Imarisai

Imarisai

„Suliaq naleqanngitsoq“

„Suliaq naleqanngitsoq“

 Iluarluinnarniarta qulanngilluinnarlutalu

„Suliaq naleqanngitsoq“

UKIUNI nutaanerusuni Jehovap Nalunaajaasuisa aallaqqaataaniilli soqutigingaarpaat Jesus Kristusip siulittuutaasa ilaat: ’Naalagaaffimmik iivangkiiliu tamanna oqaluussissutigineqassaaq inuit najugaanni tamarsuarmi inuiaqatigiit tamarmik nalujunnaarutissaannik; taavalu naggatissaq nalliussaaq.’ (Matîuse 24:14) Ukioq 1914 — „ullut kingulliit“ aallartiffissaat — qanillimmat silarsuaq tamakkerlugu ajoqersuisitsinersuaq Biibilimik tunngavilik aallartinneqarpoq. Tassa Biibilimik Atuaqqissaartartut ilumoorusuttut qulanngilluinnarlutik suliassaq tamanna suliariumavaat. — 2 Timûtiuse 3:1.

Nunarsuarmi tamarmi nutaarsiassaq nuannersoq oqaluussissutigalugu anguniagaraat, anguniagarlu tamanna anguniarlugu nutaamik, sapiitsumik paasinarluartumillu periaaseqalerput. Piffimmut uteqqilaarluta periaaseq tamanna sammilaariartigu.

Oqaluusseriaaseq nutaaq

Januaariuvoq 1914-imi. Takorlooruk 5000-it ilagalugit New Yorkimi inersuarmi taartumi issiallutit. Seqertittarfissuaq siuninniippoq. Tassani angut qeersooq qangaanerusoq assuutaasartoq kavaajaq takkajaaq qernertoq atorlugu sassarpoq. Soorunami siornatigut filmit nipitaqanngitsut takusimavatit, kisianni angut taanna oqaluppoq, tusaasinnaavallu qanoq oqaluttoq. Teknikkikkut nutaaliap atorneqaqqaarnerani najuupputit, tusarliussarlu tusakkat immikkut ittuuvoq. Oqaluttoq tassaavoq Charles Taze Russell, Napasuliaq Alapernaarsuiffiup Peqatigiiffiata præsidentia siulleq, filmilu tassaavoq „Skabelsens Fotodrama“ (Pinngortitsinermik isiginnaagassiaq).

C. T. Russellip paasivaa filmit aalasunik assiliartallit inuppassuit anguniarlugit immikkut ittumik atortorissatsialaasut. Taamaattumik 1912-imi „Skabelsens Fotodrama“-mut piareersaaneq aallartippaa. Isiginnaartitsissutinngorpoq assit seqersittakkat nalunaaquttap-akunnerinik arfineq-pingasunik sivisussusillit qalipaatillit filmillu aalasunik assiliartallit.

Isiginnaagassiaq immikkoortuni sisamani takutinneqartussiaavoq. Isiginnaartullu pinngortitsineqqaarnermiit inuiaat oqaluttuarisaanerannut, Jesus Kristusip ukiuni tusindini naalakkersuinerata naanerani Guutip nunarsuarmik inunnillu siunertaata naammassineqarnissaa tikillugu isiginnaartinneqarput. Aatsaat ukiorpassuit qaangiummata teknikki tamanna niuernermut tunngasunut atorneqalerpoq. Kisianni „Skabelsens Fotodrama“ inunnut millionilikkuutaanut akeqanngitsumik isiginnaartitsissutigineqarpoq.

Nipilersugassiat immikkut qinikkat nuutinut immiunneqarput, saniatigullu 96-inik oqaluttortalinnik immiussineqarluni. Silamiut oqaluttuarisaanerannut assersuutissatut assilissat eqqumiitsuliat atorlugit assit seqersittakkat stereoskopiskiusut pilersinneqarput, aammattaaq assilissat  nutaat hundredelippassuit qalipallugillu titartarnissaat pisariaqalersimavoq. Assit seqersittakkat aamma filmit ilaat assaannarnik qalipataapput. Tamanna arlaleriarluni suliarineqartariaqarpoq immikkoortunit sisamanit minnerpaamik 20-t illoqarfinni 80-ini immikkoortuisa ilaat ataatsikkut takutitassanngorlugu sananeqarmata.

Isiginnaartitsiviup tunuatungaani

Takutitsinerup ingerlanerani isiginnaartitsiviup tunuani qanoq pisoqartarpa? Alice Hoffman Biibilimik Atuaqqissaartartoq oqarpoq: „Filmi qatanngut Russellimik takutitsisoq aallartittarpoq. Seqertittarfimmut sassarpat qarluilu aalaleraangata oqaluttartoq aallartinneqartarpoq . . . taavalu nipaa nuannaarutigalugu tusarnaarsinnaavarput.“

Filmiliat piffissamik naalisakkat pillugit Zola Hoffman ima oqaluttuarpoq: „Ullut pinngortitsiffiusut takutinneqarmata uissuummivunga, isigitilluta liljat arriitsumik sikkerput.“

Karl F. Klein, nipilersornermik nuannarisalik Jehovallu Nalunaajaasuisa siulersuisoqatigiivinut ilaasortaasoq, ima ilaliivoq: „Assilissat nipilersornermik ajunngeqisumik ingiorneqarput, nalissaqanngitsut soorlu Narcissus Humoreskelu tusarnaarneqarlutik.“

Clayton J. Woodworth inuusuttoq oqaluttuarsimavoq: „Ilaannikkut kukkunerit quianartut pisarput. Ilaanni ’Flee as a Bird to Your Mountain’ (’Timmissatut qaqqannut qimaagit’) oqaluttartukkut appinneqarpoq, seqertittarfimmilu uumasorujussuup assinga erserluni!“

Sivitsunngitsoq aamma „Skabelsens Fotodrama“-p saniatigut ataqatigiit „Heurekadrama“-mik taaneqartut pilersinneqarput. (Ungaluusaq takuuk.) Aappaani oqalugiaatit nipilersugassiallu immiunneqarput, aappaa nipimik immiussat assillu seqersittakkat. Naak „Heurekadrama“ aalasunik assiliartaqanngikkaluartoq avinngarussimasuni inulinni ilassilluarneqaqaaq.

Oqaluussinermi atortorissaarut sunniuteqangaartoq

1914-ip naannginnerani Amerikami Avannarlermi, Europami Australiamilu inuit 9.000.000-nit amerlanerusut „Skabelsens Fotodrama“ takusimavaat. Biibilimik Atuaqqissaartartut ikipput, kisianni nutaarsiassamik nuannersumik oqaluussinermi isiginnaartitsissutip tamatuma atornissaanut qulanngilluinnarnermik amigaateqanngillat. Inersuit isiginnaartitsiviusinnaasut atorneqarnerannik akileeqataasinnaanertik nuannaarutigaat. Taamaammat isiginnaartut amerlasuut Guutip oqaasii siunertaalu „Skabelsens Fotodrama“-kkut ilisarilerpaat.

Ilaata C.T. Russell ima allaffigaa: „Takutitsinerit siullerpaamik takugakku inuuninni allanngorfiuvoq, imaluunniit eqqornerusumik oqaatigalugu Biibilimik ilisarsinera allanngorluinnarpoq.“ Alla allappoq: „Uppinngissutsip marraanut morsulivitsitaagaluarpunga, misigivungalu ’Skabelsens Fotodrama’-mit, aasaq manna isiginnaartitsissutigineqartumit, annaanneqarlunga. . . . Eqqissineq silarsuup matuma neqeroorutigisinnaanngisaa pigaara, taarsiukkumanngilaralu silarsuup pisuussutitaanut tamanut.“

Demetrius Papageorge, sivisuumik Peqatigiiffiup qullersaqarfiani sulisimasoq, oqarpoq: „Biibilimik Atuaqqissaartartut qanoq ikitsiginerat aningaasallu qanoq killeqartigineri eqqarsaatigigaanni ’Skabelsens Fotodrama’ suliaavoq naleqanngitsoq. Guutip anersaava ilumut tunulequtaavoq!“

[Qupp. 8-mi ungalusaq/​assiliartat]

„Heurekadrama“

„Skabelsens Fotodrama“-p isiginnaartitsissutigineqaqqaarneranit qaammatit arfineq-pingasut qaangiuttut Peqatigiiffiup paasilerpaa allamik „Heurekadrama“-mik taaguuserneqartumik pisariaqartitsisoqartoq. „Skabelsens Fotodrama“-p illoqarfissuarni takutinneqaqqattaarnerani, ’Heureka’-mik ataqatigiit illoqarfeeqqani inukitsunilu tusarliussamik tunngaviusumik assingusumik takutitsivigaat. ’Heureka’-mik ataqatigiit ilaat ’qatanngutinut arnanut immikkut ittumik oqaluussinissamut periarfissatut’ oqaatigineqarput. Tassami karsi oqaluttartup nuutaanik kiilunik 14-iinnarnik oqimaassuseqarpoq. Soorunami aamma takutitsinissamut oqaluttartoq nassarneqartariaqarpoq. (wE 15/1 01)