Imarisai

Imarisai

Sivisuumik ujaasineq kinguneqarluartoq

Sivisuumik ujaasineq kinguneqarluartoq

 Sivisuumik ujaasineq kinguneqarluartoq

„JEHOVA? Jehova kinaagami?“ Silvia arfineq-pingasunik ukioqarpoq niviarsiaqqap allap ateq taanna ilaquttami Biibiliutitoqaanni Ameniamiusuuni takutikkamiuk. Tamatuma kingornatigut Silviap kikkut tamaasa aperisarpai Jehova pillugu oqaluttuussinnaaneraanni, Armeniamili Jerevanimi najugaqarfigisamini najugallit — angajoqqaavisa, ilinniartitsisuisa illoqarfiulluunniit palasiisa oqaluttuusinnaasimanngilaat.

Silvia peroriartorpoq, atuarnini naammassivaa suliffittaarlunilu, sulili Jehova kinaanersoq paasinagu. Inersimasunngorami Armeniamit qimaasariaqarsimavoq. Kingusinnerusukkut Polenimut pivoq, tassanilu ineeqqami qimaasut allat ineqatigalugit. Ineqatimi ilaat akuttoqatigiimmik pulaarneqartarpoq. „Kikkunuku pulaartaraatsit?“ Silvia aperivoq. „Jehovap Nalunaajaasuisa, taakkua Biibilimik ajoqersorpaannga,“ aperisaa akivoq.

Ateq Jehova tusaramiuk Silvia nuannaajallattorujussuuvoq. Kiisami Jehova pillugu Guutitullu asannittutut qanoq ittuunera ilinniarsinnaalerpaa. Ajoraluartumilli sivitsunngitsoq Polen qimattariaqalerpaa, Østersøillu illuatungerluinnaanut Danmarkimut qimaasutut nunasinissaminik qinnuteqarluni. Pigisami ilamininngui kisiisa nassarpai, ilaatigut atuagassiat Biibililersaarutit Jehovap Nalunaajaasuinik pisimasani. Taakkunani quppernerni kingullerni Napasuliaq Alapernaarsuiffiup immikkoortortaqarfiisa najugaqarfii allattorsimapput. Taakku pigisami, Jehovamut pituutani, erliginerpaasami ilagaat.

Danmarkimi Silvia qimaasut ineqarfiani ineqalerpoq, ingerlaannarlu Jehovap Nalunaajaasui ujalerlugit. Nalunngilaa angerlarsimaffiit allattorsimaffianni Napasuliaq Alapernaarsuiffiup immikkoortortaqarfiat Holbækimiittoq. Holbækili sumiippa? Silvia qimuitsuitsorluni ineqarfimmut allamut nuunneqarpoq, ingerlatillutik Holbæk aqqusaarpaat. Appassaanik nuannaajallaqaaq.

Sivitsunngitsoq seqinnarissuugaa Silvia qimutsuitsunik ilaalluni Holbækimut uterpoq, niugami immikkoortortaqarfiup tungaanut pisorusaalerpoq. Eqqaamavaa naatsiivimmut iserami issiavimmullu ingilluni imminnut oqarfigaluni: „Tassa Paratiisi.“ Immikkoortortaqarfimmi tikilluaqqusaangaarpoq kiisamilu nammineq Biibilimik atuqqissaaqatigineqarsinnaanngorluni.

Arlaleriarlunili nuutinneqartarpoq. Tamatigut qimaasut ineqarfianut nutaamut pigaangami Jehovap Nalunaajaasui ujartarpai Biibilimillu atuaqqisaaqatigineqarnini nangeqqittarlugu. Taamaattorli ukiut marluk qaangiummata, ilikkarsimasani pissutigalugit Jehovamut tunniulluinnarsinnaalerpoq. Kuisippoq kinguninngualu piffissaq tamaat oqaluussisartutut aallartilluni. 1998-imi qallunaat oqartussaasuisa politikki tunngavigalugu qimaasutut akueraat.

Maanna Silvia 27-nik ukioqarpoq Paratiisimullu eqqaanartitamini sulilluni, Jehovap Nalunaajaasuisa immikkoortortaqarfiani Danmarkimiittumi. „Sumik allamik kissaateqarsinnaavunga?“ aperaaq. „Niviarsiaraallungali Jehova ujalerpara, maanna nassaaraara. Kissaatigisimavara inuunera tassunga atorniarlugu, maannalu Betelimiippunga. Qinnutigaara ukiorparujussuarni manna angerlarsimaffigiumaarlugu.“ (wE 1/9 2000)