Imarisai

Imarisai

Aqqit illersoruk

Aqqit illersoruk

 Aqqit illersoruk

Angut illussanik kusarnartunik titartaasartoq, pikkorissutsimigut tusaamasaallualersarpoq. Arnaq inuusuttoq atuarfimmi ilisimasaqassutsimigut ilinniarnertuutut pikkorissutut ilisimaneqalersarpoq. Suliaqarneq ajortut allaat tusaamasanngortarput — eqiasuttutut. Biibilip naqissuserpaa tusaamasaalluarnerup pingaaruteqassusia, imatut: „Tusaamasaalluarneq pisuussuterpassuarnit pingaarneruvoq, nuannarisaaneq sølvimit kuultimillu pitsaaneruvoq.“ — Ussatit 22:1.

Arlaleriarluni annikitsualunnik iliuuseqarnikkut tusaamasaallualertoqarsinnaavoq. Ataasiaannarlunili ajortumik iliuuseqaraanni tusaamasaalluarneq annaaneqarsinnaavoq. Assersuutigalugu ataasiaannarluniluunniit kinguaassiuutitigut kanngunartuliornerup tusaamasaalluarneq aserorsinnaavaa. Ussatini Biibilimiittumi kapitalit arferngani kunngi Salomon Israelitoqqameersoq pissutsit, isiginnittaatsit iliuutillu tusaamasaanerlutsitsisinnaasut Jehova Guutimullu attaveqarnitsinnik innarliisinnaasut pillugit mianersoqqusivoq. Ilaatigut taasai makkuupput: Eqqarsaqqaarnani neriorsuinerit, eqiasunneq, peqquserlunneq kanngunartuliornerlu, Guutip qamannga pisumik maajuginerpaasai. Kunngi Salomonip siunnersuutaanut tusarnaarutta atitta tusaamaneqarnittalu illersornissaannut iluaqutigissavarput.

Neriorsuinerit sianiitsorpallattut pinngitsoortikkit.

Ussatini kapitalit arferngat ima aallartippoq: „Ernera, inoqatinnut akiligassarsisumut qularnaveeqqusiisussanngortikkuit akiitsoqarfiillu assaatigut eqillugu uppernarsaaffigeqatigalugu, taamalu neriorsuinikkut imminut aaginnarlutit, oqaaserisakkullu napititaasimallutit inoqatinnillu tiguartissimallutit — taava ernera, imminut annaanniarlutit imaaliorit: Tuaviorlutit angut akiitsoqarfiit orniguk kimigiiserfigalugulu.“ — Ussatit 6:1-3.

Ussatip tamatuma allat niuernerannut akuliuteqqunngilaatigut, ingammik inunnut nalusatsinnut. Israelikkut ’nunaqqatertik ajornartorsiulerpat imminut napatissinnaajunnaarluni’ ikiortussaavaat. (3 Moses 25:35-38) Israelikkulli naviatsaattut ilaat niuvernernut nalorninartunut akuliussimapput allallu aningaasatigut ’qularnaveequtissamissut’ tapersersortigilersimallugit taamaalillutik akiitsuminnut akisussaatilerlugit. Ullumikkut assigusumik pisoqarsinnaavoq. Immaqa aningaasaateqarfiit qularnaveeqqummik, soorlu aningaasaateqarfiup naliliineratut nalorninartoqarpat aningaasanik atukkiitinnatik (atortoq akiliisinnaajunnaarpat sinnerlugu akiliisussamik) qularnaveequtissamik piumasaqaateqartarput. Silatussaarnerussanngilaq eqqarsaqqaarani allat tamatumunnga akuliutitikkaanni. Aningaasatigut „ajornartorsiulersinnaavutit“ aningaasaateqarfimmi  akiligassarsisitsisartunilu tusaamasaanerlulersinnaallutit.

Ajunngissoralugu iliuuseqarsimagaanni kingusinnerusukkulli paasillugu kukkusumik iliorsimalluni ajornartorsiulersimagaanni qanoq iliortoqarsinnaava? Siunnersuutigineqarpoq pingaarniassuseq eqqarsaatigeqqunagu ’angullu akiitsoqarfiit orniguk kimigiiserfigalugulu’. Ajornartorsiut aaqqinniarlugu sapinngisamik iliuuseqartoqartariaqarpoq. Allagarsiivimmi allassimavoq: „Illit akiitsoqarfiillu ajornartorsiut aaqqinniarlugu isumaqatigiinnissarsi tikillugu sapinngisamik iliuuseqarit, iliuuserisimasatit pillugit kingusinnerusukkut ilaquttatit eqqugaannginniassammata“. Tamannalu erngerlugu suliarineqartariaqarpoq. Kunngimi nangippoq: „Sinilitsaaliorit isitillu sequnngitsaaliorlugit imminut aniguisitserlutit oqinninnguatut napitinneqarsimasutut, timmissatut timmiarniap tigummisaatut.“ (Ussatit 6:4, 5) Ajornanngippat sianiilliorluni isumaqatigiissutigisimasap taamaatinnissaa pitsaanerussaaq, taassuminnga „pisaritinnissaminngarnit“.

Uniaaluttut eqiasuitsigigit.

„Eqiasuttutit uumaa, uniaaluk orniguk, eqiasuissusia takuuk ilikkagaqarfigalugulu!“ Kunngi Salomon peqqusivoq. Ilisimassuseq suna uniaaluaqqap inuunerani pissarsiarisinnaagatsigu? Kunngi akivoq: „Siulersorteqanngikkaluarpoq, nakkutilliisoqarnani naalagaqarnaniluunniit, taamaattoq aasami nerisassarsiortarpoq nerisassaminillu ukiussamut eqqanaarsartarluni.“ — Ussatit 6:6-8.

Uniaaluit tupinnaannartumik aaqissuulluagaasumik maluginiarnartumillu suleqatigiillaqqissuupput. Nalugaluarlugu nerisassaminnik peqqumaasisarput. ’Siulersorneqanngikkaluarput, nakkutilliisoqanngikkaluarlutik naalagaqanngikkaluarlutilluunniit.’ Uniaaluit dronningeqaraluarput, manniliortuuinnarporli, tamanullu ningiuuinnarluni. Allanik naalakkersuinngilaq. Siulersuisoqaratik nakkutilliisoqaratilluunniit qasusuillutik suliassatik suliariuartarpaat.

Uniaaluttulli eqiasuitsigisariaqannginnerpugut? Suleruloorluta suliattalu ilungersorluta pitsaanerutinnissaat iluaqutigissavarput, nakkutigineqarutta nakkutigineqanngikkuttaluunniit. Atuarfimmi, suliffitsinni anersaakkullu tunngasunik suleqataagutta, sapinngisatsinnik iliortariaqarpugut. Soorlu uniaaluit eqiasuinnertik iluaqutigigaat, Jehovap kissaatigaa ’suleruloornitta kinguneranik pilluarluta inuunissarput’ (Nalunaajaasup oqaasii 3:13, 22; 5:17) Suleruloorneq ilerasunnginnermik inuttullu nalerisimaarnermik kinguneqartarpoq. — Nalunaajaasup oqaasii 5:11.

Apeqqutit akisariaqanngitsut marluk atorlugit eqiasuttoq eqiasunneranit Salomonip itersarniarpaa: „Qanoq sivisutigisumik innangaannassagavit eqiasuttutit uumaa, qaquguuna sinikkunnaarlutit makinniartutit? Kunngip eqiasuttup oqariaasia ilaariarlugu nangippoq: „Sineqqilaarallassaanga, aanngaalaaginnarlunga, assakka paarlallugit qasuersilaarallassaanga.“ — piitsuussutsip qoqassillutit saassutissavaatit piiaasutut, ajorsarnerullu angutitut sakkulisartutut.“ (Ussatit 6:9-11) Eqiasuttoq innangatilluni tillinniatut ittumit piitsuussutsimit qoqassineqartarpoq, angutitut sakkulisartunit ajorsartunngortinneqarluni. Eqiasuttup narsaataa kapinartunipallattarpoq naasupilunipallattarlunilu. (Ussatit 24:30, 31) Niuernermini ajunaaruteqapallattarpoq. Qanoq sivisutigisumik sulisitsisup naparliinnartoq ilaginnaannassanerpaa? Qanorlu ililluni ilinniartup ilinniakkerinissaminut eqiasuttup ingerlalluarnissani ilimagisinnaavaa?

Unneqqarissuugit

Ileqqoq alla inuiaqatigiit akornanni tusaamasaanerlutsitsilersinnaasoq Guutimullu attaveqarnermik aseruisinnaasoq Kunngi Salomonip nangilluni eqqartorpaa: „Inupiluullunilu pinerluttuliortuuvoq salluliorluni oqaluttartoq, nakutitsiniartartorlu uisorersarluni isikkanilu inussanilu aalatillugit. Taamaaliortup aseruinissaq siunertarisarpaa  pilersaarutipiloqartuartarlunilu. Taamaakkami saqitsaanneq assortuunnerlu pilersittarpai.“ — Ussatit 6:12-14.

Peqquserluttoq taamatut eqqaaneqarpoq. Sallutuup peqquserluutini toqqortorniartarpai. Qanoq iliorluni? ’Salluliuinnarnani’ aammali pissusilersornermigut. Misissueqqissaartartup oqaatigaa: „Salluliorniarluni ussersorneq, nipi, aap allaat kiinnerneq peqqusersuusaartumik atorneqartarput. Unneqqarittuusaaraanni tunuaniippoq ileqqupiloqalersimasarneq saqitsaasigajussisimasarnerlu.“ Inuk taama ittoq pilersaarutipiloqartuaannarpoq saqitsaasiniartuaannarlunilu. Qanoq ingerlassava?

Israelip kunngia akivoq: „Taamaattumik tassanngaannaq ajunaartussaavoq sequmisitaassallunilu katsorsarneqarsinnaanani.“ (Ussatit 6:15) Sallutooq paasisaaguni ingerlaannaq tusaamasaanerlulertarpoq. Kiap tatigileqqissinnaavaa? Naggataatigut ajorluinnassaaq, ’sallutuut’ tamarmik naassaanngitsumik toqumik pillagaasussanut ilanngullugit eqqartorneqarami ilagalugit eqqartuiffigineqareersimagami. (sarĸúmersitat 21:8) Pissutissaqarluarpugut ’tamatigut assuarnaatsumik iliussalluta’. — Eprîarit 13:18.

Jehovap uumigisai uumigitigit

Ajortut uumigigaanni tusaamanerlugaanitsinnut ajoqutaalersinnaappat iliuuseqanngitsoortissavaatigut. Ajortut tamaasa uumiginissaat ilinniartariaqannginnerparput? Sorpiaalliuku uumigisariaqarivut. Kunngi Salomon akivoq: „Arfiniliusut [Jehovap] uumigai, arfineq-marluusut qinngarsugarai: Isit makitarpaluttut, oqaq sallutooq, assaat pinngitsup aavanik kuisisut, uummat pilersaarutipiloqartoq, isikkat tuaviinnaq ajortup tungaanut ingerlaniartut, sallullutik nalunaajaasut qatanngutigiinnillu saqitsaatilersitsisut.“ — Ussatit 6:16-19.

Pissuserineqartartut arfineq-marluk ussatini eqqartorneqartut tunngaviupput ajortullu tamarluinnaasa matungajallugit. ’Isit makitasut’ aamma ’uummat pilersaarutipilulik’ eqqarsaatitsinni ajortuliaraavut. ’Oqaq sallutooq’ aammalu ’sallulluni nalunaajaanerit’ oqalunnikkut ajortuliaapput. ’Assaat pinngitsup aavanik kuisisut isikkallu tuaviinnaq ajortup tungaanut ingerlasut’ suliaapput ajortut. Jehovallu uumiginerpaavai allat akornanni eqqissillutik inooqatigiissinnaagaluartunik saqitsaatilersitsinerminnik nuannarisaqartut. Arfinilinnit arfineq-marlunngornerannut amerliarluinnarnerannut takussutissaavoq tulleriiaarinerit suli naammassineqanngitsut inuit ajortuliornerminnik amerliartortitsiuarnerannut.

Jehovap uumigisaasa uumiginissaat ilinniartariaqarpoq. „Isit makitarpaluttut“makitanermullu ersiutaasut allat tamaasa pinngitsoorniartariaqarpavut. Oqaatsit mamarliinerit aserorsaataasut ’qatanngutigiit’ akornanni ’saqitsaatilersitsisinnaasut’ ingalassimaniartariaqarpavut. Tusakkanik siaruarterineq asannittuliornerunngilaq isornartorsiuinerit pisariaqanngitsut salluliuutilluunniit atorlugit immaqa ’pinngitsut aavannik kuisinerunngitsut,’ kisianni allat ajunngitsumik isumaqarfigineqarnerat ajoquserluinnarsinnaavarput.

Arnap pinnissusia pileritsaatissanngilat’

Kunngi Salomonip siunnersuutimi tullii ima oqaatigai: „Ernera, ataatavit inassutai maleruarniakkit anaanannillu ilinniakkatit asiginnarnagit! Uummatinnut qilerusimatittuakkit qungatsinnilu ujamigiuarlugit. Ingerlagaangavit tasissersuuttassavaatsit, innangagaangavillu sernissussavaatsit, iteraangavillu oqaluffigisassavaatsit.“ — Ussatit 6:20-22.

Ilumoorpa Biibili naapertorlugu perorsaanerup kanngunartuliornerup napiniaataanit illersorsinnaagaatigut? Aap, taamaassinnaavoq. Kunngip Salomonip uppernarsaavoq: „Inassutimmi naneruaapput ajoqersuutillu qaammaqqutaallutik, avoqqaarineqarneq anusinngorsagaanerlu inuunermut aqqutaapput. Pitsaaliussavaatsit arnamut  ajortumut, arnap allasiorniartup oqaanut piutsersumut.“ (Ussatit 6:23, 24) Unnersuussutit Guutip oqaasianeersut eqqaamallugillu atorukkit ’naneruaralugit isikkannut, qaammaqqutigalugillu aqqutinni’ taava arnap angutilluunniit kanngunartuliorniartup neqeroorutaata akiornissaanut iluaqutigisinnaavatit. — Tussiaat 119:105.

Kunngi Salomonip silatuup oqaaqqissaarpaatigut: „Arnap pinnissusianit pileritsatsinneqarnaveerit, isaanit ussassaarisunit nakutinneqarnaveerit!“ Sooq? „arnaq atortittartoq iffiamik akilerlugu pisinnaavat, kisianni arnap allasiorniartup inuunerit eriaginartoq navianartorsiortissavaa.“ — Ussatit 6:25, 26.

Uani kunngip Salomonip arnaq (nuliaasoq) allasiorniartoq atortittartutut eqqaavaa? Immaqa. Aamma imaassinnaavoq atortittartumut kanngunartulionerup angutillu allap nulianik allasiornerup kingunerisinnaasai immikkoortikkai. Atortittartumik kanngunartuliorfiginnissimasup pigisani atulussinnarsinnaavai piitsunngorlunilu. Aammalu annernartumik nappaammillu tunillaattartumik innarluutigilersinnaasaminik, soorlu aids-mik eqqorneqarsinnaavoq. Mosesip inatsisaata nalaani angutip allap nulianik kanngunartuliorfiginnittoq suli navianartorsiornerungaarpoq nuliaasup allasiortup allasiorfigisami ’inuunera naleqangaartoq’ navianartorsiortimmagu. „Uani pineqaannanngilaq inuunerlunnerup kingunerisaanik inuuneq sivikinnerusoq,“ tusagassiivik allappoq. „Ajortuliortoq toqutassanngortarpoq.“ (3 Moses 20:10; 5 Moses 22:22) Arnaq taamaattoq pileritsaatassaanngilaq qanorluunniit isikkorilluni pinnertigigaluarpat.

’Aamaq saarmiuliunneqassanngilaq’

Allasiornerup navianaatai erseqqissarniarlugit kunngi Salomon aperaaq: „Kina aamanik saarmioqarsinnaava atisani ikuallatsinngitsoorlugit? Kialuunniillu aamat tullaarisinnaanerpai isikkani uutinngitsoorlugit?“ Taavalu assersuusiani nassuiarpaa: „Taamatut ajunaartinneqassaaq inoqammi nulianik atuisoq.“ (Ussatit 6:27-29) Ajortuliortoq taamaattoq pillarneqangaassaaq.

„Tillittoq asissugaanngitsoortarnerpa naak nererusuersaatissaannarminik tillikkaluarluni?“ kunngi Salomon nangippoq. „Qaninngarneqarluni tiguneqaraangami arfineq-marloriaammik taarsiisariaqartarpoq illuminilu pigisani tamaasa tunniuttariaqartarlugit.“ (Ussatit 6:30, 31) Israelitoqqami inatsiseqarpoq tillinniaq taarsiissasoq pigisaanik tamanik naleqassagaluarpalluunniit. * Allasiorsimasoq taamaaliornerminut patsisissaqanngimmat, pillarneqarnissaa pissutissaqangaarneruvoq.

„Isumaatsutut iliorpoq allap nulianik atuisoq,“ kunngi Salomon aalajangersimasumik oqarpoq. Angullu isumaatsoq siuneqassuseqanngitsoq, „imminut aseruutissiuinnarpoq.“ (Ussatit 6:32) Immaqa qallikkut ataqqinarpalukkaluarpoq, ilumigulli misigittaatsuuvoq inerissimananilu.

Allasiortoq suli allanik katersugassaqartarpoq. „Taamaaliornini kanngunarsaatigiinnarlugulu ajoqutissarsiffigiinnassavaa; kanngunarsagaaneralu puigorneqanngisaannassaaq, tassa uiusoq sangiannerata kamangaartilersarmagu ullormi akiniaaffimmini qajassuussiunnaartillugu. Saammarsaatitut akiliutiginiakkat soqutaatinngilai, qanorsuarluunniit tunissuteqarfiginiaraluarunni tamakku tigujumanavianngilai.“ — Ussatit 6:33-35.

Tillinniap tillitani taarsersinnaavai, allasiortorli ajortuliaminut qanorluunniit taarsiisinnaanngilaq. Ueq kamattoq sumik neqeroorfigisinnaavaa? Qanorluunniit isumakkeerfigeqqulluni qinnuigigaluarpani uiusup allasiortoq naakkigilernavianngilaa. Qanorluunniit ilioraluaruni allasiortup ajortuliani taarsersinnaanngilaa. Aterminik kanngunarsaallunilu narrunarsaanini attatariualissavai. Utertinneqaatissaq akilersinnaanngilaa allatigulluunniit akiliilluni pillarneqanngitsoorsinnaanani.

Allasiornerup iliuutsillu allat isiginnittaatsilluunniit atermut Guutimullu mitalliutaasut ingalassimanissaat silatusaarnerussaaq. Mianersortariaqarpugut sianiitsorpallattunik isumaqatigiisusiunnginnissatsinnut. Eqiasuinneq ilumoornerlu tusaamaneqaatigisariaqarpavut. Guutip uumigisaasa uumiginissaat ilungersuutigisariaqarparput, taassumunnga inoqatitsinnillu ajunngitsumik tusaamaneqaatissatsinnik. (wE 15/9 2000)

[Quppernerup ataani ilanngussaq]

^ imm. 28 Mosesip inatsisai naapertorlugit tillinniaq marloriaammik, sisamariaammik, tallimariaammilluunniit tillitaminut taarsiisussaatitaavoq. (2 Moses 22:1-4) Oqaaseq „arfineq-marloriaammik“ atorneqartarunarpoq paasitinniarlugu tillinniap tillitani tamakkerlugu taarsissagaa, tillitami naliga sinnerujussuarsinnaallugu.

[Qupp. 25-mi assiliartaq]

Atukkanut ’qularnaaveeqqusiinissat’ mianersuutigiuk

[Qupp. 26-mi assiliartaq]

Uniaaluttut eqiasuitsuugit

[Qupp. 27-mi assiliartaq]

Oqaatissuaatit nikanarsaataasut mianersorfigikkit