Imarisai

Imarisai

Upperisaq ilumoortoq ataasiussuseqalersitsisarpoq

Upperisaq ilumoortoq ataasiussuseqalersitsisarpoq

 Upperisaq ilumoortoq ataasiussuseqalersitsisarpoq

UPPERISARSIORNEQ avissaartuutaagajussinnaagaluartoq Guutimik ilumoortutuamik pallorfiginninneq inunnik ataasiussuseqalersitsisinnaavoq. Israelikkut Guutip toqqagaasut inuiaagallarmata juutiunngitsut ilumoorusuttorpassuit upperisaq ilumoortoq kajungeraat. Soorlu Ruthi, Moabimi siuaasami guutiinik qimatsisoq, taamaappoq. Sakiminut No’omimut oqarpoq: „Inuiaqatitit uangattaaq inuiaqatigissavakka, illillu Guutit uangattaaq Guutigissavara.“ (Ruthi 1:16) Ukiuni hundredelinni siullerni juutiunngitsorpassuit Guuti ilumoortoq pallorfigilerpaat. (Apustilit Suliaat 13:48; 17:4) Jiisusip apustiliisa nutaarsiassaq nuannersoq tusarliunniarlugu ungasissumut angalasalermata, inuit ilumoorusuttut suli amerlanerusut Guutimik ilumoortumik pallorfiginninnermi ataasiussuseqalerput. ’Guutipiluit tunullugit Guutimut saappusi, Guuti uumasoq Guutiviusoq kiffartorfigilerumallugu,’ apustili Paulusi allappoq. (1 Thessalonikamiut 1:9) Guutimik ilumoortumik pallorfiginninneq ullumikkut taamatulli ataasiussuseqalersitsisinnaava?

Isumaqartoqarpoq „ilumoortumik pallorfiginnittut“ imaluunniit „Guutiviusoq“ eqqartussallugu kukkunerusoq. Isumaqarsinnaapput sallusuissummik ilinniartitsissutigineqarsinnaasumik nassaassaqanngitsoq. Assigiinngitsunilli tunuliaqutalippassuit sallusuissummik ujarlersut paasisimavaat upperisaq nammineq isumap piumanerusalluunniit suuneranit aalajangerneqartussaanngitsoq. Pallorfigineqarnissamut qinngaqqunanngitsutuaq tassaavoq tamanik Pinngortitsisoq — Jehova Guuti. (Saqqummersitat 4:11) Guutiuvoq ilumoortoq, qanorlu pallorfigineqarnissani nammineq aalajangigassaraa.

Jehovap oqaatsini, Biibili, aqqutigalugu sunik piumaffiginerluta nalunaarfigaatigut. Nunarsuarmi inuit tamangajammik Biibili tamaat ilaannaaluunniit pisinnaavaat. Guutillu ernera oqarpoq: ’Oqaasera aalajangiussimajuarussiuk, sallusuissut ilisimalissavarsi.’ (Johannesi 8:31, 32) Tassa sallusuissut ilikkarneqarsinnaavoq. Inuillu ilumoorusuttut millionilikkuutaat assigiinngitsunik tunuliaqutaqaraluarlutik sallusuissummik tamatuminnga ilassinnissimapput upperisamilu ilumoortumi ataasiussuseqalerlutik. — Mattæusi 28:19, 20; Saqqummersitat 7:9, 10.

Ullumikkut silarsuaq tamakkerlugu ataasiussuseqarneq

Biibilimi Sefaniap allagaani atuarsinnaavarput inuit assigiinngitsunik tunuliaqutallit qanoq ataatsimuulernissaannik siulittuut maluginiarnartoq. Allassimavoq: „Kingorna inuiaqatigiit allanngortissavakka minguitsunik qarloqalersillugit; taava tamakkerlutik [Jehovap] aqqa torlorfigissavaat isumaqatigiillutillu kiffartuutissallugu.“ (Sefania 3:9) Inuit upperisamut ilumoortumut qanoq saannissaannik ataasiussuseqarlutillu Guutimut kiffartulernissaannik allaaserilluagaavoq.

Qaqugu taamaalisoqassasoq Sefania 3:8-mi paasineqarsinnaavoq. Allassimavoq: „Utaqqisinga, oqarpoq [Jehova], ilisimannittutut sassarumaarama ullussami tassani. Pisinnaatitaavunga inuiaqatigiit katersussallugit kunngeqarfiillu ataatsimuulersissallugit uumitsannera kamangaarneralu taakkununnga kuerarumallugit, ilungersornerma innerata nunarsuaq tamaat nungutissammagu.“ Aap, Jehovap inuiaqatigiit katersorpagit — kamangaarninili taakkununnga kuerartinnagu — nunami qanilaartut minguitsunik qarloqalersissavai, oqaaseqalersissavai. Maanna piffissanngorpoq, inuiaqatigiimmi Guutip Ajugaqanngitsup ullussarsuani Harmagedonimi sorsunnissaminnut katersuutilereerput. — Saqqummersitat 16:14, 16.

Jehovap kiffani ataasiussuseqalersinniarlugit minguitsunik oqaaseqalersippai. Oqaatsinut taakkununnga ilaavoq Guuti taassumalu siunertaa pillugit Biibilimi allassimasunik paasinninneq. Minguitsunik oqaaseqarnermut ilaapput sallusuissutsip upperinera, allanut  oqaluttuarinera Guutillu inatsisaanut najoqqutassiaanullu naapertuuttumik inuuneq. Aamma politikkimut akuliunnaveersaartariaqarpoq namminissarsiorunnaarlunilu, soorlu ammip qalipaataa tunngavigalugu immikkoortitsiunnaarluni avissaartuutaasumillu inuiaqatigiissutsimik pingaartitsivallaarunnaarluni, tamakku silarsuup matuma ilisarnaatigimmagit. (Johannesi 17:14; Apustilit Suliaat 10:34, 35) Ilumoorlutik sallusuissummik nuannarisallit tamarmik oqaatsit taakku ilikkarsinnaavaat. Maanna takoriartigik allaaserisap matuma siuliani taaneqartut inuit tallimat — upperisarsiornerup tungaatigut imminnut ungasissimasut — maanna Guutimik ilumoortutuamik, Jehovamik, pallorfiginninnermi ataasiussuseqartut.

Upperisami ilumoortumi ataasiussuseqarneq

Fideliap, katuulllip guutimik mianerinnittup, panini Biibilimik atuarfimmi atugassaanik pitsippaa. Palasi aperaa taanna atorlugu qitornani annaasani qanoq innersut nassuiarsinnaaneraa. „Pakatsinaqaaq,“ oqarpoq. Taamaattumik Jehovap Nalunaajaasuinik pulaarneqarami taakku aamma taamatut aperai. Nammineq Biibilimini toqusimasut qanoq innerat atuaramiuk, paasivaa oqaluffeqarfimmit salloqittarneqarsimalluni. Paasivaa toqusimasut ilisimassuseqanngitsut taamaattumillu limbomiinngitsut allamiinnatilluunniit. (Tussiaat 146:4; Oqaluussisartup oqaasii 9:5) Fideliap upperisarsiornikkut assiutini tamaasa igippai, oqaluffimmit anilluni Biibililu misissornerulerlugu. (1 Johannesi 5:21) Ukiuni kingullerni qulini sallusuissutsip Biibilimeersup allanut ilinniartitsissutiginera nuannaarutigaa.

Tara Kathmandumit nunamut hindunut naalaffeqanngingajattumut nuuppoq. Taamaattumik metodistit oqalufffianukarpoq neriulluni anersaakkut tumannguissalluni. Kisianni sooq taama naalliunnartoqartiginera apeqqutigigamiuk akineqanngilaq. Taava Jehovap Nalunaajaasuinik Biibilimik atuaqqissaaqateqarnissamik neqeroortunik pulaarneqarpoq. Tara oqarpoq: „Paasivara Guuti asannittoq silarsuarmi naalliuutinut tamanut akisussaasinnaanngilluinnartoq. . . . Silarsuaq nutaassaq eqqissisimaffiusoq aaqqiagiiffigiusorlu qilanaareqaara.“ (Saqqummersitat 21:3, 4) Tarap hindut guutiliaat igippai, upperisarsiornikkut ileqqutoqqani malikkunnaarlugit Jehovap nalunaajaasuatullu allat anersaakkut pisariaqartitaannik matussuseeqataanikkut pilluarneq piviusoq nassaaralugu.

Panya, Buddhasiortoq, Jehovap Nalunaajaasuinik pulaarneqaqqaarami Bangkokimi siulittuisartuuvoq. Ingammik Biibilimi siulittuutit soqutigilerpai. Oqaluttuarpoq: „Maanna silarsuarmi pissutsit Pinngortitsisup siunertaqqaavanit sooq allaanerunersut akeqqamilu aserorterinerinik tamanik iluarsiiumaarnera paasigakku soorlu tassa uisitaallunga. Biibilip tusarliussaa tamarmi imminut naapertuulluinnarpoq. Guuti kinaassusilittut asalerpara, eqqortutullu ilikkakkaka naapertorlugit inuulernissannut asanninnerma kajumissisippaanga. Inuit ilisimassutaasa ilisimassutsillu Guutimeersup assigiinngissutaat allanut paasitikkusoqaara. Ilisimassutsip ilumoortup inuunera ilumut allanngortippaa.“

Piffissap ingerlanerani Virgilip Muslimit Qernertormiut qularutigilerpai. Qernertormiut peqatigiiffillu immikkoortitsisorisani, qaamasunik amilinnik uumissuilersitsisoq, nammineq qanoq ikiorsinnaanerlugit qinnutigiunnaarlugu, sallusuissut suugaluarnersoq sumiikkaluarnersorluunniit nassaarerusullugu qinuvoq. „Qamannga pisumik Guutimut qinunerma aqaguani Napasuliaq Alapernaarsuiffik nassaaraara,“ Virgil oqaluttuarpoq. „Matutta saanut ilineqarsimavoq.“ Sivitsunngitsoq Jehovap Nalunaajaasui Biibilimik atuaqqissaaqatigisalerpai. Nangilluni oqarpoq: „Inuuninni siullerpaamik naammaginartumik akissutissarsivunga. . . . Neriuutissaqalerpunga.“ Sivitsunngitsoq Guutip oqaasianeersumik,  Biibilimeersumik, neriuummik ilumoortutuamik ujarlersunik ikiuisut Virgilip ataasiussuseqatigilerpai.

Charop Amerika Kujallermeersup niueriartortarfiliaraangami qitornami mikisut ilagisarnerat ajornartorsiutigaa. Taamaattumik Gladysip, Jehovap Nalunaajaasuisa ilaata, tamanna malugalugu ikiorumammani nuannaarpoq. Piffissap ingerlanerani Gladysip Biibilimik atuaqqissaaqatigiumalluni neqeroorutaa Charop aamma ilassivaa. Tupaallaatigaa nammineq Biibilimini atuaramiuk inuit ajunngitsut tamarmiunngitsut qilaliassasut, Jehovalli inuit aamma nunarsuarmi naassaanngitsumik inuulersissagai. (Tussiaat 37:11, 29) Ukiuni 15-ini kingullerni Charop neriuut tamanna ilisimaneqalersinniarlugu ulapputigaa.

Takorlooriaruk nunarsuaq tamarmi Guutimik ilumoortutuamik, Jehovamik, pallorfiginninnermi ataasiussuseqartunik inoqartoq. Takorluuinerinnaanngilaq. Jehovamit neriorsuutaavoq. Pruffiitini Sefania aqqutigalugu ima oqarpoq: „Ilinnut pigitiinnassavakka amiakkui inuiaqatigiit ikiortariallit sanngiitsut; . . . [Jehovap] aqqa tatigissavaat. Iluaatsuliussanngillat sallussanatillu, oqaatsinik peqquserluutaasunik qanermiugisaqassanngillat. . . ., ungoorlugit peersinneqassanngillat.“ (Sefania 3:12, 13) Neriorsuut nuannerunartikkukku, taava Biibilimi kajumissaarut una maliguk: „[Jehova] ujarsiuk nunami maniguuttusi tamassi, peqqussutaanik maleruaasusi. Iluarsuseq noqqaassutigisiuk, maniguunneq noqqaassutigisiuk. Immaqa taava qimarnguissarsiumaarpusi ullormi [Jehovap] kamaffissaani.“ — Sefania 2:3. (wE 15/9 01)