Imarisai

Imarisai

Jehova naalannarsisiguk piumaffiginnineratut iliorlutit

Jehova naalannarsisiguk piumaffiginnineratut iliorlutit

 Jehova naalannarsisiguk piumaffiginnineratut iliorlutit

’Qujaninnik naalannarsisissavara.’ — TUSSIAAT 69:31.

1. (a) Sooq Jehova unnersiutigineqartariaqarpa? (b) Qujalluta qanoq unnersiutigisinnaavarput?

JEHOVA ajugaqanngitsuuvoq, silarsuarmi kisimi Oqartussaasoq, tamanik Pinngortitsisoq. Taamaattumik aqqa siunertaalu naalannarsisinneqartariaqarput, unnersiutigineqartariaqarput. Jehovamik unnersiutiginnittoqartarpoq ataqqingaarlugu, nersorlugu oqaatsitigullu iliuutsikkullu naalannarsisillugu. ’Qujalluta’ taamaaliussagutta uagutsinnut maannakkut iliuuserisai siunissamilu iliuuserisassai qumasuutigiuartariaqarpavut. Qanoq isiginnittaaseqartariaqartugut Saqqummersitat 4:11-mi allassimavoq, qilammi anersaat aalajaatsut nalunaarnerattut: ’Illit, [Jehova] Guuterput qinngaqqunnanngillat pigissallugit naalannaat ataqqinaallu pissaanerlu; illimmi suut tamaasa pinngortippatit, illit piumasakkut piulerput pinngortitaallutillu.’ Jehova qanoq unnersiutigisinnaavarput? Ilisarisimalerneratigut taavalu uagutsinnut piumaffiginninneratut iliorluta. Tussiaasiortup oqarneratut ima isiginnittaaseqartariaqarpugut: „Ajoqersunnga illit piumasattut ilioqqullunga, Guutigigakkimmi illit.“ — Tussiaat 143:10.

2. Jehova unnersiutiginnittunut qanoq iliorpa, unnersiutiginninngitsullu qanoq pissavai?

2 Jehovap unnersiutiginnitsini pingaartippai. Taamaattumillu ’ujarlersini akissarsisissavai’. (Hebræerit 11:6) Sumik akissarsisissavai? Jiisusi Ataataminut qilammiusumut ima qinuvoq: „Inuuneq naassaanngitsoq tassaavoq ilinnik, ilumut kisimi Guutiusumik aallartitannillu Jiisusi-Kristusimik, ilisimanninneq.“ (Johannesi 17:3) Aap, ’qujanerminni [Jehovamik] naalannarsisitsisut’ „nuna kingornutissavaat najugaqassallutillu tassani naassaangitsumik“. (Tussiaat 37:29) Akerlianilli inuk „ajortoq siunissaqanngilaq“. (Ussatit 24:20) Ullunilu kingullerni makkunani Jehovamik unnersiutiginninnissarput aatsaat taama pingaaruteqartigaaq, ungasinngitsukkummi guutiitsut piuneerutissavai naapertuilluartullu inuuginnartillugit. „Silarsuaq piumatussusialu nungussapput, Guutilli piumasaanik iliortoq naassaanngitsumik atassaaq. Peqqusersuitsummi nunami najugaqassapput, assuarnaatsut kisimik tassaniilissapput.“ — 1 Johannesi 2:17; Ussatit 2:21, 22.

3. Malakip allagai sooq eqqumaffigisariaqarpavut?

3 Jehovap piumasaa suunersoq Biibilimi atuarsinnaavarput, ’Allakkammi Guutimit anersaarfigineqarput’. (2 Timotheusi 3:16) Guutip oqaasiani oqaluttuarpassuaqarpoq Jehovap unnersiutiginnitsiminik qanoq pilluaqqusisarneranik  unnersiutiginninngitsunillu qanoq pinnittarneranik. Oqaluttuat taakku ilaanni oqaluttuarineqarpoq pruffiitip Malakip nalaani Israelimi qanoq pisoqarnera. Ukiup 443-p missaani u.n.s. Nehemia Judami naalagaatitaatillugu, Malakip atuagaq ateqaatigisani allappaa. Atuagaq pissanganartoq taanna tusarliussaavoq kimittooq paasissutissiisoq siulittuutaallunilu ’mianersoqqussutaalluni uatsinnut ullunik kingullernik angumerinnittunut’. (1 Korintumiut 10:11) Malakip oqaasii eqqumaffigigutsigik ’[Jehovap] ullussaanut pingaartumut siooranaqisumullu’ aaqqissuussinermik ajortumik matuminnga aseruiffissaanut piareersimatissinnaavaatigut. — Malaki 4:5.

4. Malaki kapitali 1-imi sammineqartut arfinillit suuppat?

4 Malakip allagaasa, ukiut 2400-nit amerlanerusut matuma siorna allanneqartut, ullumikkut 2000-kkunni Jehovap ullussarsuanut siooranaqisumut qanoq piareersimatissinnaavaatigut? Kapitalimi siullermi erseqqissarneqarput sammineqartut minnerpaamik arfinillit Jehovamut iluarisaalernissatsinnut naassaanngitsumillu inuulernissatsinnut pingaaruteqartut: (1) Jehovap innuttani asavai. (2) Jehova mianerisariaqarparput illernatullu pingaartillugit. (3) Jehovap naatsorsuutigaa pigisatsinnik pitsaanerpaanik tunissagitsinni. (4) Pallorfiginninneq ilumoortoq asanninnermik pissuteqarpoq, piumatuunermik pinnani. (5) Guutip iluarisaanik kiffartorfiginera ileqqulersuutaanngilaq nanertuutaasoq. (6) Tamatta immikkut Guutimut akisussaavugut. Taamaattumik, Malakip allagai pillugit allaaserisat pingasuusut siullersaanni, sammineqartut taakku paasiniariartigit Malakip allagaani kapitali siulliup misissorneruneratigut.

Jehovap innuttani asavai

5, 6. (a) Sooq Jehovap Jaaku asavaa? (b) Jaakutut aalajaattuarutta suna ilimagisinnaavarput?

5 Jehovap asanninnera erseqqissarneqarpoq Malakip allagaani versimi siullermiilli, imatut aallartittumi: „Pruffiitikkut oqaatigeqqusaq. [Jehovap] Malakikkut Israelimut oqaasia.“ Versi 2 naapertorlugu Guuti Israelikkunnut ima oqarpoq: „Asavassi.“ Assersuuteqarluni versimi tassani nangippoq: „Jaaku asavara.“ Jaaku Guutimut upperpoq. Piffissap ingerlanerani Jehovap Jaakup aqqa allanngortippaa ateqalersillugu Israel, inuiannullu Israelikkunnut siuaasanngortillugu. Jehovap Jaaku asavaa uppertuummat, Israelikkullu Jaakutut imminut isiginnittaasillit asallugit. — Malaki 1:1, 2.

6 Jehova asagutsigu innuttaalu ilumoorfigigutsigit tuppallersaatigisinnaavagut oqaatsit Samuelimik allakkat siulliit 12:22-miittut: „[Jehovap] atini naalannangaartoq pissutigalugu innuttani ajattunngitsoorpai.“ Jehovap innuttani asavai akissarsisittarlugillu, naggataatigut inuunermik naassaanngitsumik, imatummi allassimavoq: „Tatigiuk [Jehova] ajunngitsuliorlutillu, inuusinnaaqqullutit eqqissisimallutit nunami. [Jehova] qiimmattaatigiuk, taassuma tunisarumaarmatit uummativit kissaatigisaanik.“ (Tussiaat 37:3, 4) Malaki kapitali 1-imi Jehovamut asanninnermut tunngasumik allamik uparuunneqarpugut.

Illernartut pingaartikkit

7. Sooq Jehovap Esaui uumigaa?

7 Malaki 1:2, 3 naapertorlugu Jehova ima oqarpoq: „Jaaku asavara Esauili uumigalugu.“ Sooq assigiinngisippai? Jaakup Jehova qutsissisippaa unnersiutigalugulu, marluliaqataali, Esaui, taamaaliunngilaq. Esaui aamma Edomimik taaneqartarpoq. Malaki 1:4-imi Edomi taaneqarpoq  „guutiitsuussutsip nunaanik“, nunamilu innuttaasut assuarineqarlutik. Esaui atsernerqarpoq Edomi (isumaqartoq „aappaluttoq“) angajulliussutsi eertaasanik aappaluttunik nerisassianut akigimmagu. „Esauip angajulliussutsi taama soqutiginngitsigaa,“ Mosesimik allakkat siulliit 25:34-mi allassimavoq. Apustili Paulusip uppeqatini ima kajumissaarpai: „Sianiginiarsiuk . . . Esauitut kinguaassiuutitigut inuunerluttoqaqqunagu illernartunilluunniit pingaartitsinngitsoqaqqunagu, taassuma angajulliussutsi nerisassanut ataasiagassaannarnut akigimmagu.“ — Hebræerit 12:14-16, NV.

8. Sooq Paulusip Esauip iliuusia kinguaassiuutitigut inuunerlunnermut assersuuppaa?

8 Sooq Paulusip Esaui kinguaassiuutitigut inuunerlunnermut tunngatillugu eqqaavaa? Esauitut eqqarsartaaseqarneq illernartunik pingaartitsinngitsoortitsisinnaammat. Aamma sualuttumik ajortuliortitsisinnaavoq, soorlu kinguaassiuutitigut inuunerlulluni. Taamaattumik imminut ima aperisinnaavugut: ’Ilaannikkut kristumiutut kingornussama — inuunerup naassaanngitsup — eertaasanik nerisassiatut nungujatigisunut akiginissaa ussernartorsiorfigisarpara? Illernartut suusupagisarpakka, immaqa nammineq sianiginagu?’ Esaui utaqqisinnaassuseqanngilaq — timikkut pisariaqartitani massakkorpiaq matussuserniarpai. Jaaku oqarfigaa: „Aappaluttumik uuminnga illit pinnik nerisassannik tuninasuannga.“ (1 Mosesi 25:30) Alianaraluartumik Guutip kiffaasa ilaat ima oqartarpullusooq: „Tuavi! Sooq kateqqaassaagut?“ Qanorluunniit akeqassagaluarpat kinguaassiuutitigut atoqateqarusunnerat Esauip ’eertaasanik’ nererusunneratulli atoqateqarusutsigilersimapput.

9. Jehova qanoq ataqqiuarsinnaavarput?

9 Illernartunik — kinguaassiuutitigut minguitsuunermik, assuarnaatsuunermik anersaakkullu kingornussatsinnik — suusupaginninngisaannarta. Esauitut innata Jaaku uppertoq aalajaatsorlu malitsigu Guutilu ataqqiuartigu illernartunik pingaartitsingaarnitsigut. Qanoq ililluta? Jehovap piumaffiginninneratorluinnaq iliorluta. Taamaalilluta Malaki kapitali 1-imi sammineqartut pingajuat sammisussanngorparput.

Jehova pitsaanerpaanik tuniuk

10. Palasit Jehovap nerrivianik nikaginninnertik qanoq takutittarpaat?

10 Judami palasit Malakip nalaani Jerusalemimi naalaffimmi kiffartortut Jehova pigisaminnik pitsaanerpaanik tuninngilaat. Malaki 1:6-8-mi ima allassimavoq: „Ernerusup ataatani ataqqisaraluarpaa inussiallu naalakkani, uangali ataataasunga ataqqinaatiga sumiippa? Uangalu naalagaasunga mianerineqarnera sumiippa? Uanga Katersaarsuit [Jehovaat] taama oqarpunga ilissinnut palasinut atinnik nikaginnittunut.“ „Qanoq ililluta atit nikagisimanerparput?“ palasit aperipput. „Tassa nerisassat mingunnartut pilliiviutinnut aattarassigit!“ Jehova akivoq. „Qanoq ililluta mingutsissimanerpatsigit?“ palasit aperipput. Jehovap oqarfigai: „Tassa oqartarassi: ’[Jehovap] nerrivia nikagineqaannarsinnaavoq!’ Nersutaatit tappiitsut pilliutigisarassigit tamanna ajortuunnginnerpa?“

11. (a) Pilliutit akuerineqarsinnaanngitsut pillugit Jehova qanoq oqarpa? (b) Israelikkut inuinnaat qanoq ajortuliorpat?

11 Pilliutaat akuerineqarsinnaanngitsut pillugit eqqarsalersinniarlugit Jehova nangippoq: „Naalagaatitassinnut aakkaluariassagisi! Isumaqarpit iluaralutit ilassilluassagaatit?“ Naagga,  soorunami naalagaatitaasup tunissut taamaattoq iluarinavianngilaa. Silarsuarmi kisimi Oqartussaasup tunissutit amigaatillit qanoq iluarinnginnerutigissavai! Sualuttumik kukkussutillit palasiinnaanngillat. Palasit pilliutinik pilliiviliaassinermikkut Jehovamik nikaginikkaluarput. Israelikkulli inuinnaat pisuussuteqanngitsuunngillat. Taakkumiuku uumasunik tappiitsunik, tusiattunik napparsimasunillu palasimukaassisut, palasit Jehovamut pilliutiginiassammatigik. Taamaalillutik ajortuliungaarput.

12. Pigisatsinnik pitsaanepaanik Jehovamut tunniussaqarnissatsinnik qanoq ikiorneqarpugut?

12 Jehova ilumut asagipput takutissinnaavarput pigisatsinnik pitsaanerpaanik tunillugu. (Matthæusi 22:37, 38) Malakip nalaani palasisut namminissarsiortutut pinnatik ilagiit Jehovap ullumikkut atugaasa pitsaalluinnartumik Biibilimik ilinniartippaatigut Jehovamik qutsissisitsinissatsinnut unnersiutiginninnissatsinnullu piumaffiginninneratullu iliornissatsinnut iluaqutigingaakkatsinnik. Taamaalilluta Malakip allagaani kapitalimi siullermi sammineqartut sisamaat sammisussanngorparput.

Pallorfiginninneq ilumoortoq asanninnermik pissuteqarpoq, piumatuunermik pinnani

13. Palasit piumatuujunerat qanoq takuneqarsinnaava?

13 Malakip nalaani palasit namminissarsiortuupput, asanninngitsuullutik aningaaserituujullutillu. Tamanna qanoq nalanngilarput? Malaki 1:10-mi allassimagami: „Kiatoq arlassi naalaffiup isaaffii matuinnaqiligit [akilerneqartinnasi ikitsineq ajorassi, NV] uanga pilliiviutinni. Nuannarisarinngilassi, oqarpoq Katersaarsuit [Jehovaat], pilliutisilu piumanngilakka.“ Palasit piumatuut taakku naalaaffimmi suliassat suunngitsunnguilluunniit akileqqusarpaat. Allaat matunik matusinertik pilliivimmilu ikitsinertik akilersittarpaat. Tupinnangilaq Jehovap ’pilliutaat piumanngimmagit’.

14. Sooq oqarsinnaavugut Jehovap Nalunaajaasui asanninnermit kajumilersinneqartut?

14 Itsaq Jerusalemimi palasinik piumatuunik namminissarsiortunillu eqqartuinitta eqqaasippaatigut ’piumatuut Guutip naalagaaffia kingornussarsiarissanngikkaat’. (1 Korinthimiut 6:9, 10) Palasit namminissarsiortut iliuusiinik eqqarsaatiginninnitta, silarsuarmi tamarmi Jehovap Nalunaajaasuisa oqaluussinerannik aamma pingaartitsinerulersissinnaavaatigut. Namminneq piumassutsiminnik oqaluussipput, oqaluussinertillu aningaasarsiniassutiginngisaannarpaat. Aap, ’Guutip oqaasianik iluanaarniuteqanngilagut’. (2 Korinthimiut 2:17) Paulusitulli oqarsinnaavugut: ’Guutip iivangkiiliua akeqanngitsumik ilissinnut nalunaajaassutigaara.’ (2 Korinthimiut 11:7) Ny verden-nutsigaq naapertorlugu Paulusi nuannaarluni tusagassamik nuannersumik oqaluussinerarpoq. Tamatuma Malaki kapitali 1-mi sammineqartut tallimaannik eqqaasippaatigut.

Ileqqulersuutaanngilaq nanertuutaasoq

15, 16. (a) Palasit pilliisarnermut qanoq isiginnittaaseqarpat? (b) Jehovap Nalunaajaasui qanoq pilliuteqartarpat?

15 Itsaq Jerusalemimi palasit ilumuunngitsut Guutimut pilliisarneq ileqqulersuutitut qasunartutut isigaat. Taakkununnga nanertuutaavoq. Malaki 1:13-imi allassimasutut Guutip ima oqarfigai: „Oqartarpusi: ’Ila pisariussusia!’ Pilliutillu  suusupagaasi.“ Palasit Guutip naalaffiani illernartunik suusupaginnipput, imaluunniit narruginnipput. Qinnutigisartigu taakkutut ilinngisaannarnissarput. Akerlianik Johannesip allagai siulliit 5:3-mi allassimasutut isiginnittaaseqartariaqarpugut: „Guutimut asanninneq tassaavoq inassutai maleruaratsigit, inassutaalu artornartuunngillat.“

16 Guutimut anersaakkut pilliuteqartarnerput nuannaarutigitigu nanertuutitullu qasunartutut isiginngisaannarlutigu. Siulittuutit uku eqqumaffigisigit: „[Jehovamut] uterniaritsi oqarfigalugulu: ’Ajortulianik tamanik isumakkiisartutit tunissutiginiakkavut ilassikkit; qarlutta inerititaannik tunissagatsigit.’“ (Hosea 14:3) Allassimagaangat „qarlutta inerititaannik“ pineqartarput anersaakkut pilliutit, tassa oqaatsitigut Jehovamik unnersiutiginninneq siunertaanillu allanut oqaluussineq. Hebræerinut allakkat 13:15-imi allassimavoq: „Taamaattumik Guuti [Jiisusi Kristusikkut] pilliivigiuartigu qujaniutinik, tassa qarlut aqqanik nassuerutiginnittut inerititaannik.“ Nuannaarutigaarput anersaakkut pilliutitta ileqqulersuutaannaannginnerat, Guutimulli asanninnitsinnut uummammik tamakkiisumik ersersitsisuunerat! Taamaalilluta Malaki kapitali 1-imi sammineqartut arfernat ilinniarfigisinnaasarput sammisussanngorparput.

Tamatta immikkut akisussaavugut

17, 18. (a) Sooq Jehovap „peqquserluttoq“ perloqquaa? (b) Peqquserluttut suna eqqarsaatiginngilaat?

17 Malakip nalaani inuusut suliaminnut namminneq akisussaapput, aamma uagutsinnut taamaappoq. (Romamiut 14:12; Galatiamiut 6:5) Taamaattumik Malaki 1:14-imi allassimavoq: „Perloqqusaali peqquserluttoq savaatiminit angutiviaq [innarluuteqanngitsoq] [Jehovamut] tunniukkumallugu neriorsuisimagaluarluni tassunga taarsiullugu innarluuteqartumik pilliisoq.“ Savaatilik ataasiinnarmik uumasuuteqartanngilaq. Taamaattumik pilliiniaraangami tappiitsumik, tusiattumik napparsimasumilluunniit pilliuteqartariaqanngilaq. Uumasumik innarluutilimmik pilliuteqarniaruni Jehovap pilliinissamik aaqqissuussineranut suusupaginnissaaq, angummi ataasiinnaanngitsumik uumasuutilik, innarluuteqanngitsuuteqassagaluarpoq.

18 Taamaattumik Jehova pissutissaqarluarpoq perloqqusissalluni ’peqquserluttumik’; naleqquttumik angutiviaateqaraluarluni, tappiitsumik, tusiattumik napparsimasumilluunniit palasip pilliutissaanik — immaqa allaat pinngitsaalillugu — aggiussisumik. Aammattaaq Malakip siulittuutaani malunnartoqanngilaq palasit Guutip inatsisaanik issuaasarsimanerannik eqqaasitsiniarlutik uumasut innarluutillit Jehovap iluarinngikkai. (3 Mosesi 22:17-20) Israelikkut ilisimasariaqaraluarpaat innarluutilimmik naalagaatitaq tunissuteqarfigigaluarunikku iluarineqarnaviarnatik. Innarluutilimmilli tunissuteqarfigineqartoq tassaavoq Jehova, silarsuarmi kisimi Oqartussaasoq, inummit naalagaatitamit kimilluunniit qutsinnerungaartoq. Malaki 1:14-imi imatut allassimavoq: „Uanga kunngersuuvunga, oqarpoq Katersaarsuit [Jehovaat], ateralu mianerineqarpoq inuianni.“

19. Suna qilanaaraarput, qanorlu iliortariaqarpugut?

19 Guutip kiffaasut aalajaatsutut qilanaaraarput Kunngersuup, Jehova Guutip, inuiannit tamanit ataqqineqalernissaa. Taamanikkut Jehovamik „ilisimasaqarnerup nuna tamakkerumaarpaa soorlu ermit matoqqagaat immap naqqa.“ (Esaja 11:9) Taamaalinnginnerani Guutip piumaffiginninneratut sapinngisatsinnik iliortariaqarpugut, tussiaasiortoq ima oqartoq ilaarlugu: ’Qujaninnik naalannarsisissavara.’ (Tussiaat 69:31) Tamatumunnga atatillugu Malakip siulittuutaani suli allanik iluaqutissatsinnik siunnersuuteqarpoq. Taamaattumik allaaserisat tullii marluk Malakip allagaasa ilaannik allanik eqqartuisut misissorneroriartigik.

Eqqaamavigit?

• Sooq Jehova unnersiutigissariaqarparput?

• Malakip nalaani palasit pilliutaat sooq Jehovap akuerisinnaanngilai?

• Jehova qanoq qujaniutinik pilliuteqarfigisinnaavarput?

• Pallorfiginninnermut ilumoortumut suna kajumilissutaasariaqarpa?

[Atuaqqissaarnermi apeqqutit]

[Qupp. 9-mi assiliartaq]

Malakip siulittuutaa ullutsinnut siulittuutaavoq

[Qupp. 10-mi assiliartaq]

Esauip illernartut pingaartinngilai

[Qupp. 11-mi assiliartaq]

Palasit inuinnaallu akuerineqarsinnaanngitsunik pilliuteqartarput

[Qupp. 12-mi assiliartaq]

Silarsuaq tamakkerlugu Jehovap Nalunaajaasui namminneq kajumissutsiminnik qujaniutinik pilliuteqartarput