Imarisai

Imarisai

„Tamatigut assersuutit atorlugit oqaluffigisarpai“

„Tamatigut assersuutit atorlugit oqaluffigisarpai“

 „Tamatigut assersuutit atorlugit oqaluffigisarpai“

„Tamakku tamaasa assersuutitigut Jiisusip inunnut oqaatigai, tamatigullu assersuutit atorlugit oqaluffigisarpai.“ — MATTHÆUSI 13:34.

1, 2. (a) Assersuusiaalluartut sooq eqqaamajuminartarpat? (b) Qanoq ittunik Jiisusi assersuuteqartarpa, tamatumunngalu atatillugu suut apeqqutaalerpat? (Aamma takuuk quppernerup ataani ilanngussaq.)

ASSERSUUSIAQ ukiorpassuit matuma siorna tusakkat eqqaamaviuk, immaqa oqalugiaammi tusarsimasat? Assersuusiat sunniuteqarluartut imaaliallaannaq puigorneqarneq ajorput. Atuakkiortut ilaat allassimavoq assersuusiat „tusakkat assilianngortittaraat tusarnaartullu assilissat atorlugit eqqarsalersittaraat”. Assilissat atorlugit amerlanertigut paasinnilluarnerusaratta, assersuusiat oqariartaatsit paasiuminarninngortissavaat. Assersuusiat oqaatsit uummaarinnerulersittarpaat eqqaamajuminarnerulersillugillu.

2 Nunarsuarmi ajoqersuisoqarsimanngilaq Jiisusi Kristusitut assersuusiullaqqitsigisumik. Ukiut 2000-ingajaat qaangiukkaluartut Jiisusip assersuusiarpassui eqqaamajuminarput. * Sooq ilinniartitseriaaseq taanna Jiisusip atorajuppaa? Aamma sooruna assersuusiai immikkut illuinnartuusut?

Sooq Jiisusi assersuusiat atorlugit ilinniartitsisartoq

3. (a) Matthæusi 13:34, 35 naapertorlugu Jiisusip assersuutinik atuineranut pissutaasut suna ilagaat? (b) Suup takutippaa ilinniartitseriaaseq taamaattoq Jehovap pingaartingaaraa?

3 Jiisusip assersuusianik atuisarneranut pissutaasut pingaaruteqartut marluk Biibilimi taaneqarput. Siullermik taamaaliornermigut siulittuut eqquutitippaa. Apustili Matthæusi allappoq: „Tamakku tamaasa assersuutitigut Jiisusip inunnut oqaatigai, tamatigullu assersuutit atorlugit oqaluffigisarpai eqquuteqqullugu pruffiitikkut oqaaserisaq imaattoq: ’Qanera ammarniarpara assersuutitigut oqalullunga.’“ (Matthæusi 13:34, 35) ’Pruffiiti’ Matthæusip issuagaa Tussiaat 78:2-mik allattuuvoq. Jiisusip inunngornera ukiunik hundredelinnik arlalinnik sioqqullugu tussiaasiortoq Guutip anersaavanit isumassarsisinneqarluni allappoq. Ernermi assersuutit atorlugit ilinniartitsinissaa Jehovap ukiut hundredellit arlallit sioqqullugit paasissutissiissutigisimammagu maluginiarnartuunnginnerpa? Qularutissaanngilaq Jehovap ilinniartitseriaaseq taanna pingaartingaaraa!

4. Assersuusianik atuisarnini Jiisusip qanoq nassuiarpaa?

4 Aappaattut Jiisusi nammineq oqarpoq assersuusiat atortarlugit inuit killitassaanngitsumik uummatillit immikkoortinniarlugit. Naatsiiassanik siaruarterisumik ’inuppassuarnut’ assersuuteqareermat ajoqersugaasa aperaat: „Sooq inuit assersuutitigut oqaluffigaagit?“ Jiisusi akivoq: „Ilissi tunineqarpusi Qilaap Naalagaaffiata anngigisai ilisimasinnaassallugit, taakkuli taama pineqanngillat. Taamaattumik assersuutitigut oqaluffigaakka, isigigaluarlutimmi takunninngimmata, tusaagaluarlutillu tusanngimmata paasisaqarnatillu. Taakkununnga eqquuppoq Esajap siulittuutigisaa imaattoq: Tusaasaqartuassaasi, kisianni siunersisaqarnasi, isigisaqartuassaasi, kisianni paasisaqarnasi. Inuiaammi taakkua uummataat orsumik qallersimapput.“ — Matthæusi 13:2, 10, 11, 13-15; Esaja 6:9, 10.

5. Tusarnaartut maniguuttut pingaarniartunit Jiisusip assersuusiaanit qanoq immikkoortinneqarpat?

5 Inuit immikkoortut marluk Jiisusip assersuusiaanit qanoq immikkoortinneqartarpat? Oqaasii tamakkiisumik paasiumallugit Jiisusip tusarnaartui ilaannikkut immikkut iliuuseqartariaqartarput. Maniguuttut paasissutissanik amerlanerusunik  qinnuiginissaanut kajuminnerulertarput. (Matthæusi 13:36; Markusi 4:34) Taamaatut Jiisusip assersuusiaasa sallusuissummik ujarlertumik uummatilinnut sallusuissut saqqummersittarpaat, pingaarniartumik uummatilinnut isertuutiitigalugu. Aap, Jiisusi ilinniartitsisuuvoq nalissaqanngitsoq! Assersuusiaasa taama sunniuteqartigisarnerinut pissutaasut ilaat qimerluulaariartigik.

Annikitsualuit toqqakkat

6-8. (a) Ukiuni hundredelinni siullerni Jiisusip tusarnaartaasa suna suli iluaqutigisinnaanngilaat? (b) Assersuutit suut takutippaat Jiisusi annikitsualunnik eqqaasassaminik peqqissaarluni toqqaasartoq?

6 Jiisusip ilinniartitsineranut tusarnaarneq qanoq issimanersoq eqqarsaatiginikuuiuk? Jiisusimut tusarnaarneq ajoqersukkanut misinnangaaraluartoq, taakku allassimasunik quppigassaqanngillat oqaasiinik eqqaasitsisinnaasunik. Jiisusilli oqaasii isummaminnut uummamminnullu toqquinnartariaqartarpaat. Assersuusianik atuillaqqilluni ilinniartitsinini taakkununnga eqqaamajuminarnerulersippaa. Qanoq?

7 Annikitsualunnik eqqaaniakkaminik peqqissaarluni toqqaasarpoq. Paasissutissat aalajangersimasut oqaluttuamut pingaaruteqaraangata imaluunniit arlaannik erseqqissaateqarnissaq pisariaqaraangat peqqissaarluni eqqaasarpai. Assersuutigalugu oqaluttuaraa savat qasserpiaat qimataanersut piginnittup sava ataaseq tammarsimasoq ujariartormagu, nalunaaquttap-akunneri qasserpiaat viinnequteqarfimmi sulinermut atorneqarnersut aamma talentit qasserpiaat kiffanut paarisassanngortitaanersut. — Matthæusi 18:12-14; 20:1-16; 25:14-30.

8 Taamaalilluni pingaaruteqanngitsunik, assersuusiat isumaannik paasinninnissamut puussaarutaasinnaasunik, ilanngussisanngilaq. Assersuutigalugu kiffamik naakkittaatsumik assersuusiami nassuiarneqanngilaq kiffaq denarinik 60.000.000-inik qanoq ililluni akiitsoqalersimanersoq. Isumakkeerfiginninnissap pisariaqartuunera Jiisusip assersuusiami erseqqissarpaa. Pingaartinneqartoq tassaanngilaq kiffaq qanoq akiitsoqalersimanersoq tassaallunili akiitsorpassuisa isumakkeerfigineqarnerat, qanorlu kiffaqatiminik amerlagisassaanngitsunik imminut akiitsulimmut pinninnera. (Matthæusi 18:23-35) Ernermik tammaraluartumik assersuusiamini Jiisusip eqqaanngilaattaaq sooq ernerup nukarliup kingornussassani taama tassanngaannartigisumik tigujumanerai, aamma sooq nungulussinnarnerai. Jiisusilli sukumiisumik nassuiarpaa angutaa qanoq misiginersoq, erninilu allamik isumataarluni utermat qanoq qisuariarnersoq. Annikitsualuit taamaattut pingaaruteqarput ataataasup qisuariarneranut atatillugu Jiisusip erseqqissarniagaanut, tassa Jehovap ’isumakkeerfiginnittuartarneranut’. — Esaja 55:7; Lukasi 15:11-32.

9, 10. (a) Jiisusip assersuusiamini inuttarititani oqaluttuarigaangamigit suna pingaartinnerusarpaa? (b) Jiisusip assersuusiani tusarnaartiminut allanullu qanoq eqqaamajuminarsartarpai?

 9 Assersuusiamini inuttarititani oqaluttuarigaangamigit Jiisusi aamma isumatusaartarpoq. Inuttarititami isikkui oqaluttuarinagit qanoq iliornerat, pissutsinilu pineqartuni qanoq qisuariartarnerat Jiisusip pingaartinnerugajuppai. Assersuutigalugu Samariamiumik naakkinnittumik assersuusiami Samariamiup isikkuanik ilisimatinnata pingaarnerungaartoq Jiisusip erseqqissarpaa — tassa Samariamiu qanoq misiginneqataanersoq juutilu ikilerneqarsimasoq aqqusinermi nalasoq ikioraa. Aamma naggueqatiginngisavut inuiaqatiginngisavullu ilanngullugit tullermut asannittariaqarnerup erseqqissisinnissaanut annikitsualuit pisariaqartut Jiisusip oqaluttuarisarpai. — Lukasi 10:29, 33-37.

10 Jiisusip annikitsualunnik eqqarsaatigilluakkanik atuisarnera assersuusiaanik naatsuutitsillunilu eqqorluartuutitsivoq. Taamaattumik assersuusiat taakkunanngalu ilinniutissat naleqangaartut — Jiisusip ukiuni hundredelinni siullerni tusarnaartaanut inuppassuarnullu allanut kingusinnerusukkut iivangiiliunik isumassarsiarititaasunik atuartussanut — eqqaamajuminartuupput.

Assersuusiat ulluinnarni pisimasuneersut

11. Galilæami peroriartornermini Jiisusip ilisimasimassagunagai assersuusiaani qanoq ersertarnersut oqaluttuarikkit.

11 Inuunermi ulluinnarni pisimasuneersunik Jiisusi assersuusiullaqqippoq. Qularnanngitsumik Galilæami peroriartornermini malugisarpassuami ilai assersuusiarisarpai. Meeraanermini Jiisusip anaanani seernarsaatilimmik iffiortoq, kingullermik iffiorami immikkoortissimasaminik pullassaaserlugu naqittaasoq, akuttunngitsumik takusarsimassavaa. (Matthæusi 13:33) Aammattaaq aalisartut Galilæap tasersuanut tungutsorimmut qassusertut arlalippassuariarluni isiginnaartarsimassannginnerpai? (Matthæusi 13:47) Qularnanngitsumik meeqqat niueriartortarfimmi pinnguartut takusarsimassavai. (Matthæusi 11:16) Erseqqippoq Jiisusip ulluinnarni pisartut maluginiartarai assersuusiaminilu atortarlugit — naatsiiassat siaruarterneqartut, katittorsiornerit nuannersut, narsaatini qajuusassat seqinermit ineritikkiartorneqartut. — Matthæusi 13:3-8; 25:1-12; Markusi 4:26-29.

12, 13. Jiisusip naatsiaassanik naasupilunnillu assersuusiaa pissutsinik atuuttunik ilisimasaqarluarneranik qanoq takutitsiva?

12 Taamaattumik tupinnanngilaq pissutsit inuit ulluinnarni inuuneranneersut Jiisusip assersuusiarpassuini atorneqartarmata. Ilinniartitseriaatsimik taassuminnga Jiisusi qanoq atuillaqqitsigisoq tamakkiisumik paasissagaanni pitsaassaaq eqqarsaatigissallugu oqaasii juutinut tusarnaartuinut qanoq isumaqarnersut. Assersuutit marluk misissoriartigik.

13 Naatsiiassanik naasupilunnillu assersuusiamini angut narsaatimini naatsiiassarissunik siaruarterisoq Jiisusip oqaluttuaraa, ’qinngarsuisorli’  narsaammi naasupilunnik ikkussuivoq. Sooq Jiisusip taannarpiaq assersuusiaraa? Assersuusiaq Galilæap Tasersuata eqqannguani oqaluttuaraa, Galilæamiullu amerlanersaat nunalerinermut tungasunik suliaqarput. Qinngarsuisup isertorluni narsaammi naasupilunnik ikkussuineranit suna nunalerisumut ajoqusiisinnaanerunerpa? Inatsisit Jiisusip nalaaneersut takutippaat ilumut taamaattoqartarsimasoq. Tusarnaartimi paasiuminartinnerusaat Jiisusip assersuusiarigaa ersarinnginnerpa? — Matthæusi 13:1, 2, 24-30.

14. Jiisusip Samariamiumik naakkinnittumik assersuusiamini ’Jerusalemimit Jerikomut’ aqqutaa eqqaammagu sooq maluginiarnartuua?

14 Samariamiumik naakkinnittumik assersuusiaq ilisimaneqarluartuuvoq. Jiisusi ima aallartippoq: „Angut Jerusalemimit Jerikomukartoq piiaasut tigusaraat. Atisaajarpaat persuttarlugulu, toqungajattorlu qimaannarlugu ingerlaqqipput.“ (Lukasi 10:30) Soqutiginarpoq Jiisusip pingaartitani ersersinniarlugu ‘Jerusalemimit Jerikomut’ aqqutaa taammagu. Jiisusi taamatut assersuusiorami Jerusalemip ungasinngisaani Judæamiippoq. Taamaattumik tusarnaartuisa aqqusineq eqqaasaa ilisimassannguatsiarpaat. Aqqusineq taanna ulorianartuusoq ilisimaneqarluarpoq, ingammik kisimiillutik angalasunut. Inoqajuitsukkut aqqutaavoq sangujoraartoq, ujajaasunut qamaffissarpassualik.

15. Samariamiumik naakkinnittumik assersuusiami palasip Levikkuusullu iliuuseqanngitsoornerat sooq illersorneqarsinnaanngila?

15 Allamittaaq maluginiarnartoqarpoq. Angutit ’Jerusalemimit Jerikomukartut’ Jiisusip eqqaavai. Siullermik palasi saneqquppoq, tulliulluni Levikkuusoq, arlaannaataluunniilli unilluni ikilerneqarsimasoq ikiunngilaa. (Lukasi 10:31, 32) Palasit naalaffimmi Jerusalemimiittumi kiffartorput, Levikkuusullu taakkununnga ikiuuttarput. Palasit Levikkullu ilarpassui naalaffimmi sulinngikkaangamik Jerikomi najugaqartarput, Jerikomi Jerusalemimiit kilometerinik 23-innarnik ungasitsigisumiippoq. Taamaattumik taannarpiaq aqqutigisimassagaat ilimanarpoq. Malugiuttaaq palasi Levikkuusorlu „Jerusalemimit” ammukartut, taamaalillutillu naalaffimmeersut. * Taamaammat angutit ikiuinngitsoornerat illersorneqarsinnaanngilaq ima oqarluni: ’Angut ikilerneqarsimasoq qanillinaveersaarpaat toqungarpasimmat, toqungasorlu attorunikku piffissami aalajangersimasumi naalaffimmi kiffartorsinnaajunnaassapput.’ (3 Mosesi 21:1; 4 Mosesi 19:11, 16) Erseqqippoq pissutsit tusarnaartuisa ilisimasaqarfigisaat Jiisusip assersuusiaani oqaluttuarineqartut.

Assersuusiat pinngortitarsuarmeersut

16. Sooq tupinnanngila Jiisusi pinngortitarsuarmik ilisimasaqarluarmat?

16 Jiisusip naasunik, uumasunik silallu pissusiinik ilisimasaqarnera assersuusiarpassuisa takutippaat. (Matthæusi 6:26, 28-30; 16:2, 3) Taakku sumit ilisimalersimavai? Qularnanngitsumik Galilæami peroriartortilluni Jehovap pinngortitaasa qimerloornissaannut periarfissaqarluarsimavoq. Aammattaaq Jiisusi ’pinngortitat tamarmik erniusut siullersaraat’, aamma Jehovap suut tamaasa pinngortikkamigit ’suliortoraa’. (Kolossemiut 1:15, 16; ússatit 8:30, 31) Taamaattumik tupinnanngilaq Jiisusip pinngortitarsuaq ilisimasaqarfigilluarmagu. Ilisimasani taakku ilinniartitsinermini qanoq atortarpai?

17, 18. (a) Johannesi kapitali 10-mi allassimasut qanoq takutippaat Jiisusip savat iliuuserisartagaat nalunngikkai? (b) Savanut paarsisuinullu tunngatillugu nunanut Biibilimi eqqartorneqartunut tikeraarsimasut suna malugisimavaat?

17 Jiisusip assersuusiaa killitsinnarnerpaaq Johannesi kapitali 10-mi oqaluttuarineqarpoq. Tassani Jiisusip ajoqersukkaminut qanittumik attaveqarnini savanik paarsisut savallu akornanni pissutsinut assersuuppaa. Savat siulersoruminarlutik paarsisuminnik aalajaallutik malinnittut assersuusiarigamigit Jiisusip takutippaa savat nujuitsut qanoq iliuuseqartartut nalunngilluarlugu. (Johannesi 10:2-4) Savanik paarsisut savallu akornanni qanittumik attaveqarneq nunanut Biibilimi taaneqartunut tikeraarsimasut malugisimavaat. 1800-kkunni pinngortitamik misissueqqissaartartoq H. B. Tristram allappoq: „Taamaallunga savanik paarsisoq savaatiminik pinnguaqateqartoq isiginnaarpara. Qimaaniartuusaalermat savat malinnipput ungullugulu. . . . Naggataatigut savat tamarmik iloqqasunngorlutik ungoriarlugu saniani pissittaqattaalerput.“

 18 Sooq savat paarsisortik malittarpaat? „Nipaa nalunnginnamikku,“ Jiisusi oqarpoq. (Johannesi 10:4) Savalli paarsisumik nipaa ilumut ilisarisarpaat? George A. Smithip atuakkiamini The Historical Geography of the Holy Land-imi misigisartakkani oqaluttuarai: „Ilaannikkooriarluta ullup-qeqqanut qasuersaartarpugut imeqarfiit eqqaanni savanik paarsisut pingasut sisamalluunniit savaatitik ilagalugit ornittagaanni. Savaatit imminnut akuleruttarput, eqqarsaatigisarparpullu savanik paarsisut qanoq ilillutik savaatitik immikkoorteqqissinnaaneraat. Savalli imereeraangata pinnguareeraangatalu savanik paarsisut ataasiakkaarlutik sammivinnut assigiinngitsunut qooqqumiit qummukartarput, tamarmillu immikkut nipeqarlutik suaartarput. Savat savarpassuit qimallugit paarsisumik tungaanukaasarput, savallu tikiunnermisulli uivinngitsigalutik qimaguttarput.“ Jiisusip ersersinniakkani pitsaanerusumik assersuusiarisinnaanngilaa. Ilinniartitsissutaa akueralugulu naalakkutsigu siulersuineralu malillugu ’savanik paarsisup ajunngitsup’ asannittumik qajassuussisumillu isumassuinera iluaqutigisinnaavarput. — Johannesi 10:11.

Pisimasunit inuit nalunngisaannit assersuusiat

19. Pisimasuiup innersuussutigineratigut ajoqersuut eqqunngitsoq Jiisusip qanoq akerlilerpaa?

19 Assersuusiat eqqarsaatissiisut misigisimasanik imaluunniit assersuusianik ilinniutaasinnaasunik ilaqarsinnaapput. Ajunaarnersuarnit eqqorneqartariaqartut eqqorneqartarnerat pillugu eqqunngitsumik isiginnittaaseqarneq akerlilerniarlugu Jiisusi ilaanni pisimasuvimmut innersuussivoq. Oqarpoq: „Isumaqarpisiluunniit taakku 18-it napasuliap Siloamiittup uppiffigalugit toqutai Jerusalemimiunit allanit tamanit pisuutitassaanerusut [ajortuliorsimanerusut]?“ (Lukasi 13:4) Pisut siumut aalajangeriigaanerannik eqqarsartaaseq Jiisusip pillaqqilluni eqqunngitsuunerarpaa. Guutip kamaatigisaanik ajortuliorneq inuit 18-it taakkua toqqutiginngilaat. Naamik, toqunerannut pissutaasoq tassaavoq piffissaq nalaatsornerlu. (Oqaluussisartup oqaasii 9:11, NV) Pisimasuik tusarnaartumi ilisimasaat innersuussutigalugu Jiisusip eqqunngitsumik ajoqersuut akerlilerpaa.

20, 21. (a) Sooq farisæerit Jiisusip ajoqersugai avoqqaaraat? (b) Sabbati pillugu inatsisit sukannersumik atuutsinneqarnissaat Jehovap kissaatiginngikkaa takutinniarlugu pisimasoq Biibilimeersoq suna Jiisusip atorpaa? (c) Allaaserisami tulliuttumi suna sammissavarput?

20 Jiisusip pisimasut Biibilimeersut ilinniartitsinermini aamma atortarpai. Ilaatigut taamaaliorpoq ajoqersukkami sabbatimi karrinik nutsuillutik nerinerat farisæerit avoqqaarimmassuk. Ajoqersukkat taamaaliornermikkut Guutip inatsisai unioqqutinngilaat, sabbatimili suna suliareqqusaannginnersoq pillugu farisæerit sukannersumik inatsinik nassuiaanerat naapertorlugu unioqqutitsipput. Sabbati pillugu inatsisit taamatut sukannersumik paasineqarnissaat Guutip siunertarisimanngisaannaraa assersuusiornikkut oqaluttuariniarlugu pisimasoq Samuelimik allakkat siulliit 21:4-7-imiittoq Jiisusip innersuussutigaa. Ilaanni Daavi angutitanilu perlilileramik tupiusaliap eqqaanut unillatsiarput timiusallu saqqumisitat pisoqqat timiusanik nutaanik taarserneqarsimasut nerivaat. Timiusat taakku palasit kisimik nerisinnaagaluarpaat. Pissutsilli immikkut ittut pissutigalugit Daavi angutitaasalu taakkuninnga nerinerat avoqqaarineqanngilaq. Soqutiginarpoq timiusat pisoqqat palaseqatigiinnut ilaanngitsunit nerineqarnerat pillugu Biibilimi eqqaaneqartutuaammat. Oqaluttuaq sorlerpiaq atussanerlugu Jiisusip nalunngilaa, tusarnaartuisalu juutiusut qularnanngitsumik oqaluttuaq taanna ilisimasimassavaat. — Matthæusi 12:1-8.

21 Ilumut, Jiisusi ajoqersuisorsuuvoq! Tusarnaartumi uummataannik killiisumik sallusuissutinik pingaarutilinnik ingerlatitsillaqqinnera tupigusuutiginngitsuugassaanngilaq. Ilinniartitseriaasia qanoq uagut ilaarsinnaavarput? Tamanna allaaserisami tulliuttumi sammissavarput.

[Quppernerup ataani ilanngussat]

^ imm. 2 Jiisusi assigiinngitsunik assersuusioriaaseqarpoq, ilaatigut assersuutit, naleqqiussinerit assilissallu atorlugit. Ingammik assersuusianik atuisartutut ilisimaneqarpoq. Assersuusiat tassaanerarneqarput „naleqqiussinerit, oqalualaat naatsut, amerlanertigut piviusuunngitsut, ileqqussatigut anersaakkulluunniit ilumoortumik ersersitsisut”.

^ imm. 15 Jerusalemi Jerikomiit qaffasinnerusumiippoq. Taamaattumik angalasoq „Jerusalemimit Jerikomukartoq“ assersuusiami oqaatigineqartutut aqqusinikkut ammukarpoq. (Ny Verden-nutsigaq naapertorlugu)

Eqqaamavigit?

• Sooq Jiisusi assersuusiat atorlugit ilinniartitsisarpa?

• Jiisusip assersuusiani inuunermi ulluinarni pisimasuninngaanneersuutittarai assersuutip suup takutippaa?

• Jiisusip pinngortitarsuaq pillugu ilisimasani assersuusiamini qanoq atortarpai?

• Pisimasut tusarnaartumi ilisimasaat Jiisusip qanoq innersuussutigisarpai?

[Atuaqqissaarnermi apeqqutit]

[Qupp. 9-mi assiliartaq]

Kiffaq amerlagisassaanngitsunik akiitsulimmik isumakkeerfiginnikkumanngitsoq pillugu aamma ataataasoq ernerminik kingornussaminik nungulussinnaasumik isumakkeerfiginnittoq pillugu Jiisusi oqaluttuarpoq

[Qupp. 10-mi assiliartaq]

Samariamiu naakkinnittoq pillugu oqaluttuami suna pingaartillugu ersersinniarneqarpa?