Imarisai

Imarisai

 TOQQORSIVITSINNIT

“Saaniluttut angerlarsimaffiga nassartuaannarpara”

“Saaniluttut angerlarsimaffiga nassartuaannarpara”

ULLUNI qulingiluani immikkut ittumik suliniuteqarnermi oqaluussisartut 10.000-init amerlanerusut 1929-mi aggustimi septembarimilu anoritut kaavittuliortutut USA itivippaat. Atuakkat quppersakkallu 250.000-it agguaappaat. Oqaluussisartut taakku ilagaat piffissaq tamaat kiffartortut 1000-it missaat. Amerlipallassimaqaat! Bulletin-imi * nalunaarutigineqarpoq pionerit “tupinnaannartumik” 1927-miit 1929-mut pingasoriaammik amerlisimasut.

1929-mi aningaasatigut ajutoornersuaqarpoq. Oktobarip 29-anni 1929-mi — Black Tuesday-mik taaneqartartumi — New Yorkimi børsimi aktiat naleerukkiartupallannerat silarsuarmi tamarmi aningaasaqarniarnermut sunniuteqarluni ajutoornersuarmik kinguneqarpoq. Bankit tuusintillit aningaasatigut ajutoorput. Naasorissaaneq ajalusoorpoq. Suliffissuit matupput. Inuit millionilikkuutaat suliffeerupput. Ilaqutariit angerlarsimaffimminnik qimatsisariaqartut 1933-mi amerlanerpaapput ullormut 1000-iullutik.

Piffissaq tamaat kiffartortut ulluni ajornartorsiorfiusuni taamaattuni qanoq iliorpat? Ilaasa angerlarsimaffik assakaasulik angerlarsimaffigilerpaat. Pionererpassuit assakaasulimmik kalittakkamilluunniit angerlarsimaffillit ineqarnermut akiligassaqarneq ajoramik minnerpaamik aningaasartuuteqarlutik pioneritut ingerlaannarsinnaapput. * Ataatsimeersuaraangamillu ineqarnermut akiliisariaqartanngillat. 1934-mi Bulletin-imi atortorissaarutitalimmik — soorlu imiisivilimmik, kissarsuuteeralimmik, patitittakkamik siniffilimmik issimullu oqorsaatitalimmik — najoruminartumik qanoq assakaasulimmik angerlarsimaffiliortoqarsinnaaneranik sukumiisumik ilitsersuuteqarpoq.

Nunarsuarmi sumi tamani oqaluussisartut isumassarsiullaqqissut assakaasulinnik angerlarsimaffiliortalerput. “Noap umiarsualiorneq misilittagaqarfiginngilaa,” Victor Blackwell oqaluttuarpoq, “uangalu kalittakkamik angerlarsimaffiliorneq misilittagaqarfiginagulu ilisimasaqarfiginngilara.” Sanavorli.

Indiami biili angerlarsimaffigiitigisaq siallersarfiup nalaani kuukkut ikaarunneqalersoq

Avery aamma Lovenia Bristow biileqarput angerlarsimaffigiitigisamik. Avery ima oqarpoq: “Saaniluttut angerlarsimaffiga nassartuaannarpara.” Bristowikkut Harvey aamma Anne Conrow marlunnik ernillit pionerioqatigaat. Conrowikkut angerlarsimaffiata assakaasullip iigai pappiararsuarnik usserutitalinnik qalligaapput, nuunnerillu tamaasa pappiararsuaq ilanngalaartarpoq. Avery ima oqarpoq: “Angerlarsimaffimmik taamaattumik takusoqarsimanngisaannarpoq, takusoqaqqinngisaannassaarlu!” Averyli naapertorlugu Conrowikkut “takorloorsinnaasamit ilaqutariittut pilluarnerpaajupput”. Harvey Conrow ima allappoq: “Amigaateqanngisaannarpugut, Jehovamullu kiffartornermi taassumalu asannittumik isumassuinerani toqqissisimalluinnarpugut.” Kingusinnerusukkut Conrowikkut sisamaallutik Ilinniarfik Gileadi peqataaffigaat ajoqersuiartortitatullu Peruliartitaallutik.

Giusto aamma Vincenza Battaino pioneriupputtaaq Italiamiut USA-mi najugallit oqaluussiffigisarlugit. Paasigamikku qitornartaalerlutik biili  usisarfeeralik (Ford A 1929-mi ilusiligaasoq) angerlarsimaffinngortippaat, taannalu tupernut siornatigut inigisartagaannut sanilliullugu “hotelitsialattut ippoq”. Paninnguartillu kiffartornermi nuannarisaminni ingerlaannarput.

Nutaarsiassamik nuannersumik soqutiginnittorpassuaqarpoq. Piitsulli suliffeqanngitsullu Biibililersaarutit qaqutiguinnaq aningaasanik akilersinnaasaramikkit pigisaminnik akiliuteqarumasarput. Pionerit marluk soqutiginnittunit imminnut akiliutigineqartartut assigiinngitsut 64-iunerarpaat — allattuiffiallu “soorlu tassa nunaannarmi pisiniarfimmi nioqqutissat nalunaarsorfiat”.

Fred Andersonip naasorissaasoq isarussanik anaanami pikuinik akiliilluni atuakkanik perusuttoq naapippaa. Naasorissaasup saniliata atuagassiaativut soqutigai imali oqarluni: “Atuffasigisinnaasannik isaruaqanngilanga.” Sanilimili isaruai atuffasigisinnaagamigit kajumilluni atuakkat isarussallu akilerpai.

Herbert Abbottip biiliminiitippaa kukkukuusivik mikisoq. Oqaluussinermi kukkukuunik pingasunik sisamanilluunniit taartisiarsereeraangami tuniniaavinni tuneriarlugit biilini orsertarpaa. Ima allappoq: “Ilaannikkut aningaasaataarutingajattarpugut? Aappi, tamannali unissutigineq ajorparput. Orsussaqartilluta ingerlajuarpugut Jehovamik upperinnilluta tatiginnillutalu.”

Guutip kiffaasa aalajangiussisimalluinnarnertik Jehovamillu tatiginninnertik iluaqutigalugit ukiut ajornartorsiorfiusut tamakku anigorpaat. Maxwell aamma Emmy Lewisip ilaanni sialuttalimmik anorersuarnerani angerlarsimaffitsik kalittagaq orpimmit uppiffigitilluni marlunngorlugu qupineqarmat anigueqqarput. Maxwell ima allappoq: “Tamakku unissutiginngilavut, pisimasuinnaappummi, unissanerlutalu eqqarsaatiginngisaannarparput. Oqaluussinermi suliassarpassuaqarpoq, suliarinissaallu aalajangiusimavarput.” Maxwellip Emmyllu anusinngujuillutik ikinngutit asannittut ikiortigalugit angerlarsimaffitsik assakaasulik sanaqqippaat.

Aamma ullutsinni ajornartorsiorfiusuni imminut pilliutigeriaannaaneq Jehovap Nalunaajaasuisa aallussilluartut millionillit ilisarnaatigaat. Taamanikkut pioneriusutut taakkutut oqaluussiuarnissaq aalajangiusimavarput Jehovap naammassineraanissaata tungaanut.

^ par. 3 Maanna Guutip naalagaaffianut kiffartorneq.

^ par. 5 Taamanikkut pionerit amerlanerit suliffeqanngillat. Biibililersaarutit akikinnerusumik pisarpaat, taakkuninngalu tunisigaangamik akiliutigineqartartut inuuniutimininnguaminnut matussutigisarpaat.