Imarisai

Imarisai

Ajoqersuisorsuaq ilaaruk

Ajoqersuisorsuaq ilaaruk

 Ajoqersuisorsuaq ilaaruk

„Taamaattumik aallaritsi inunnillu inuiannit tamaneersunik ajoqersuganngortitsigitsi . . . ajoqersorsigillu ilissinnut peqqussutikka tamaasa maleruaqqullugit.“ — MATTHÆUSI 28:19, 20, NV.

1, 2. (a) Pissutsini qanoq ittuni ilinniartitsisuuvugut? (b) Kristumiut ilumoortut ilinniartitsinermut tunngatillugu sumik immikkut akisussaaffeqarpat?

ILINNIARTITSISUUIT? Tamatta arlaatigut taamaappugut. Tammartajaartoq ikioraangakku, suleqatit suliassaminik naammassinninnissaanik takutikkaangakku, nukappiaraararluunniit kamippaminik qilersinissaannik nassuiaakkaangakku, ilinniartitsisarputit. Nuanneqaaq allat ikiorsinnaallugit ilinniartissinnaallugillu.

2 Ilinniartitsinermut tunngatillugu kristumiut immikkut akisussaaffeqarput, peqquneqaratta inunnik ajoqersuganngortitseqqulluta Jiisusillu peqqussutaanik tamanik maleruaanissaannik ilinniartitseqqulluta. (Matthæusi 28:19, 20) Ilagiinni ilinniartitsinissatsinnut aamma periarfissaqarpugut. Angutit piukkunnaateqartut ilagiit ineriartoqqullugit ’paarsisutut ajoqersuisutullu’ kiffartortussatut toqqarneqartarput. (Efesosimiut 4:11-13) Arnat inersimalluartut arnanik inuusunnerusunik ikiuisinnaaniassagamik ulluinnarni kristumiutut inuunerminni „ajunngitsuliornermik ajoqersuussisuussapput“. (Titusi 2:3-5) Tamatta uppeqatitsinnik qiimmassaanissatsinnut kajumissaarneqarpugut, Biibililu ineriartornartumik atorutsigu taamaaliorsinnaavugut. (1 Thessalonikamiut 5:11) Aap, Guutip oqaasianik allanut ilinniartitsisinnaaneq anersaakkullu pingaarutilinnik iluaqutigiuaannarsinnaasaannik avitseqatiginnissinnaaneq immikkut pisinnaatitaafferujussuuvoq.

3. Qanoq ilinniartitsilluarnerulersinnaavugut?

3 Qanoq ilinniartitsilluarnerulersinnaavugut? Pingaarnerpaamik Ajoqersuisorsuup Jiisusip ilaarneratigut. Immaqa ilaat eqqarsassapput: ’Qanormi ililluta Jiisusi ilaarsinnaagatsigu, naammalluinnartuuvormi.’ Soorunami ilinniartitsisunngorsinnaanngilagut naammalluinnartut. Taamaattoq, qanorluunniit piginnaaneqartigigaluarutta, Jiisusip ilinniartitseriaasia sapinngisatsinnik ilaarniarsinnaavarput. Ilinniartitseriaasii sisamat qanoq atorsinnaanerlugit takoriartigu — paasiuminarsaaneq, apeqqutinik atorluaaneq, paasiuminartunik eqqarsaatissiineq naleqquttunillu assersuusiorneq.

Paasiuminartuliorit

4, 5. (a) Sallusuissut Biibilimeersoq sooq paasiuminartuua? (b) Paasiuminartumik ilinniartitsisinnaassagutta sooq oqaatsinik atuinerput eqqumaffigisariaqarparput?

Sallusuissutit tunngaviunerusut Guutip oqaasianiittut paasiuminaatsuunngillat. Qinnummini Jiisusi oqarpoq: „Unnersiutigaakkit Ataataq, . . . ilisimasunut sianisuunullu tamanna isertorakku saqqummersilluguli meerannguanut.“ (Matthæusi 11:25) Jehovap uummatimikkut ilumoorusuttunut maniguuttunullu siunertani qulaareerpaa. (1 Korinthimiut 1:26-28) Tassa sallusuissutip Biibilimeersup paasiuminassuseq ilisarnaatigaa.

5 Biibilimik atuaqqissaaqateqartillutit soqutiginnittunut pulaaqqiitillutilluunniit qanoq paasiuminartumik ilinniartitsisinnaavit? Ajoqersuisorsuarmimmi suna ilikkarparput? Tusarnaartini, ilarpassuit „inuinnaasut immikkut  ilinniagaqarsimanngitsut,“ soqutiginnilersinniarlugit Jiisusip oqaatsit ulluinnarsiutaasut paasisinnaasaat atortarpai. (Apustilit Suliaat 4:13) Taamaattumik oqaatsinik atuinitta eqqumaffiginiarnissaa pingaaruteqarpoq. Sallusuissut Guutip oqaasianeersoq uppernarnerulersinniarlugu oqaatsit oqaaseqatigiilluunniit pingaarniarpaluttut atortariaqanngilavut. „Oqalloringaarneq“ taamaattoq allanut, ingammik inunnut ilinniagaqarluarsimanngitsunut, qunulersitsisinnaavoq. (1 Korinthimiut 2:1, 2) Jiisusip maligassiaata takutippaa oqaatsinik paasiuminartunik qinerluakkanillu sallusuissut sunniuteqarluartumik saqqummiunneqarsinnaasoq.

6. Ilinniartitatsinnut qanoq paasissutissiivallaarnaveersaarsinnaavugut?

6 Ilinniartitsinerput paasiuminartuussappat atuaqqissaaqatitta paasissutissanik amerlavallaartunik inornartunik tuninnginnissaa mianersuutigisariaqarparput. Jiisusip ajoqersukkami pisinnaasaasa killeqarnerat eqqumaffigisimavaa. (Johannesi 16:12) Uaguttaaq ilinniartitatta pisinnaasaat eqqarsaatigisariaqarpavut. Assersuutigalugu atuagaq Ilisarsineq inuunermut naassaanngitsumut sammisoq atorlugu atuaqqissaaqateqaraangatta sunnguit tamaasa nassuiaatigisariaqanngilavut. * Paasissutissat aamma tuaviupiluutigisariaqanngilavut soorlu pisassap aalajangersimasup sammipallannissaa pingaarnerutillugu. Pitsaanerussaaq ilinniartup pisariaqartitai pisinnaasaalu qanoq sukkatigisumik ingerlanissamut aalajangiisuutikkaanni. Ilinniartup Jiisusimut ajoqersuganngornissaa Jehovamullu pallorfiginnilernissaa anguniagaraarput. Soqutiginnittoq ilinniakkaminik paasisaqarluartinniarlugu pisariaqartumik piffissaqarfigisariaqarparput. Taamaalilluni imaassinnaavoq sallusuissut uummammiorileraa ajunngitsumillu qisuariartillugu. — Romamiut 12:2.

7. Ilagiinni saqqummiussassaqartilluta siunnersuutit suut paasiuminartumik ilinniartitsinissatsinnut iluaqutaasinnaappat?

7 Ilagiinni saqqummiussassaqartilluta nutaat najuutsillugit qanoq ‘erseqqissumik oqalussinnaavugut’? (1 Korinthimiut 14:9) Siunnersuutit pingasut tulliuttut iluaqutaasinnaapput. Siullermik oqaatsit oqaaseqatigiilluunniit ilisimaneqarluanngitsut atortariaqakkatit nassuiakkit. Guutip oqaasianik paasinninnitta oqaatsinik nalinginnaanngitsunik paasinnilersippaatigut. Oqariartaatsit soorlu „inussiaq ilumoorlunilu silatooq”, ‘savat allat’ imaluunniit „Babylonersuaq“ atorutsigit, paasiuminartumik nassuiartariaqarpavut, suna pineqarnersoq naluneqannginniassammat. Aappassaanik oqaaseqarpallaarnaveersaartariaqarpugut. Oqaaseqarpallaarutta sunnguillu tamaviisa nassuiarniarutsigit tusarnaartivut soqutiginnikkunnaarsiinnarsinnaavavut. Oqaatsit oqariartaatsillu pisariaqanngitsut atornagit erseqqissumik eqqorluartumillu saqqummiisinnaavugut. Pingajussaanik sammisassat amerlavallaartut oqaluuseriniarsarissanngilavut. Oqaluuserisassanik misissuisilluta, immaqa soqutiginartorpassuarnik nassaarsinnaavugut. Pitsaanerussaarli sammisassami pingaaruteqartut ikittuinnaatikkaanni paasissutissallu pingaaruteqartut kisiisa paasiuminarnerulersitsisinnaasut, piffissarititaasullu iluani sammineqarluarsinnaasut, atoraanni.

Apeqqutinik atorluaaneq

8, 9. Pulaakkatsinnut soqutiginartumik qanoq aperisinnaavugut? Assersuutinik taasaqarit.

8 Nalunngisatsitut, Jiisusi ajoqersukkaminut eqqarsalersitsisinnaasunik qanorlu eqqarsarnerannik ersersitsisinnaasunik apeqqutinik atorluaasarsimavoq. Aperisarnermigut Jiisusip uummataat attortarpai. (Matthæusi 16:13, 15; Johannesi 11:26) Qanoq ililluta Jiisusitut apeqqutinik atorluaasinnaavugut?

 9 Illumiit illumut oqaluussigaangatta, aperisarnerput inuit soqutiginnilernissaannut Guutillu Naalagaaffianut tunngasumik oqaloqateqarnissamut aqqutissiuisuusinnaavoq. Pulaakkatsinnut soqutiginnilersitsisinnaasumik qanoq aperisinnaavugut? Eqqumasariaqarpugut. Illumukaraangatta avatangiisit maluginiartariaqarpavut. Angerlarsimaffimmi meeraqarneranik takutitsisumik silami pinnguaqarpa? Taamaappat aperisinnaavugut: ’Meeqqatit inersimasunngorpata silarsuup qanoq ikkumaarnissaa eqqarsaatiginikuuiuk?’ (Tussiaat 37:10, 11) Matu silarleq paarnaarsaatinik isumannaallisaatinillu ulikkaarpa? Taamaappat aperisinnaavugut: ’Isumaqarpit angerlarsimaffitsinni aqqusinernilu toqqissisimasinnaalerumaartugut?’ (Mika 4:3, 4) Iseriartorluni majuariamik issiavinnut kaamisaartakkanut aqquteqarpat, immaqa aperisinnaavugut: ’Illit qanoq isumaqarpit: Qaquguluunniit inuit tamarmik peqqisuulerumaarpat?’ (Esaja 33:24) Atuagassiaaqqami Allakkat oqaloqatigiissutigisigik-mi  * allanik siunnersuutissarpassuaqarpoq.

10. Apeqqutit iluaqutigalugit Biibilimik atuaqqissaaqatitta eqqarsaatai misigisaalu qanoq paasisinnaavavut, sunali mianersorfigiuaannartariaqarparput?

10 Biibilimik atuaqqissaaqateqartilluta qanoq apeqqutinik atorluaasinnaavugut? Akerlianilli uagut Jiisusitulli inuit uummammiui takusinnaanngilavut. Pissuserissumilli qinerluakkamillu aperinerup ilinniartup qanoq eqqarsarneranik misigineranillu paasitissinnaavaatigut. (Ussatit 20:5) Assersuutigalugu ‘Ilisarsinermi’ kapitali 13 „Sooq Guutip piumasaanik iliorneq pillualernartoq” atuaqqissaartuusaariartigu. Guutip unneqqaserlunnermut, kinguaassiuutitigut inuunerlunnermut allanullu isigiinnittaasianut tunngavoq. Ilinniartup apeqqutit allassimasut immaqa eqqortumik akigaluarpai, ilinniakkanili aamma isumaqatigai? Aperisinnaavugut: ’Jehovap taamatut isiginnittaaseqarnera eqqortuusoraajuk?’ ’Najoqqutassiat Biibilimeersut inuuninni qanoq atorsinnaavigit?’ Ilinniartumulli ataqqinninnitta takutinnissaa eqqaamajuartariaqarparput. Ilinniartumut nikanarsaataasinnaasunik peqqusiileqilersitsisinnaasunilluunniit aperinaveersaartariaqarpugut. — Ussatit 12:18.

11. Tamanut ammasumik oqalugiartut apeqqutit qanoq sunniuteqarluartumik atorsinnaavaat?

11 Tamanut ammasumik oqalugiartut apeqqutit atorluarsinnaavaattaaq. Apeqqutit akineqartariaqanngitsut tusarnaartunut eqqarsalersitsisinnaapput. Jiisusip apeqqutit taamaattut ilaatigut atortarsimavai. (Matthæusi 11:7-9) Oqalugiartussaq oqalugiaatissaminut aallarneereeruni sammisassani pingaaruteqartut apeqqutit atorlugit eqqaasinnaavai. Assersuutigalugu oqarsinnaavoq: „Ullumi oqalugiaammi apeqqutit tullernguuttut misissuataassavavut . . .“ Apeqqutinut unnersuussinermigut naggasiinermini pingaaruteqartut uteqqissinnaavai.

12. Kristumiut utoqqaanertat Guutip oqaasiinit uppeqatiminnik tuppallersaaniarlutik apeqqutinik qanoq atuisinnaanerannik assersuuteqarit.

12 Kristumiut utoqqaanertat paarsisutut sulinerminni Jehovap oqaasiinit ‘ernumasunik’ tuppallersaaniarlutik apeqqutit atorsinnaavaat. (1 Thessalonikamiut 5:14) Utoqqaanertap nikallungasoq tuppallersarniarlugu Tussiaat 34:19-imut unnersuussisinnaavoq. Allassimavoq: „[Jehovap] qanippai sequmissimasumik uummatillit, annaattarpai aserortersimasumik anersaallit.“ Qatanngut nikallungasoq qularunnaarsinniarlugu inuttut pineqartoq utoqqaanertap aperisinnaavaa: ’Jehovap kikkut qanippai? Ilaatigut misigisarpit ‘sequmissimasumik uummateqarlutit’ ‘aserortersimasumillu anersaaqarlutit’? Biibilimi allassimaneratut Jehovap taamaattut qanippagit taava imaanngila  qanikkaatit?’ Asannittumik qularunnaarsitsineq taamaattoq nikallungasumut qiimmassaataasinnaavoq. — Esaja 57:15.

Tunngavilersuutit paasiuminartut

13, 14. (a) Guutip ersinngitsup piuneranik upperinninngitsumik qanoq eqqarsalersitsisinnaavugut? (b) Sooq tamarmik qularunnaarsinneqarnissaat ilimagissanngilarput?

13 Oqaluussinitsinni ajunngitsumik qularunnaarsitsisumillu eqqarsalersitsinikkut inuit uummataat angorusuttarpavut. (Apustilit Suliaat 19:8; 28:23, 24) Imaappa sallusuissummik Guutip oqaasianeersumik allat qularunnaarsinniarlugit tunngaveqarluaraluarluta paasiuminaatsumik oqallorissaarluta saqqumiinissarput ilinniartariaqaripput? Naamerluinnaq. Tunngavilersuutaalluartut paasiuminaattuusariaqanngillat. Tunngavilersuutit paasiuminartut pitsaanerpaasarput. Assersuut una eqqarsaatigeriaruk.

14 Guutip ersinngitsup piuneranut upperinninngitsumut qanoq oqarsinnaavugut? Pissutaasoq sunniutaasorlu pillugit inatsimit eqqarsalersinniarlugu oqaloqatigisinnaavarput. Sunniuteqaraangat, pissuteqarsimanera naluneq ajorparput. Oqarsinnaavugut: ’Avinngarusimasumiitillutit illu kusanartoq nerisassaqareersoq (sunniut) aqqusaarukku, eqqarsariaqqaarnak ilimagiinnassavat arlaata (pissutaasoq) illu sanasimassagaa nillataartitsivia qerititsivialu immersimassagai, ilaa? Pinngortitarsuaq nunarsuullu „nerisassaasivia” nerisassanik ulikkaartoq (sunniut) qimerlooraangatsigit pissusissamisuussannginnerpa ilimagissallugu arlaanneersimassasut (pissutaasoq)?’ Biibilimi paasiuminarluinnartumik allassimavoq: „Illuliat tamarmik immikkut sanasoqartarput, tamanilli sanasoq tassaavoq Guuti.“ (Hebræerit 3:4) Tunngavilersuutilli qanorluunniit paasiuminartigisut atoraluarutsigik, tamarmik qularunnaarsinneqarnavianngillat. Biibilimit eqqaasinneqarpugut „eqqortumik isumaqarfiginnittut“ kisimik uppertunngorumaartut. — Apustilit Suliaat 13:48, NV; 2 Thessalonikamiut 3:2.

15. Jehovap pissusii periaasiilu ersersinniarlugit tungavilersuutit qanoq ittut atorsinnaavavut? Assersuutinik marlunnik taasaqarit.

15 Oqaluussinermi ilagiinniluunniit ilinniartitsinitsinni Jehovap pissusii periaasialu ersersinniarlugit tunngavilersuutit paasiuminartut atorsinnaavavut. Eqqarsalersitseriaaseq immikkut sunniuteqarluartartoq, Jiisusip ilaatigut atortagaa, tassa ilinniartitsisup tusarnaartullu isumaqatigiissutigisinnaasaannik eqqartuineq taavalu tusarnaartut tamatumunnga assingusumik pingaarnerusumilli isummertillugit. (Lukasi 11:13; 12:24) Eqqarsalersitseriaaseq taamaattoq sunniuteqangaarsinnaavoq akerliusumut atassuserneqaraangat. Anniarfimmik ajoqersuutip uppernanngilluinnarnera takutinniarlugu, oqarsinnaavugut: ’Ataataasup asannittup kialuunniit qitornani pillarnavianngilaa assaatigut innermik uutillugu. Ataatatsinnut qilammiittumut asannittumut anniarfimmik eqqarsaat maajunnarnerungaassaaq!’ (Jeremia 7:31) Jehova kiffaminik inuttut immikkut isumaginnittartoq paasitinniarlugu oqarsinnaavugut: ’Jehovap ullorissat milliardilippassuit tamaasa atiisigut nalunngikkunigit, inunnut imminut asannittunut ernermilu aavanik naleqangaartumik pisiarisimasaminut soqutigininnerungaassaaq!’ (Esaja 40:26; Apustilit Suliaat 20:28) Tunngavilersuutit qularunnaarsitsisut taamaattut allat uummataasa angunissaannut iluaqutaasinnaapput.

Assersuusiat naleqquttut

16. Ilinniartitsinermi assersuusiat atornissaat sooq pingaaruteqarpa?

16 Assersuusiat ilinniartitsinerput kajungernarnerulersissinnaavaat. Ilinniartitsinermi assersuusiat atornissaat sooq pingaaruteqarpa? Ilinniartitsisoq oqarsimavoq: „Eqqarsaataannarsorneq inunnut ajornakusoornerpaat ilagaat.“ Assersuusiat isummami assilissatut ipput puiukkiutsitsisinnaasut eqqarsaatinillu nutaanik paasinnitsitsisinnaasut. Jiisusi assersuusialiullaqqivissuusimavoq. (Markusi 4:33, 34) Maanna ilinniartitseriaaseq taamaattoq atorsinnaanerlutigu takussavarput.

17. Pingaaruteqartut sisamat suut assersuusiaq sunniuteqarluarsinnaalersippaat?

17 Suunuku assersuusiat sunniisinnaassuseqartikkaat? Siullermik tusarnaartunut tulluartuusariaqarpoq pissutsinillu atugaanneersuusariaqarluni. Eqqaamavarput Jiisusip assersuusiarpassui ulluinnarpaluttuusut. Aappassaanik assersuusiap saqqummiunneqartariaqartoq erseqqissartariaqarpaa. Assersuussineq pisuusaarpaluppat, assersuusiaq paatsiveerussaataaginnalersinnaavoq. Pingajussaanik assersuusiaq pisariaqanngitsunik  ilaartorneqartariaqanngilaq. Jiisusip qanoq ilinniartitsisarsimanera eqqaaqqilaariaruk. Pisariaqartut eqqaasarpai, pingaaruteqanngitsulli pinnagit. Sisamassaanik assersuusioraangatta siunertaasup erseqqilluinnarnissaa eqqumaffiginiartariaqarparput. Taamaanngippat ilaasa paasinngitsoorsinnaavaat.

18. Qanoq ililluta tulluartunik assersuusiorsinnaavugut?

18 Qanoq ililluta tulluartunik assersuusiorsinnaavugut? Sunnguit tamaasa ilanngullugit oqaluttuarusaartariaqanngilagut. Assersuusiat naatsunnguit eqqorluartuusinnaapput. Assersuusiarerusutannut assingusinnaasumik eqqaasaqarniarsarigit. Takorlooriaruk Guutip isumakkeerfiginninnera sammineqartoq, eqqarsaallu Apustilit Suliaat 3:19-imiittoq assersuutigerusullutigu. Tassani allassimagami Jehovap ‘ajortivut piiarai’. Eqqarsaat taanna qanoq assersuutigisinnaavarput? Immaqa piiaammik allattarfissuarmulluunniit piiaammik? Oqarsinnaavugut: ’Jehovap ajortitsinnik isumakkeerfigigaangamitigut, allakkanik piiaanertut (allattarfissuarmiluunniit piiaanertut) piiartarpai.’ Assersuusiat taamaattut paasiuminarluinnartuusarput.

19, 20. (a) Assersuusiatsialaat sumi nassaassaappat? (b) Atuagassiaatitsinni assersuusianik sunniuteqarluarsinnaasunik taasaqarit. (Ungalusaq takujuttaaq.)

19 Assersuusiat inuunermi pisimasuneersuusinnaapputtaaq. Immaqa uppeqatitta uagulluunniit nammineq misigisavut atorluarsinnaavavut. Allarpassuaqarportaaq assersuusiornermi atorneqarsinnaasunik, ilaatigut uumasut naasullu, illup iluani atortorissaarutit ulluni makkunaniluunniit pisut. Ulluinnarni pisunik malinnaanerput assersuusiorluarnissatsinnut iluaqutaasinnaavoq. (Apustilit Suliaat 17:22, 23) Tamanut ammasumik oqalugiartussanut qinerlerfissiami ima allassimasoqarpoq: „Oqalugiartussaq inuit inuunerannik iliuusiinillu maluginiaasartoq, inunnik assigiinngitsunik oqaloqatiginnittartoq, sunik tamanik misissueqqissaartartoq paasinnilluarnissamilu tungaanut apersuisartoq, oqalugiaatissaminut assersuusiassarpassuarminik katersisinnaavoq.“

20 Napasuliaq Alapernaarsuiffik-mi Iteritsi!-milu atuagassianilu allani Jehovap Nalunaajaasuinit saqqummersinneqartuni ajunngivissunik assersuusiarpassuaqarpoq. Assersuusiallu qanoq atorneqarsimanersut misissorlugit ilinniarfigisinnaasorujussuuavut. * ‘Ilisarsinermi’ kapitali 17 immikkoortoq 11 assersuutigeriartigu. Tassani ilagiinniittut inuttut assigiinngitsunik pissuseqarnerat angallannermi biilinut assigiinngitsorpassuarnut assersuutigineqarpoq. Assersuusiaq taanna sooq sunniuteqarluartarpa? Pissutigalugu ulluinnarpalaarmat, tulluarmat, paasiuminarluarmallu. Oqalugiaraangatta allanilluunniit Biibilimik ilinniartitsigaangatta assersuusiat atuagassiani atorneqarsimasut naleqqussarlugit atortarutsigit iluaqutaassaaq.

21. Guutip oqaasianik ilinniartitsillaqqissuuneq qanoq nuannaalersitsisarpa?

21 Ilinniartitsillaqqissuuneq nalerisimaarnarpoq. Allanik ilinniartitsigaangatta avitseqatigisarpavut; ikiorniarlugit imminit tunniuppugut. Tuniserusussuseq taamaattoq nuannaalersitsisarpoq, Biibilimi allassimammat: „Tunisineq pilluarnarneruvoq tigusinermit.“ (Apustilit Suliaat 20:35) Ingammik Guutip oqaasianik ilinniartitsigaangatta nuannaarneq taanna misigisarparput, naleqavissumik ataavartumillu tunisisaratta — Jehova pillugu sallusuissut. Nalerisimaarnarportaaq nalunagu taamaaliornikkut Ajoqersuisorsuaq, Jiisusi Kristusi, ilaaripput. (wE 09/01 02)

[Quppernerup ataani ilanngussat]

^ imm. 6 Jehovap Nalunaajaasuinit saqqummersitaq.

^ imm. 9 Takuuk immikkoortoq „Aallarniutit oqaluussinermi atugassat” qupp. 2-8. — Jehovap Nalunaajaasuinit saqqummersinneqartoq.

^ imm. 20 Assersuusiat Register til Vagttårnets publikationer-imi „Illustrationer, billeder, billedtaler“ qupperaanni nassaarineqarsinnaapput. — Oqaatsini assigiinngitsuni Jehovap Nalunaajaasuinit saqqummersinneqartoq.

 Eqqaamavigit?

• Biibilimik atuaqqissaaqateqaraangatta ilagiinniluunnit saqqummiussaqaraangatta qanoq paasiuminartumik ilinniartitsisinnaavugut?

• Illumiit illumut oqaluussitilluta apeqqutit qanoq atorluarsinnaavavut?

• Jehovap pissusii periaasiilu ersersinniarlugit tunngavilersuutit paasiuminartut qanoq atorsinnaavavut?

• Assersuusiat tulluartut sumi nassaarisinnaavavut?

[Atuaqqissaarnermi apeqqutit]

[Qupp. 17-mi ungalusaq/​assiliartaq]

Assersuusiat makku eqaamasinnaavigit?

Assersuusiat tulliuttut sunniuteqarluarnerat paasinarsisimavoq. Soormi unnersuutigineqartut qupperukkit takullugulu sammineqartup pingaarnersaa assersuusiat qanoq erseqqissarneraat?

• Cirkusimi issakatsiaarfinni eqqumiitsuliortutut sukuutseqatigiittutullu aappariilluarnermik ineriartortitsiniartut naleqqulluartumik aappaqarnissaq pisariaqartippaat. — Napasuliaq Alapernaarsuiffik, 1. juuni 2001, qupp. 16.

• Misigissutsinik allamut oqaatiginninneq arsamik miloriussinermut assersuunneqarsinnaavoq. Sallaatsumik imaluunniit ima sakkortutigisumik ajoqusiisumik miloriussisoqarsinnaavoq. — Iteritsi!, 8. januaari 2001, qupp. 10.

• Asanninnermik ersersitsinissamik ilinniarneq allamiut oqaasiinik ilinniarnertut ippoq. — Napasuliaq Alapernaarsuiffik, 1. marsi 1999, qupp. 18, 22-23.

• Anersaarsiorneq anersaapiluit atortarpaat soorlu piniartut narajaq atortaraat: pisariniakkamut ussassaarutitut. — Ilisarsineq inuunermut naasaanngitsumut sammisoq, qupp. 111

• Jiisusip Adamip kinguaavinik ikiuinera uunga assersuunneqarsinnaavoq: Inuup pisuup ajunngitsuliorumasup suliffissuup akiligassai (suliffissuup naalagaata unneqqaserlunneranik pissuteqartut) akilerpai ammarteqqillugulu suliffissuup sulisorpassuisa iluaqutissaannut. — Napasuliaq Alapernaarsuiffik, 1. juuli 1991, qupp. 15.

[Qupp. 14-mi assiliartaq]

Kristumiut ilumoortut Guutip oqaasianik ilinniartitsipput

[Qupp. 15-mi assiliartaq]

Utoqqaanertat aperisarnermikkut uppeqatiminnik Guutip oqaasiinit tuppallersaasinnaapput