Atuartartut apeqqutaat

Ilumoorpa oqassalluni Jehovap naapertuilluarnera naakkinninneranit „sallaannerulersinneqartoq“?

„Naapertuilluarneq“ „eqqortuliornerlu“ qanittumik ataqatigiipput Biibilimilu ataatsikkut atorneqakulasarlutik.

Oqaaseq hebræerisooq „naapertuilluarneq“-mik nutserneqartoq unneqqarissusermik assuarnaassusermillu isumaqarpoq,oqaaserlu eqqartuussutip inernerata oqaatigineqarnerani atorneqakulasarluni. Oqaaseq „eqqortuliorneq“ inatsisinut attuumassuseqarpaluttoq ilaatigut „eqqartuussisut aalajangigaannik“ „eqqartuussummillu“ nutserneqartarpoq. Oqaatigineqaraangat Jehova ’eqqortuliortoq’, pillarneqartussanik pillaanera imaluunniit annaanneqartussanik annaassinera pineqarsinnaavoq. (1 Mosesi 18:20-32; Esaja 56:1; Malaki 3:20) Taamaattumik oqaatigineqarsinnaanngilaq Jehovap naapertuilluarnera sukangasuusoq, sallaannerulersinneqartariaqartorlu.

Oqaaseq hebræerisooq „nallittuineq“-mik nutserneqartoq isumaqarsinnaavoq pillaanissamik tunuarsimaarallarneq, aammali misiginneqataalluni naalliuttunik ikiuinikkut iluaqutaasumik iliuuseqarneq pineqarsinnaavoq. — 5 Mosesi 10:18; Lukasi 10:29-37.

Jehova Guuti naapertuilluartuuvoq naakkinnittuullunilu. (2 Mosesi 34:6, 7; 5 Mosesi 32:4; Tussiaat 145:9) Naapertuilluartuuneq naakkinninnerlu naammalluinnartumik piginnaanerai, piginnaanerilu peqatigiilluartuupput. (Tussiaat 116:5; Hosea 2:21) Piginnaanerit taakku marluk naammalluinnartumik oqimaaqatigeeqqissaarlutik imminnut tapertariipput. Oqaraanni Jehovap naapertuilluarnera naakkinninneranit sakkukillineqartoq sallaannerulersinneqartorluunniit, aamma oqaatigineqartariaqarpoq naakkinninnera naapertuilluarneranit sakkukillineqarluni sallaannerulersinneqartoq.

Esaja siulittuilluni oqarpoq: „Jehovalli qilanaaraa ilissinnik saammaassinissani,nikuikkumaarpoq nallittorumallusi. Jehovami Guutiuvoq naapertuilluartoq.“ (Esaja 30:18, NV) Uani Esajap takutippaa Jehova naapertuilluassusermik paasisimasaqarluni naakkinnittuliortoq; oqaatigineqanngilaq Jehovap naakkinninnerata naapertuilluarnera sallaassisikkaa tunuarsimaartikkaaluunniit. Jehova naakkinnittarpoq naapertuilluartuulluni asannittuugami.

Ilumoorpoq Biibilimik allaqataasoq Jaaku allammat: „Naakkittarnerup eqqartuussut ajugaasimaarutigaa.“ (Jaaku 2:13b) Versinili eqqaaniittuni Jaakup Jehova allaaserinngilaa, kristumiut naakkinninnermik takutitsisut allaaserai — assersuutigalugu piitsunut naalliuttunullu. (Jaaku 1:27; 2:1-9) Naakkinnittut taamaattut Jehovamut eqqartuussassanngorpata, iluuserisaat naatsorsuutigissavai naakkinnillunilu isumakkeerfigiumaarpai ernermi pilliutaa tunngavigalugu. Taamaalillutik naakkinnittuliorneri eqqartuunneqarnissaraluamut ajugaasimaarput ajugaallutilluunniit. — Ussatit 14:21; Matthæusi 5:7; 6:12; 7:2.

Taamaattumik eqqunngilaq oqassalluni Jehovap eqqartuussutaa naapertuilluartoq naakkinninneranit sallaassisinneqartoq (sakkukillineqartorluunniit) — soorlu naapertuilluarnera naakkinninnermit sallaassisinneqartariaqartoq. Piginnaassutsit taakku marluk Jehovami naammalluinnartumik oqimaaqatigiipput — oqimaaqatigeeqqissaarput. Oqimaaqatigiipput, soorlu Jehovap piginnaaneri allat, assersuutigalugu asanninnera ilisimatuuneralu, oqimaaqatigiittut. (wE 03/01 02)