Imarisai

Imarisai

Innarluutit atugaajunnaarpata

Innarluutit atugaajunnaarpata

 Innarluutit atugaajunnaarpata

TAKORLOORIARUK tappiitsut isigisut, tusilartut nipinnguit tamaasa tusaagaat, oqajuitsut qiimattarlutik erinarsortut tusiattullu erloqinatik angalaartut. Uani nakorsaatitigut siuariarsimaneq eqqartorneqanngilaq, Guutilliuna inuit iluaqutissaannut akulerunnerata kinguneri. Biibilimi neriorsuuteqarpoq: „Taava tappiitsut isaat uisitaassapput, tusilartut siutaat ammarneqassapput. Tusiattoq tuttorsuartut pissigarumaarpoq, oqajuitsuugaluaq qiimmattarluni appikkumaarpoq.“ (Esaja 35:5, 6) Qanorli qulakkeersinnaavarput siulittuut tupinnangaartoq tamanna piviusunngorumaartoq?

Tunngavissaq pingaarnerpaaq tassa Jiisusi nunamiikkallarami inuit nappaataannit anniaataannillu tamanik ajorunnaarsitsisarnera. Tupinnartuliaasa amerlanersaat amerlasuunit najuuffigineqartarput allaat akeraanit. Akerlilersuisut qulartut ajorunnaasitsinera minnerpaamik ataaseq ajortussarsiorfigalugu misissoqqissaarpaat. Ugguutigeqisaminnilli uppernarsiinnarpaat ilumut tupinnartuliorsimasoq. (Johannesi 9:1, 5-34) Kingusinnerusukkut Jiisusi assortugassaanngitsumik tupinnartulioqqimmat, assortuisut paatsiveerussimaarlutik oqarput: „Qanoq iliussaagut? Angut taanna amerlasuunik nalunaaqutiliortarpoq.“ (Johannesi 11:47) Inuit naliginnaasut paasitikkuminarnerupput Jiisusilu upperfigilerpaat. — Johannesi 2:23; 10:41, 42; 12:9-11.

Jiisusip tuppinnartuliai — nunarsuaq tamakkerlugu ajorunaarsitsinissamut takussutissat

Jiisusip tupinnartuliaasa takutiinnanngilaat Missiarsiusoq, Guutip ernera. Aamma Guutimut naalattut ajorunnaarsitaajumaarnerannik Biibilimi neriorsuutinik upperinninnissaannut tunngavissinneqarput. Tamanna siulittuummi Esajap allagaani kapitali 35-mi, allaaserisap aallaqqaataani issuarneqartuni ilaatigut erserpoq. Esaja 33:24-mi Guutimik mianerinnittut siunissami peqqinnissaat pillugu ima allassimasoqarpoq: „Innuttaasoq kinaluunniit oqassanngilaq: „Napparsimavunga!“ Neriorsuut assigusoq Saqqummersitat 21:4-mi allassimavoq: ’[Guutip]qulliit tamaasa isaannit allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq siulliit [ullumikkut misilinneqarnerit anniaatillu] peermata.’

Siulittuutit taakkua eqquunnissaat inuppassuit qinnutigikulasarpaat, Jiisusimmi ima qinunissatsinnik ilinniartippaatigut: „Naalagaaffiit tikiulli,  piumasat qilammisut nunamissaaq pili.“ (Matthæusi 6:10) Aap, Guutip piumasaa nunamut inuiannullu attuumassuteqarpoq. Nappaateqarnerup innarluuteqarnerullu akuerisaanerat nassuiaatissaqarpoq ungasinngitsukkulli peerneqartussaapput. Anniaatit Guutip ’isigaasa tummarfiat’ naassaanngitsumik kanngunarsassanngilaat. — Esaja 66:1. *

Ajorunnaarsitsineq annernanngitsoq akeqanngitsorlu

Inuit qanorluunniit nappaatillit Jiisusip ajorunnaarsittarpai annernanngitsumik, erngerlugit akeqanngitsumillu. Tupinnanngitsumik tusaamaneqarnera siaruapallapoq. Kinguninnguatigut „inuppassuit Jiisusi ornippaat nukillaarsimasut, tappiitsut, iloqiaat, oqajuitsut allarpassuillu aggiullugit. Jiisusillu isigaasa saavannut inissittarpaat, ajorunnaarsittarpaalu.“ Inuit qanoq qisuariarpat? Matthæusip takusani oqaluttuaralugit allappoq: „inuillu tupigusulerput takugamikkit oqajuitsut oqaluttut, iloqiaat ajorunnaarsimasut, nukillaarsimasut pisuttut, tappiitsullu tappissisut. Israelillu Guutia unnersiutigaat.“ — Matthæusi 15:30, 31.

Maluginiaruk Jiisusip napparsimasut ikittuinnaat kisiisa ajorunnaarsinniarlugit immikkoortiteqqissaanngikkai, soorlu ajorunnaarsitsisarnerartorpassuit taamaaliortartut. Naamik, napparsimasut ilaqutaasa ikinngutaasalu napparsimasortatik ’Jiisusip isigaasa saavannut inissittarpaat, ajorunnaarsittarpaalu.’ Jiisusip ajorunnaarsitsisimanerata ilamininngui misissorneroriartigik.

Tappiinneq: Taamaalluni Jiisusi Jerusalemimiilluni „inuk inunnguutsiminiilli tappiitsuusoq“ isigisaqalersipaa. Angut illoqarfimmi qinusartutut tappiitsutut ilisarisimaneqarmat, takorlooruminarpoq inuit qanoq tupigusutsigisimassasut angut isigisaqarluni pisuttoq takugamikku. Tamarmilli nuannaarutiginngilaat. Farisæerit ilaasa juutiussusermik aallaavillit nuimasut sunniuteqangaartullu Jiisusi uumigaat ajussusertik qulaarmagu. Maanna isumatsasimangaarlutik ajorunnaarsitsisarnera salloqittaanerinnaanerallugu uppernarsaatissarsiorfigilerpaat. (Johannesi 8:13, 42-44; 9:1, 6-31) Siullermik ajorunnaarsitaasimasoq tusarniaavigaat, taava angajoqqaavi ajorunnaarsitaasimasorlu uterfigeqqillugu. Narrujummissutigeqisaminnilli uppernarsiinnarpaat Jiisusi tupinnartuliorsimasoq. Pisuusaarnersuat eqqarsaataasalu ajussusiat tupigusuutigalugu ajorunnaarsitaasimasoq oqarpoq: „Tappiitsuulluni erniusup isaanik uisitsisumik siornatigut tusartoqanngisaannarsimavoq. Taanna Guutimit pisuunngikkuni qanoq iliorsinnaassanngilaq.“ (Johannesi 9:32, 33) Ammasumik silatusaartumillu uppernini oqaatigimmagu farisæerit „ajallugu anisippaat“. Qularnanngitsumik synagogimut iseqqittussaajunnaarsillugu. — Johannesi 9:22, 34.

Tusilartuuneq: Jiisusi Dekapolisimiitillugu, Jordanip kuussuata kangiani, tamaani najugallit ornippaat „tusilartoq oqalunneq sapingajattoq“ aggiullugu. (Markusi 7:31, 32) Jiisusip ajorunnaarsiinnanngilaa, tusilartorpassuilli allat assigalugit katersuussimasut akornanni ittoortumut nalliginninnini takutippaa. Biibilimi oqaluttuarineqarpoq ajorunnaarsinnginnerani ’Jiisusip inunnit nigortikkaa.’ Tassanissaaq isiginnittut „tupigusungaalerput oqarlutillu: „Suut tamaasa ajunngitsumik suliarai. Tusilartut tusaasinnaalersippai oqajuitsullu oqalulersillugit.“ — Markusi 7:33-37.

Nukillaarneq: Jiisusi Kapernaumimi pulaartilluni, angummik nukillaarsimasumik siniffimmi nalasumik akiartunit orninneqarpoq. (Matthæusi 9:2) Matthæusi 9:6- 8-mi pisimasoq allaatigineqarpoq: Jiisusip nukillaarsimasoq oqarfigaa: „Nikuillutit siniffiit tiguuk angerlarlutillu, nikuillunilu angerlarpoq. Inuit tamanna takugamikku ersilerput, Guutilu unnersiutigaat piginnaatitaaneq taamaattoq inunnut tunniussimammagu.“ Aammattaaq tupinnartuliat taakkua Jiisusip ajoqersugaanit akeraanillu najuuffigineqarput. Maluginiagassaavoq inuit uumiginnittuunngitsut paqumiginnittuunngitsullu takusatik pillugit ’Guuti unnersiutigigaat.’

Nappaatit: „Pupissoq Jiisusimut pivoq; seeqqumiarfigalugulu qinnuigaa oqarluni:  ’Piumaguit mingukkunnaarsissinnaavarma’. Jiisusip naakkitsaatingaaramiuk assani isatsillugu attorpaa oqarfigalugulu: ’Piumavunga, mingukkunnaarit!’ Erniinnarlu pupinnerata qimappaa.“ (Markusi 1:40-42) Maluginiaruk Jiisusip piuminaalluni ajorunnaarsinnginnamiuk kajumillunili, misiginneqataanermik ilumoortumik. Takorluulaariaruk pupissuullutit. Akiugassaanngitsumik takussunarsisitsiartuaartumillu inuiaqatigiinnilu ajattugaalersitsisartumik nappaateqarlutit tassanngaannaq annernanngitsumillu ajorunnaarsitaagaluaruit qanoq misigissagaluarpit? Paasiuminarpoq pupissoq alla tupinnartuliakkut ajorunaarsitaasoq ’Jiisusip isigaasa saavannut pallormat kiinnani nunamut tutsillugu qutsavigalugulu.’ — Lukasi 17:12-16.

Aqqunarnerit: Jiisusip tigusaannginnermini nappakkamullu kikiattugaannginnermini tupinnartuliaa kingulleq tassaavoq tigusarinnitsimi ilaat ajorunnaarsikkamiuk. Pipallalluni apustili Petrusip panani amoriarlugu „palasiunerup kiffaa panarpaa talerperlermik siutaarlugu.“ (Johannesi 18:3-5, 10) Lukasip iivangkiiliuani oqaluttuami assingusumi oqaluttuarineqarpoq Jiisusip ’kiffap siutaa attorlugu ajorunnaarsikkaa.’ (Lukasi 22:50, 51) Aamma tassani inuppalaartumik iliuuserisaq Jiisusip ikinngutaanit akerartortaanillu, matumani imminik tigusarinnittunit, najuuffigineqarpoq.

Paasinarsivoq Jiisusip tupinnartuliai misissorluarnerujartortillugit tatiginassusiinik uppernarsaatissaqarnerulernartartoq. (2 Timotheusi 3:16) Soorlu oqaatigineqareersoq Guutip inunnik naalattunik ajorunnaarsitsinissamik neriorsuutaata piviusunngorumaarneranik misissuinerit taamaattut uppernermik nakussatsiteqataasarput. Biibilimi nassuiarneqarpoq kristumiut uppernerat ’tassaasoq neriugisamik tatiginnilluinnarneq, takunngisamik qularuteqannginneq.’ (Hebræerit 11:1) Ersarippoq Guuti uppertitsiniaaginnaraniluunniit inornartunik kisaateqalersitsinianngitsoq uppernerli tunngavissaqarluartoq kissaatigigaa. (1 Johannesi 4:1) Upperneq taamaattoq ineriartortikkutsigu anersaakkut nukittunerulissaagut, peqqinnerulluta pilluarnerulerlutalu. — Matthæusi 5:3; Romamiut 10:17.

Anersaakkut ajorunnaarsitaaneq siulliuttariaqarpoq

Timikkut nappaatilippassuit nikallorsimapput, allaat ilaat neriuutaarussimanertik ajornartorsiutiminilluunniit artukkerneqarsimanertik pissutigalugit imminoriartarput. Neriuuteqannginneq anersaakkut innarluutaavoq tamannalu Guutip isaani timikkut innarluuteqarnermit ajornerungaarpoq. (Johannesi 9:41) Timikkulli innarluutilippassuit, soorlu Christian Juniorilu allaaserisap siuliani eqqaaneqartut, pilluarlutik siunertaqartumillu inuupput anersaakkut peqqikkamik neriorsuummillu tutsuiginartumik Biibilimeersumit nutaamik nukissaqalersinneqartaramik.

Pisariaqartitsineq uagutsinnut inunnut immikkut ilisarnaataasoq eqqarsaatigalugu Jiisusi oqarpoq: „Inuup timiusaannaq inuussutissarinngilaa, oqaaserli sunaluunniit Guutip qarnanit anisoq.“ (Matthæusi 4:4) Uumasullu assigiingissuterput tassaavoq uagut inuit inuuniarnerinnaq naammaginnginatsigu. Guuti ’assilillugu’ pinngortitaagatta anersaakkut inuussutissat, soorlu Guuti pillugu taassumalu siunertaani piumasaminillu naammassinninnissaani inissisimaffipput pillugu ilisimasaqarneq, pisariaqartippavut. (1 Mosesi 1:27; Johannesi 4:34) Guutimik ilisimasaqarnerup inuuneq siunertaqalersittarpaa anersaakkullu kajumissaataalluni. Taannami aamma nunami paratiisiusumi naassaanngitsumik inuunissamut tunngaviliivoq. Jiisusi oqarpoq: „Inuunerlu naassaanngitsoq tassaavoq ilinnik, ilumut kisimi Guutiusumik aallartitannillu Jiisusi-Kristusimik, ilisimanninneq.“ — Johannesi 17:3.

Maluginiagassaavoq Jiisusi „nakorsamik“ taaneqartanngimmat „ajoqersuisumilli.“ (Lukasi 3:12; 7:40) Sooq taama taaneqartarpa? Pissutigalugu inuit ajornartorsiutaannut aaqqiissutissatuaq eqqartoramiuk: Guutip naalagaaffia. (Lukasi 4:43; Johannesi 6:26, 27) Naalagaaffik Jiisusip qilammiit aqutassaa naalakkersuineruvoq. Nunarsuarmut tamarmut sunniuteqassaaq inuillu naapertuilluartut pissutsini nuannersuni peqqilluinnartunngornissaannik Biibilimi neriorsuutigineqartut tamaasa piviusunngortissallugit.  (Saqqummersitat 11:15) Taamaattuminguna Jiisusip qinnummini tusaamasaasumi Guutip piumasaa nunami maani pissappat Naalagaaffik tikiuttariaqarneraraa. — Matthæusi 6:10.

Innarluutilippassuit nikallorsimanerat neriuutip qiimmaallannartup tamatuma nuannaarninngortippaa. (Lukasi 6:21) Guutip nappaatit innarluutillu piiginnarnianngilai. Inuit anniaataannut pissutaasoq suujunnaarsinniarpaa, tassa ajortiliussuseq. Soorlu Esaja 33:24-mi Matthæusi 9:2-7-milu oqaatigineqareersoq ajorteqaratta naappaateqarpugut. (Romamiut 5:12) Ajorti peerneqarpat, kiisami inuit Guutip „qitornaasa kiffaanngissusiata naalannaataat“ nuannaarutigilissavaat, kiffaanngissuseq, eqqarsartaatsikkut timikkullu aamma naammalluinnartunngortitsisoq. — Romamiut 8:21.

Peqqissuseq taamaattussaannartut isigeqqajaanarsinnaavoq. Innarluutillit taama isumaqanngilat. Timimikkut misigaat inuunerup peqqissutsillu erlinagaassusiat, qanorlu sukkatigisumik suut tamarmik allanngoriataarsinnaanerat. (Oqaluussisartut oqaasii 9:11) Taamaattumik neriuutigaarput atuartartutta innarluutillit Biibilimi Guutip neriorsuutai nuanningaartut misissorluarumaaraat. Neriorsuutit piviusunngornissaannut Jiisusip inuunini qularnaveequtitut tunniuppaa. Pitsaanerusumik qularnaveequsiisoqarsinnaava? — Matthæusi 8:16, 17; Johannesi 3:16.  (wE 5/1 02)

[Quppernerup ataani ilanngussaq]

^ imm. 6 Guutip anniaatinut akuersisimanera pillugu sukumiinerusumik atuagassiaaqqami Guutip ilumut soqutigaatigut?-mi atuarneqarsinnaavoq. Jehovap Nalunaajaasuinit saqqummersinneqartoq.