Imarisai

Imarisai

Uummatit paariuk!

Uummatit paariuk!

 Uummatit paariuk!

„Paarisassannit tamanit annermik uummatit paariuk inuuneq tassannga aallaaveqarmat.“ — Ussatit 4:23.

1, 2. Sooq uummaterput paarisariaqarparput?

ANGUT utoqqaq Caribiami qeqertat ilaanni anorersuarujussuareermat oqquiffimminit anivoq. Aserukkat misissoramigit takuaa orperujussuaq ukiuni qulikkuutaani illumi isaariaata saaniittoq uppissimasoq. ’Orpiit minnerit eqqaaniittut uppissimanngimmata qanoq taamaattoqarsinnaava?’ eqqarsarpoq. Manngua takuinnarlugu nalunanngilaq. Orpiup aalajaappasissuugaluartup ilua asiusimavoq, anorersuullu asiujartorsimanera takutiinnarpaa.

2 Jehovamik pallorfiginnittut ilaat kristumiutut inooriaatsimik aalajangiussisimarpasissoq uppernermigut misilinneqarluni ilumuunngitsooraangat alianartaqaaq. Biibilimi eqqortumik allassimavoq „inuit inuusunnerminniit ajortuinnarmik eqqarsaateqartut“. (1 Mosesi 8:21) Tamanna isumaqarpoq eqqumaniartuanngikkaanni allaat uummat ajunngitsuugaluaq ajortumut ussernartorsiortinneqarsinnaasoq. Inuup naammalluinnanngitsup kialuunniit uummataanik ajortumut sunnertissinnaanngitsoqanngimmat, oqaaqqissaarut una ilumooruttariaqarparput: „Paarisassannit tamanit annermik uummatit paariuk.“ (Ussatit 4:23) Taavami uummaterput assersuutaasoq qanoq paarisinnaavarput?

Aalajangersimasumik misissuisarnissaq — pisariaqarluinnarpoq

3, 4. (a) Uummat pillugu qanoq aperisoqarsinnaava? (b) Uummatitta assersuutaasup misilinnerani suna iluaqutaasinnaava?

3 Misissortinniarlutit nakorsiaruit qularnanngitsumik uummatit misissussavaa. Peqqissutsivit, uummatit ilanngullugu, takutittarpaa timit pisariaqartunik inuussutissartaqarnersoq? Aappit naqitsinera qanoq ippa? Uummatit akuttoqatigiimmik erseqqissumillu tillerpa? Timigissarluartarpit? Uummatit pisariaqanngitsumik uippakajaarpa?

4 Uummat aalajangersimasumik misissortittariaqarpat, taavami uummat assersuutaasoq? Jehovap misissortarpaa misilittarlugulu. (1 Nalunaarsuutit 29:17) Aamma uagut taamaaliortariaqannginnerpugut? Ilumut. Qanorli? Imminut ima aperaluta: Uummatiga aalajangersimasumik atuaqqissaarnikkut ataatsimeeqataasarnikkullu anersaakkut inuussutissaqarluarpa? (Tussiaat 1:1, 2; Hebræerit 10:24, 25) Jehovap oqaasia ima isummanniitsitsigaara „soorlu ilunni innermik ikumasoqartoq“ Guutillu Naalagaaffianik oqaluussinngitsoorsinnaajunnaarlunga ajoqersuganngortitsinngitsoorsinnaajunnaarlungalu? (Jeremia 20:9; Matthæusi 28:19, 20; Romamiut 1:15, 16) Ilungersorusussuseqarpunga ajornanngikkaangallu arlaatigut piffissaq tamaat kiffartoqataarusuttarlunga? (Lukasi 13:24) Uummatiga assersuutaasoq sunik sunnerneqartittarpara? Pallorfiginninnermi ilumoortumi uummatimikkut ataasioqatigiittut ilaginiartarpakka? (Ussatit 13:20; 1 Korinthimiut 15:33) Ajortoqaraangat malugipallattariaqarparput iliuuseqapallallutalu.

5. Uppernikkut misilinneqarnerit sumut iluaqutaasinnaappat?

5 Uppernerput misilinneqarajuppoq. Tamatuma periarfissippaatigut uummatitta qanoq ittuunerata maluginissaanut. Israelikkunnut nunamut neriorsuutigisamut isiliivissunut Mosesi oqarpoq: „Eqqaamaniaruk [Jehovap] Guutivit ukiuni 40-ni inoqajuitsumi ingerlattuarsimammatit makitanaveersarniarlutit misilinniarlutillu paasiumallugu peqqussutini maleruarumaneritit maleruarumannginneritilluunniit.“ (5 Mosesi 8:2) Ilimaginngisatsinnik pisoqaraangat ussernartorsioraangattaluunniit misigissutsivut, kissaativut qisuariarnerpulluunniit ilaatigut tupaallaannartanngillat? Misilinneqarnerit Jehovap akuerisaasa sanngiissutivut qulaartarpaat nakussatsinnissaannullu periarfissilluta. (Jaaku 1:2-4) Qinunikkut eqqarsaatigiuartariaqarparput misilinneqaraangatta qanoq qisuariartarnerluta.

Oqaluuserisavut sumik takutitsippat?

6. Oqaluuserisavut uummaterput pillugu sumik takutitsisinnaappat?

6 Uummatitsinni suut isertornerlugit qanoq paasisinnaavarput? Jiisusi oqarpoq: „Inuup ajunngitsup uummatimi toqqorsivianit ajunngitsumit ajunngitsut saqqummertarpai, inuullu ajortup toqqorsivimminit ajortumit ajortut saqqummertarpai. Uummatimmi ulikkaarutaanik qaneq oqaluttaraaq.“ (Lukasi 6:45) Oqaluuserinerusartakkavut uummammiugisatsinnik tikkuussisinnaapput. Pigisat silarsuarmilu angusavut oqaluuserigajunneruavut? Eqqarsaatilluunniit anersaamut tunngasut teokratiimilu anguniakkat oqaluuserigajuppavut? Allat kukkussutaat oqaluuserinagit asannilluta malunnaarsaartarpavut? (Ussatit 10:11, 12) Allat sulerinersullu oqaluusereqqajaaneruavut anersaamut tunngasut oqaluuserivallaarnagit? Taamaakkutta allat inuunerannik susassarinngisatsinnik soqutiginninnitsinnut ersiutaasinnaava? — 1 Petrusi 4:15.

7. Josefip qatanngutaanik qulinik oqaluttuaq uummatitta paarinissaa pillugu qanoq ilinniarfigisinnaavarput?

7 Ilaqutariissuarni Jaakukkunni qanoq pisoqarnersoq eqqarsaatigiuk. Jaakup ernerisa angajulliit qulit nukartik Josefi ’inussiarnersumik oqaluffigisinnaanngilaat’. Sooq? Ataatamik asanerummagu sinngagigamikku. Kingusinnerusukkut Josefi Guutimit iluarisaanerminut uppernarsaataasumik Guutimit sinnattortitaammat qatanngutaasa „suli annerusumik uumissulerpaat“. (1 Mosesi 37:4, 5, 11) Ajussutsiminni nukartik inussiatut tunivaat. Iliuusertik paasitinnaveersaarniarlugu angutertik salloqittarpaat Josefi uumasumit kiisortumit toqutaanerarlugu. Qatanngutigiit qulit uummatiminnik paarsinngillat. Allanik isornartorsiueqqajaagutta usorunnitsinnut sinnganitsinnulluunniit ersiutaasinnaava? Qanitsinnit anisut eqqumaffigisariaqarpavut ajortumillu oqaluuserinninneqqajaanerit tamaasa aaqqipallattarlugit.

8. Sallunissamut usserneqassagaluarutta uummatitta misilinnissaanut suna iluaqutigissavarput?

8 Guuti sallusinnaanngilluinnarpoq, inuilli naammalluinnanngitsut taamaanngillat. (Hebræerit 6:18) „Inuit tamarmik sallutuujupput,“ tussiaasiortoq ajuusaarpoq. (Tussiaat 116:11) Allaat apustili Petrusi salluvoq Jiisusi pingasoriarluni ilisarisimannginneraramiuk. (Matthæusi 26:69-75) Soorunami sapinngisarput tamaat sallunaveersaartariaqarpugut, Jehovammi „oqaq sallutooq“ uumigaa. (Ussatit 6:16-19) Sallunissamut usserneqassagaluarutta pissutaasoq paasiniarluartariaqarparput. Inunnut ersinerua? Pillarneqarnissamilluunniit annilaanganerua? Immaqa tusaamasaanerlukkumanata immaqaluunniit namminissarsiorluta salluvugut? Sunaluunniit pissutaagaluarpat eqqarsaatigeqqissaarnissaa pitsaassaaq, kukkussuterpullu maniguulluta nassuerutigalugu, isumakkeerfigeqqulluta Jehova qinnuigalugu sanngiissuterpullu qaangerniarlugu ikioqqulluta. Immaqa „ilagiit utoqqaanertaat“ ikiuilluarnerpaasinnaapput. — Jaaku 5:14.

9. Qinnutivut uummaterput pillugu sumik takutitsisinnaappat?

9 Kunngi Salomop ilisimassusermik ilisarsinermillu qinnutaa akillugu Jehova oqarpoq: „Tamanna kissaatigigakku, aammalu pisuunngornissat ataqqisaanissallu . . . [qinnutiginnginnakkit], taava pissavatit ilisimassuseq silaqassuserlu. Aammattaarli pisuussutinik pequutinillu . . . ataqqisaanermillu . . . tunissavakkit.“ (2 Nalunaarsuutit 1:11, 12) Salomop qinnutigisai qinnutiginngisaalu tunngavigalugit suut uummammiuginerai Jehovap takusinnaavaa. Guutimut qinnutivut uummaterput pillugu sumik takutitsippat? Qinnutitta takutippaat ilisarsinermik, ilisimassummik siuneqassusermillu qilalersugut? (Ussatit 2:1-6; Matthæusi 5:3) Uummaterput Guutip Naalagaaffiata soqutigisaanik ulapputeqarpa? (Matthæusi 6:9, 10) Qinnutivut eqqarsaatigeqqissaartarunnaarsimagutsigik qalliinnarsiortuulersimappatalu Jehovap suliaanik eqqarsaatiginneqqissaarnissatsinnut piffissaqartariaqalersimanitsinnut ersiutaasinnaavoq. (Tussiaat 103:2) Kristumiut tamarmik qinnutimik suna takutinneraat eqqumaffigisariaqarpaat.

Iliuutsivut sunik takutitsippat?

10, 11. (a) Allasiorneq kinguaassiuutitigullu inuunerlunneq sumi aallartittarpat? (b) ’Uummatitsigut allasiunnginnissatsinnut’ suna iluaqutigissavarput?

10 Oqartoqarsimavoq iliuutsit oqaatsinit ersersitsinerusartut. Aap, iliuutsitta qanoq ittuunersugut qulaartarpaat. Assersuutigalugu ileqqussat eqqarsaatigalugit uummatip paarinera tassaaginnanngilaq kinguaassiuutitigut inuunerlunnaveersaarneq allasiornaveersaarnerlu. Qaqqami oqaluutsimini Jiisusi oqarpoq: „qialuunniit allap nulia pilerigalugu isigiguniuk taanna uummatimigut allasiorfigereerpaa.“ (Matthæusi 5:28) Qanoq — allaat uummatitsinni — allasiornaveersaarsinnaavugut?

11 Ataataanerpaaq aalajaatsoq Jobi angutinut arnanullu kristumiunut maligassiuilluarpoq. Qularnanngitsumik Jobip arnat inuusuttut ulluinnarni naapittarpai ikiortariaqaraangatalu ikiortarlugit. Ajuutiginissaalli eqqarsaatigisinnaanngilaaluunniit. Sooq? Angutitut assuarnaatsutut aalajangiusimalluinnaramiuk arnaq pileritsaallugu isigiumanagu. „Isikka isumaqatigiissuteqarfigisimavakka niviarsiaq pileritsaallugu isigiumanagu,“ oqarpoq. (Jobi 31:1) Isivut assingusumik isumaqatigisariaqarpavut taamaalillutalu uummaterput paaralugu.

12. Lukasi 16:10 uummatip paarinissaanut qanoq attuumassuteqarpa?

12 Guutip ernera oqarpoq: „Annikitsutigut ilumoortoq annertuutiguttaaq ilumoorpoq. Annikitsutigut peqquserluttoq annertuutiguttaaq peqquserluppoq.“ (Lukasi 16:10) Aap, ulluinnarni pisartunut soqutaanngitsuusorinartunut tunngatillugu, allaat kisimiitilluta, iliuutsivut eqqarsaatigisariaqarpavut. (Tussiaat 101:2) Angerlarsimagaangatta, TV-mi isiginnaaraangatta interneteraangattaluunniit Biibilimi oqaaqqissaarut una maleruartarparput: „Kinguaassiuutitigut inuunerlunneq mingunnartullu suulluunniit piumatuussuserlu taaneqassanngillalluunniit akornassinni, illernartut tamakku ileqqussarinngimmatigit. Ileqqussaanngilartaaq kannguttaanneq sianiitsunillu quiasaarnipalaanilluunniit oqalunneq“? (Efesosimiut 5:3, 4) TV-mimi videospilinilu nakuuserneq? „[Jehovap] iluartoq iluanngitsorlu misissuiffigai, nakuusernermillu nuannarisaqartoq uumigaa.“ — Tussiaat 11:5.

13. Suut uummammiuginerlugit misissortillugu mianersoqqussut suna pissusissamisoorpa?

13 „Tamanit annerusumik uummat tatigisassaanngitsuuvoq. qatsorsagassaanngilaq,“ Jeremia mianersoqqusivoq. (Jeremia 17:9) Uummatip tatigisassaanngitsuunera malunnarsisarpoq kukkussutivut utoqqatsissutissarsioraangatsigik, naammalluinnangissutivut suusupagigaangatsigik, inuttut sanngiissutivut sualuttut suunngitsuuneraraangatsigik namminerluunniit ajunngequtivut malugitinniaraangatigik. Uummat katsorsagassaanngitsoq, tassa paatsiveerulluinnaqqasoq, marloqiusaasinnaavoq — pitsaasuusartoq oqaatsiminit allaanerusumik iliortoq. (Tussiaat 12:2; Ussatit 23:7) Uummammiugisavut misilikkaangatsigit unneqqarissuunissarput pingaaruteqarpoq.

Iserput qaamasuua?

14, 15. (a) Isip ’qaamasuunera’ qanoq isumaqarpa? (b) Uummatitta paarinerani isitta qaamasuutinnera qanoq iluaqutaava?

14 „Isi timip qaammaqqutigaa,“ Jiisusi oqarpoq nangillunilu: „Isit qaammarippat timit tamarmi qaamasuussaaq.“ (Matthæusi 6:22) Isi qaamasoq aalajangersimasumik anguniagaqarpoq, imaluunniit siunertaqarpoq. Allamut saasartittanngilaq. Aap, isitta ’Guutip naalagaaffia iluarneralu’ tappiffiginerusariaqarpaat. (Matthæusi 6:33) Iserput qaamasuutinngikkutsigu uummaterput assersuutaasoq susinnaava?

15 Assersuutigalugu inuussutissarsiorniarneq eqqarsaatigeriartigu. Kristumiut ilaquttaminnik pilersuinissaat piumasaqaataavoq. (1 Timotheusi 5:8) Taavami ussernartorsiorutta nutaanerpaanik, pitsaanerpaanik piumaneqarnerpaanillu nerisaqarusulluta, atisartaarusulluta, initaarusulluta allanillu pisaarusulluta? Uummaterput isumarpullu inussianngortissinnaannginnerpai affaannarmik uummateqarluta Jehovamut kiffartulersilluta? (Tussiaat 119:113; Romamiut 16:18) Sooq timikkut pisariaqartitavut ima aallutsigissavavut inuuneq ilaquttanuinnaq, niuernermuinnaq pigisanuinnarlu tunngatilerlugu? Siunnersuut isumassarsiarititaasoq eqqaamajuk: „Mianersoritsi uummatisi malussarlersitaaqqunagit aalakoornermit imerajunnermillu inuunerullu matuma piinik isumakuluutinit, pakasarteqqunasi ullup taassuma tassanngaannaq tikiunneranit nigartuutitut illuni, inuiaammi nunarsuarmi tamarmi najugaqartut tamaasa tikissammagit.“ — Lukasi 21:34, 35.

16. Isi pillugu Jiisusi qanoq siunnersuiva, aamma sooq?

16 Isi isummamut uummammullu attuumalluinnarpoq. Isigisat eqqarsaatinut, misigissutsinut iliuutsinullu sunniuteqangaartarput. Ussernartut takussaasut pissaaneqangaarnerat Jiisusip assersuusiaraa: „Isivit talerpiup tammartippatit, peeruk igillugulu. Ilinnummi pitsaaneruvoq timinni avativit ilaat ataaseq annaassallugu timivit tamarmiusup Anniarfimmut iginneqarnissaanit.“ (Matthæusi 5:29) Naleqqutinngitsut isiginaveersaarneqartariaqarput. Assersuutigalugu kinguaassiuutitigut eqqunngitsumik pilerissuseqalersitsiniartunik kissaateqalersitsiniartunillu isiginiinnassangilagut.

17. Kolossemiunut allakkat 3:5-imi oqaaqqissaarut uummatitsinnik paarsinitsinni qanoq iluaqutigisinnaavarput?

17 Soorunami avatangiisitsinniittunit takusinnaasatsiguinnaq sunnerneqartanngilagut. Misigissutsit allat, soorlu malugisinnaassuseq tusaasinnaassuserlu, aamma sunniuteqarput, timillu pisatai misigissutsinut taakkununnga attuumassuteqartut eqqarsaatigalugit mianersortariaqarpugut. Apustili Paulusi oqaaqqissaarivoq: „Taamaattumik toqutissigit nunamut atasut ilissinniittut: qinguaassiuutitigut inuunerlunneq, minguttuuneq, pileritsaassineq kajungerisapiluillu aamma piumatuuneq, tassa guutipilussiorneq.“ — Kolossemiut 3:5.

18. Eqqarsaatipilunnut tunngatillugu qanoq iliortariaqarpugut?

18 Isummatsinni isertortumi kissaatipiluk pilersinnaavoq. Kissaat taamattoq eqqarsaatiginiinnaraanni pilerissusipiluit ingasannerulerajupput uummallu sunnerlugu. ’Pilerissuseq ilumileraangami ajorti erniarisarpaa.’ (Jaaku 1:14, 15) Inuppassuit nassuerput imminut inertikkusunneq taamatut pilertartoq. Taamaattumik pingaaruteqarluinnarpoq ajunngitsunik minguitsunillu eqqarsaateqarniarnissaq. (Filippimiut 4:8) Eqqarsaatipiloqalissagaluaruttalu eqqarsaatigiunnaarniarlugu sapinngisatsinnik iliuuseqartariaqarpugut.

’Jehova kiffartorfiginiaruk uummatikkut iluungarlutit’

19, 20. Jehova uummammik tamakkiisumik qanoq kiffartorfigisinnaavarput?

19 Kunngi Daavi utoqqaalilluni ernerminut oqarpoq: „Ernera Salomo, ataatavit Guutia ilisariniaruk, kiffartorfiginiaruk uummatikkut iluungarlutit nuannaarlutillu, uummatit tamaasa misissuiffigeqqissaartarpai inuillu piumasaat pilersaarutaallu tamaasa paasisimallugit.“ (1 Nalunaarsuutit 28:9) Salomop ’malussarissumik uummateqalernissani’ qinnutigaa. (1 Kunngit 3:9) Misigaali inuuneq naallugu taamaattumik uummateqaannarnissaq qanoq ajornakusoortigisoq.

20 Iluatsissagutta Jehovap iluarisaanik uummateqarnissaq naammanngilaq — aamma uummat taamaattoq paarisariaqarparput. Guutip oqaasiani oqaaqqissaarutit isummatsinniitittariaqarpavut — ’uummatitsinni paaralugit’. (Ussatit 4:20-22) Aammattaaq uummaterput aalajangersimasumik misissortariaqarparput misilittarlugulu qinunikkullu oqaatsivut iliuutsivullu sumik takutsitsinersut eqqarsaatigalugit. Qanorli iluaqutaatigissagaluarpa sanngiissutivut paasisavut aaqqinniarlugit ilumoorluta Jehovamut qinunngikkutta ikioqqulluta? Aammattaaq pingaaruteqarpoq misigissutsitsinnit qanoq sunnerneqartarnerluta eqqumaffigissallugu. Taamaaliorutta qularutiginngilluinnarsinnaavarput ’eqqissinerup Guutimit pisup siuneqassusernit tamanit annerungaartup uummaterput eqqarsaativullu sernigissagai Kristusi-Jiisusimi’. (Filippimiut 4:6, 7) Aap, aalajangiusimatigik allanit tamanit annermik uummatitta paarinissaa uummammillu tamakkiisumik Jehovamut kiffartornissarput. (wE 10/15 01)

Eqqaamavigit?

Uummatitta paarinissaa sooq pingaaruteqarpa?

Suut oqaluuserisarnerlugit paasigutsigu uummatitsinnik paarsinissatsinnut qanoq iluaqutigissavarput?

Sooq iserput ’qaamasuutissavarput’?

[Atuaqqissaarnermi apeqqutit]

[Qupp. 18-mi assiliartaq]

Oqaluussinermi, ataatsimiinnerni angerlarsimaffimmilu suut oqaluuserigajunneruavut?

 [Qupp. 20-mi assiliartaq]

Isi qaamasoq allamut saasartittanngilaq