Imarisai

Imarisai

Nalunngeqatiginnissutsit sernissoruk

Nalunngeqatiginnissutsit sernissoruk

 Nalunngeqatiginnissutsit sernissoruk

TIMMISARTUMUT qarasaasiamut kukkusumik toraagassinneqarsimasumut ilaanissaq eqqarsaatigissallugu annilaarnartuuvoq. Taava timmisartup aquutaanut tunngasut qarasaasiaaluunniit piaaraluni peqquserluttumik allanngortinneqarsimasoq takorlooruk. Kinaassusillip aalajangersimasup nalunngeqatiginnissuserput taamatut sunnerniarsaraa. Ileqqussatigut aquuterput ajoquserniarlugu nakutitsiniarsarivoq. Guutip aqqutigeqqusaanut akerliusumik ingerlanissarput siunertaraa. — Jobi 2:2-5; Johannesi 8:44.

Kinaassusilik ajortoq taanna kinaagami? Biibilimi oqaatigineqartutut tassaavoq „pulateriaarsutoqaq Diaavulumik Saatanimillu taaneqartoq silarsuarmik tamarmik tammartitsiniartoq“. (Saqqummersitat 12:9) Naatsiivimmi Edenimi saqqummeqqaarpoq, peqqusersuullunilu Eva eqqortup akerlianik iliuuseqarnissamut akuersitillugu, tassa Guutimut pikititsisillugu. (1 Mosesi 3:1-6, 16-19) Tamatuma kingorna kattuffiit tammarsaarisut atorlugit peqqusersiorluni inuiaat Guutimut akerlilersuisunngortinniarsarai. Eqqunngitsumik upperisarsiorneq kattuffiit assuarnarnerpaartaraat. — 2 Korinthimiut 11:14, 15.

Eqqunngitsumik upperisarsiornerup nalunngeqatiginnissuseq ajortunngortittarpaa

Atuakkap Biibilimiittup Saqqummersitat-nik taaneqartup eqqunngitsumik upperisarsiorneq arnamut atortittartumut assersuuppaa, Babylonersuarmik taaguutilittut taallugu. Ajoqersuutaata inuppassuit ileqqussatigut paasinnittaasiat ajortunngortittarpaat allaallu allanik upperisalinnut uumissuilersitsillunilu nakuuserfiginnilersitsisarpoq. Saqqummersitat naapertorlugit eqqunngitsumik upperisarsiorneq Guutimit ’nunarsuarmi toqutaasimasut tamarmik aavanut’ pingaarnertut akisussaatinneqarpoq. — Saqqummersitat 7:1-6; 18:3, 24.

Jiisusip ajoqersukkani mianersoqquvai ileqqussatigut najoqqutassiat mumisinniarlugit eqqunngitsumik upperisarsiorneq qanoq ingasatsigisumik iliuuseqarumaartoq, oqarami: „Ullut nalliukkumaarput ilissinnik toqutsisut isumaqalerfissaat taamaaliornermikkut Guuti kiffartuullugu.“ Taamaaliortut nalunanngitsumik ileqqussatigut taarsiortuupput. Jiisusi nangilluni oqarpoq: ’Ataatarluunniit uangaluunniit ilisimanngilaatigut.’ (Johannesi 16:2, 3) Jiisusi taamatut oqariitsiarluni upperisarsiornikkut siuttut peqqusineratigut toqutaavoq, pinerluttuliorniarnerallu nalunngeqatiginnissusiannit unitsinneqarunanngilaq. (Johannesi 11:47-50) Tamatumunnga akerliusumik Jiisusi oqarpoq ajoqersugaasa ilumoortut asaqatigiinneq ilisarnaatigissagaat. Asannittuunerusariaqarpulli, akeqqattaaq asaneqartussaapput. — Matthæusi 5:44-48; Johannesi 13:35.

Eqqunngitsumik upperisarsiorneq, ileqqorissaarneq ileqqorlunnerluunniit eqqarsaatigalugit, nuannarineqartut qujanarniarfigineratigut amerlasuut nalunngeqatiginnissusiannik ajortunngortitsivoq. Tamanna Paulusip ima siulittuutigaa:  „Ullussani nalliuttussani inuit ajoqersuut peqqissinartoq naammagiunnaarumaarpaat, namminneq iluarisaminnik amerlaqisunik ajoqersuisussarsiumaarput siutimik tusarnarisaat tunngavigalugu.“ — 2 Timotheusi 4:3.

Nalitsinni upperisarsiornikkut siuttut inuit tusarnarisaat ajoqersuutigisarpaat oqarlutik katissimanani kinguaassiuutigut atoqateqarneq Guutimit akuerineqarsinnaasoq, ilaallu isumaqarput angutit imminnut arnallu imminnut atoqatigiinnerat ilaginnarneqarsinnaasoq. Aap, allaat palasit ilaat anguteqatinoortarput. Tuluit aviisiat The Times napertorlugu „palasit 13-nit anguteqatinoortartutut ilisimaneqartut“ tuluit oqaluffiisa ilagiivini isumalioqatigiissitanut qinigaasimapput. Palasit Biibilimi ileqqussatigut najoqqutassianik sumiginnaappata oqaluffimminnillu ilaginnarneqarlutik, taava ilagiit ilaasortaasa qanoq ittunik najoqqutassaqarnissartik naatsorsuutigisinnaavaat? Tupinnanngitsumik millionillit paatsiveerulluinnarsimasutut misigipput.

Ajunnginnerungaanngila Biibilimi ileqqussatigut najoqqutassianit anersaakkullu sallusuissutsip qaamarnganit siulersorneqarluni! (Tussiaatit 43:3; Johannesi 17:17) Assersuutigalugu Biibilimi ajoqersuutigineqartutut kinguaassiuutitigut inuunerluttut allasiortulluunniit „Guutip naalagaaffia kingornussarsiarissanngilaat.“ (1 Korinthimiut 6:9, 10) Takutippaa angutit arnallu ’atoqatigiinneq pinngortitaanermi pissuserititaasoq pissuserititaanngitsumik taarseraat’, Guutip isaani kannguttaallutik’. (Romamiut 1:26, 27, 32) Ileqqussatigut sallusuissutit taakku inunnit naammalluinnanngitsunit isumassarsiaanngillat; tassaapput najoqqutassat Guutimit anersaarfigineqartut, atorunnaarsinneqarsimanngillallu. (Galatiamiut 1:8; 2 Timotheusi 3:16) Saatanilli aamma periaatsit allat atorlugit inuit nalunngeqatiginnissusiat ajortunngorsarniarsaraa.

Isumatusaarlutit aliikkutassarsiorit

Pinngitsaaliilluni eqqunngitsuliortitsisoqarsinnaavoq, eqqunngitsuliorusussuseqalersitsinerli allaavoq. Tamannalu Saatanip, ’silarsuup naalagaata’, anguniagaraa. Eqqarsaatiminik ajorsilluinnarsimasunik uppiasut misilittagakitsullu isumaat uummataallu sunnerniarlugit — pingaartumik inuusuttut eqqortiasut — atuakkat nalorninartut, filmit, nipilersorneq, qarasaasiakkut pinnguaatit internetimilu tiingasulersaarutit sakkugisarpai. — Johannesi 14:30; Efesosimiut 2:2.

„Missingerneqarsimavoq [USA-mi] inuusuttut isiginnaagassiat nakuusernertallit ukiumut 10.000-t missaat takusaraat,“ nalunaarusiami atuagassiami pediatrics-imiittumi allassimavoq, „meeqqanullu aallakaatitassiat peqqarniinnerpaajullutik“. Nalunaarusiap ersersippaattaq „inuusuttuaqqat isiginnaagassiat ilaat ukiumut 15.000-it missaat tiingasulersaarutinik, kanngunartunik tusangiasaarinernik aamma kanngunangajattunik quiasaarinernik imallit isiginnaartaraat“. Allaat piffissami aallakaatitsivigisartakkami pitsaanerpaami nalunaaquttap-akunneranut isiginnaagassiat ilaat ikinnerpaamik arfineq-pingasunik tiingasulersaarutitallit aallakaatinneqartarput, tamannalu 1976-imut sanilliullugu sisamariaammik amerleriarneruvoq. Tupinnanngilaq  misissuinerup „oqaatsit kannguttaalliartuinnarnerat“ ersersimmagu. Biibilip ilisimatuussutsikkullu misissuinerit ersersippaat taamatut sunnerneqarneq inunnik ajoqusiisartoq. Ilumoorlutit Jehovap iluarisaanik iliorusukkuit namminerlu iluaqutigalugu, taava Ussatit 4:23-mi allassimasoq malugiuk: „Paarisassannit tamanit annermik uummatit paariuk inuuneq tassannga aallaaveqarmat.“ — Esaja 48:17.

Aamma nipilersuutit nutaaliat ilarpassui nalunngeqatiginnissummik ajortunngortitseqataasarput. Erinarsortartoq nunani killerni amerlasuuni nuannarineqangaartoq „quarsaartitsiniarluni immikkut iliuuseqartarpoq“, Australiami aviisi The Sunday Mail allappoq. Allaaserineqarpoq erinarsugaasa „sunnertisimanartut, qanigilluinnakkamik atoqateqarneq, pinngitsaaliillunilu atoqateqarneq unnersiutigisaraat“. Ilaasa taallaraat „nuliamik qanoq toqutsisinnaaneq timaanillu tatsimut igitsineq“. Taallaasa ilaat maani taassallugit maajunnarpallaarput. Nipilersortarninili ataqqisaasutut nersornaatisiaqaatigaa. Isummat uummatillu eqqarsaatinik aserorsaataasunik taamaattunik immersorusuppigit, taallarineqaannarneri pissutigiinnarlugu? Taamaakkunanngilaq, taamaaliortummi nalunngeqatiginnissusertik mingutsittarpaat naggataatigullu „ajortumik uummateqalerlutik“ Guutimut akeranngortarlutik. — Hebræerit 3:12; Matthæusi 12:33-35.

Taamaattumik isumatusaarlutit aliikkutassarsiorit. Biibilimi kajumissaarneqarpugut: „Pingaartissigit suut ilumoortut tamaasa, suut assuarnaatsut, suut iluartut, suut minguitsut, suut asanartut, suut ajunngitsumik oqaatigineqarsinnaasut, tassa suut ajunngitsut nersornartullu.“ — Filippimiut 4:8.

Nalunngeqatiginnissuseq ilagisartakkanit sunnerneqartarpoq

Neil aamma Franz meeraagallaramik ikinngutitik kristumiuusut ilagerusuttarpaat. * Piffissalli ingerlanerani „ikinngutipalaaqalerpunga“, Neil oqaluttuarpoq. Alianartumik pinerlunnermik parnaarussaanermillu kinguneqarpoq. Franz taamatorluinnaq oqaluttuarsinnaavoq. „Isumaqaraluarpunga silamiunit sunnerneqarnanga ilagisinnaallugit,“ aliasuppalulluni oqaluttuarpoq. „Kisianni Paulusip Galatiamiunut allagaani 6:7-mi allassimavoq: ’Tammaqinasi! Guuti mitaatigeqqunngilaq. Inuup siaruartikkani aamma katersorumaarpai’. Atugarliungaarnikkut kukkusumik isumaqarnera Jehovallu ilumoornera paasivara. Iliuuserisimasara pillugu inuunera tamaat parnaarussassanngortitaavunga.“

Inuusuttut ullormiit ullormut pinerluttunngortanngillat. Inuppassuit namminneq pinerluttunngorsinnaanertik eqqarsaatigisinnaanngilaalluunniit. Soorlu Neilimi Frantzimilu pisimasoq, ikinngutipalaaqarnermik aallartittarpoq. (1 Korinthimiut 15:33) Tamatuma kingornagut ikiaroornartumik imigassamillu atornerluisoqalersinnaavoq. Nalunngeqatiginnissut eqqorluartumik taaneqarsimavoq „kinaassutsip ilaa imigassamit arrortinneqarsinnaasoq“. Tamaanngaanniit pinerluttalernissamut imaluunniit kanngunartuliornissamut alloriarnissaq qanittuararsuuvoq.

 Taavami sooq alloriarneq siulleq alloriassaviuk? Taamaaliornak Guutimik asannittut ilagisakkit. Aqqutikkut eqqortukkut ingerlaqqullutit nalunngeqatiginnissutsivit nakussassarnissaanut ikiussavaatsit anniaaterpassuarnillu aniguisillutit. (Ussatit 13:20) Neil Franzilu suli parnaarussivimmiipput, maannali nalunngeqatiginnissut Guutimit tunissutaasutut eqqortumik ilinniartinneqaannarani sernissorneqartariaqartutulli isigaat. Aamma Guutiminnut, Jehovamut, qanittumik ikinngutaalernissartik sulissutigaat. Taamaattumik silatusaarit, kukkunerattulli kukkuniaqinak. — Ussatit 22:3.

Nalunngeqatiginnissutsit sernissoruk

Guutimut uppernermik asanninnermillu ineriartortitsinikkut, Jehovallu iluarinngisaanik iliuuseqarusunnginnermik ersersitsinikkut nalunngeqatiginnissusitsinnik sernissuijuarnerput takutissavarput. (Ussatit 8:13; 1 Johannesi 5:3) Biibilimi erseqqissarneqarpoq nalunngeqatiginnissuseq taakkuninnga sunnerneqanngitsoq, amerlasuutigut ileqqussatigut aalajaassuseqartanngitsoq. Assersuutigalugu Tussiaat 14:1-mi allassimasutut uummatimikkut oqartarput: „[Jehovaqanngilaq].“ Nalunngeqatiginnissusiat uppissuseqannginnerannit qanoq sunnerneqartarpa? Versimi nangilluni allassimavoq: „Ajortumik maajunnartumillu iliorput.“

Inuit Guutimut uppinngitsut pitsaanerusumik siunissaqalernissamik qularnaatsumik neriuuteqanngillat. Siunissaq eqqarsaatiginagu inuupput uinikkut pilerigisatik naammassiniarlugit. Inuunermik isumaliutersuutaat tassaavoq: „Nerillutalu erngutiinnarniarta, aqagu toqussagatta!“ (1 Korinthimiut 15:32.) Akerlianik inuunerup naassaanngitsup pilluaqqussutaanik aallussisut silarsuup matuma nuannaarniutaannit qaangiutiasunit tammartitaanngillat. Qarasaasiatut ima eqqorluartigisutut sumiissusersiutigineqarsinnaasutut nalunngeqatiginnissutsip ilinniartitaasup Guutimut ilumoortuartissavai naalattuartissallugillu. — Filippimiut 3:8.

Nalunngeqatiginnissutsit nakussatsinneqartuassappat eqqorluartuujuassappallu Guutip oqaasianit siunnersorneqartuartariaqarputit. Biibilimi oqariaaseq kusanartoq atorlugu taamatut siunnersuuteqarnerarpaa ima allassimagami: „Nammineq siutinnik tusassavat tununnit oqaaseq: ’Aajuna aqqusineq, taanna ingerlavigissavarsi!’ Talerpimmukarumavusimi saamimmukarumallusilu.“ (Esaja 30:21) Taamaattumik Biibilip ullut tamaasa atuartarnissaanut piffissaqartarit. Eqqortumik iliorniarlutit tamaviaarninni, imaluunniit ersileraangavit annilaangaleraangavillu nakussatsillutit qiimmassassavaatit. Jehova iluunngarlutit tatigigukku ileqqussatigut anersaakkullu siulersussagaatit qularutiginngilluinnaruk. Aap, tussiaasiortutut iliorit: „[Jehova] takkunniitittuaannarpara, taanna talerpimma tungaaniippoq, patajalernavianngilangalu.“ — Tussiaat 16:8; 55:22. (wE 11/1 01)

[Quppernerup ataani ilanngussaq]

^ imm. 16 Atit allanngortitaapput.

[Qupp. 5-mi assiliartat]

Upperisarsiorneq eqqunngitsoq, Biibilimi Babylonersuarmik taaneqartoq, amerlasuut nalunngeqatiginnissutsikkut sianigisaarukkiartornerannut pisuuvoq

[Suminngaanneernera]

Palasi sakkutuunik pilluaqqusisoq: U.S. Army photo

[Qupp. 6-mi assiliartaq]

Nakuusertunik kanngunartuliortunillu isiginnaartarnerup nalunngeqatiginnissuseq mingutsissinnaavaa

[Qupp. 7-mi assiliartaq]

Guutip oqaasianit aalajangersimasumik siunnersorneqartarnerup nalunngeqatiginnissuserput sernissussavaa