Imarisai

Imarisai

Aningaasanut isiginnittaatsimik qanoq oqimaaqatigiissaarisoqarsinnaava?

Aningaasanut isiginnittaatsimik qanoq oqimaaqatigiissaarisoqarsinnaava?

 Aningaasanut isiginnittaatsimik qanoq oqimaaqatigiissaarisoqarsinnaava?

Aningaasanut asanninneq nunallu piinik pigisaqarumaneq nutaajunngillat. Tamanna pillugu Biibili nipangiussisimanngilaq, soorlu takutikkaa qangali atugaasoq. Israelikkunnut inatsisimigut Guuti oqarpoq: „Tullivit illua pileritsaatissanngilat. . . . suugaluartulluunniimmi tullivit pigisai.“ — 2 Mosesi 20:17.

JIISUSIP nalaani amerlasuut aningaasartuupput. Tamanna ilaatigut Jiisusip oqaloqatigisaani angummi inuusuttumi ’pisoorsuarmi’ erserpoq. Jiisusip oqarfigaa: „Suli ataaseq amigaatigaat: Pigisatit tamaasa akigikkit piitsunullu agguaallugit, taava qilanni pisuussuteqalerumaarputit. Qaallutillu malinnga! Angutip tamanna tusaramiuk aliasungaalerpoq, pisoorsuugamimi.“ — Lukasi 18:18-23.

Aningaasanut isiginnittaaseq eqqortoq

Eqqortuliornerussanngilaq oqassalluni Biibilip aningaasat atorneqarnissaalluunniit assuarigaa. Eqqaavaa aningaasat pitsuususermut taassumalu malitsigisaanut illersutaasut inuuniarnermilu pisariaqavissunut pissarsissutaasinnaasut. Kunngi Salomo allappoq: „ilisimassusermi alanngortaaliisarpoq aningaasat alanngortaaliisarnerattut ilisimassutsilli pitsaaqutigiinnarpaa ilisimassuseqartoq inuutittaramiuk.“ „Timiusaliorneq nuannaalersitsisarpoq viinnilu inuusunut qiimmassaataasarluni. Aningaasallu taamaaliorsinnaalersittarpaatsit.“ — Oqaluussisartup oqaasii 7:12; 10:19.

Aningaasanik eqqortumik atuineq Guutip ajorinngilaa. Sorlu Jiisusi oqartoq: „Oqarfigaassimi: Mamoni peqquserluut ikinngutissarsiutigisiuk nunguppat taakkua ilassisinnaaniassammasi inigisani ittuinnartuni.“ — (Lukasi 16:9) Guuti ikinngutigiumagutsigu, pallorfiginninnermut minguitsumut aningaasartuuteqarnissamik ilaqarpoq. Ataatamisut Daviditut, Salomo aningaasarpassuarnik erlinnartuuterpassuarnillu Jehovap nalaffiutaanik sananissamut tunissuterpassuaqarsimavoq. Kristumiuttaaq kajumissaarneqarput pisariaqartitsisunut tunissuteqartaqqullugit. „Illernartut ikiortarsigit ikiortariaqartaraangata,“ Paulusi oqarpoq. Nangipporlu: „inoroorsaarnissaq pingaartissiuk.“ (Romamiut 12:13) Tamatigungajak aningaasanik atuinerussaaq. Aningaasanulli asanninneq suua?

’Aningaaserituneq’

Paulusip peqqissaartumik ’aningaaserituujuneq’ — imaluunniit eqqortumik oqaatigalugu („sølvinik asannittut“) — uppeqatiminut inuusuttumut allakkamini eqqartorpaa. (1 Timotheusi 6:6-19) Uani ’aningaaserituneq’ pisuussutinut qanoq isiginnittaaseqarnissamut atatillugu eqqaavaa. Ullumikkut inuiaqatigiit aningaasanut qanoq pingaartitsiginerat eqqarsaatigalugu, Paulusip isumassarsisitaalluni oqaaserisai misissoqqissaarutigit silatusaassaagut. Misissueqqissaarneq taamaattoq nalilerujussuuvoq, tassuuna ilikkarsinnaagatsigu qanoq ilillutalu ’inuunivik pigilersinnaanerlutigu’.

Paulusi mianersoqqusivoq: „Aningaaserituujunermi ajortunut tamanut sorlaavoq; tamatumannga pileritsatsitaallutik inuit ilaat uppernerminnit tunussisitaasarput taamalu imminnut amerlasuunik erloqissutissiorlutik.“ (1 Timotheusi 6:10) Uani Biibilimiluunniit allami  allassimasoqanngilaq aningaasat ajortuusut. Apustili aamma oqanngilaq aningaasat ’ajortunut tamanut’ pisuusut imaluunniit aningaasat ajornartorsiutinut tamanut aallaaviusut. Aningaaseritunerli „ajortunut tamanut“ pissutaasinnaavoq.

Piumatussusermut sianiginiaritsi

Biibilimi aningaasat avoqqaarineqanngimmata, Paulusip mianersoqqussutaa soqutiginngitsuusaartariaqanngilarput. Kristumiut aningaaserituunngorsimasut ajornartorsiuterpassuaqalersarput, tamanillu ajornerusumik, upperminit tammartitaasarput. Paulusip kristumiunut kolossamiittunut oqaasiata tamatuma eqqortuunera tunngavilerpaa: ’Taamaattumik toqutissigit nunamut atasut ilissinniittut. . . . kajungerisapiluit aamma piumatuuneq, tassa guutipilussiorneq.’ (Kolossemiut 3:5) Sooq piumatuuneq, kajungerisaqarneq imaluunniit ’aningaaserituujuneq’ guutipilussiornerup assigiinnaarpaa? Tassa imaappa anginerusumik illutaarusunneq, nutaanerusunik biilitaarusunneq pitsaanerusumilluunniit suliffittaarusunneq kukkunerusut? Naamik, tamanna ajoquteqanngilaq. Apeqqutaavorli: Pisariaqavinngippatali, suummiuna tamakkuninnga kissaateqalersikkaatigut?

Kissaateqarnerup pileritunerullu assigiinngequtigai, soorlu igaffiusinnaasumik innermik ikumalaartitsineq ikuallannersuarlu orpippassuarnik nungutitsisinnaasoq assigiinngitsuusut. Kissaatit peqqinnartut tulluartullu iluaqutaasinnaapput. Suliinnartissinnaavaatigut naammassisaqartillutalu. Ussatit 16:26-mi allassimavoq: „Sulisoq kaannerata suliumallersittarpaa, qarngata tamatumunnga pinngitsaalisarpaa.“ Pileritussuserli ulorianartuuvoq aserorsaataallunilu. Tassaavoq suli peqarusunnermik killeqanngitsumik kissaateqarneq.

Kissaatigisat aqussinnaanissaat apeqqutaavoq. Aningaasat katersukkatta pilerigisattaluunniit pisariaqartitavut matussusersinnaavaat imaluunniit pisariaqartitatta aningaasanut kiffanngortissavaatigut. Tamanna pillugu Paulusip piumatuuneq ’guutipilussiornermik’ taavaa. (Efesosimiut 5:5) Pilerituujuneq eqqortumik oqaatigalugu tunniutiinnarneruvoq — naalagarilerlugu imaluunniit guutigilerlugu imminullu kiffanngortilluni. Guutili ima oqarpoq: „Allanik guuteqassanngilatit uangaanngitsunik.“ — 2 Mosesi 20:3.

Pilerituujuneq pisariaqartitatsinnik Guutip isumaginninnissaminik neriorsuutaanik tatiginninnerunngilaq, aamma tamanna ’guutipilussiorneruvoq.’ Taamaattumiguna Paulusi ersarissumik paasiuminartumillu mianersoqqusisoq.

Aamma Jiisusip toqqaannartumik piumatussuseq pillugu mianersoqquaatigut. Oqaaqqissaarpaatigut piginngisatsinnik pilerigisaqarneq eqqumaffiginiaqqullugu. „Sissueritsi mianersorlusilu piumatussusermut sumulluunniit, inuummi inuuneranut aalajangiisuunngilaq sumik pigisaqarnera naammattorsuarnilluunniit pigisaqaraluaruni.“ (Lukasi 12:15) Oqaatsit taakku assersuusiarlu malitsigisaaniittoq tunngavigalugit piumatussutsip isumaa tassaavoq qanoq pigisaqartigineq pingaarnerusoq. Aningaassaasinnaapput, atorfik, pissaaneq assigisaaluunniit. Inuussutissarsiutaasinnaasut tamarmik pileritsaatigineqarsinnaapput. Isumaqarnartarpoq una unaluunniit pigaanni naammagisimaalissalluni, Biibililli misilittagarpassuillu takutippaat Guuti kisimi — taamaaliorumaarporlu — pisariaqartitavigut matussusersinnaagai, soorlu Jiisusip tusarnaartini paasitinniarai. — Lukasi 12:22-31.

Atuinissamut qaammarsagaalluartumi inuuffigisatsinni pileritussutsip inneranik ikummarissititsiniaallaqqissuupput. Qujanarniarlutik piginnaaneqarlutilli inuit isumaqalersinniartarpaat amigaateqartutut, qanorluunniit peqartigigaluarlutik. Ilimagissanngilarput silarsuaq avatitsinniittoq allanngortissinaallutigu, qanorli tamanna pinngitsoortinniarsinnaavarput.

Naammagisimaarnerup akerlia piumatuujuneq

Paulusip ilinniartippaatigu piumatuujunerup naammagisimaaneq illua’tungerigaa. Oqarpoq: „Nerisassaqarlutalu atisassaqarutta tamakku naammagissavavut.“ (1 Timotheusi 6:8) Oqaatsit — nerisassaqarlutalu atissassaqarutta — naammagissagivut, amerlasuut tutsaanni immaqa pisariillisaanermik ingasattumik sianiippaluttutullu nipeqarsinnaapput. Inuppassuit tusaamasat  angerlarsimaffiisa qanoq ittuuneri silamiut atuagassiaataanni tv-milu isiginnaagassiani isiginnaartarpaat, taamatulli naammagisimaarinninneq anguneqarsinnaanngilaq.

Soorunalimi Guutip piumasarinngilaa innuttani nammineerlutik aalajangikkamissut piitsuullutik inuussasut. (Ussatit 30:8, 9) Paulusip allaatigaa piitsuususeq qanoq isumaqanersoq: tassa pisariaqarnerpaat amigaatigalugit, soorlu nerisassat atissassat inissaqarnerlu. Tamakku pigigutsigit naammagisimaarnissatsinnut tunngavigissavavut.

Paulusilli naammagisimaarnermik allaaserisaa ilumoorunneqarsinnaava? Tunngaviusut kisiisa naammagalugit naammagisimaartoqarsinnaava — nerisasaqarneq, atisassaqarneq inissaqarnerlu? Paulusip tamanna nalunavianngilaa. Peqangaarluni atorfigisaaninilu pillugu inuiaqatigiinni juutini Romamiutullu innuttaaqataanini pillugit immikkut ittumik pisinnaatitaaffeqarluni misilinnikuusimaavaa. (Apustilit Suliaat 22:28; 23:6; Filippimiut 3:5) Aamma angalalluni kiffartornermini ilungersornangaartorpassuit anigorsimavai. (2 Korinthimiut 11:23-28) Tamakkunatigut anngigisamik naammagisimaarutiginnittuarnissani ilikkarpaa. Sunaana?

Isertugaat ilikkarpara

Paulusi allakkami ilaani allappoq: „Ajorsarneq peqangaarnerlu nalunngilakka. Tamanik misilittagaqareerpunga — qaarsilaarnermik kaannermillu, peqangaarnermik ajorsaateqarnermillu.“ (Filippimiut 4:12) Paulusi nakimaalluinnarpaluppoq isumalluarpalullunilu. Eqqarsarnarsinnaavoq oqaatsit taakkua allakkamigit inuulluataartuusoq, taamaattoqanngivipporli. Romami paarnaarussivimmiippoq. — Filippimiut 1:12-14.

Tassani pigisanik naammagisimaarutiginninnerinnaq pinnagu aammali atukkanik naammaginninnissamik sakkortuumik kajumissaaruteqarpoq. Pingaartinnerusanik ersersitsissalluni pisuussutit assortorneqarnerlu aallarniutaasinnaapput. Paulusip ersersippaa, pigisatigut qanorluunniit atugaqaraluarluni anersaakkut isumalluuteqarnerata naammagisimaartissinnaavaa. „Tamaasa pissatsitsisikkut atussallugit sapinngilakka.“ (Filippimiut 4:13) Paulusi qanorluunniit peqartigigaluaruni peqanngitsigigaluaruniluunniit, atukkani ajunngippata ajorpataluunniit, tatigaa Guutip pisariaqartitaminik isumagiumaaraani. Taamaattumik nalerisimaarpoq.

Paulusip atugarisimasai Timotheusimut pingaartorujussuupput. Apustilip angut inuusuttoq taanna kajumissaarpaa Guutimik mianerinninneq Guutimullu qanimut attaveqarneq inooriaaseriniaqqullugit. Paulusi oqarpoq: „Illilli inuk Guutip pigisaa, ajortut tamakku tamaasa nigorsimaniakkit noqqaassutigalugillu iluarneq, Guutimik mianerinninneq, upperneq, asanninneq, nikallujuinneq qanilaarnerlu.“ (1 Timotheusi 6:11) Naak oqaatsit tamakkua Timotheusimut oqaatigineqaraluartut, tamanut Guutimik ataqqinnikkusuttunut pilluarlunilu inoorusuttunut atuupput.

Timotheusi, kristumiutulli allatut piumatuujussusermut eqqumaniartariaqarpoq. Ilagiinni Efesosimiittuni, Paulusip allaffigimmani  Timotheusip najugaani, pisooqarsimagunarpoq. (1 Timotheusi 1:3) Paulusi nammineerluni niuertoqarfimmi tassani Kristus pillugu tusagassaq nuannersoq oqaluussissutigisimavaa amerlasuullu isumataatillugit. Qularnanngitsumik tamakku ilarpassui pisuujupput soorlu ullumikkut kristumiut ilagiivini aamma ilaat taamaattuusut.

Apeqqulli unaavoq, ingammik 1 Timotheus 6:6-miit 10-mut eqqarsaatigalugu: Inuit pisuut Guuti ataqqiumagunikku qanoq iliussappat? Paulusi oqarpoq isiginnittaasertik eqqarsaatigisariaqarleraat. Aningaasat ilaatigut imminuinnaq naammaginnalesitsisinnaapput. Allappoq: „Silarsuarmi matumani pisuut peqqusiffigissavatit makitaniaqqunagit pisuussutitilluunniit allanngujasut isumalluutigeqqunagit, isumalluutigeqqulluguli Guuti pisariaqakkatsinnik naammattunik tunniussisoq.“ (1 Timotheusi 6:17) Pisuut aningaasaatitik pinnagit Guutip pigissaarnernut tamanut aallaaviusup tunaarinisaa ilinniartariaqarpaat.

Isiginnittaaseq alloriarnerup ilaannaminiinnaraa. Siusinnerusukkut kingusinnerusukkulluunniit suliatigut ersertariaqarpoq. Paulusip kajumissarpaatigut ’ajunngitsulioqqulluta ajunngitsulianillu pisuussuteqaqqulluta, tukkusuujoqqulluta inoqatinullu tunniussisaqqulluta.’ — 1 Timotheusi 6:18.

„Inuunivik“

Paulusip unnersuusutaata qiteraa immitsinnut eqqaaseqqulluta pisuussutit nalii killeqarmata. Guutip oqaasiani allassimavoq: „Pisuup peqangaarutini pallittaalisarai, eqqarsaataani qarmarsuartut portusuutut ittarput.“ (Ussatit 18:11) Aap, pisuusutit isumannaallisaataagaluarlutik, eqqarsaataannaapput taamaattumillu salloqittaataallutik. Inuunermi Guutimik iluaritinnissaminngarnit aningaasat pingaarnerutissaat kukkuneruvoq.

Pisuujuneq patajasuuvoq tunaarissallugulu qajannarpallaarluni. Neriuut piviusoq siunertaqarluartumi aalajaatsumilu tunngaveqarluartariaqarpoq. Kristumiut pinngortitsisumut, Jehova Guutimut inuunermut naassaanngitsumut neriorsuutaanut neriuuteqartariaqarput. Pilluarneq pisiarineqarsinnaanngilaq ingammillu anassut. Guutimut uppernitta neriuummik taamaattumik taamaallaat tunisinnaavaatigut.

Pisuujugutta piitsuuguttaluunniit, imatut inuuniarta Guutimi pisuujusutut. (Lukasi 12:21) Allamik pingaarnerusoqarsinnaanngilaq Pinngortitsisumut attaveqarnermit. Tassunga iluaritikkusulluta iliuuserisatsigut ’pisuussutinik siunissami toqqaviusinnaasunik ajunngitsunik inuunivik pigilersinnaaqqullugu katersivugut.’ — 1 Timotheusi 6:19. (wE 15/6 01)

[Qupp. 7-mi assiliartaq]

Paulusip naammagisi- maarnerup isertugaataa ilikkarpaa

[Qupp. 8-mi assiliartat]

Pigisatit naammagalugillu nuannaarutigikkit