Imarisai

Imarisai

Naggatissap qanillinerani naalannissaq pingaartiguk

Naggatissap qanillinerani naalannissaq pingaartiguk

 Naggatissap qanillinerani naalannissaq pingaartiguk

„[Silo] . . . inuiaat naalassavaat.“ — 1 MOSESI 49:10.

1. (a) Jehovamut naalanneq sumut attuumassuteqartinneqakkajuttarpa? (b) Naalannissaq pillugu siulittuut suna Jaakup siulittuutigaa?

JEHOVAMUT naalanneq suliassisimasaanut, soorlu inngilinut, ataataanerpaanut, eqqartuussisunut, palasinut, pruffiitinut kunnginullu naalannermut attuumassuteqartinneqakkajuttarpoq. Allaat Israelimi kunngip issiavissaarsua Jehovap kunngimut issiavissaarsuarititaanik taaneqartarpoq. (1 Nalunaarsuutit 29:23, NV) Ajoraluartumik Israelimi naalagaatitarpassuit Guutimut naalasseriitsuugamik imminnut innuttaminnullu ajunaarutissittarput. Aalajaatsulli Jehovap neriuutissaqartinngitsuunngilai. Tuppallersarpai neriorsorlugit kunngimik perlussiortitsinngisaannartumik inuit naapertuilluartut nuannaarlutik naalakkumasaannik ivertitsiniarluni. (Esaja 9:5, 6) Ataataanerpaaq Jaaku toqulerluni naalakkersuiumaartussaq pillugu ima siulittuivoq: „Piissanngilaq Judamit kunngip tigumiaa ajaappiarluunniit nalunaaqut isigaasa akornannit tikiutserlugu naalagaasussaq — taanna [Silo] inuiaat naalassavaat.“ — 1 Mosesi 49:10.

2. „Silo“ qanoq isumaqarpa, kunngitullu naalakkersuiffigissasaa qanoq annertutigissava?

2 „Silo“ hebræerisut oqariartaasiuvoq isumaqartoq „taassuma pigisaanik“ imaluunniit „taassumannga pigineqartumik“. Kunngip tigummiaa, Silop killeqanngitsumik naalakkersuisinnaanermik kingornussisussaaneranut ilisarnaataavoq, ajaappiarlu nalunaaqut naalakkiinissamut pissaaneqalernissaanut assersuutaalluni.  Aammattaaq Jaakup kinguaavi kunngisut kisiisa naalakkersuiffigiinnarnagit ’inuiaat’ tamaasa naalaakkersuiffigissavai. Jehovap Aaperaamut neriorsuutaa siulittuummit uppernarsarneqarpoq: „Kinguaassavit akeqqamik isaaffii tiguassavaat. Illillu kinguaassakkut nunarsuarmi inuiaat tamarmik pilluaqqunarsissapput.“ (1 Mosesi 22:17, 18) Jehovap Jiisusi Nazaretimiu ukiumi 29-mi u.n.k. anersaaminik illernartumik tanikkamiuk ’kinguaassaq’ tikkuarpaa. — Lukasi 3:21-23, 34; Galatiamiut 3:16.

Jiisusip kunngitut naalakkersuinera aallartippoq

3. Jiisusi qilaliarami naalagaassuseq qanoq ittoq tiguaa?

3 Jiisusi qilaliarami kunngi tigummiaa ingerlaannaq tigunngilaa nunamilu inuiannut naalakkersuilerluni. (Tussiaat 110:1) Taamaattoq ’naalagaaffik’ imminut naalattunik innuttalik tiguaa. Apustili Paulusip ima allaatigaa: „[Guutip] taartup pissaaneranit aniguisippaatigut ernermilu asasami naalagaaffianut nuutsilluta.“ (Kolossemiut 1:13) Ukiumi 33-mi piinsip ulluani anersaaq illernartoq Jiisusip ajoqersugaanut aalajaatsunut kuineqarmat aniguisitaaneq aallarnerneqarpoq. — Apustilit Suliaat 2:1-4; 1 Petrusi 2:9.

4. Jiisusip ajoqersugaasa siulliit naalannertik qanoq takutippaat, ataatsimullu Jiisusip qanoq taavai?

4 Tanitat ’Kristusi sinnerlugu oqariartortitatut’ naalallutik anersaakkut naalagaaffimmi tassani ’innuttaaqataasussat’ allat katersulerpaat. (2 Korinthimiut 5:20; Efesosimiut 2:19; Apustilit Suliaat 1:8) Aammattaaq kunngiminnit Jiisusi Kristusimit akuerisaassagunik ’eqqarsaatimikkut isummamikkullu ataasioqatigiissapput.’ (1 Korinthimiut 1:10) Ataatsimut isigalugit tassaassapput ’kiffaq ilumoortoq silatoorlu’, ’pilittaasoq ilumoortoq’. — Matthæusi 24:45; Lukasi 12:42.

Guutimut ’pilittaasoq’ naalakkamikku pilluaqquneqarput

5. Jehovap innuttani qanoq ilinniartittuartarsimavai?

5 Ilinniartitsisut aqqutigalugit Jehovap innuttani ilinniartittuartarsimavai. Juutit Babylonimiit utereermata, ilaatigut Ezra angutillu allat piukkunnaatillit ilinniartitsisutut atorpai. Guutip inatsisaanik inuit nipituumik atuffatiinnartanngilaat. Inatsilli „atuakkatillu nassuiarpaat inunnut paasinartunngorlugit.“ — Nehemia 8:8.

6, 7. Siulersuisoqatigiit aqqutigalugit piffissaq eqqorlugu anersaakkut nerisassanik kiffaqatigiit qanoq isumassuisarsimappat, aamma kiffaqatigiinnut naalannissarput sooq pissusissamisoorpa?

6 Kipineqartarneq ukiumi 49-mi u.n.k. oqallisaalermat, kiffaqatigiit siulersuisoqatigiivisa suliaq qinunikkut isumaliutigeriarlugu, Allakkat Illernartut tunngavigalugit inerniliipput. Siulersuisoqatigiit aalajangiinertik allakkatigut  nalunaarutigaat, ilitsersuullu ilagiit naalakkamikku Guutip pilluaqqusinera nuannaarutigaat. (Apustilit Suliaat 15:6-15, 22-29; 16:4, 5) Ullumikkuttaaq kiffaq aalajaatsoq siulersuisoqatigiit aqqutigalugit pingaarutilinnik, soorlu kristumiutut kalluunnaveersaarnissaq, aap illernartuunera, ikiaroorniutinik tupamillu atuineq pillugit ersarissunik siunnersuuteqarsimavoq. (Esaja 2:4; Apustilit Suliaat 21:25; 2 Korinthimiut 7:1) Jehovap kiffani oqaatsiminut kiffamullu aalajaatsumut naalammata pilluaqqusimavai.

7 Guutip kiffaasa kiffaqatigiinnut naalatsigitinnermikkut aamma Naalagaq, Jiisusi Kristusi, naalallugu takutippaat. Tamanna nalitsinni suli pingaarnerulerpoq, tassami soorlu Jaakup toqulerluni siulittuisimaneratut Jiisusip oqartussaanera annertunerulersimavoq.

Silo nunarsuarmi naalakkersuisunngorpoq

8. Qanoq qangalu Kristusi annertunerusumik oqartussaassuseqalerpa?

8 Silo „inuiaat naalassagaat“ Jaakup siulittuutigaa. Taamaattumik ersarilluinnarpoq Israelimit anersaakkut ittumit annertunerusoq Kristusip naalakkersuiffigisassarigaa. Sunaassava? Saqqummersitat 11:15-imi tamanna akineqarpoq: „Silarsuarmi naalagaassuseq Naalakkatta tanitaatalu maanna pigilerpaat, kunngiussaarlu naassaanngilluinnartumik.“ Biibilimi ilisimatitsissutigineqarpoq Jiisusip oqartussaassuseq taanna tigusimagaa pruffiitikkut siulittuutigineqartut ’piffissarititat arfineq-marluk’, taakku „inuiaat ullussaat aalajangersagaasut“ naammata. Tamanna 1914-imi pivoq. * (Danieli 4:13, 14; Lukasi 21:24, NV) Ukioq taanna Jiisusip kunngitut Messiarsitut takussaanani ’najuunnera’ aallartippoq. ’Akeqqami akornanni naalagaanissaanut’ piffissanngorsimavoq. — Matthæusi 24:3, NV; Tussiaat 110:2.

9. Jiisusi kunngitut pissaaneqalerami qanoq iliorpa, tamannalu inuiannut, pingaartumik Jiisusip ajoqersugaanut, qanoq sunniuteqarpa?

9 Jiisusip kunngitut pissaaneq tigoreeramiuk iliuusereqqaagaa tassaavoq naalasseriilluinnartoq Saatani inngilipiluilu ’nunamut igillugit’. Taamanikkulli anersaapiluit ajortut taakkua inuiaat assissaqanngilluinnartumik naalliuuteqartippaat. Aammattaaq avatangiisit anersaakkut aserorsaasut pilersissimavaat, Jehovamut naalannissaq ajornakusoortunngortillugu. (Saqqummersitat 12:7-12; 2 Timotheusi 3:1-5) Saatanip anersaakkut ittumik sorsuffigisai tassaanerupput Jehovap tanitai, „Guutip inassutaanik Jiisusillu nalunaajaataanik aalajangiussisut“, taakkualu kiffaqataat ’savat allat’. — Saqqummersitat 12:17; Johannesi 10:16.

10. Biibilimi siulittuutit sorliit qularnaallisippaat Saatanip kristumiunut ilumoortunut saassussinera iluatsissanngitsoq?

10 Saatanilli pilersaarutaa iluatsissanngilaq, tassami ullumikkut „Naalakkap ulluani“ inuuvugut, Jiisusillu ’ajugaajuarnissaa’ sumilluunniit akornuserneqarsinnaanngilaq. (Saqqummersitat 1:10; 6:2) Ilaatigut Israelikkut anersaakkut ittut 144.000-iusut inaarutaasumik naqissuserneqarnissaat qulakkeerumaarpaa. Aammattaaq „inuppassuit amerlangaaramik kisinneqarsinnaanngitsut, inuiaqatigiinnit naggueqatigiinnillu inuiannillu immikkullu oqaasilinnit tamanit pisut“ sernissorumaarpai.  (Saqqummersitat 7:1-4, 9, 14-16) Kiffaqatitik tanitat qilammi inuuneqalersut assiginagit taakkua nunarsuarmi Jiisusimut innuttaalerumaarput naalattut. (Danieli 7:13, 14) Silop nunarsuarmi innuttaqarnera „silarsuarmi naalagaassusermik“ ilumut tigusisimaneranut ersittumik uppernarsaataavoq. — Saqqummersitat 11:15.

’Nutaarsiassap nuannersup’ naalannissaanut piffissanngorpoq

11, 12. (a) Silarsuarmi aaqqissuussap naggatissaani kikkut kisimik annassappat? (b) Pissutsit qanoq ittut ’silarsuup anersaavanit’ siuarsarneqarpat?

11 Naassaanngitsumik inoorusuttut tamarmik naalannissaq ilinniartariaqarpaat, tassami Biibilimi erseqqissarneqarpoq ullormi Guutip akiniaaffissaani ’Guutimik ilisimasaqanngitsut Naalakkamillu Jiisusimik [nutaarsiassamut nuannersumut] naalakkumanngitsut’ tamarmik inuuginnassanngitsut. (2 Thessalonikamiut 1:8) Avatangiisilli guutiitsut maannakkut atuuttut Biibilip inatsisaanut najoqqutassiaanullu naalasseriinnermik ersersitsipput, nutaarsiassamut nuannersumut naalannissaq ajornakusuulersillugu.

12 Guutimut anneruniartumik isiginnittaaseq Biibilimi ’silarsuup anersaavanik’ taaneqarpoq. (1 Korinthimiut 2:12) Silarsuup anersaavata inunnut sunniutai pillugit Paulusi itsaq Efesosimi kristumiunut ima allappoq: „Siornatigut inuuffigisassinni tamaani inuunersi aalajangerneqartittarallarassiuk silarsuup matuma pissuserisaanit silaannarsuullu naalagaaffiani naalagaasumit, naalasseriitsut qitornaannut sunniuteqartuartumit. Siornatigummi tamatta taamaassimavugut. Uinitta pilerissusiatigut iliortarpugut uinitta eqqarsaatittalu piumasaat malillugu, inunnguuseralugulu kamannermut qitornaavugut allat assigalugit.“ — Efesosimiut 2:2, 3.

13. Silarsuup anersaava kristumiut qanoq akiorsinnaavaat, taamaaliornerallu qanoq iluaqutaava?

13 Qujanartumik Efesosimi kristumiut naalasseriinnerup anersaavanit inussiaataajuaannanngillat. Guutip anersaavanit sunnertinnermikkut, inerititaanillu ajunngitsunik naammattunillu katersuinermikkut Guutimut meeraalerput naalattut. (Galatiamiut 5:22, 23) Aamma ullumikkut Guutip anersaavata tamanit pissaaneqarnerungaartup inuit millionillit Jehovamut naalattunngortippai. Tamanna pissutigalugu ’naggatissaq tikillugu . . . pisuussut neriugisap imarisaa pissarsiarisinnaavaat’. — Hebræerit 6:11; Zakaria 4:6.

14. Jiisusip qanoq kristumiut ulluni kingullerni inuusut tamaasa ajornartorsiutinik aalajangersimasunik naalannerannik misilinneqaataasussanik paasitippai?

14 Eqqaamajuttaaq Silo pissarsuaq ikiortigigatsigu, taassuma Ataatani peqatigalugu pisinnaasavut qaangerlugit akeraq naalannitsinnik misiliiniartoq, anersaapiluuppat inuugaluarpalluunniit, akornusissavaa. (1 Korinthimiut 10:13) Anersaakkut sorsunnissatsinnut piginnaanngorsarniarluta ajornartorsiutit aalajangersimasut ulluni kingullerni malunniuttussat Jiisusip oqaluttuarai. Taamaaliorpoq allakkat arfineq-marluk apustili Johannesimut allaqqusani iluaqutigalugit. (Saqqummersitat 1:10, 11) Ilitsersuut tamanna soorunami itsaq kristumiunut pingaaruteqarpoq, 1914-imiilli „Naalakkap ulluani“ inuusunut pingaarnerusumik saaffiginnippoq. Taamaattumik oqariartuutit soqutigeqqissaarniartigit! *

Kajumiillineq, kanngunartuliorneq aningaaseritunerlu ingalassimakkit

15. Efesosimi ilagiinni pissutsit atuuttut sooq mianersuutigissavavut, taamaaliussagaannilu suna pisariaqarpa? (2 Petrusi 1:5-8)

15 Allakkat siulliit Jiisusip allatsitai Efesosimi ilagiinnut allagaapput. Ilagiit pinertunerannik nersoriarlugit Jiisusi oqarpoq: „Kisianni assuaraakkit asannissutsit siulleq soraarukkakku.“ (Saqqummersitat 2:1-4) Ullumikkuttaaq kristumiut ilaasa ilungersuussinertik, Guutimullu asanningaarnertik annaasimavaat, taamaattumik Guutimut attaveqarnerat qajannarsisimavoq. Pingaartuuvoq asanninneq uummarissaqqinniarlugu piaarnerpaamik iliuuseqarnissaq. Qanoq taamaaliortoqarsinnaava? Akuttunngitsumik Biibilip misissoqqissaartarneratigut, ataatsimiinnernut najuuttarnikkut, Jehovamut qinunikkut ilinniakkattalu eqqarsaatigeqqissaartarnerisigut.  (1 Johannesi 5:3) Taamaaliussagaanni ’ilungersungaarneq’ pisariaqarpoq, taamaaliornerli imminut akilersinnaavoq. (2 Petrusi 1:5-8) Unneqqarissumik imminut killisiorluta paasigutsigu Guutimut asanninnerput nillorsimasoq, Jiisusip oqaaqqissaarutaa erniinnaq malittariaqarparput: „Eqqaamaniaruk sumit nakkartutit, allamik isumataarit, suliatillu siulliit suliarikkit.“ — Saqqummersitat 2:5.

16. Inuit anersaakkut aserorsaasut qanoq ittut Pergamonimi Thyatiramilu ilagiinni takussaasimappat, aamma sooq Jiisusip oqaasii ullutsinni naleqqulluarpat?

16 Pergamonimi Thyatiramilu kristumiut assuarnaassusertik, nikallujuinnertik ilungersornertillu pillugit nersorneqarput. (Saqqummersitat 2:12, 13, 18, 19) Allanilli Bileamitut Jesabelitullu ajortunik isiginnittaasilinnit, kanngunartuliorneq Ba’alisiornerlu iluaqutigalugit Israelikkunnik ileqqupiloqartitsilersimasunit sunnerteqqajaasimapput. (4 Mosesi 31:16; 1 Kunngit 16:30, 31; Saqqummersitat 2:14, 16, 20-23) „Naalakkap ulluani” — uagut nalitsinni — tamanna qanoq ippa? Aamma taamaattoqaqqajaasoqarpa? Aap. Guutip ilagiivinit anisitaasarnernut kanngunartuliorneq pissutaanerpaasarpoq. Taamaattumik ileqqorissaarnissamik aseruisinnaasut kikkulluunniit, ilagiinniikkaluarpata avataaniittuugaluarpataluunniit, qanittumik attaveqarfigisannginnissaat pingaartorujussuuvoq! (1 Korinthimiut 5:9-11; 15:33) Silomut naalallutik innuttaarusuttut, aliikkutassiat ajorsinnaasut tiingasulersaarutillu qanoq ittulluunniit, naqitaagaluarpata internetikkooraluarpataluunniit, nigorsimaqqissaartariaqarpaat. — Amosi 5:15; Matthæusi 5:28, 29.

17.  Sardesimi Laodikeamilu ilagiit imminnut qanoq isumaqarfigippat, Jiisusilli anersaakkut pissusiat qanoq isumaqarfigaa?

17 Sardesimi ilagiinni amerlanngitsuinnaat nersualaarneqarput. Ilagiit uummaarissutut tusaamaneqarput, anersaakkulli ima kajumiillisimatigaat ’toqungasutut’ Jiisusimit isigineqalersimallutik. Qalliinnakkut nutaarsiassamut nuannersumut naalattuupput. Aap, ilagiinni assuarisassarpassuaqarpoq. (Saqqummersitat 3:1-3) Pissutsit assingusut Laodikeami ilagiinni takussaapput. Pisuussutini usorsitsaarutigai oqarluni: „Pisuujuvunga.“ Kristusilli isaani ’tassaavoq inukuluk, nallinnartoq, piitsoq, tappiitsoq tamaqanngitsorlu’. — Saqqummersitat 3:14-17.

18. Guutip isaani anersaakkut nillertunngunnginnissarput qanoq pinngitsoortissinnaavarput?

18 Ullumikkuttaaq aalajaallutik kristumiuusimagaluartut ilaasa naalasseriinneq ileqqorilersimavaat. Amerlanertigut silarsuup anersaavanik sunnertissimagamik piffissap ilungersunartuunera malugisimajunnaarsimavaat. Biibilimik  atuaqqissaartarnissamut, qinunermut, kristumiutut ataatsimiinnernut oqaluussinermullu isiginnittaasiat nillorsimavoq. (2 Petrusi 3:3, 4, 11, 12) Anersaakkut pisuussutinik ileqqaarnermikkut Kristusimut naalalernissaat pingaartuuvoq. Kristusi ’kuultimik innermik akuiakkamik pisiffigisariaqarpaat’. (Saqqummersitat 3:18) Anersaakkut pisuujunermut ilaavoq ’ajunngitsulianik pisuussuteqarneq, tukkortuuneq, inoqatiminnullu tunniussisarneq’. Pisuussutinik erlinnartunik piviusunillu katersaqarutta „pisuussutinik siunissami toqqaviusinnaasunik ajunngitsunik inuunivik pigilersinnaaqqullugu“ katersuissaagut. — 1 Timotheusi 6:17-19.

Naalannerminnik nersorneqartut

19.  Qanoq Jiisusip Smyrnami Filadelfiamilu kristumiut nersualaarlugillu kajumissaarpai?

19 Smyrnami Filadelfiamilu ilagiit naalannerup tungaatigut maligassaalluarput. Jiisusip ilagiinnut taakkununnga allagai avoqqaarliutitaqanngillat. Smyrnami ilagiinnut ima oqarpoq: „Ilisimavakka annikilliortarnitit piitsuussutsillu — pisuujuvutilli!“ (Saqqummersitat 2:9) Ilagiit taakku Laodikeami ilagiinnit nunap piinik pisuussutiminnik usorsitsaarutiginnittunit, piviusumilli piitsuusutut oqaatigineqarsinnaasunit allaanerulluinnarput. Inuit Kristusimut ilumoortut naalattullu takullugit Diaavulup soorunami iluarinngilluinnarpaa. Tamanna pillugu Jiisusi mianersoqqusivoq: „Naalliunnissatit sioorageqinagit, Diaavulup ilasi parnaarussivimmut pisikkumaarpai misilinneqaqqullusi, naalliunnartorsiussaasilu ulluni qulini. Toqumut allaat ilumoorit, taava ajugaasumut niaqorusiussassaq inuussutaasoq ilinnut tunniukkumaarpara.“ (Saqqummersitat 2:10) Jiisusip Filadelfiami ilagiit assingusumik nersualaarpai. Oqarpoq: „Oqaasera aalajangiussimavat ateralu miserratiginagu. Erniinnaq aggerumaarpunga. Pigisat aalajangiunniaruk ajugaasumut niaqorusiussamik arsaarneqaqqunak.“ — Saqqummersitat 3:8, 11.

20.  Inuit millionillit Jiisusip oqaasiinut qanoq ullumikkut naalappat, aamma qanoq atugaqaraluarlutik?

20 Sinneruttut ilumoortut „savat allat“ akornanni suleqatitik ilagalugit „Naalakkap ulluani“ 1914-imi aallartittumi, kiffartornerminni ilungersornermikkut assuarnaatsuunermikkullu Jiisusip oqaasii naalassimavaat. Ukiuni hundredelinni siullerni kristumioqatitik assigalugit Kristusimut naalannertik pissutigalugu ilaat naalliuttariaqartarsimapput. Taakkua ilaat allaat paarnaarussaallutillu tigusat inissiarsuarniittariaqarsimapput. Ilaat allat inuiaqatigiinni pigisanik pingaartitsisuni ’isiminnik qaammarissuutitsinermikkut’ Jiisusip oqaasii naalappaat. (Matthæusi 6:22, 23) Aap, avatangiisitik inuunermilu atukkatik qanoq ikkaluarpataluunniit kristumiut ilumoortut Jehovap uummataa nuannaartittuarpaat. — Ussatit 27:11.

21. (a) Anersaakkut pisussaaffik suna ’kiffaqatigiit’ isumagiuassavaat? (b) Silo ilumut naalakkusullugu qanoq takutissinnaavarput?

21 Annikilliornartussarsuaq maanna qanilliartortillugu „kiffaq ilumoortoq silatoorlu“ aalajangersimalluinnarpoq Naalakkamut, Jiisusi Kristusimut, naalattuarniarluni. Guutip inoqutaanut anersaakkut nerisassanik piffissaq eqqorlugu piareersaasarneq naalanneranut ilaavoq. Taamaattumik Jehovap peqatigiissortaa teokratiikkut ingerlanneqartoq alutornangaartoq, peqatigiissortaatalu uagutsinnut tunniussai pingaartinniartigit. Taamaaliornitsigut Silomut, innuttaminik naalattunik inuunermik naassaanngitsumik akissarsisitsisussamut, naalannerput takutissavarput. — Matthæusi 24:45-47; 25:40; Johannesi 5:22-24.  (wE 10/01 02)

[Quppernerup ataani ilanngussat]

^ imm. 8 ’Piffissarititat arfineq-marluk’ pillugit nassuiaat atuakkami Ilisarsineq inuunermut naasaanngitsumut sammisoq-mi, kapitali 10-mi, Jehovap Nalunaajaasuinit saqqummersinneqarsimasumi takuneqarsinnaavoq.

^ imm. 14 Atuakkami Jehovap Nalunaajaasuinit saqqummersinneqarsimasumi Åbenbaringen — Det store klimaks er nær!-imi qupperneq 33-miit allakkat arfineq-marluk tamarmik sukumiinerusumik sammineqarput.

Eqqaamavigit?

• Oqartussaassuseq suna Jiisusip pigilerumaaraa Jaakup toqulerluni siulittuutigaa?

• Jiisusi Silotut akueralugu qanoq takutissinnaavarput, isiginnittaaserlu suna ingalassimasariaqarparput?

• Ilagiinnut arfineq-marlunnut allakkat Saqqummersitat atuagartaani eqqaaneqartut uagutsinnut naleqquttunik qanoq ilitsersuuteqarpat?

• Smyrnami Filadelfiamilu ilagiit qanoq ilaarsinnaavavut?

[Atuaqqissaarnermi apeqqutit]

[Qupp. 16-mi assiliartaq]

„Pilittaasoq ilumoortoq“ naalammassuk Jehovap kiffani pilluaqquai

[Qupp. 17-mi assiliartaq]

Guutimut naalattuunissarput Saatanip ajornakusoortunngortippaa

[Qupp. 19-mi assiliartaq]

Jehovamut qanittumik attaveqarnerup taassumunnga naalannissaq ajornannginnerulersissavaa