Imarisai

Imarisai

Jehovap isumassorpaatigut

Jehovap isumassorpaatigut

 Jehovap isumassorpaatigut

„Isumakuluutisi tamaasa [Guutimut] pisissigit isumassormasi.“ — 1 PETRUSI 5:7.

1. Pingaaruteqartup suup tungaatigut Jehova Saatanilu assigiinngilluinnarpat?

JEHOVA Saatanilu assigiinngilluinnartuupput. Kialuunniit Jehovamut kajungertup Diaavulu maajugissavaa. Qinerlerfissiami Encyclopædia Britannica-mi (1970) assigiinngissut tamanna uparuarneqarpoq Saatanillu sulinera, Biibilimi Jobimik allakkani allaaserineqartoq, pillugu ima allassimalluni: ’Saatanip nunarsuaq angalaffigeqqissaarpaa unnerluutigisassarsiorluni; tassa Naalakkap ajunngitsut tamaasa nakussatsinniarlugit nunarsuarmiittunik tamanik ’takunnissinnaasup’ siunertaata akerlerluinnaanik siunertaqarluni (II Krøn. xvi, 9). Inuttut ajunngissuseq namminissarsiunngitsoq Saatanip asissuerpaluttumik pasilliutigaa, misilinnissaanullu akuerineqarsimavoq Guutip oqartussaanerata nakkutilliineratalu ataani killiliussaatalu iluani.’ Aap, assigiinngilluinnassusii! — Jobi 1:6-12; 2:1-7.

2, 3. (a) Jobimik oqaluttuami qanoq takutilluarneqarpa oqaaseq „Diaavulu“ qanoq isumaqarnersoq? (b) Biibilimi qanoq takutinneqarpa Saatani Jehovap kiffaanik nunamiittunik unnerluutiginnittuartuusoq?

2 Oqaaseq „Diaavulu“ grækerit oqaaseraat isumaqartoq „eqqunngitsumik unnerluussisoq, mamarliisoq“. Jobimik allakkanni takutinneqarpoq Saatanip Jehovap kiffaa aalajaatsoq Jobi namminissarsiorluni Guutimut kiffartornerarlugu unnerluutigigaa ima oqarluni: „Jobimi pissutissaqarluarunarpoq Guutimik mianerinninnerminut.“ (Jobi 1:9) Jobimik allakkani oqaluttuap  takutippaa Jobi misilinneqaraluarluni annikilliortitaagaluarlunilu Jehovamut qaninnerujartuinnarsimasoq. (Jobi 10:9, 12; 12:9, 10; 19:25; 27:5; 28:28) Misilinneqareerluni Guutimut ima oqarpoq: „Siornatigut allat pillutit oqaaserisaat tusallatsiaannarsimavakka, maannali nammineq isinnik takuakkit.“ — Jobi 42:5.

Jobip kingorna Saatani Guutip kiffaanik aalajaatsunik unnerluussisarunnaarpa? Naagga. Saqqummersitat-ni takutinneqarpoq naggatissap nalaani matumani Saatani Kristusip qatanngutaanik tanitanik qularnanngilluinnartumillu suleqataannik aalajaatsunik unnerluussiuartuusoq. (2 Timotheusi 3:12; Saqqummersitat 12:10, 17) Taamaattumik pingaaruteqarluinnarpoq kristumiutut ilumoortutut tamatta Guutimut isumassortitsinnut, Jehovamut, naalatsigitinnissarput asanninnerlu pissutigalugu kiffartornissarput, Saatanip unnerluussinera eqqunngitsutut uppernarsarneqassammat. Taamaaliorutta Jehovap uummataa nuannaartissavarput. — Ussatit 27:11.

Jehova ikiorniarluta periarfissarsiortuarpoq

4, 5. (a) Jehovap nunarsuarmi maani suna nakkutigaa Saatanip nakkutigisaata akerlianik? (b) Jehovamit iluarisaaneq misigissagutsigu qanoq iliortariaqarpugut?

4 Diaavulu nunarsuarmi angalasarpoq unnerluussassarsiorluni iisassarsiorlunilu. (Jobi 1:7, 9; 1 Petrusi 5:8) Tamatuma akerlianik imminit nakussatsinneqarnissamik pisariaqartitsisut ikiorniarlugit Jehova periarfissarsiortarpoq. Pruffiiti Hanani kunngi Asamut oqarpoq: „[Jehovap] nunarsuarmiittut tamaasa takusinnaavai uummatimikkut iluunngarlutik imminik tunaarinnittut pissaanermigut ikiorsinnaallugit.“ (2 Nalunaarsuutit 16:9) Saatanip uumissuilluni nakkutiginninnerata Jehovallu asannittumik isumassuinerata assigiinngissusii!

5 Jehovap alapernaanngilaatigut kukkussutivut naammalluinnanngitsuunerpullu naatsorsorniarlugit. Tussiaasiortoq allappoq: „Illit [Jehova], ajortuliat naatsorsuutigissagaluarukkit kina atassagaluarpa taava, [Jehova]?“ (Tussiaat 130:3) Ima paasisariaqarpoq: atasinnaasoqarsinnaassanngikkaluarpoq. (Oqaluussisartup oqaasii 7:20) Uummammik tamakkiisumik Jehova qanilligutsigu, nakkutigissavaatigut — imaanngitsoq assuariniarluta, maluginiarluguli qanoq ilungersuuteqarnersugut, ikioqqullutalu isumakkeerfigeqqullutalu qinnutivut akiumallugit. Apustili Petrusi ima allappoq: „[Jehovap] isaasa sammivigaat iluartut, ikioqqullutik nillianerat siutaasa tusartarpaat. [Jehovap] kiinaa pinerluttuliortunut sammivoq.“ — 1 Petrusi 3:12.

6. Daavimi pisimasoq uagutsinnut qanoq tuppallersaataallunilu mianersoqqussutaava?

6 Daavi naammalluinnanngitsuuvoq sualuttumillu ajortuliorluni. (2 Samueli 12:7-9) Uummammiugisanili Jehovamut annippai qamuunalu pisumik qinunikkut qanilliniarlugu. (Tussiaat 51:1-14) Jehovap Daavip qinnutaa tusarpaa isumakkeerfigalugulu, naak Daavi ajortuliaminik kingunerlutsitsinngitsuunngikkaluartoq. (2 Samueli 12:10-14) Tamanna uagutsinnut tuppallersaataallunilu mianersoqqussutaavoq. Tuppallernarpoq nalunagu Jehovap isumakkeerfigerusukkaatigut ilumoorluta ajortuliavut peqqissimissutigigutsigik, eqqarsaallannarporli ajortuliat kingunerlutsitsinartarneri. (Galatiamiut 6:7-9) Jehova qanillerusukkutsigu iluarinngisai tamaasa sapinngisamik ungasinniartariaqarpavut. — Tussiaat 97:10.

Jehovap innuttani imminut kajungersippai

7. Inuit qanoq ittut Jehovap alapernaattarpai, qanorlu imminut kajungilersittarpai?

7 Daavi tussiaasiami ilaanni ima allappoq: „[Jehova] qutsinnermiippoq, nikanartulli isigai, imminut angisuutittoq nalunngilaa ungasissumit.“ (Tussiaat 138:6) Tussiaammi allami assingusumik allassimasoqarpoq: ’Kia assigaa [Jehova] Guuterput, qutsissisittoq issiaffimmini, atsissisittoq takuniaanermini qilammi nunamilu? Taassuma nikanartoq makittarpaa issumit.’ (Tugsiaut 113:5-7) Aap, silarsuarmik Pinngortitsisoq ajugaqanngitsoq nunamut takuniaalluni atsissisippoq, takuaalu ’nikanartoq’, imaluunniit maniguuttoq, tassa inuit „maajunnartuliat pillugit anersaarulullutik kappialasut“. (Ezekieli 9:4) Inuit taamaattut erni aqqutigalugu imminut kajungilersittarpai. Jiisusi nunamiikkallarami  ima oqarpoq: ’Kinaluunniit uannut ornigussinnaanngilaq Ataatap uannik aallartitsisup kajungilersinngippani . . . Uannut pisinnaasoqanngilaq Ataatannit taamaalisinneqanngikkuni.’ — Johannesi 6:44, 65.

8, 9. (a) Sooq tamatta Jiisusimut ornigunnissarput pisariaqartipparput? (b) Utertitsissummut tunngatillugu suna maluginiarnartuua?

8 Inuit tamarmik Jiisusimut orniguttariaqaraluarput pilliutaanullu utertitsissutaasumut upperlutik, tamarmimmi ajortiliusutut Guutimullu takornartaasutut inunngorput. (Johannesi 3:36) Guutimit saammaanneqarnissaq pisariaqartippaat. (2 Korinthimiut 5:20) Guutip inunnik ajortiliusunik eqqisseqatigineqarumalluni arlaannik aaqqissuusseqqulluni qinnuigineqarnissani utaqqinngilaa. Apustili Paulusi ima allappoq: „Guutip uagutsinnut asanninnini takutippaa ajortiliugallartilluta Kristusip pilluta toquneratigut. . . . Sulimi Guutimut akeraatilluta ernerata toquagut saammaannartitaavugut; taava Guutimit saammaannartitaagatta suli annerungaartumik inuuneratigut annaanneqassaagut.“ — Romamiut 5:8, 10.

9 Apustili Johannesip ilumoortoq nalissaqanngitsoq, tassa Guutip inuit saammaakkai, uppernarsarpaa ima allalluni: „Matumuuna Guutip asanninnera akornatsinni saqqummersinneqarsimavoq: Guutip ernituani silarsuarmut aallartimmagu taassumuuna inooqqulluta. Asanninneq tassaanngilaq uagut Guuti asagatsigu, tassaavorli Guutip asammatigut erninilu aallartimmagu ajortivut pillugit pilliutitut saammaannartitsissutitut.“ (1 Johannesi 4:9, 10) Iliuuseqaqqaartut tassaanngillat inuit, tassaavorli Guuti. Guutimut ’ajortiliuinnaanngitsunut’, aap, allaat ’akeraasunut’, taama asannitsigisumut kajunginngilatit? — Johannesi 3:16.

Jehova ujartariaqarparput

10, 11. (a) Jehova ujarniarlugu qanoq iliortariaqarpugut? (b) Saatanip pissutsinik aaqqissuussinera qanoq isigisariaqarparput?

10 Soorunami Jehovap pinngitsaalilluta qaaqqunngilaatigut. Ujartariaqarparput, ’satsilluta nanisinnaaneripput, uffa ilatsinnit kimilluunniit ungasinngikkaluartoq’. (Apustilit Suliaat 17:27) Jehovap imminut naalatsigitinnissarput piumasarisinnaagaa akuerisariaqarparput. Ajoqersugaq Jaaku ima allappoq: „Taamaattumik Guutimut naalatsigitinniaritsi; Diaavululu akerartorsiuk, taava ilissinnit qimaassaaq. Guuti qaninniarsiuk, taava taanna ilissinnut qanillissaaq. Ajortiliususi, assasi ipiiarsigit; isumassigut marluususi, uummatisi salissigit!“ (Jaaku 4:7, 8) Diaavulu akiorniarlugu Jehovalu tapersersorniarlugu aalajangiussilluinnarnissarput nangaassutigissanngilarput.

11 Tassa Saatanip pissutsinik aaqqissuussinera ajortoq akuersaassanngilarput. Jaaku aamma ima allappoq: „Nalugassiuk silarsuarmut ikinngutaaneq tassaasoq Guutimik akerartuineq? Silarsuarmut ikinngutaajumasoq Guutimut akeranngortarpoq.“ (Jaaku 4:4) Akerlianik Jehovamut kiffaarusukkutta, ilimagisariaqarparput Saatanip silarsuaanit uumigineqarnissarput. — Johannesi 15:19; 1 Johannesi 3:13.

12. (a) Oqaatsit tuppallernartut suut Daavip allappai? (b) Jehova pruffiiti Azarja aqqutigalugu qanoq mianersoqqusiva?

12 Saatanip silarsuaanit aalajangersimasukkut tatineqaraangatta, qinunikkut Guutimut qanillinissarput ikioqqunissarpullu immikkut pisariaqartittarpavut. Daavip, arlaleriarluni Jehovamit aniguisitaasarsimasup, oqaatsit tuppallernartut uku allappai: „[Jehova] qanippoq torlorfigisiminut tamanut, tamanut ilumoorlutik imminut torlorfiginnittunut. Mianerinnitsiminut kissaataannik iliortarpoq, annikilliornerminni nillianerat  tusartarpaa annaattarlugillu. [Jehovap] sernigisarpai asasini tamaasa, iluaatsulli tamaasa nungutissavai.“ (Tussiaat 145:18-20) Tussiaammi tamatumani takutinneqarpoq Jehovap aniguisissinnaagaatigut inuttut immikkut misilinneqaraangatta, innuttanilu ataatsimut isigalugit annaatissavai ’annikilliortitaangaarnissaq’ aallartippat. (Saqqummersitat 7:14) Jehovap qanissavaatigut qanikkutsinni. Pruffiiti Azarja ’Guutip anersaavanit’ siulersorneqarluni ilumoortuartuusussaq allappaa: „[Jehovap] najorpaasi najorassinni. Ujarussiuk nanissavarsi, tunukkussiulli aamma ilissi tunussavaasi.“ — 2 Nalunaarsuutit 15:1, 2.

Jehova uagutsinnut piviusuusariaqarpoq

13. Jehova uagutsinnut piviusuusoq qanoq takutissinnaavarput?

13 Apustili Paulusi Mosesi pillugu ima allappoq: „Takussaanngitsumik isigisaqarlunilusooq pinertusaarpoq.“ (Hebræerit 11:27) Soorunami Mosesip Jehova takuinngilaa. (2 Mosesi 33:20) Jehovali Mosesimut ima piviusuutigaaq soorlu tassa Taanna takullugu. Jobi aamma taamatut misigivoq. Misilinneqarnermi kingorna uppernerup isaanik Jehova takulluarneruaa Guutiusutut kiffami aalajaatsut misilinneqarnissaannik akuerinnittutut taakkuninngali neriulussinnartitsinngisaannartutut. (Jobi 42:5) Allassimavoq Enokip Noallu ’Guuti inooqatigigaat’. Guuti nuannaartinniarlugu naalallugulu taamaaliorput. (1 Mosesi 5:22-24; 6:9, 22; Hebræerit 11:5, 7) Jehovap Enokimut, Noamut, Jobimut Mosesimullu piviusuutigineratut uagutsinnut piviusuutigippat, ’eqqarsaatigiuartassavarput sumiikkaluaraangattaluunniit, taava ingerlavissavut nalimmatsissavai’. — Ussatit 3:5, 6.

14. Jehovamik ’aalajangiussisimaneq’ qanoq isumaqarpa?

14 Israelikkut nunamut neriorsuutigisamut isiliivissut Mosesip ima siunnersorpai: „[Jehova]  Guutersi malissavarsi mianerissallugulu. Peqqussutai maleruassavasi oqaasiilu naalassallugit; taanna kiffartuutissavarsi aalajangiussimallugulu.“ (5 Mosesi 13:5) Jehova malissavaat, mianeralugu, naalallugu aalajangiussimallugulu. Biibilimik misissueqqissaartartoq oqarpoq Hebræerit oqaasianni, uani „aalajangiussimallugulu“-mik nutserneqarsimasumi, pineqartoq „attaveqatigiinneq qanittuararsuaq“. Tussiaasiortoq ima allappoq: „[Jehovamik] mianerinnittut Guuti peqatigalugu inuusarput.“ (Tussiaat 25:14) Jehovamut taamatut erlinnartumik qanittumillu attaveqatigiinneq nuannaarutigisinnaavarput Jehova uagutsinnut piviusuuppat imalu asatigigutsigu iluarinngisaanik iliornissarput siooragalugu. — Tussiaat 19:10-15.

Jehovap isumassuinera eqqumaffigaajuk?

15, 16. (a) Tussiaat 34 Jehovap isumassuineranik qanoq takutitsiva? (b) Jehovap uagutsinnut ajunngitsuliorsimaneranik eqqaasaqarneq ajornakusoortikkutsigu qanoq iliussaagut?

15 Saatanip uagutsinnut peqqusersusaarutigisartagaasa ilagaat Guutitta, Jehovap, kiffaminik aalajaatsunik isumassuiuartuuneranik puiuititsiniaaneq. Israelip kunngiata Daavip paasisimalluarpaa Jehovap sernissoraani allaat navianartorsiorujussuarnermini. Gatip kunngia Akishi silaaruttuusaarfigisariaqarlugu misigigami taalliorpoq, tusarnerluinnartumik, uppernermik imatut ersersitsinertalimmik: „[Jehova] ataqqinartissiuk peqatigalunga, peqatigiilluta aqqa nersortigu! [Jehovap] ujaranni akivaanga, aniguisippaangalu siooqqatigisannit tamanit. [Jehovap] inngilia taassuminnga mianerinnittut eqqaanni inississaaq, aniguisissavaalu. Ussersiuk takusiullu [Jehova] ajunngitsuusoq. Pilluarpoq taassumani qimarnguffissarsiortoq. [Jehovap] qanippai sequmissimasumik uummatillit, annaattarpai aserortersimasumik anersaallit. Iluartoq ajunaarnernik amerlasuunik eqqorneqartarpoq, [Jehovalli] tamakkunannga tamanit annaattarpaa.“ — Tussiaat 34:4, 5, 8, 9, 19, 20; 1 Samueli 21:11-16.

16 Upperilluinnarpiuk Jehova annaassinissaminut pissaaneqartuusoq? Inngilini aqqutigalugit sernissuinera eqqumaffigaajuk? Nammineerlutit  ’usserpiuk takullugulu Jehova ajunngitsuusoq’? Qanga kingullermik maluginiarpiuk Jehovap ajunngitsuliorfigigaatit? Eqqarsaatigilaaruk. Taamaaliorpa oqaluussitillutit pulaakkanni kingullermi ingerlaqqinnissannut sapilivillutit misigileruttorlutit? Immaqa nuannersumik oqaloqateqarputit. Jehovap qutsaviginissaa eqqaamaviuk pisariaqartitsiffinni nakussatsinnerummatit pilluaqqummatillu? (2 Korinthimiut 4:7) Immaqa arlaannik Jehovap ilinnut immikkut ajunngitsuliorsimaneranik eqqaasaqarnissat ajornakusoortippat. Immaqa sapaatip-akunnera ataaseq, qaammat ataaseq, ukioq ataaseq siusinnerusorluunniit kingumut eqqarsaatigisariaqassavat. Taamaappat soormi taava Jehovamut qaninnerulerniarlutit iliuuseqaruit maluginiarlugulu qanoq siulersoraatit? Apustili Petrusip kristumiut ima siunnersorpai: „Guutip assaata pissarsuup ataani qanilaartuugitsi, . . . isumakuluutisilu tamaasa taassumunnga pisissigit isumassormasi.“ (1 Petrusi 5:6, 7) Qularnanngitsumik tupaallaatigissavat Jehovap qanoq isumassortigigaatit! — Tussiaat 73:28.

Jehova ujartuaruk

17. Jehova ujartuassagutsigu qanoq iliortariaqarpugut?

17 Jehovamut ajunngitsumik attaveqarneq ineriartortittuartariaqarparput. Jiisusi Ataataminut ima qinuvoq: „Inuuneq naassaanngitsoq tassaavoq ilinnik, ilumut kisimi Guutiusumik aallartitannillu Jiisusi-Kristusimik, ilisimanninneq.“ (Johannesi 17:3) Jehova erneralu pillugit ilisarsiniarluni iliuuseqartuartoqartariaqarpoq. ’Guutip itissusii’ paasisinnaassagutsigik qinusariaqarpugut ikiorneqartariaqarlutalu anersaaq illernartumik. (1 Korinthimiut 2:10; Lukasi 11:13) ’Kiffap aalajaallunilu silatuup’ siulersuinera pisariaqartipparput ’piffissaq eqqorlugu’ anersaakkut inuussutissaqarniarluta. (Matthæusi 24:45, NV) Taanna aqqutigalugu Jehovap siunnersorsimavaatigut oqaasia ullut tamaasa atuartassagipput, kristumiut ataatsimiinneri aalajangersimasumik najuuffigisassagivut aamma ’naalagaaffimmik nutaarsiassamik nuannersumik’ siunertaqarluartumik oqaluusseqataasassasugut. (Matthæusi 24:14, NV) Taamaaliorutta Guuterput isumassuisoq, Jehova, ujartuassavarput.

18, 19. (a) Qanoq iliorniarluta aalajangiusimasariaqarparput? (b) Diaavulu akiorniarlugu aalajangiusimalluinnarutsigu Jehovalu ujartuarlugu qanoq pilluaqqusaassaagut?

18 Saatanip sapinngisani tamaat Jehovap innuttai sumit tamanit akerlilersugaatinniarpai, malersugaatinniarlugit tatineqartinniarlugillu. Eqqissisimajunnaartinniarpaatigut Jehovamullu ajunngitsumik attaveqarunnaartinniarluta. Kissaatiginngilaa ilumoorusuttunik ujaasinerput silarsuarmilu kisimi oqartussaaneq pillugu akerleriissutaasumi Jehovamik tapersersuilersinniarlugit ikiuinerput ingerlaannassasoq. Jehovamulli ilumoortuarnissarput aalajangiuttariaqarparput tatigalugulu Ajortumit aniguisikkumaaraatigut. Guutip oqaasianit siulersortikkutta peqatigiiffianilu takussaasumi suliniuteqartuarutta, qularutigissanngilarput isumassortuassagaatigut. — Esaja 41:8-13.

19 Taamaattumik aalajangiusimalluinnartigu Diaavulup peqqusersusaarnerisalu akiornissaat, ujartuartigulu Guuterput asannittoq, Jehova, pakatsisitsinngisaannartoq ’nakussatsissagaatigulli aalajaatsumillu tunngavilerluta’. (1 Petrusi 5:8-11) Taamatut ’Guutip asanninneraniittuinnassaagut Naalakkatta Jiisusi-Kristusip nallittuinerata uagutsinnik inuunermut naassaanngitsumut pisitsinissaa utaqqitillugu’. — Judasi 21. (wE 10/15 02)

Qanoq akissavit?

• Oqaaseq „Diaavulu“ qanoq isumaqarpa, Diaavulullu taamatut taaguuteqarnini qanoq eqqortippaa?

• Inunnik nunarsuarmiittunik isiginnittaatsimigut Jehova Diaavulumit qanoq allaanerua?

• Inuup Jehova qanillissaguniuk sooq utertitsissut akuerisariaqarpaa?

• Jehovamik ’aalajangiussineq’ qanoq isumaqarpa, qanorlu ujartuarsinnaavarput?

[Atuaqqissaarnermi apeqqutit]

[Qupp. 28-mi assiliartaq]

Jobi annikilliortitaagaluarluni, Jehovamit isumassorneqarluni paasilersimavaa

[Qupp. 29-mi assiliartat]

Ullut tamaasa Biibilimik atuaraangatta, kristumiut ataatsimiinnerinut aalajangersimasumik najuukkaangatta aallussilluarlutalu oqaluusseqataagaangatta eqqaasinneqartarpugut Jehovap isumassoraatigut