Imarisai

Imarisai

Kiserliorunnaarsinnaavutit

Kiserliorunnaarsinnaavutit

 Kiserliorunnaarsinnaavutit

„UUMMAT kiserliortoq anorimit iluneqarsimasutut ittarami, uummat kiserliortoq anorimit parnutsinneqartarpoq.“ Soorlu taalliortup Irlandimiup William Butler Yeats-ip oqaasiisa taakkua takutikkaat inuup misigissusii ilorlerpaat kiserliornerup sunnersinnaavai.

Kina oqarsinnaava kiserliornerup annernartua misigisimanagu? Uagutsinnik kiserliortitsisinnaasut amerlaqaat. Ingammilli arnat ukiuni arlalinni aappaqanngereerlutik imaluunniit uillarnerullutik avinnerullutilluunniit kiserliorujussualersinnaapput.

Kristumiu arnaq inuusuttoq Francesimik atilik oqaluttuarpoq: „23-nik ukioqarlunga paasivara ikinngutikka tamarmik katissimasut kisimalu kisimiittuulersunga.“ * Kiserngorulluni misigineq ukiut ingerlaneranni sakkortunerulersinnaavoq katinnissamullu periarfissaarukkiartorsorinarsisarluni. Sandra 50-iliingajalersoq oqarpoq „aappaqanngittuaannarnissani isumanginngisaannarlugu, sulilu katikkusulluni.“ Angela 50-it missaanni ukiulik oqaluttuarpoq: „Kisimiittuujuarnissara aalajangiusimanngikkaluarpara, taamaaginnarporli. Specialpioneritut angalaarfigisalikkanni qatanngutit angutit ikittuararsuupput.“

Kristumiut arnarpassuit katissimanngillat Jehovap taamaallaat „Naalakkami“ katinnissamik siunnersuutaanut ilumoorusukkamik, nersortariaqaqaallu. (1 Korinthimiut 7:39) Ilaasa kisimiittuunertik iluarusuutigeqaat, allalli piffissap ingerlanerani katinnissartik meerartaarnissartillu kissaatiginerujartuinnalersinnaavaat. „Aappaqannginnerup sumunnaraluaruma sumiikkaluarumalu misigissusiiartutut illunga malersorpaanga,“ Sandrap oqaluttuuppaatigut.

Pissutaasut allat, assersuutigalugu angajoqqaanik utoqqalisunik isumassuineq, kiserliornerulersitsisinnaavoq. „Katinneqannginnama ilaquttama naatsorsuutigaat angajoqqaavut utoqqalisut paarissagikka,“ Sandra oqarpoq. „Qatanngutigiit arfineq-marluugaluarluta angajoqqaakka ukiuni 20-ni akisussaaffigineruakka. Oqinnerungaarsimassagaluarpoq ueqarsimasuuguma aamma uanga soqutigisannik eqqarsaatiginnittumik.“

Frances allamik taasaqaqqippoq kiserliornerulersitsisumik. „Ilaanni toqqaannartumik aperineqartarpunga: ’Sooruna katinnianngitsutit?’ Taamatut oqarnerup misigitittarpaanga kisimiittuunera nammineq pisuussutigigiga. Katittorsioqataanikka tamangajaasa taamatut aperisoqassanersoq siooragisarpara: ’Qaa,qaqugu illit tullinnguutissagavit?’ Ima eqqarsartarpunga: ’Qatanngutit angutit anersaakkut pingaartitsisut soqutiginngippannga, taava immaqa kristumiutut eqqortunik pissuseqarsimassanngilanga, imaluunniit kajungernanngilluinnarlunga.’“

 Qanoq kiserliorunnaartoqarsinnaava? Allat ikiuiniarlutik iliuuseqarsinnaappat, taamaassappat qanoq?

Jehova tatigiuk

Tussiaasiortoq erinarsorpoq: „Nanertuutigisat Jehovamut tunniuguk, taava isumagiumaarpaatit. Iluartoq patajatinngisaannassavaa“ (Tussiaat 55:23) Oqaaseq „nanertuutigisaq“ taallani hebræerisuuni toqqaannartumik isumaqarpoq „agguagarsiaq“, eqqarsaatigineqarluni inuunitsinni atukkatsinnik pissuteqartunik aliasuuteqarlutalu isumakuluuteqartarnerput. Jehovap allanit tamanit nanertuutigisat taakkua arajutsisimannginneruai, nammassinnaanngortillugit nakussatsissinnaavaatigut. Taamatorluinnaq Angelap kiserliornermut akiuunnermini Jehova Guutimut tatiginninnini iluaqutigaa. Piffissaq tamaat oqaluussisartutut kiffartornini eqqaavaa oqarlunilu: „Pioneritut aallartikkama oqaluusseqatigisartagaralu ilagiinnut qaninnernut ungasissumi najugaqarpugut. Jehovap tatigilluinnarnissaa ilikkarparput, tatiginninnerlu tamanna taamanimiilli iluaqutigaara. Ajortunik eqqarsaateqaleraangama Jehova oqaloqatigisarpara ikiortarpaangalu. Tussiaat 23 tamatigut tuppallersaatigingaartarpara atuakulasarlugulu.“

Apustili Paulusi ersutaminik nanertuuteqangaartarsimavoq. Minnerpaamik pingasoriarluni ’Naalagaq qinnuigisarpaa taanna imminit peersitaaqqullugu’. Paulusip nanertuutigisaa tupinnartuliornikkut peerneqarneq ajorpoq, Guutilli ajunngissusianik pisassarinngisaraluaminik neriuuteqarnerata napatittarpaa. (2 Korinthimiut 12:7-9) Paulusip nalerisimaarnissani aamma ilikkarpaa. Kingusinnerusukkut allappoq: „Tamanik misilittagaqareerpunga — qaarsilaarnermik kaannermillu, peqangaarnermik ajorsaateqarnermillu. Tamaasa pissatsitsisikkut atussallugit sapinngilakka.“ (Filippimiut 4:12, 13)

Nikallugagaanni kiserlioraanniluunniit Guutimit nakussatsinneqarneq qanoq pineqarsinnaava? Paulusi allappoq: „Sumilluunniit isumakuluuteqarnaveeritsi, kissaatigisasili qanoq ittukkulluunniit Guutimut saqqummiuttarsigit qinullusi torlulallusilu qujallusilu. Taava eqqissinerup Guutimit pisup siuneqassusernit tamanit annerungaartup uummatisi eqqarsaatisilu sernigissavai Kristusi-Jiisusimi.“ (Filippimiut 4:6, 7) Sandrap siunnersuut tamanna maleruarlugu timitalerpaa. Nassuiaavoq: „Aappaqannginnama kisimiikulavunga. Tamatuma Jehovamut qinunissamut periarfissarissaartippaanga. Misigaanga qanittumik attavigalugu ajornartorsiutinnik nuannaarutinnillu oqaloqatigisinnaallugu.“ Francesilu oqarpoq: „Eqqarsaatit ajortut nammineq akiorniassagaluarukkit aliasuttuaannassagaluarpunga. Jehova misigissutsikka pillugit ammasumik oqaluttuussinnaagakku iluaqutigeqaara. Qularutiginngilara Jehovap anersaakkut misigissutsikkullu peqqissutsinnut sunniisinnaasut suulluunniit soqutigigai.“ — 1 Timotheusi 5:5.

„Nanertuutigisassinnik ersoqatigiigitsi“

Qatanngutigiinni kristumiuni nanertuutigisat kisimiilluni ersuttariaqanngillat. Apustili Paulusi kajumissaarivoq: „Nanertuutigisassinnik ersoqatigiigitsi, taamaaliornikkut Kristusip inatsisaa naammassiumaarassiuk.“ (Galatiamiut 6:2) Uppeqatitta katerisimaaqatiginerini „qiimmassaalluni oqaaserisat“ tusarsinnaavavut kiserliornermi nanertuutigisanik oqinnerulersitsisinnaasut. — Ussatit 12:25.

Aamma eqqarsaatigiuk eqqartuussisup israelikkuusup Jeftap pania pillugu Biibilimi allassimasoq. Jeftap Ammonip sakkutuui akeqqersimaartut ajugaaffigitinnagit Jehova neriorsorpaa uteruni parsiarluni illuminit anisoq siulleq Jehovamut tunniunniarlugu. Pania siulliulluni anivoq. (Eqqartuussisut 11:30, 31, 34-36) Tamanna isumaqarpoq pania katinngisaannassasoq ilaqutaqarusunninilu pissusissamisoortoq tunuartittariaqaraa, paniatali nammineq piumassutsiminik Jeftap neriorsuutaa piviusunngortippaa inuunermilu sinnera Silomi illernartuutiliami kiffartorluni. Pilliut tamanna pingaaruteqannginnami? Naamerluinnaq: „Kingorna Israelimi ileqquulerpoq arnat Israelikkuusut ukiut tamaasa ulluni sisamani upikkiartortarnerat Jeftap Gileadimiup pania upputigalugu.“ (Eqqartuussisut 11:40) Aap, kisimiittut pingaartinneratigut qiimmassarsinnaavavut. Taamaattumik taamaaliornissarput puiunngisaannartigu.

Aammattaaq ajussanngeqaaq Jiisusip maligassiaanik eqqarsaatiginninnissaq. Juutinut  angutinut nalinginnaasimanngilaq arnanik oqaloqateqartarneq, Jiisusilli Mariap Martallu ilaginissaat piffissaqarfigisarpaa. Kisimiittuusimagunarput, immaqaluunniit uillarnerullutik. Jiisusip siunertarilluinnarpaa taakkunannga ikinnguteqarnini anersaakkut iluaqutissarsiffigissagaat. (Lukasi 10:38-42) Anersaakkut qatanngutinik arnanik kisimiittunik qaaqqusinissatsinnik angalaaqateqarnissatsinnillu eqqaamanninnitsigut Jiisusip maligassiaa ilaarsinnaavarput. (Romamiut 12:13) Taamatut soqutigineqarnertik pingaartippaat? Qatanngut arnaq oqarpoq: „Nalunngilara ikinngutit nuannarigaannga pingaartillungalu, inuttulli soqutigineqarnerugaangama nuannaartarpunga.“

„Ilaqutaqannginnatta,“ Sandra nassuiaavoq, „asaneqarnissarput anersaakkullu ilaqutariissuarnut ilaanitta misiginissaa pisariaqartinneruarput.“ Soorunami Jehovap aamma kisimiittut nuannarai, suleqatigisarparpullu kissaatigineqartutut asaneqartutullu misigitikkaangatsigit. (1 Petrusi 5:6, 7) Isumassuineq taamaattoq malugineqanngitsoorsinnaanngilaq, ’piitsumik ikiuisoq [Jehovamut] taarsigassarsisitsisuummat, [Jehovallu] taarsiiffigissammagu ajunngitsuliornerata taamaaqataanik.’ — Ussatit 19:17.

„Kialuunniit . . . nammagassani nammineq nammassavaa“

Naak allat ikiuillutillu tapersersuillutik qiimmassaasinnaagaluartut kialuunniit „nammagassani nammineq nammassavaa.“ (Galatiamiut 6:5). Kiserliorluni nanertuutigisaqaraanni navianartunik eqqumaffigisassaqarnarpoq. Misigissutsivut annittanngikkutsigit kiserliortorujussuanngorsinnaavugut. Aappaatigulli asanninnerup kiserliorunnaartissinnaavaatigut. (1 Korinthimiut 13:7, 8) Pillualersitsisinnaasut pitsaanerpaat tassaapput allanik tunisineq aveqateqarnerlu — atukkavut qanoq ikkaluarpataluunniit. (Apustilit Suliaat 20:35) „Kiserliornerma eqqarsaatiginissaanut piffissaqanngingajavippunga,“ qatanngut arnaq pioneri eqiasuitsoq oqarpoq. „Ulapikkaangama iluaqutaasutullu misigigaangama kiserliorunnaartarpunga.“

Sianigisariaqarparputtaaq kiserliornermit ajortunik ikinngutissarsiulinnginnissarput. Qanoq alianartigissagaluarpa katikkusunnerup uppinngitsumut katinnermi ajornartorsiutaalersussarpassuarnut tappiillisippatigut. Alianangaassagaluarpoq kissaatip tamatuma ‘uppinngitsunik uniaqatiginninnginnissamik’ Biibilimi siunnersuut sumiginnartippagu! (2 Korinthimiut 6:14) Kristumiu arnaq avinneq oqarpoq: „Kisimiittuunermit ajornerusoqarpoq. Tassa eqqunngitsumik katitaqarneq.“

Ajornartorsiutit aaqqiissutissarsineqarsinnaanngitsut naammagittarfigineqarallartariaqarput. Guutip ikiuineratigut qasusuilluni kiserliortoqarsinnaavoq. Qanortoq Jehova kiffartuuttuartillugu qularinngikkisigu pisariaqartitavut tamarmik ullut ilaanni pitsaanerpaamik matussutissinneqarumaartut. (Tussiaat 145:16). (wE 03/15 02)

[Quppernerup ataani ilanngussaq]

^ imm. 4 Arnat atii allanngortitaapput.

[Qupp. 28-mi assiliartaq]

Tunisiumatunikkut allanillu aveqateqarnikkut kiserliorunnaartoqarsinnaavoq