Imarisai

Imarisai

Jehovap imminut naalattut pilluaqqullugillu sernissortarpai

Jehovap imminut naalattut pilluaqqullugillu sernissortarpai

 Jehovap imminut naalattut pilluaqqullugillu sernissortarpai

„Uannut naalattoq aarlerinaatsumik najugaqassaaq eqqissillunilu inuussalluni perlussanik aarlerigisaqarnani.“ — USSATIT 1:33.

1, 2. Guutimut naalannissaq sooq pingaaruteqarpa? Akissutit assersuusiorlutit erseqqissaruk.

MARLORAAT piaraat sungaartut, qiviunik meqqullit nerisasseralutik ivikkani naatsuni pukungaaramik kissavik pavanersuaq qulangiuaartoq takunngitsoorpaat. Tassanngaannarli marloraaq mianersoqquserpaluttumik qarlorpoq sulunilu siaarlugit. Piaraasa ornikkasuarpaat, sekundialunnguillu ingerlanerinnaanni suluisa ataannut isumannaatsumut pipput. Kissaviup saassussinerigaluani taamaatiinnarpaa. * Tamanna sumik takutitsiva? Tassa naalanneq inuuinnarnissamut pingaaruteqartoq.

2 Naalattuunissaq ingammik kristumiunut ullumikkut pingaaruteqarpoq, tassami Saatani Guutip kiffai pisariniarlugit tamaviaaleruttorpoq. (Saqqummersitat 12:9, 12, 17) Jehovamik iluarisaanissamik naassaanngitsumillu inuunissamik neriugisatsinnik arsaarniarluta Jehovamut attaveqarnerput aserorniarsaraa. (1 Petrusi 5:8) Guutimulli qanittumik attaveqarutta ilitsersuutaalu oqaatsini peqatigiissortanilu aqqutigalugit tunniuttagai kajumilluta naalakkutsigit, qularutigissanngilarput sernissussagaatigut. „Meqquminik qallissavaatit, oqquiffissarsiussaatit suluisa ataanni,“ tussiaasiortoq allappoq. — Tussiaat 91:4.

Naalagaaffik naalasseriitsoq akeqqanit tiguarneqarpoq

3. Israelip naalasseriittuarnera qanoq kinguneqarpa?

3 Israelikkut Jehova naalakkaangamikku soqutiginninnermik isumassuinermillu takutitsivigisarpai. Pinngortitsisorli sumiginnartuartarpaat, guutillu qisummik ujaqqanillu sanaat pallorfigisalerlugit — „guutipiluit piunngitsut piunngitsuunertik pissutigalugu ikiuisinnaanatillu annaassisinnaanngitsut“. (1 Samueli 12:21) Ukiuni hundredelikkuutaani pikitsitsinerup naalagaaffik tunussisunngortippaa. Tamanna pillugu Jiisusi aliasulluni ima oqarpoq: „Jerusalemi, Jerusalemi! Pruffiitinik toqutsisutit ilinnullu aallartitat ujaqqanik milloorlugit. Qasseriarlungamitaava qitornatit katersorniartaraluarpakka, soorlu kukkukuup piaqqani sulummi ataannut katersortarai, piumanngilasili. Illorsi ilissinnut qimagaassaaq inuerullugu.“ — Matthæusi 23:37, 38.

4. Qanoq ukiumi 70-imi u.n.k. erserpa Jehovap Jerusalemimi najugallit ilaginnaannarsimagai?

4 Ukiumi 70-imi u.n.k. alianartumik ersarissivoq Jehovap juutit tunussisut ilaginnaannarsimagai. Taama pisoqarpoq Romamiut sakkutuuisa, nattorallip assinganik maluginiarnartumik ilisarnaaserlutik Jerusalemi saassummassuk, toqoraanersuarmik amiilaarnaannartumik kingunilimmik. Poorski pissutigalugu juuterpassuit illoqarfimmiipput,  pilliuterpassuili Guutip iluarinngilai. Pisimasup alianartup tamatuma Samuelip kunngi Saulimut naalasseriitsumut oqaasiinik eqqaasippaatigut: „[Jehovap] pilliutissat ikikkagassat toqutassallu naalanneqarnissamisut pingaartitsiginerpai? Naaggali, naalanneq pilliutinit pitsaaneruvoq, naalaarnerlu pitsaaneruvoq savat angutivissat tunnuannit.“ — 1 Samueli 15:22.

5. Naalanneq Jehovap piumasaqaataa qanoq ilisarnaateqarpa, taamatullu naalannissaq ajornanngitsuusoq qanoq nalunngilarput?

5 Naalannissaq Jehovap piumasaraa, aammali inuit naammalluinnanngitsut pisinnaasaat killeqartut ilisimalluarpaa. (Tussiaat 130:3, 4) Piumasaraa ilumoorneq naalannerlu uppernermik, asanninnermik Jehovamillu ajuallatsitsinissamik peqqinnartumik siooranermik aallaavilik. (5 Mosesi 10:12, 13; Ussatit 16:6; Esaja 43:10; Mika 6:8; Romamiut 6:17) Taamatut naalattoqarsinnaanera ’nalunaajaasut amerlasuut’ kristumiut siulliit takutereersimavaat. Naak sakkortuumik misilinneqartaraluarlutik assuarnaassusertik, ilaatigut inuunerminnik akeqartartoq, aalajangiusimajuarpaat. (Hebræerit 11:36, 37; 12:1) Aap, ilumut Jehovap uummataa nuannaartippaat! (Ussatit 27:11) Ilaat aalajaakkaluariarlutik naalasseriitsunngortarput. Taakkua ilagaat Judap kunngia Joashi.

Ajortunik peqateqarnerup kunngi ajunaartippaat

6, 7. Jojada inuutillugu Joashi kunngitut qanoq ittuua?

6 Kunngi Joashi meeraaraalluni peqqavimmik inuartarineqanngilaq. Arfineq-marlunnik ukioqartoq palasiunerup Jojadap sapiilluni toqqorsimaffianiit aariarlugu kunnginngortippaa. Jojadap Guutimik mianerinnittup kunngimut inuusuttumut ataatatut siunnersuisuunerata kinguneraa ’Joashi Jehovap isaani eqqortumik iliornera palasi Jojada inuutillugu’. — 2 Nalunaarsuutit 22:10–23:1, 11; 24:1, 2.

7 Jehovap naalaffianik iluarsartuussineq Joaship ajunngitsuliaasa ilagaat – aap, ’Joashi aalajangerpoq’ taamaaliorumalluni. Taamaaliornissaminut aningaasanik pissarsiniarluni palasiuneq Jojada kalerrippaa Judami Jerusalemimilu naalaffimmut akileraartoqartalissasoq, ’Mosesip Guutip kiffaata Tupermut Naapeqatigiittarfimmut akiliutigitittagaanik’. Guutip inatsisaata misissoqqissaarnissaanik naalannissaanillu Jojadap kajumissaarutaa Joaship naalassimassavaa. Tamatuma kinguneranik naalaffiup suliarineqarnera naalaffimmilu atortut sananeqarnerat piaartumik naammassineqarput. — 2 Nalunaarsuutit 24:4, 6, 13, 14; 5 Mosesi 17:18.

8. (a) Joaship anersaakkut nakkaakkiartorneranut suna pissutaanerpaava? (b) Naalasseriinnerup Joashi qanoq iliuuseqartippaa?

8 Ajoraluartumik Joashi Jehovamut naalattuaannanngilaq. Sooq naalattuaannarsimannginnera Biibilimi oqaluttuarineqarpoq: „Jojadap toqunerata kingorna Judap naalagartaasa kunngi Joashi ornippaat pallorfigalugulu, kunngillu naalaarpai, taakkualu [Jehovap] siuaasamik Guutiata illua qimappaat napasullu Asheramut pigititat guutiliallu guutisiorfigilerpaat. [Jehovap] Judakkut Jerusalemimiullu kamaappai taamaaliornermikkut imminut pinerluuteqalersimammata.“ Aammattaaq Judap naalagartaasa sunniipilunneri pissutigalugit Guutip pruffiitii kunngip, ilaatigut Jojadap ernera Zakaria, sapiilluni Joaship inuiaallu naalasseriinnerat pillugit avoqqaarinnittoq, tusaajumanngilai. Joashi allamik isumataanngilaq, akerlianilli Zakaria ujaqqanik milloorneqartippaa toqullugu.  Joaship qanoq naakkittaatsigilersimanera naalasseriitsunngorsimatigineralu paasissaarpianngilaq — ajortunik peqateqartarnermik sunnertissimagami taamaappoq. — 2 Nalunaarsuutit 24:17-22; 1 Korinthimiut 15:33.

9. Naalasseriinneq sianiitsuliornerusoq Joashimik naalagartanillu oqaluttuami qanoq erseqqissarneqarpa?

Joaship ikinngutaasalu, naalagartat ajortut, Jehova tunummassuk qanoq pisoqarpa? Aramæerit ’sakkutuui ikittuinnaat’ Judamut isaapput „inuiannilu naalagartat tamaasa toqorarlugit“. Akeqqat kunngi pinngitsaalillugu kuultinik sølvinillu illernartuummeersunik arsaaginnarnagu aammattaaq pigisaanik arsaarpaat. Joashi annakkaluarluni nikallorsimaqalunilu napparsimavoq. Tamatuma kinguninnguatigut kiffaminit toqunneqarpoq. (2 Nalunaarsuutit 24:23-25; 2 Kunngit 12:18, 19) Tamanna Jehovap Israelimut oqaasiinut uppernarsaataavoq: „[Jehova] Guutit naalakkumanngikkukku peqqussutai inatsisaalu . . . tamaasa maleruaqqissaarnagit, taava perloqqussutit . . . ilinnut nalliutissapput anngutissallutillu.“ — 5 Mosesi 28:15.

Naalannerup allatsi annatsippaa

10, 11. (a) Jehovap Barukimut oqaaqqissaarutaata eqqarsaatiginissaa qanoq iluaqutigissavarput? (b)  Jehova Barukimut qanoq oqarpa?

10 Naapitatit ikittuinnaat nutaarsiassamik nuannersumik tusarusummata ilaannikkooriarlutit nikallortarpit? Pisoorsuit piisaarlutik inuusut ilaannikkut usorisarpigit? Taamaappat Jeremiap allattaanut Barukimut Jehovap asannittumik oqaaqqissaarinera eqqarsaatigisinnaavat.

11 Baruki pruffiitikkut oqariartuummik allaleruttortoq Jehovap immikkut ittumik saaffigaa. Sooq Jehova taamaaliorpa? Taamaaliorpoq Barukip inuunermini atukkani naammagittaalliutigilerlugit Guutimut kiffartuutiminit immikkut ittumit pitsaanerusorisaminik kissaateqalersimammat. Barukip isiginnittaasiata allanngornera Jehovap malugigamiuk erseqqissumik inussiarnersumillu oqaaqqissaarpaa: „Illit ujarpat angisooq. Taamaalioqinak! Uanga inuit tamaasa perlummik aallartitsivigissavakka . . . kisiannili illit inuuginnartissavakkit sumiikkaluaruilluunnit.“ — Jeremia 36:4; 45:5.

12. Silarsuarmi maani ’angisuumik ujarlissalluni’ sooq sianiitsuliornerua?

12 Jehovap Barukimut, Jeremia ilagalugu imminut aalajaalluni qunusuillunilu kiffartorsimasumut, isumassuingaarnera ersarissumik malunnannginnerpa? Aamma ullumi silarsuup neqeroorutaanut kajungerisaqartut Jehovap qamannga isumassorpai. Qatanngutit angutit anersaakkut piginnaaneqarluartut asannittumik oqaaqqissaarutaat ilarpassuisa qujanartumik nuannaarlutik ilassisarpaat, soorlu Baruki taamaaliorsimasoq. (Lukasi 15:4-7) Aap, silarsuarmi maani ’angisuumik ujarlissalluni’ siunissaqanngitsoq tamatta immikkut paasilluartariaqarparput. Ilumoortumik pilluarnissaraluaq annaaneqaannarneq ajorpoq. Ajornerusorli tassaavoq silarsuarmut matumunnga akuliuttut tamarmik, tassunga piumatussusianullu namminissarsiortumut ilanngullutik qanittumi peerutissammata. — Matthæusi 6:19, 20; 1 Johannesi 2:15-17.

13. Barukimik oqaluttuap maniguunneq pillugu qanoq ilinniartippaatigut?

13 Aammattaaq Barukimik oqaluttuap maniguunneq pillugu ilinniartippaatigut. Maluginiarnarpoq Jehovap toqqaannartumik oqaaqqissaanngimmagu, Jeremiali aqqutigalugu saaffigimmagu. Barukip Jeremiap sanngiissutai eqqumeeqqutaalu nalunngilluinnarsimassavai. (Jeremia 45:1, 2) Barukili pingaarniartuunngilaq; maniguulluni paasivaa ilitsersuut Jehovameersuusoq. (2 Nalunaarsuutit 26:3, 4, 16; Ussatit 18:12; 19:20) Uagut ’misiginngitsoorluta pinerlukkutta’ Guutillu oqaasia tunngavigalugu oqaaqqissaarneqarluta, taava Barukip inersimassusia, anersaakkut immikkoortitsisinnaassusia maniguunneralu ilaarniartigu. — Galâsiamiut 6:1.

14. Sooq ’siulersortivut naalattariaqarpavut’?

14 Maniguulluta oqaaqqissaaruk ilassigutsigu, aamma siunersortitsinnut ajunngitsuliussaagut. Hebræerit 13:17-imi ima allassimasoqarpoq: „Siulersortisi naalassigit peqqusaallu maleruarlugit, taakkuami tarnisi pigaappaat nalunnginnamikku taakku pillugit akisussaatitaajumaarlutik. Taamaaliorsinnaalit nuannaarlutik anersaarulunnatilli;  taamaanngippammi ilissi tamanna atugarliuutigissavarsi.“ Utoqqaanertat paarsisutut kiffartuutimik ilungersunartortaa taanna suliarissagaangamikku, sapiissuseqaqqullutik, ilisimasooqqullutik periaaserissaartuusinnaaqqullutillu Jehova ilungersorlutik qinnuigisarpaat. Tamatigut ’inuit taamaattut qujamasuutigisigit’. — 1 Korinthimiut 16:18.

15. (a) Jeremias Barukimut tatiginninnermik qanoq takutitsiva? (b) Barukip maniguulluni naalannera qanoq akilerneqarpa?

15 Tamatuma kinguninnguatigut Jeremiap Baruki ajornakusoorluinnartumik suliassimmagu, paasinarsivoq Baruki silatsorilersimasoq. Naalaffimmukariarluni eqqartuussinissamillu tusarliussaq Jeremiap imminut allatsissimasaa nipituumik atuassavaa. Baruki naalappa? Aap. „Pruffiitip Jeremiap peqqussutaa malilluinnarlugu iliorpoq“. (Jeremia 36:1-6, 8, 14, 15) Ukiut 18-it qaangiuttut illoqarfik Babyloniamiunit tigusarineqarmat, Barukip inuunini asattuunneqarmat qujamasuutigisimassaqaa. Qularnanngitsumik nuannaarutigisimassavaa Jehovap mianersoqqussutaa naalassimagamiuk ’angisuunillu ujarlerunnaarluni’. — Jeremia 39:1, 2, 11, 12; 43:6.

Juutit naalattut Jerusalemi uppitinneqarmat annapput

16. Babyloniamiut Jerusalemi ukiumi 607-imi u.n.s. ungusarimmassuk juutit illoqarfimmiittut Jehovap qanoq naakkinnittuliorfigai?

16 Jerusalemi 607-imi u.n.s. tigusarineqarmat Jehovap imminut naalattunut nallittuingaarnini erserseqqippaa. Jerusalemi uppititaanngitsiartoq juutinut ima oqarpoq: „Ilissi qinigassippassi inuunermut aqqummik toqumullu aqqummik. Illoqarfimmi matumani uniinnartoq panamit, kaannersuarmit nappaammillu toqoraataasumit toqussaaq. Kisianni illoqarfimmit anilluni Kaldæerinut ilissinnik ungusisimasunut tunniutiinnartoq inuussaaq, inuunini tiguakkatut pissavaa.“ (Jeremia 21:8, 9) Jerusalemimiut nungutitaasussaagaluarput tamanna pineqaatissarimmassuk Jehovalli imminut naalattut naakkinnittuliorfigai, allaat piffissaq kingullerpaat atorlugu. *

17. (a) Juutit ’Kaldæerinut ililiussimasut’ naalakkeramigit Jeremia sutigut marlutsigut naalannerminik misilinneqarpa? (b) Jeremiap maligassiuinera qanoq ilaarsinnaavarput sapiilluta Jehova naalallugu?

17 Juutit tunniutiinnaqqullugit naalakkernialeramigit Jeremiap naalannera aamma misilinneqarpoq. Akeqqat ajugaanerminnut ataqqinaat guutipilumminnut uumassuseqanngitsunut tunniuppagu, angutip Jehovap aqqanik taama ilungersuutiginnitsigisup aqqata mitaatigineqarnissaanik eqqarsaat maajugisimassaqaa. (Jeremia 50:2, 11; Upputit 2:16) Aammattaaq oqariartuutini pikitsitsinissamik kajumissaarinertut paatsoorneqarsinnaasup saqqummiunneratigut inuunini navianartorsiortippaa. Taamaaliunngitsuunngilarli. Jehovap oqariartuutai  naalalluni ingerlateqqippai. (Jeremia 38:4, 17, 18) Jeremia assigalugu oqariartuut nuannarineqanngitsoq oqaluussissutigaarput — Jiisusip nikagineqaatigisaminik oqariartuutigisimasaata assinga. (Esaja 53:3; Matthæusi 24:9) Taamaammat ’inunnik qunugisaqartariaqanngilagut’, Jeremiatulli qunusuilluta Jehova tatigilluinnarlugu naalattariaqarparput. — Ussatit 29:25.

Gog saassussippat naalannissaq

18. Jehovap kiffai qanoq naalannissamut misilinneqartarumaarpat?

18 Qanittukkut asseqanngilluinnartumik ’naalliunnartoqangaalerpat’ Saatanip silarsuaa ajortoq tamarmi suujunnaarsitaassaaq. (Matthæusi 24:21) Qularnanngitsumik naalliunnartoqangaarnerup nalaani siornatigullu Guutip kiffaasa uppernerat naalannerallu annertuumik misilinneqarumaarpoq. Biibilimi siulittuutigineqarpoq Saatani Gogi ’Magogimi nunaqartutut’ Jehovap kiffaanut saassusserujussuarumaartoq. Gogi sakkutoorpassuini nunamut „nuissatut majortutut“ assersuunneqartut ilagalugit saassussiartussaaq. (Ezekieli 38:2, 14-16) Guutip kiffai sakkoqanngitsut ikinneroqisullu Jehovap „suluisa ataanni” qimarnguiffissarsissapput, naalattullu sernissorumaarpai.

19, 20. (a) Immap Aappalaartup killingani Israelikkut Jehovamut naalannissaat sooq taama pingaaruteqartigaa? (b) Israelikkut Immap Aappalaartup killinganiinnerat pillugu oqaluttuaq qinunikkut eqqarsaatigissallugu qanoq uatsinnut iluaqutaassava?

19 Taanna Israelikkut Egyptenimit animmata pisimasumut assingussaaq. Jehovap Egypteni qulinik perlussiortereeramiuk innuttani aqqutikkut qaninnikkut nunamut neriorsuutaasumut ingerlatinngilai, Immalli Aappalaartup tungaanut ingerlappai, sakkutuut saassussiniartut qimaaffissaasinnaasunik ajornanngitsuararsuarmik asersuiffigisinnaasaannut. Sakkutuut isaanni isigalugu taamatut iliorneq ajorluinnartuugaluarpoq. Ilaasimagaluarutta Jehovap Mosesi aqqutigalugu oqaasii naalassimassagaluarnerpavut tatiginnillutalu Immap Aappalaartup tungaanut ingerlalluta, naak nalunngikkaluarlugu nuna neriorsuutaasoq killup tungaaniittoq? — 2 Mosesi 14:1-4.

20 Mosesimik allakkat aappaanni kapitali 14-ip nanginnerani takutinneqarpoq, Jehovap qanoq ililluni innuttani pissaanerminik takutitsinermigut mianernangaartukkut annaakkai. Oqaluttuat taamaattut atuartarnerisigut eqqarsaatigisarnerisigullu uppernerput nakussatsisinnaavarput. (2 Petrusi 2:9) Uppernerup sakkortuup Jehovamut naalannissatsinnut sapiissuseqalersissavaatigut, aamma inuit isiginnittaasiatigut sianiitsuliornertut isikkulimmik piumasaqaraangat. (Ussatit 3:5, 6) Taamaattumik immitsinnut aperisariaqarpugut: ’Eqiasuillunga qinusarnikkut, Biibilimik atuartarnikkut atuakkannillu eqqarsaatiginnittarnikkut uppernerma ineriartortinnissaa aalajangersimalluinnarlunga sulissutigaara? Akuttunngitsumik Guutip innuttai peqatigisarpakka?’ — Hebræerit 10:24, 25; 12:1-3.

Naalanneq neriuuteqalersitsivoq

21. Maannakkut siunissamilu pilluaqqussutit suut Jehovamut naalattut misigissavaat?

21 Inuit inuunerminni tamani Jehovamut naalattut maannangaaq Ussatit 1:33-p eqquunnera misigaat, tassanimi allassimavoq: „Uannut naalattoq aarlerinaatsumik najugaqassaaq eqqissillunilu inuussalluni perlussanik aarlerigisaqarnani.“ Ullormi Jehovap akiniaaffissaani naalattut oqaatsit taakku pissatsinnartut tatiginartuuneri  uppernarsisissavaat! Jiisusip ajoqersukkani ima allaat oqarfigai: „Tamakkulu pilerpata nikuigitsi niaqqusilu massitsillugit aniguisitaanissarsimi qanillimmat.“ (Lukasi 21:28) Paasinarpoq Guutimut naalattut kisimik kajumissaarummik taassuminnga malinninnissamut pisariaqartumik tatiginnittuusussaasut. — Matthæusi 7:21.

22. (a) Suna pissutigalugu Jehovap innuttai tatiginnissinnaappat? (b) Allaaserisami tulliuttumi suna sammineqassava?

22 Tatiginnilersitsisoq alla tassaavoq ’Guuti Jehova qanoq iliortarinngimmat pilersaarutini kiffaminut pruffiitinut saqqummerseqqaartinnagit’. (Amosi 3:7) Nalitsinni Jehovap pruffiitit isumassarsitinneq ajorpai, kisianni ’kiffaqatigiit’ aalajaatsut naalakkersimavai inoqutiminik piffissaq eqqorlugu anersaakkut nerisitsisaqqullugit. (Matthæusi 24:45-47) Taamaattumik ’kiffaqatigiinnut’ naalannissarput pingaartorujussuuvoq. Soorlu allaaserisami tulliuttumi ersersinneqarumaartoq naalanneq taanna ’kiffaqatigiit’ naalagaannut, Jiisusimut qanoq isiginnittaaseqarnersugut takutitsisuuvoq. ’Taanna inuiaat naalassavaat’. — 1 Mosesi 49:10.  (wE 10/01 02)

[Quppernerup ataani ilanngussat]

^ imm. 1 Marloraat nujuartutut oqaatigineqarajuttarput, kisianni „marloraap piaqqani innarliiniartunut illersorniarlugit toqussi tikillugu akiuuttartoq,“ uumasunik illersuiniaqatigiit saqqummersitaanni oqaatigineqarpoq.

^ imm. 16 Jeremia 38:19-mi oqaatigineqarpoq juutit ilaat ’Kaldæerinut ililiussimasut’ annallutillu, nunaminniilli aallarussaanngitsuunngillat. Oqaatigineqanngilaq Jeremiamit kajumissaarneqarlutik tunniutiinnarsimanersut; annammatali pruffiitip oqaasii uppernarsarneqarput.

Eqqaamavigit?

• Israelip naalasseriittuujuarnera qanoq kinguneqarpa?

• Qanoq kunngi Joashi avatangiisiminik sunnerneqarpa, meeraanermini kingusinnerusukkullu?

• Barukip maligassiaata qanoq ilinniartippaatigut?

• Sooq Jehovap kiffai naalattut silarsuup matuma nungutitaangajalernerani ersissutissaqanngillat?

[Atuaqqissaarnermi apeqqutit]

[Qupp. 11-mi assiliartaq]

Jojada siunnersuisoralugu Joaship Jehova naalappaa

[Qupp. 13-mi assiliartaq]

Peqatigisartakkaminik ajortunik sunnerneqarluni Joaship Guutip pruffiitia toqutsippaa

[Qupp. 14-mi assiliartaq]

Jehova naalassimassagaluarpiuk, annaassisinnaaneralu mianernangaartoq misigalugu?