siulittuutigai. Inuit nunarsuarmiittut nalunaaqummit paasisinnaassavaat Jiisusi qilammi kunngisut najuutilersimasoq. Allatut oqaatigalugu, nalunaaqut Jehovap naalagaaffimmi Missiarsikkoortumi qangaaniilli neriorsuutigisaasumi Jiisusimik kunnginngortitsisimaneranut takussutissaavoq. Nalunaaqut Guutip naalagaaffiata ajussusermik piiaangajalerneranik inuiannullu eqqissinermik piviusumik pilersitsingajalerneranik paasinarsisitsissaaq. Taamaalillutik Jiisusip siulittuutigisai pissutsinik aaqqissuussaanitoqqap — upperisarsiornikkut, politikkikkut innuttaaqatigiinnikkullu aaqqissuussaanerit maanna atuuttut — ulluinut kingullernut pissutsinillu aaqqissuussaanerup nutaap aallartinneranut nalunaaqutaassapput.

Jiisusi kunngisut qilammi tikiunnermi, imaluunniit najuunnermi, nalaani nunarsuarmi susoqarumaarnera pillugu nassuiaavoq. Oqarpoq nunarpassuit peqataaffigisaannik sorsuttoqarumaartoq, nerisassakilliortoqarumaartoq, nunami sajunnersuaqartarumaartoq nappaalanersuaqarumaartorlu. Inatsisaatsuuneq nalinginnaaleraluttuinnassaaq. Tamakkua tamarmik sakkortunerpaaffitsik ‘naalliunnartoqangaarnerani’ nallerumaarpaat. Aamma Jiisusip ajoqersugaasa ilumoortut Guutip naalagaaffianik nutaarsiassaq nuannersoq nunarsuarmi tamarmi oqaluussissutigissavaat, ‘naalliunnartoqangaarneranilu’ aatsaat taama oqaluussisoqartigissaaq. — Matthæusi 24:21.

Jiisusimik malinnittut qanoq ilillutik nalunngissinnaavaat naalliunnartoqangaarnissaq tamanna qaqugukkut qanillissanersoq? Jiisusi ima oqarpoq: ‘Figenequt ilinniarfigisiuk.’ (Matthæusi 24:32) Figenequtip avalequtai pilutanikkaangata aasap qanillinera nalunarneq ajorpoq. Taamatuttaaq Jiisusip siulittuutaasa tamarmik piffissap aalajangersimasup ingerlanerani pinerat naggatissap qanillineranut nalunaaqutaassaaq erseqqissoq. Ulloq aamma nalunaaquttap-akunnera naalliunnartoqangaarnerup aallartiffissaa Ataatap kisimi nalunngilaa. Taamaattumik Jiisusip ajoqersukkani ilungersorluni ima kajumissaarpai: “Eqqumagitsi! Naluarsimi taamaaliffissaa qaqugu nalliukkumaartoq.” — Markusi 13:33.

— Tunngavigineqartut: Matthæusi kapitalit 24-25; Markusi kapitali 13; Lukasi kapitali 21.

^ par. 14 Jiisusip siulittuutaa pillugu paasisaqarnerorusukkuit takuuk atuakkami Biibilimi sorpiaat ajoqersuutigineqarpat?-mi kapitali 9. Jehovap Nalunaajaasuinit saqqummersinneqartoq.