Imarisai

Imarisai

’Guutip oqaasia sunniisinnaassuseqarpoq’

’Guutip oqaasia sunniisinnaassuseqarpoq’

 Guutip naalagaaffianik oqaluussissutiginninnermit nutaarsiassat

’Guutip oqaasia sunniisinnaassuseqarpoq’

QEQERTAMI Jamaicami Caribiamiittumi seqineqarluartartumi Biibili ilisimaneqarluarpoq. Angerlarsimaffinni tamangajanni Biibili King James Version pigineqarpoq, inuillu ilaasa nammineerlutik una misigisimavaat: „Guutip oqaasia uumavoq sunniisinnaassuseqarlunilu.“ (Hebræerit 4:12) Inuit inuunerannik allanngortitsisinnaavoq, soorlu misigisap ataani allassimasup ersersikkaa.

Cleveland sulereerluni angerlaqqammersoq Jehovap Nalunaajaasuisa ilaata pulaarpaa. Oqaluussisartup Biibilimeersunik oqaloqatigilaariarlugu atuagaq Ilisarsineq inuunermut naassaanngitsumut sammisoq tunniuppaa. Inuunini Guutip oqaasianit qanoq allanngortinneqarluinnassasoq Clevelandip taamani nalulluinnarpaa.

Cleveland upperisamik ilumoortumik ujaasinermini ikiorneqarusukkami ullormut pingasoriarluni Guutimut qinusarpoq. Paasisimavaa angajoqqaami upperisaat ilumoortuunngitsoq, upperisarsiornernilli allanik misissuinini pakatsissutigiinnarlugu. Jehovap Nalunaajaasui tusarsimagaluarpai, qularutigaali upperisaat ilumoortuussasoq. Cleveland nangaagaluarluni oqaluussisartup Biibilimik misissueqatigiumalluni neqeroorutaanut akuersivoq. Taamaaliorpoq Jehovap Nalunaajaasuisa upperisaat ilumuunngitsoq uppernarsarniaannarlugu!

Sivitsunngitsorli Clevelandip paasivaa arnanik assigiinngitsunik marlunnik kinguaassiuutitigut inuunerloqateqarnini Guutip iluarinngikkaa. (1 Korinthimiut 6:9, 10) Marloriaannarluni atuaqqissaareerami sapiiserluni arnanut attaveqarnini unitsippaa. Aammattaaq naalagaaffilersaarfimmi kristumiut ataatsimmiinnerinut najuuttalerpoq. Tamannali allamik misilinneqaatigilerpaa.

Cleveland nuannarilluarlugu arsaattartuuvoq, unnunnili ataatsimiiffiusuni arsaattoqarajulluni. Suniarpami? Sungiusaasuminit, arsaattartoqatiminit ikinngutiminillu tatineqangaaraluarluni Cleveland aalajangerpoq arsaattarunnaarniarluni. Aap, Guutip oqaasianit sunnerneqalerpoq.

Clevelandip ilikkakkani Biibilimeersut allanut oqaluttuarisalermagit, Guutip oqaasiata pissatsinnarnera malunnarseqqippoq. (Apustilit Suliaat 1:8) Oqaluussinerata kingunerisaanik arsaattartoqatigisimasai marluk Jehovap Nalunaajaasuisa ataatsimiinnerinut najuuttalerput. Cleveland nutaarsiassamik nuannersumik oqaluussisartunngoreerami allanik ikiuinermini Guutip oqaasianik atuinini nuannaarutigeqaa.

Cleveland Guutip oqaasiata pissatsinnarneranit sunnerneqartittuarami piffissap ingerlanerani Jehovamut tunniulluinnarnini takutillugu kuisippoq. Maanna piffissaq tamaat oqaluussisartuuvoq ilagiinnilu kiffartortuulluni.

Jamaicami silarsuarmilu sumi tamaani inuit tusindilikkuutaat una misigisimavaat: „Guutip oqaasia uumavoq sunniisinnaassuseqarlunilu.“ (wE 08/01 02)

[Qupp. 8-mi nunap assinga/assiliartaq]

(Allassimasut qanoq inissisimanersut naqitami takuneqarsinnaavoq)

JAMAICA

[Suminngaanneernera]

Nunap assinga globusilu: Mountain High Maps® Copyright © 1997 Digital Wisdom, Inc.