Orpiit atajuaannarsimasut

Innap sivinganertaa qaqqami qutsissumiittoq inissisimaffissaalluarunanngikkaluarpoq. Naak inissisimaffissaq taamaattoq akornutissaqaraluaqisoq orpiit qaqqartuuniittut ilaasa ukiukkut issittarnera aasakkullu panernersuaqartarnera akiuutigalugu qaarsumi aniinganerit ataniarfigisarpaat.

ORPIIT taakku toqujaatsut amerlanertigut orpinnit assingusunit pukkinnerusuniittutut kusanartigisanngillat. Kanaartaat peqingatitaartuusinnaapput, naajartorpiartaratillu. Silamit peqqarniitsumit nunamillu issortaqarpianngitsumit ilusilersorneqartarput.

Orpiit taakku nunarsuup tikikkuminaannersaanni naajartortarmata, isumaqartoqarsinnaavoq uumanikinnerussasut. Taamaanngilarli. Orpik Metusalemi, børstekoglefyrimik taaneqartartoq, Californiami White Mountainsimi 3000 meterisut qutsitsigisumi naasartoq, ilaasa ukiunik 4700-nik utoqqaassuseqarsoraat. Guinness Rekordbog 1997-imoortoq naapertorlugu orpik taanna nunarsuami orpiit utoqqaanerpaartaraat. Edmund Schulman orpitoqqanik misissuinikuusoq nassuiaavoq: „Orpik sallilikkiassaq børstekoglefyri . . . pissutsini atoruminaatsuni naajartortarnini pissutigigunarlugu sivisunerusumik uumasarpoq. Orpiit utoqqaanerusut White Mountainsimi 3000 meterisut qutsitsigisumiittuni panertuni inoqajuitsuni qaarsortuuni naajartortarput.“ Edmund Schulmanip aamma paasivaa orpiit sallilikkiassat utoqqaanersaat atoruminaatsunik atugaqarlutik naajartortartut.

Børstekoglefyrit atoruminaatsorpassuit qaangerniartariaqartarpaat, toqujaalluinnarnerminnili iluaqutigisinnaasatuatik marluk atorluarniartarpaat. Nuna naajartorfigisaat avinngarusimasoq naasoqarpianngilaq, tamannalu orpippassuit ikuallattoornissaannut illersuutaavoq, orpiit inerilluarsimasut navianartorsiutiginerpaartaasa ilagimmassuk. Qaarsumilu ima sorlanilluarsimatigipput, nunap sajunneratigut aatsaat kaanngartinneqarsinnaallutik.

Guutip kiffai aalajaatsut Biibilimi orpinnut assersuunneqarput. (Tussiaat 1:1-3; Jeremia 17:7, 8) Kiffat taamaattut aamma unamminiarnartunik nalaataqartarsinnaapput inuunerminni atukkatik  pissutigalugit. Malersorneqarneq, peqqiilliorneq piitsuussuserluunniit uppernikkut misilinneqaataangaartarsinnaapput, pingaartumik misilinneqarnerup ukiut arlerpagit. Pinngortitsisup orpinnik atajuaannarnermikkut annikilliornangaartunik qaangiisartunik pinngortitsisup, pallorfiginnitsini uppernarsaavigai tapersersorumallugit. Aalajaattuartut Biibilimi ima neriorsorpai: ’Najummillusi nakussatsillusilu aalajaatsumik tunngavilissavassi.’ — 1 Petrusi 5:9, 10.

Oqaluut grækerisooq Biibilimi „nikallujuinnermik“ nutserneqartartoq ’aalajaannermik, attassiinnarnermik naammagittarnermillu’ isumaqarsinnaavoq. Kristumiut nikallujuissagunik orpiit qaqqartuuniittut assigalugit sorlanilluartariaqarput. Aalajaassagunik Jiisusi Kristusimi sorlanilluartariaqarput. Apustili Paulusi allappoq: „Kristusi-Jiisusi, Naalagaq, ilassigassiuk taava taassumani inuuniaritsi, taanna sorlaqarfigalugu, taassumani ineriartortinneqarlusi, uppernermi aalajaallusi ajoqersorneqarnersi malillugu qujaniangaartarlusilu.“ — Kolossemiut 2:6, 7.

Paulusip anersaakkut sorlanilluartariaqarnermik pisariaqartitsineq nassuerutigivaa. Nammineq ’kapinartumik timiminut kapputtumik pineqarpoq’, qasusuillunilu kiffartornermini malersorneqangaarneq atortariaqarlugu. (2 Korinthimiut 11:23-27; 12:7) Paasivaali Guutip nukinga atorlugu aalajaattuarsinnaalluni. „Tamaasa pissatsitsisikkut atussallugit sapinngilakka.“ — Filippimiut 4:13.

Soorlu Paulusip maligassiuineratigut takuneqarsinnaasoq, kristumiut nikallujuissusiat ajunngitsunik atugaqarnermut inuuniarnermilu atukkanut attuumassuteqanngilaq. Soorlu orpiit qaqqartuuniittut anorersuit ukiuni hundredelikkuutaani akiorsimagaat, uppernitsinni aalajaattuarsinnaavugut Kristusimit sorlanilluarsimagutta Guutillu nukimmik tunisisarnera tatigigutsigu. Naggatissamut aalajaakkutta Guutip neriorsuutigisaata allap piviusunngornerata misiginissaa qilanaarisinnaavarput: ’Innuttakka orpiup pisoqaassusiatut utoqqaatigilissapput.’ — Esaja 65:22; Matthæusi 24:13. (wE 1/7 01)